Әз малбәта Католикида Нийу Йоркеда бажаре Рочестерда мәзьн бумә. Чахе әз һʹәйшт сали бум, де-баве мьн һәв ԛәтийан. Ләʹде 5 рʹожа әз бал дийа хԝә авайики бона мәрьвед кʹәсибда дьмам. Ле Шәʹми-Ләʹде әз тʹәви баве хԝә бум, кʹижани кӧ мьһаләкә дәԝләтида дьжит. Дийа мьн анщах шәш зарʹ хԝәй дькьр, ләма жи мәрәма мьн әԝ бу, кӧ дәԝләти бьм у аликʹарийе бьдьмә дийа хԝә.

 Баве мьн дьхԝәст ԝәки әз рʹьнд бьжим у ахьрийа мьн баш бә, ләма жи бь аликʹарийа ԝи әз кʹәтьмә мәкʹтәбәкә навдар, кʹижанеда шьхӧле отеле һин дьбум. Мьн әв мәкʹтәб һʹьз кьр, у мьн тʹьре ԝәки Хԝәде щаба дӧайе мьн да, кӧ дәԝләти у бәхтәԝар бьм. Әз пенщ сала администрасийа меванхане, изьна бизнесе у финансед корпоратив һин дьбум. Ԝи ԝәʹдәйида әз ӧса жи отела казинода, Невадайеда шәһәре Лас Вегасда дьхәбьтим.

 Чахе әз 22 сали бум, әз бумә аликʹарчийе ԝәкʹиле казино. Әз дәԝләти у пешдачуйи бум. Мьн хԝарьнед лапә баш дьхԝар у ичкед лапә бьһа вәдьхԝар. Һәвалхәбатчийед мьн дьготьн: «Һʹьш-аԛьле хԝә бьдә сәр пʹәра, чьмки дьнйайеда пʹәра фәрзтьр тʹӧ тьшт тʹӧнә». Бь ньһерʹандьна ԝан бәхтәԝарийа рʹаст пʹәрада бу.

 Дькʹәтә нава хәбата мьн әв йәк, кӧ мьн гәрәке бона һʹәԝщә у хԝәстьнед мәрьвед пʹьрʹ дәԝләти хәм кьра, йед кӧ дьһатьнә Лас Вегасе сәва кӧ казинойеда бьлизьн. Рʹаст ә әԝана гәләк дәԝләти бун, ле рʹьнд дьһатә кʹьфше кӧ бәхтәԝар нибун. Әз хԝәха жи бәхтәԝар нибум. Мьн чьԛас һе зедә пʹәрә ԛазанч дькьр, һаԛас һе зедә хәмгини дькʹәтә дьле мьн у хәԝ нәдькʹәтә чʹәʹве мьн. Һәла һе жи мьн дәстпекьрьбу бьфькьрьм дәрһәԛа ԝе йәке, кӧ ида нәжим. Әз жь жийина хԝә гәләк вәстийайи бум, ләма жи мьн Хԝәдерʹа дӧа кьр у жь ԝи пьрси: «Кʹидәре бәхтәԝарийа рʹаст бьвиньм?»

 Ԝи чахи дӧ хушкед мьн бьбунә Шәʹдед Йаһоԝа у дәрбази Лас Вегасе бун. Рʹаст ә мьн журналед ԝан һьлнәдьда, ле әз рʹази бум кӧ тʹәви ԝана Кʹьтеба Пироз йа хԝә бьхуньм. Ԝәлгәрʹандьна Кʹьтеба Пирозә мьнда, һʹәму готьнед Иса бь рʹәнге сор ньвисар бун. Хушкед мьн заньбун, ԝәки мьн һʹәму готьнед Иса ԛәбул дькьр, ләма жи ԝана дина мьн дьданә сәр готьнед ԝи. Хенщи ԝе йәке мьн дәстпекьр хԝәха жи Кʹьтеба Пироз бьхуньм.

 Чахе мьн Кʹьтеба Пироз дьхԝәнд, әз сәр гәләк тьшта әʹщебмайи дьмам. Мәсәлә Иса готийә: «Гава кӧ һун дӧа дькьн, мина пʹутпʹарьста пʹьрʹхәбәр нәбьн. Ԝана тʹьре бона пʹьрʹ хәбәрдана ԝан дӧайед ԝане бенә бьһистьне» (Мәтта 6:7). Ле кʹәшишәки зудава шькьле Иса да мьн, у гот кӧ һәрге әз бәр ви шькьли дӧа бькьм у дәһә щара бьԝәкʹьлиньм, Хԝәде ԝе һаԛас пʹәрә бьдә мьн, чьԛас кӧ мьнрʹа лазьм бә. Әз фькьрим кӧ һәрге әви дуайи диса у диса бьԝәкʹьлиньм, найе һʹәсабе кӧ әз «пʹьрʹхәбәр» дьбьм? Мьн ӧса жи әв гьлийе Иса хԝәндьбу: «Ль сәр дьне һун тʹӧ кәсирʹа нәбежьн: ‹Баво›, чьмки Баве ԝә йәк ә, кӧ әʹзмана йә» (Мәтта 23:9). Әз әʹщебмайи мам, кӧ чьма мьн у Католикед дьн, кʹәшишарʹа дьгот «Баво»?

 Хԝәндьна кʹьтеба Аԛуб әз һелан кьрьм кʹур дәрһәԛа жийина хԝә бьфькьрьм. Сәре 4-да Аԛуб ӧса ньвисийә: «Һун ньзаньн кʹе ве дьне һʹьз дькә, әԝ нәйартийе ль Хԝәде дькә? Аԝа кʹи дьхԝазә бьбә йаре дьне, әԝ хԝә дькә нәйаре Хԝәде» (Аԛуб 4:4). Илаһи рʹеза 17 гәләк сәр мьн һʹӧкӧм бу: «Аԝа әԝе кӧ занә ԛәнщийе бькә у накә, әԝ жерʹа гӧнә йә». Мьн хушкед хԝәрʹа тʹеле хьст у готә ԝан, ԝәки әз бизнеса хԝәйә казинойе дьһельм, чьмки нахԝазьм кӧ хәбата мьн хӧмарева у тьмайева гьредайи бә.

 Мьн дьхԝәст һәләԛәтийа хԝә тʹәви Хԝәде у малбәта хԝә баш кьм. Ләма жи мьн сафи кьр жийина хԝә һеса кьм, сәва кӧ һе зедә ԝәʹде мьн бона ԝан һәбә. Ле гӧһастьнед ӧса нә һеса бун. Мәсәлә, чәнд щара отела казинойе мәщал дьданә мьн, ԝәки бизнеседа пешда һәрʹьм у һе зедә пʹәра бьстиньм. Мьн Хԝәдерʹа дӧа кьр, паше жи мьн сафи кьр, кӧ бь жийина ви щурʹәйи нәжим. Мьн хәбата хԝә һишт у әз дәрбази щәм дийа хԝә бум. Мьн гаража ԝе тʹәзә кьр у дәстпекьр ԝедәре бьжим, һьм жи мьн бизнеса хԝәйә бьчʹук вәкьр, демәк шьхӧлед менийува гьредайи дькьр.

 Рʹаст ә Кʹьтеба Пироз али мьн кьрьбу тедәрхьм, ԝәки жийина мьнда чь йә дьһа фәрз, ле диса жи әз нәдьчумә щьвата. Хушкед мьн жь мьн пьрсин, кӧ чьма әз Шәʹдед Йаһоԝа ԛәбул накьм. Мьн готә ԝан: «Чьмки Хԝәдейе ԝә Йаһоԝа, малбәта һьлдьшинә. Әз тʹәне ԝәʹде Сала Тʹәзә у сала буйине дькарьм тʹәви малбәта хԝә ԝәʹдә дәрбаз кьм, әԝ жи һун накьн». Хушкәкә мьн гьрийа у жь мьн пьрси: «Ле рʹожед салейә дьн тʹӧ кʹӧ йи? Әм һазьр ьн тʹьме тʹәви тә ԝәʹдә дәрбаз кьн, ле тӧ тʹәне дьхԝази ԝәʹде щәжьна тʹәви мә би, әв жи жь бо борщдарийе». Әв гьлийе ԝе гәләк дьле мьн гьртьн у әз жи гьрийам.

 Чахе мьн фәʹм кьр кӧ әз шаш бумә у Шәʹдед Йаһоԝа малбәта хԝә зәʹф һʹьз дькьн, мьн сафи кьр һәрʹьмә Ода Щьвата сәр щьватед ԝан. Ԝедәре әз тʹәви Кевин бумә нас, кʹижани кӧ Кʹьтеба Пироз рʹьнд шьровәдькьр. У паше әԝи тʹәви мьн һинбуна Кʹьтеба Пироз дәстпекьр.

 Кевин тʹәви жьна хԝә бь жийинәкә һеса дьжит, чьмки ԝана тʹәмамийа ԝәʹде хԝә сәр ԝе йәке хәрщ дькьр, кӧ али мәрийа бькьн сәва Кʹьтеба Пироз фәʹм бькьн. Пʹәре ԝан тʹера ԝан дькьр кӧ һәрʹьнә Африкайе у Америкайа Навәнд, ԝәки бона авакьрьна Филиала Шәʹдед Йаһоԝа аликʹарийе бьдьн. Әԝана тʹьме гәләк бәхтәԝар бун у зәʹф һәв һʹьз дькьрьн. Әз дьфькьрим: «Әва һәма әв жийин ә, кʹижан кӧ әз һʹьзрәт ьм».

 Кевин мьнрʹа видеойәк нишан кьр дәрһәԛа ԝе йәке, кӧ хьзмәтийа мисйонерти шабунәкә чьԛас мәзьн тинә. У мьн фәʹм кьр кӧ әԝ һәма әԝ ә, чь кӧ әз дьхԝазьм. Сала 1995-да паши шәш мәһед һинбуна Кʹьтеба Пироз, әз һатьмә ньхӧмандьне у бумә Шәʹде Йаһоԝа. Дәԝса кӧ жь Хԝәде бьхԝазьм кӧ дәԝләти бьм, мьн дәстпекьр ӧса дӧа бькьм: «Нә мьн бәләнгаз кә, нә жи дәԝләти кә» (Мәтʹәлок 30:8).

 Ньһа әз бь рʹасти дәԝләти мә, нә кӧ бь тьштед материйали, ле бь рʹӧһʹани. Жьна мьнә дәлал Нурийа һәйә, тʹәви кʹижане әз Һондураседа бумә нас. Мә тʹәвайи Панамайеда ча мисйонер хьзмәт кьрийә, ле ньһа Мәксикайеда. Әз хԝәха избат бум ԝан гьлийед Кʹьтеба Пирозда: «Дӧайе Хӧдан һәбуке дьдә у кʹәдәре сәрда зедә накә»! (Мәтʹәлок 10:22)