1, 2. Чаԝа Кʹьтеба Пироз дьдә кʹьфше кӧ һʹьзкьрьн фәрз ә?

 ҺʹЬЗКЬРЬН һʹӧнӧре Йаһоԝайи сәрәкә йә (1 Йуһʹәнна 4:16). Әʹфьрине ԝийи пешийе Иса Мәсиһ, бь милйарда сала тʹәви Баве хԝә ль әʹзмана бу, у дьдит кӧ Йаһоԝа Хԝәде чьԛас бь һʹьзкьрьн ә (Колоси 1:15). Иса жи һʹьзкьрьна ӧса дьда кʹьфше тʹәмамийа жийина хԝәда, ча ль әʹзмана ӧса жи сәр әʹрде. Демәк, әм дькарьн баԝәр бьн кӧ Йаһоԝа у Иса ԝе тʹьме бь һʹьзкьрьн сәрԝертийе бькьн.

² Чахе кәсәки жь Иса пьрси кӧ кʹижан тʹәми йә лапә гьринг, Иса гот: «‹Хӧдан Хԝәдейе хԝә һʹьз бькә бь тʹәмамийа дьле хԝә, бь тʹәмамийа щанийа хԝә у бь тʹәмамийа һʹьше хԝә›. Әв ә тʹәмийа пешьн у һәрә мәзьн. У йа дӧда жи мина ве йә: ‹Һәвале хԝә ԝәкә хԝә һʹьз бькә›» (Мәтта 22:37-39).

3. Кʹи йе «һәвале» мә?

³ Гәләк фәрз ә һʹәму һәләԛәтийада һʹьзкьрьне бьдьнә кʹьфше. Иса гот кӧ әм гәрәке Йаһоԝа у ӧса жи һәвале хԝә  һʹьз бькьн. Ле кʹи йе «һәвале» мә? Һәрге әм зәԝащеда ньн, һәвале мәйи незик әԝ һәйә һәвалзәԝаще мә. Хушк-бьред мәйи щьватеда жи һәвалед мә нә, у ӧса жи әԝ мәрьв кʹерʹа әм мьзгине бәла дькьн. Әме жь ве тʹемайе пебьһʹәсьн, кӧ әм ча дькарьн һәвале хԝәрʹа һʹьзкьрьна хԝә бьдьнә кʹьфше.

4. Рʹаст ә әм гӧнәкʹар ьн, ле ча зәԝаща мә дькарә бәхтәԝар бә?

⁴ Йаһоԝа Адәм у Һеԝа әʹфьрандьн у әԝана кьрьнә йәк. У әв зәԝаща ԝан йа пешьн бу. Йаһоԝа дьхԝәст кӧ әԝана зәԝащеда бәхтәԝар бьн, һәв зедә бьн у ль сәр дьнйайе тʹьжә бьн (Дәстпебун 1:27, 28). Ле чахе ԝана гӧрʹа Хԝәде нәкьр, зәԝаща ԝана зийане кʹәт, у ӧса гӧнә у мьрьн дәрбази сәр мә һʹәмуйа бу (Рʹомайи 5:12). Ле йәкә зәԝащ иро дькарә бәхтәԝар бә. Чаԝа Әʹфьрандаре зәԝаще, Йаһоԝа дь Кʹьтеба Пирозда ширәтед лапи баш дайә мер у жьна. (Бьхунә 2 Тимотʹейо 3:16, 17.)

5. Чьԛас фәрз ә һʹьзкьрьн зәԝащеда?

⁵ Кʹьтеба Пироз дьбежә кӧ бона зәԝащ бәхтәԝар бә, гәләк фәрз ә һʹьзкьрьна гәрм у назьк. Паԝлосе шанди дәрһәԛа һʹьзкьрьна рʹаст шьровәкьр: «Һʹьзкьрьн думькдьреж у ширьн ә, һʹьзкьрьн һʹәвсудийе накә, һʹьзкьрьн кʹӧбар набә, пʹьшька хԝәда наԝәрьмә, бепʹәргал нинә, йа хԝә нагәрʹә, зу һерс накʹәвә, кʹине нажо, дьле хԝә ль нәһәԛийе ша накә, ле рʹастийерʹа ша дьбә. Һʹьзкьрьн һәр гав дадьхә, һәр гав баԝәр дькә, һәр гав хԝәйигӧман ә, һәр гав сәбьр дькә. Һʹьзкьрьн тʹӧ щар кʹӧта набә» (1 Корьнтʹи 13:4-8). Чахе әм сәр гьлийед Паԝлос дьфькьрьн у дьдьн хәбате, зәԝаща мә ԝе бәхтәԝар бә.

6, 7. а) Кʹьтеба Пироз чь дьбежә дәрһәԛа сәре малбәте? б) Мәсиһийе кӧ малхе йә гәрәке ча бә һьндава жьна хԝә?

⁶ Йаһоԝа сафи кьрийә кӧ кʹе гәрәке сәре малбәте бә. Паԝлос шьровәкьр: «Әз дьхԝазьм кӧ һун заньбьн ԝәки сәре һәр мери Мәсиһ ә, сәре жьне мер ә у сәре Мәсиһ Хԝәде йә» (1 Корьнтʹи 11:3). Йаһоԝа дьхԝазә ԝәки сәре малбәте бь һʹьзкьрьн бә у тʹӧ щар сәрт нибә. Йаһоԝа хԝәха Сәре ԛәнщ ә у әԝ хԝәһʹьз нинә. Ләма Иса ԛәдьре сәрԝертийа Хԝәдейә бь һʹьзкьрьн дьгьрт. Әԝи гот: «Әз Баве һʹьз дькьм» (Йуһʹәнна 14:31). Иса ԝе Йаһоԝа ӧса һʹьз нәкьра, һәрге Йаһоԝа һьндава ԝида баш нибуйа.

⁷ Рʹаст ә мер сәре жьне йә, ле Кʹьтеба Пироз дьбежә кӧ мер гәрәке ԛәдьре жьне бьгьрә (1 Пәтрус 3:7). Мер ча дькарә әве йәке бькә? Әԝ гәрәке дина хԝә бьдә сәр һʹәԝще жьна хԝә у готьна ԝе һьлдә һʹәсаб. Кʹьтеба Пироз дьбежә: «Мерно, жьнед хԝә һʹьз бькьн, чаԝа кӧ Мәсиһ щьвин һʹьз кьр у жийина хԝә бәр ԝева да» (Әфәси 5:25). Чахе мер мина Иса ча сәри бь һʹьзкьрьн ә, һьнге жьнерʹа һеса йә кӧ ԛәдьре ԝи у сафикьрьна ԝи бьгьрә. (Бьхунә Тито 2:3-5.)

8. Әм гәрәке чаԝа бьн һьндава хушк у бьред хԝә?

⁸ Иро, нав тʹәмамийа дьнйайе бь милйона мәрьв Йаһоԝарʹа хьзмәт дькьн. Әԝана хушк у бьред мә нә. Ле гәло әм гәрәке һьндава ԝан чаԝа бьн? Кʹьтеба Пироз дьбежә: «Һʹәмуйарʹа ԛәнщийе бькьн, илаһи нәфәред мала Хԝәдерʹа». (Галати 6:10; бьхунә Рʹомайи 12:10.) Пәтрусе шанди ньвиси кӧ һәрге әм «гӧһдарийа рʹастийе» дькьн, һʹьзкьрьна мә гәрәке «һьндава хушк-бьрада» һәбә. Пәтрус Мәсиһийарʹа ӧса жи гот: «Бәри  һәр тьшти, һʹьзкьрьна ԝә һьндава һәвда бь дьл у щан бә» (1 Пәтрус 1:22; 4:8).

9, 10. Чьрʹа щьмәʹта Хԝәде йәктийеда ньн?

⁹ Тʹәшкиләта мәйә һʹәмдьнйайе тʹәк у щӧдә йә. Ле чьрʹа? Чьмки һʹьзкьрьна мәйә рʹаст у мәзьн һәйә һьндава хушк у бьред мә. У һьн жи, әм Йаһоԝа һʹьз дькьн у гӧрʹа ԛанунед ԝи дькьн, ләма жи Йаһоԝа бь ԛәԝата хԝәйә гьринг, демәк рʹӧһʹе пироз али мә дькә. Бь сайа рʹӧһʹе Хԝәдейи пироз бьратийа мәйә һʹәмдьнйайе йәктийеда нә. (Бьхунә 1 Йуһʹәнна 4:20, 21.)

¹⁰ Паԝлос гот кӧ гәрәке һʹьзкьрьн һәбә нава Мәсиһийада. Әԝи гьлийед ӧса гот: «Дьлшәԝатийе, ԛәнщийе, мьлуктийе, бәрбьһерийе у сәбьре ль хԝә ԝәргьрьн. Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә. Чаԝа Хӧдан бахшандә ԝә, һун жи ӧса бьбахшиньнә һәв. У сәр ван һʹәмуйада һʹьзкьрьне ль хԝә кьн, йа кӧ ван һʹәмуйа бь йәктийа тʹам һәвва гьредьдә» (Колоси 3:12-14). Әм чьԛас рʹази нә кӧ нав мәда һәйә һʹьзкьрьн, демәк «йәктийа тʹам» кӧ «һәвва гьредьдә»!

11. Тʹәшкиләта Хԝәде бь чь әʹйан ә?

¹¹ Һʹьзкьрьна рʹаст у йәктийа хьзмәткʹаред Йаһоԝа, дьдә кʹьфше кӧ религийа ԝан йа рʹаст ә. Иса гот: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹәнна 13:34, 35). У Йуһʹәннайе шанди ньвиси: «Зарʹед Хԝәде у зарʹед Мирещьн бь ве йәке жь һәв тенә фьрԛикьрьне: Әԝе кӧ рʹастийе накә, әԝ нә жь Хԝәде йә у ӧса жи әԝе кӧ бьре хԝә һʹьз накә. Әв ә әԝ готьн, йа кӧ ԝә бәре пешда бьһистийә: Гәрәке әм һәвдӧ һʹьз бькьн» (1 Йуһʹәнна 3:10, 11). Һʹьзкьрьн у йәктийа нава Шәʹдед Йаһоԝада ԝана әʹйан дькьн ча пәйчуйед Исайи рʹаст, демәк әԝ щьмәʹт  кʹижан кӧ Хԝәде дьдә хәбате, сәва кӧ мьзгина дәрһәԛа Пʹадшатийе бәла бә сәр тʹәмамийа дьнйайе (Мәтта 24:14).

12, 13. Иро әʹлаләта мәзьн чь дькә, у ахьрийеда ԝе чь кʹаре бьстинә?

¹² Һʹәчʹи зәʹф жь хьзмәткʹаред Йаһоԝа дькʹәвнә нава әʹлаләта мәзьн, кʹижан кӧ жь щурʹә-щурʹә ԝәлата у щийа нә. Әԝана пьштгьрийа Пʹадшатийа Хԝәде дькьн. Әԝана «әԝ ьн, йед кӧ жь ԝе тәнгасийа мәзьн һатьнә, чӧхед хԝә пе хуна ԝи Бәрхи шуштьнә, чил ԛәрԛаш кьрьнә», у баԝәрийа хԝә ԛӧрбана Иса тиньн. Әԝед кӧ дькʹәвьнә нава әʹлаләта мәзьн Йаһоԝа у Иса һʹьз дькьн, у әԝана «шәв у рʹо» Йаһоԝарʹа хьзмәт дькьн (Әʹйанти 7:9, 14, 15).

¹³ Зутьрәке тәнгасийа мәзьнда Йаһоԝа ԝе әве дьнйа зӧлм у хьраб кʹӧта кә. (Мәтта 24:21; бьхунә Йерәмйа 25:32, 33.) Ле щьмәʹта хԝә Йаһоԝа ԝе хԝәй кә у дәрбази дьнйа тʹәзә кә, чьмки ԝана һʹьз дькә. Чаԝа кӧ әԝи ԝәкә 2 000 сал пешда соз да, әԝ «жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук». Ле тӧ һивийа ԝи ԝәʹдә йи кӧ щьнәтеда бьжийи, кʹидәре кӧ зӧлми, чәтьнайи, у мьрьн ида ԝе тʹӧнә бьн? (Әʹйанти 21:4).

14. Әʹлаләта мәзьн чьԛас мәзьн дьбә?

¹⁴ Жь дәстпебуна рʹожед пашьн сала 1914-да тʹәне чәнд һʹәзар хьзмәткʹаред Хԝәде һәбун. Кʹома бьчʹук йа хушкбьред рʹункьри жь һʹьзкьрьна һьндава мәрьва һелан бун, у ӧса жи рʹӧһʹе Хԝәдейи пироз али ԝан кьр, кӧ ԝана мьзгина дәрһәԛа Пʹадшатийе бәла дькьрьн у нәньһерʹин сәр чәтьнайа. Ле әԝе йәке чь кʹар ани? Иро әʹлаләтәкә мәзьн, гӧмана кʹижани жийина һʹәта-һʹәтайе сәр әʹрде йә, те тʹопкьрьне. Сәр тʹәмамийа дьнйайе ԝәкә 8 000 000 Шәʹдед Йаһоԝа дь 115 400 щьватада зедәтьр һәнә, у әв һәжмар чьԛас дьчә зедә дьбьн. Мәсәлә 275 500 зедәтьр мәрьв сала 2014-да һатьнә ньхӧмандьне у бунә Шәʹдед Йаһоԝа. Әԝ те һʹәсабе кӧ һәр һʹәфти ԝәкә 5 300 мәрьв һатьнә ньхӧмандьне.

15. Иро мәрьв ча дәрһәԛа мьзгине педьһʹәсьн?

¹⁵ Гәләк әʹщебмайи йә кӧ чьԛас мәрьв пеһʹәсийан дәрһәԛа мьзгина Пʹадшатийе. Иро әʹдәбйәтед мә сәр 700 зьмана зедәтьр һәнә. Сәр дьнйайе журнала «Бьрща Ԛәрәԝьлийе» йа лапә бәлабуйи йә. Әԝ журнал һәр мәһ 52 000 000 һʹәви зедәтьр те нәшьркьрьне сәр 247 зьмана. У кʹьтеба бона һинбуне «Чь Һин Дькә Кʹьтеба Пироз?» һатийә ԝәлгәрʹандьне сәр 250 зьмана зедәтьр. У әԝ кʹьтеб 200 000 000 һʹәви зедәтьр һатийә нәшьркьрьне.

16. Чьма тʹәшкиләта Хԝәде һе мәзьн дьбә?

¹⁶ Тʹәшкиләта мә һе мәзьн дьбә, чьмки әм Хԝәде баԝәр дькьн у баԝәр ьн кӧ Кʹьтеба Пироз Хәбәра ԝи йә (1 Тʹесалоники 2:13). Рʹаст ә Шәйтʹан пәй мә дькʹәвә у мә нәфрʹәт дькә, ле Йаһоԝа мә кʹәрәм дькә! (2 Корьнтʹи 4:4).

17, 18. Йаһоԝа дьхԝазә әм ча бьн һьндава ԝан мәрьва йед кӧ ԝирʹа хьзмәт накьн?

¹⁷ Ньһерʹандьна мәрьва щурʹә-щурʹә нә сәр мьзгина кӧ әм бәла дькьн. Һьнәк мәрьв гӧһ дьдьнә мә, ле һьнәк жи мьзгина мә нәфрʹәт дькьн. Ле Йаһоԝа дьхԝазә әм ча бьн һьндава ԝан мәрьва йед кӧ ԝирʹа хьзмәт накьн? Фьрԛи тʹӧнә мәрьв ча дьньһерʹьн сәр мьзгина мә, йәкә әм пәй тʹәмийа Кʹьтеба Пироз дьчьн. Әв дьбежә: «Бьра хәбәрдана ԝә мәʹрифәти у хԝекьри бә у бьзаньбьн кӧ чаԝа щайиз ә  щаба һәр кәси бьдьн» (Колоси 4:6). Чахе әм баԝәрийа хԝә хԝәй дькьн, әм дьхԝазьн әԝе йәке бь ԛәдьр у мьлуктийе бькьн, чьмки әм һәвале хԝә һʹьз дькьн (1 Пәтрус 3:15).

¹⁸ Һәла һе чахе мәрьв сәр мә һерс дькʹәвьн у мьзгина мә ԛәбул накьн жи, әм дьдьнә кʹьфше кӧ һәвале хԝә һʹьз дькьн у чʹәʹв дьдьнә Иса. Чахе Иса «дьһатә рʹәзилкьрьне, жь бәрва кәс рʹәзил нәдькьр, гава щәфа дькʹьшанд, гәф ль кәсәки нәдьхԝар». Ле Иса һʹәму тьшт һивийа Хԝәдева дьһишт (1 Пәтрус 2:23). Әм гәрәке тʹьме мьлуктийе бьдьнә кʹьфше, у әве ширәте бьдьнә хәбате: «Жь бәр хьрабийева хьрабийе нәкьн, йан жь бәр беһӧрмәткьрьнева беһӧрмәткьрьне, ле жь бәр ванва дӧа-дьрозга ль ԝан бькьн» (1 Пәтрус 3:8, 9).

19. Әм гәрәке чаԝа бьн һьндава дьжмьна?

¹⁹ Мьлукти али мә дькә кӧ гӧрʹа тʹәмийа Иса бькьн. Әԝи гот: «Ԝә бьһистийә кӧ һатийә готьне: ‹Һәвале хԝә һʹьз бькә у бьжәнә дьжмьне хԝә›. Ле әз ԝәрʹа дьбежьм, дьжмьнед хԝә һʹьз бькьн у бона ԝан дӧа бькьн, йед кӧ ԝә дьзериньн, ԝәки һун бьбьнә зарʹед Баве хԝәйи Әʹзмана. Чьмки әԝ тәʹва хԝә дәрдьхә һьн сәр ԛәнща, һьн жи сәр хьраба у баране дьбаринә һьн сәр рʹаста, һьн жи сәр нәрʹаста» (Мәтта 5:43-45). Чьмки әм хьзмәткʹаред Йаһоԝа нә, әм гәрәке дьжмьнед хԝә һʹьз бькьн у фьрԛи тʹӧнә әԝ һьндава мә чаньн.

20. Әм жь кʹӧ заньн кӧ һʹьзкьрьна һьндава Йаһоԝа у һәвала, ԝе сәр тʹәмамийа дьнйайе тʹьжә бә? (Бьньһерʹә шькьле әʹԝльн.)

²⁰ Әм һәргав гәрәке һʹьзкьрьна хԝә һьндава Йаһоԝа у һәвала нишан кьн. Һәрге жи мәрьв мьԛабьли мә у мьзгина мә дәртен, әм йәкә али ԝан дькьн чахе әԝана һʹәԝщә нә. Паԝлосе шанди ньвиси: «Тʹӧ тьштида дәйндаре тʹӧ кәси нәминьн, пештьри ль һәв һʹьзкьрьне, чьмки кʹи кӧ һәвале хԝә һʹьз дькә, тʹәмамийа Ԛануне дьԛәдинә. Әв тʹәмийед кӧ һәнә: ‹Зьнийе нәкә, нәкӧжә, нәдьзә, дьлһавьжийе нәкә› у һәр чь тʹәмийед кӧ һәнә, дькʹәвьнә нава ве готьне: ‹Һәвале хԝә ԝәкә хԝә һʹьз бькә›. Һʹьзкьрьн хьрабийе ль һәвале хԝә накә. Аԝа һʹьзкьрьн сәре Ԛануне дьгьрә» (Рʹомайи 13:8-10). Дь ве дьнйайеда кʹижан кӧ зӧлм, хьраб, беһʹьзкьрьн у бьн һʹӧкӧме Шәйтʹанда йә, хьзмәткʹаред Хԝәде һьндава һәвала һʹьзкьрьна рʹаст дьдьнә кʹьфше (1 Йуһʹәнна 5:19). Паши ве йәкә чахе Йаһоԝа ԝе Шәйтʹан тʹәви щьнед ԝи у дьнйа хьраб ԛьрʹ кә, һʹьзкьрьн ԝе сәр тʹәмамийа дьнйайе тʹьжә бә. Әме чьԛас кʹәрәма бьстиньн, чахе гьшк сәр тʹәмамийа дьнйайе Йаһоԝа у һәвала һʹьз бькьн!