ПЕШИЙА кӧ Мәсиһе создайи бьһата, гәло Йаһоԝа али мәрьва дькьр, кӧ бькарьбуна Мәсиһ нас кьрана? Бәле. Әм ньһа бьньһерʹьн кʹа Хԝәде сәва ве йәке чь кьрийә. Паши ньвисандьна Ньвисаред Ибрани, ԝәкә 400 сал дәрбаз бун, ль бакӧре һәрема Щәлиле, шәһәре Ньсрәтеда ԛизәкә щаһьл дьжит, наве ԝе Мәрйәм бу у әԝ бькʹьр бу. Меванәки нәнас һатә бал Мәрйәме. Әв мәләк бу бь наве Щьбрайил, әԝи готә Мәрйәме, ԝәки әԝе бь рʹӧһʹе пироз, демәк пе ԛәԝата Хԝәде кӧрʹәки бинә. Әв кӧрʹ, ԝе бьбә Пʹадшайе создайи у һʹәта-һʹәтайе сәрԝертийе бькә. Әԝ ԝе Кӧрʹе Хԝәде бә. Хԝәде ԝе әʹмьре ԝи жь әʹзмана дәрбази зьке Мәрйәме кә.

Мәрйәме әв йәк һʹәсаб кьр ча ԛәдьрәки мәзьн сәва хԝә. Хԝәде мәләк шандә щәм дәргистийе ԝе Усьве нәщар, ԝәки ԝирʹа шьровәкә кӧ чьрʹа Мәрйәм һʹәмлә дәркʹәт. Паши ве йәке әԝана зәԝьщин. Ле гәло ча әв пʹехәмбәрти, кӧ Мәсиһ ԝе Бәйтләһʹмеда бе буйине, һатә сери? (Миха 5:2) Нә әв шәһәре бьчʹук, ԝәкә 150 километьр дури Ньсрәте бу!

Сәрԝере Рʹоме фәрман да, ԝәки дәстпекьн һʹәсабкьрьна мәрийа бькьн. Һәр кәс гәрәке шәһәре хԝәда кʹидәре кӧ һатьбу буйине, бьһата ньвисаре. Усьв у Мәрйәма һʹәмлә, чунә ль Бәйтләһʹме, чьмки әԝана жь ви шәһәри бун (Луԛа 2:3). Мәрйәме тʹәԝледа зарʹ ани, у кьрә афьрʹе деԝер. Хԝәде мәләк шанд бал шьванед кӧ чоледа бун, ԝәки ԝанрʹа бежә кӧ зарʹ һатә буйине у әԝ Мәсиһе создайи йә.

Паше мәрьвед дьн жи избат кьрьн, кӧ Иса Мәсиһе создайи йә. Мәсәлә, Ишайа пʹехәмбәр пешда гот, ԝәки ԝе мәрьвәк әʹйан бә, йе кӧ сәва Мәсиһ рʹе һазьр кә (Ишайа 40:3). Әв мәри Йуһʹәннайе Ньхӧмдар бу. Чахе Йуһʹәнна Иса дит, әԝи гот: «Ва йә! Бәрхе Хԝәде, йе кӧ гӧнед дьнйайе һьлдьдә!» Һьнә шагьртед Йуһʹәнна перʹа-перʹа пәй Иса чун, йәки жь ԝан гот: «Мә Мәсиһ дит» (Йуһʹәнна 1:29, 36, 41).

Шәʹдәтик жи хԝәха Йаһоԝа Хԝәде да. Чахе Йуһʹәнна Иса ньхӧманд жь әʹзмана дәнге Йаһоԝа һатә бьһистьне. Хԝәде пе рʹӧһʹе пироз Иса кʹьфш кьр ча Мәсиһ. Хԝәде гот: «Әв ә Кӧрʹе мьни дәлал, кӧ әз жь ԝи рʹази мә» (Мәтта 3:16, 17). У ӧса Мәсиһе создайи һатә әʹйанкьрьне!

Әв йәк кʹәнге ԛәԝьми? Сала 29-да Д.М., демәк чахе 483 салед кӧ Данийел пʹехәмбәрти кьрьбу, дәрбаз бун. Әв һʹәму тьшт бь рʹасти жи избат дькьн, ԝәки Иса йә Мәсиһ. Ле чахе Иса ль сәр әʹрде бу, әԝи дәрһәԛа чь әʹлам дькьр?

​—Сәр һʹиме кʹьтебед Мәтта сәре 1 һʹәта 3; Марԛос сәре 1; Луԛа сәре 2; Йуһʹәнна сәре 1.