ПАШИ Шьмшон, Исраеледа Самуйел һʹакьм у пʹехәмбәр бу. Щьмәʹта Исраел тʹьме һиви жь ԝи дькьр, ԝәки мина мьләтед майин, ль сәр ԝан жи пʹадша бе кʹьфшкьрьне. Әв йәк сәва Хԝәде дьһатә һʹәсабе беһӧрмәткьрьн, чьмки Хԝәде бу пʹадшайе ԝан. Ле Хԝәде йәкә әʹмьр кьр, ԝәки Самуйел хԝәстьна щьмәʹте бьԛәдинә. Хԝәде мәрьвәки мьлук кʹьфш кьр, наве кʹижани кӧ Шаԝул бу. Ԝәʹдә шунда әԝ бабах бу у гӧрʹа Хԝәде нәкьр. Йаһоԝа Шаԝул инкʹар кьр у готә Самуйел, ԝәки дәԝса ԝи кʹьфш кә хортәки баш, наве кʹижани кӧ Даԝьд бу. Ле гәләк сал гәрәке дәрбаз буна һʹәта кӧ Даԝьд бьбуйа пʹадша.

Щарәке, чахе Даԝьд һе гәләк щаһьл бу, әԝ чу сәрики бьред хԝә хә, йед кӧ әскәред Шаԝул бун. Һьнге әԝи дит кӧ тьрс кʹәтьбу сәр әскәред Шаԝул, чьмки дьжмьне ԝан Голйатʹе тәрʹьки ԛәрфе хԝә ԝан у Хԝәде дькьр. Даԝьде һерскʹәти ԛьрар кьр, кӧ тʹәви ԝи шәрʹ бькә. У ӧса Даԝьд тʹәви Голйатʹе се метьре дәрдькʹәвә шәрʹ. Даԝьд тʹәви хԝә тʹәне шьдане у чәнд кәвьра һьлдьдә. Голйатʹ ԛәрфе хԝә Даԝьд дькьр. Ле Даԝьд щаба ԝи да у гот кӧ әԝ жь ԝи һе рʹьндтьр һазьр ә, чьмки әԝ бь наве Йаһоԝа те сәр ԝи шәрʹ. Даԝьд тʹәне пе кәвьрәки, Голйатʹ жорда әʹрде хьст у паше пе шуре ԝи жи, сәре ԝи же кьр. Әскәред Фьльстийа жь тьрса рʹәвин.

Шаԝул пешийе Даԝьд гәләк бәгәм кьр сәва мерхасийа ԝи, у ԝи кʹьфш кьр ча сәркʹаре ордийа хԝә. Ле паше, Шаԝул дәстпекьр ԛайим һʹәвсудийе Даԝьд бькә. Даԝьд мәщбур бу бьрʹәвә у чәнд сала хԝә вәдьшарт, ԝәки хԝә жь дәсте Шаԝул хьлаз кә. Шаԝул пәй Даԝьд кʹәтьбу у дьхԝәст ԝи бькӧшта. Ле Даԝьд һьндава Шаԝул амьн дьма, чьмки фәʹм дькьр, ԝәки Хԝәде Шаԝул кʹьфш кьрийә ча пʹадша. Ахьрийеда, Шаԝул шәрʹда һатә кӧштьне, у ԝәʹдә шунда, Даԝьд бу пʹадша чаԝа Хԝәде ԝирʹа соз дабу.

Даԝьд пʹадша гәләк дьхԝәст сәва Йаһоԝа пʹарьстгәһе ава кә. Ле Хԝәде готе ԝәки нә кӧ әԝ, ле кәсәки дьн жь зӧрʹәта ԝи ве пʹарьстгәһе ава кә. Әв зӧрʹәт Сьлемане кӧрʹе Даԝьд бу. Ле Хԝәде Даԝьд кʹәрәм кьр у пәйманәкә һʹәԝас тʹәви ԝи гьреда, ԝәки хәза малбәта Даԝьд бьбуйа һʹиме пʹадшатийе. Жь ԝи Хьлазкʹар, йан жи Зӧрʹәта кӧ дәрһәԛа ԝи бахче Еденеда һатә создайине, гәрәке пешда бьһата. Әԝ жь алийе Хԝәдеда ԝе бе шандьне, у бьбә Мәсиһ кӧ те һʹәсабе «Рʹункьри», демәк кʹьфшкьри. Йаһоԝа соз дабу кӧ Мәсиһ ԝе бьбә сәрԝере ве Пʹадшатийе, йе кӧ ԝе һʹәта-һʹәтайе һәбә.

Даԝьд гәләк жь Хԝәде рʹази бу. Ләма жи сәва авакьрьна пʹарьстгәһе Даԝьд гәләк зерʹ у зив тʹоп кьр, у ӧса жи гәләк тьштед лазьм бона авакьрьна пʹарьстгәһе. Даԝьд ӧса жи гәләк зәбур ньвисин. Пешийа мьрьна хԝә әԝи гот: «Рʹӧһʹе Хӧдан [Йаһоԝа, ДТʹ], бь . . . мьнва гот у готьна ԝи, ль сәр зьмане мьн бу» (2 Самуйел 23:2).

​—Сәр һʹиме кʹьтебед 1 у 2 Самуйел; 1 Дирок; Ишайа 9:7; Мәтта 21:9; Луԛа 1:32; Йуһʹәнна 7:42.