Буйина зарʹоке, сәва мер у жьн әв тьштәки нә һеса йә у хәмгинийе тинә. Ча де-баве тʹәзә, дьбәкә ԝәрʹа һьнәки әʹщеб бе кʹьфше, кӧ гәләк ԝәʹдә у ԛәԝата хԝә һун ль сәр ԝе йәке хәрщ дькьн, сәва кӧ мьԛати зарʹоке бьн. Кемасийа хәԝе дькарә ль сәр емосийед ԝә һʹӧкӧм кә, жь бо чь жи һәләԛәтийа ԝә тʹәви һәв дькарә хьраб бә. Сәва кӧ мьԛати зарʹоке бьн у һьн жи зәԝаща хԝә хԝәй кьн, ԝә һәрдарʹа жи лазьм ә һьнә гӧһастьна щәм хԝә бькьн. Ле гәло ча ширәта Кʹьтеба Пироз дькарә али вә бькә, сәва кӧ бькарьбьн ван чәтьнайа дәрбаз кьн.

КʹЬТЕБА ПИРОЗ ЧЬ ДЬБЕЖӘ: «Һʹьзкьрьн думькдьреж у ширьн ә». Һʹьзкьрьн ӧса жи «йа хԝә нагәрʹә, зу һерс накʹәвә» (1 Корьнтʹи 13:4, 5). Ча дайика тʹәзә, бь тʹәбийәти йә ԝәки тӧ педа дина хԝә дьди зарʹа хԝә. Мере тә дькарә дәстпекә дьшьрмиш бә кӧ сәре тә ида ԝирʹа тʹӧнә, ләма жи бир нәкә ԝәки әԝ жи һʹәԝще ԝе йәке йә, кӧ ԝәʹдә ԝирʹа жи бьвини. Бь сәбьр у ширьнайе тӧ дькари али ԝи бьки кӧ тʹәхмин кә, ԝәки әԝ сәва тә фәрз ә. У әв йәк ԝе ԝи һелан кә, кӧ хԝәйкьрьна зарʹеда али тә бькә.

«Ӧса жи мерно ... бь фәʹмдарийе әʹмьре хԝә тʹәви жьнед хԝә дәрбаз кьн» (1 Пәтрус 3:7). Фәʹм бькьн кӧ жьна ԝәрʹа ньһа лазьм бә гәләк ԛәԝата хԝә ль сәр ԝе йәке хәрщ кә, кӧ мьԛати зарʹоке бә. Әв бь рʹастийе жи щабдарийа тʹәзә йә сәва ԝе. Ләма жи жь бо ԝе йәке әԝ дькарә гәләк хәмгин бә, бәрхԝәкʹәвә у һәла һе дьлтәнг бә. У щарна дьбәкә әԝ дькарә, дьле тә жи бьешинә, ле жь алийе хԝәда һʹәму тьшти бькә сәва кӧ әʹдьлайе хԝәй ки. Чьмки «йе кӧ дәрәнг һерс дьбә заһф аԛьл ә» (Мәтʹәлок 16:32). Сәрԝахт бә у фәʹмдарийе бьдә кʹьфше. Ӧса жи пьштгьрийа ԝе бькә (Мәтʹәлок 14:29).

ЧЬ ҺУН ДЬКАРЬН БЬКЬН:

• Бавно: Али жьна хԝә бькьн кӧ мьԛати зарʹе бьн, һәла һе шәв жи. Әԝ ԝәʹде хԝә кʹижан кӧ ԝә ль сәр шьхӧлед дьн хәрщ дькьр кем кьн, сәва кӧ бькарьбьн һе гәләк ԝәхт тʹәви жьн зарʹа хԝә дәрбаз кьн

• Дайикно: Чахе мере ԝә дьхԝазә али ԝә бькә кӧ мьԛати зарʹе бә, аликʹарийа ԝи ԛәбул кьн. Һәрге әԝ бь тʹәмами әве йәке накә жи, жь бо ԝе йәке нәкʹәвьнә кʹьре ԝан, ле бь ширьнайи ԝанарʹа бьдьнә кʹьфше кӧ чаԝа гәрәке бькьн

КʹЬТЕБА ПИРОЗ ЧЬ ДЬБЕЖӘ: «Бьбьнә бәдәнәк» (Дәстпебун 2:24, ПКʹМ). Рʹаст ә ньһа дь малбәта ԝәда ида нәфәрәки тʹәзә йә, ле бира хԝәда хԝәй кьн ԝәки һун диса жи «бәдәнәк ьн». Жь алийе хԝәда тʹьме һʹәму тьшти бькьн кӧ һәләԛәтийа хԝә ԛәԝи хԝәй кьн.

Кʹӧлфәтно, жь мере хԝә рʹази бьн сәва аликʹари у пьштгьрийе. Чахе һун рʹазибуна хԝә мере хԝәрʹа дьдьнә кʹьфше, әв йәк дькарә ԛәнщ кә (Мәтʹәлок 12:18). Мерно, бежнә жьна хԝә кӧ чьԛас һун ԝе һʹьз дькьн у ԛимәт дькьн. Пʹайе ԝе бьдьн, сәва ԝан шьхӧла чь кӧ әԝ сәва малбәте дькә у хәм дькә (Мәтʹәлок 31:10, 28).

«Нәбә кӧ йәк кʹара хԝә бьгәрʹә, ле йа һәвале хԝә» (1 Корьнтʹи 10:24). Һәр гав тʹәне ԛәнщийе жьна хԝәрʹа бьхԝазьн. Чаԝа щӧте зәԝьщи ԝәʹдә бьвиньн, кӧ тʹәви һәв хәбәр дьн, пʹайи бьдьн у гӧһе хԝә жи бьдьнә һәв. Һәләԛәтийед хԝәйә сексуалда жи һʹәлал бьн. Тʹьме һʹәԝщед мере хԝә һьлдьн һʹәсаб. Кʹьтеба Пироз дьбежә: «Жь һәвдӧ на-на нәкьн» (1 Корьнтʹи 7:3-5). Ләма жи бь һʹәлали дәрһәԛа ве йәке тʹәви һәв хәбәр дьн. Сәбьр у фәʹмкьрьна ԝә, ԝе һәләԛәтийа ԝә ԛәԝи кьн.

ЧЬ ҺУН ДЬКАРЬН БЬКЬН:

• Бир нәкьн кӧ сәва хԝә һәрда жи, ԝәʹдә бьвиньн

• Тьштед бьчʹук сәва мер йан жьна хԝә бькьн, йе кӧ ԝе бьдә кʹьфше ԝәки һун ԝе һʹьз дькьн. Мәсәлә дькарьн нәʹма бьшиньн йан жи пʹешкʹешәкә бьчʹук бьдьн

КʹЬТЕБА ПИРОЗ ЧЬ ДЬБЕЖӘ: «Тӧ жь зарʹотийа хԝәда ньвисаред пироз зани, йед кӧ дькарьн тә сәрԝахт кьн» (2 Тимотʹейо 3:15). Дьшьрмиш бьн, һәла һуне чь бькьн сәва кӧ зарʹа хԝә һин кьн. Щәм зарʹе фәрәсәте ӧса баш һәйә, кӧ һәла һе пешийа буйина хԝә жи дькарә һин бә. Һәла һе зьке деда жи, зарʹа ԝә дькарә дәнге тә тедәрхә у емосийед тә жи тʹәхмин кә у тәрʹа бьдә кʹьфше. Бьхуньн зарʹерʹа һәла һе һьнге жи, гава әԝ һе гәләк бьчʹук ә. Һәрге әԝ нә жи фәʹм дькә чь кӧ һун жерʹа дьхуньн, йәкә әв дькарә али ԝи бькә, кӧ чахе мәзьн бә жи хԝәндьне һʹьз бькә.

Һʹәсаб нәкьн кӧ зарʹа ԝә һе гәләк бьчʹук ә, сәва кӧ хәбәрдана ԝә дәрһәԛа Хԝәде бьбьһе. Бьра әԝ бьбьһе чахе һун Йаһоԝарʹа дӧа дькьн (Ԛануна Дӧщари 11:19). Чахе һун тʹәвайи зарʹерʹа дьлизьн жи, хәбәр дьн дәрһәԛа тьштед кӧ Хԝәде әʹфьрандьнә (Зәбур 78:3, 4). Ԝәʹдә шунда чахе зарʹа ԝә мәзьн бә, әԝе тʹәхмин кә у бьвинә кӧ чаԝа һун Йаһоԝа һʹьз дькьн. У әԝ йәк ԝе али ԝи бькә, кӧ хԝәха жи һин бә Йаһоԝа һʹьз бькә.

ЧЬ ҺУН ДЬКАРЬН БЬКЬН:

• Илаһи дәрһәԛа ԝе йәке дӧа бькьн, ԝәки Йаһоԝа биланийе ԝәрʹа бьдә, кӧ зарʹа хԝә мәзин кьн у ширәт кьн

• Әԝ чь кӧ һун дьхԝазьн ԝәки зарʹа ԝә бира хԝәда хԝәй кә у һин бә, ԝирʹа һәртʹьм бьԝәкʹьлиньн. У әԝе дәстпекә зу һин бә