Хԝәде һәр тьшти дьвинә у дькарә һәр дәра ԝе йәке бькә, чь кӧ дьхԝазә (Мәтʹәлок 15:3; Ибрани 4:13). Кʹьтеба Пироз һин накә, кӧ Хԝәде һʹәму дәра йә у һәр тьштида нә. Ле әԝ дьбежә, ԝәки Хԝәде кәс ә у щийе ԝи жи һәйә, кʹидәре кӧ әԝ дьжи.

• Хԝәде чь щурʹәйи йә: Хԝәде кәсе рʹӧһʹани йә (Йуһʹәнна 4:24). Әԝ найе дитьне (Йуһʹәнна 1:18). Жь хәйалед кӧ Хԝәде Кʹьтеба Пирозда дайә ньвисаре те кʹьфше, ԝәки әԝ щики конкретда нә. Ле тʹӧ щийада найе готьне, кӧ әԝ һʹәму дәра йә (Ишайа 6:1, 2; Әʹйанти 4:2, 3, 8).

• Хԝәде кʹидәре йә: Хԝәде щийе рʹӧһʹанида дьжи, нә кӧ кʹидәре әʹфринед физики һәнә. Ль ԝьр сәр «әʹзман», щийәки Хԝәде һәйә (1 Пʹадшати 8:30). Кʹьтеба Пирозда те готьне, ԝәки щарәке әʹфринед рʹӧһʹани «һатьн ... ль бәр ХӦДАН [Йаһоԝа, a ДТʹ]». Жь ве йәке әм дьвиньн, ԝәки Хԝәде щики конкрет дьминә (Ибо 1:6).

Һәрге Хԝәде һʹәму дәра нинә, ле әԝ дькарә бона мьн хәм бькә?

Бәле. Хԝәде бона мәрийа хәм дькә. Рʹаст ә Хԝәде ль щийе рʹӧһʹани дьжи, ле йәкә әԝ дина хԝә дьдә мәрьвед сәр әʹрде у те һәԝара ԝан, йед кӧ бь дьл у щан дьхԝазьн дьле ԝи ша кьн (1 Пʹадшати 8:39; 2 Дирок 16:9). Ԝәрен әм шеԝьр кьн, кӧ Йаһоԝа чь чах у чь щурʹәйи хәм дькә бона хьзмәткʹаред хԝәйи амьн:

• Гава әм дӧа дькьн: Йаһоԝа дӧайед мә дьбьһе һәма ԝе дәме, чахе әм дӧа дькьн (2 Дирок 18:31).

• Гава әм дьлтәнг дьбьн: «Хӧдан незики дьлшкәстийа йә у мәʹрьм-бәләнгаза дьдәбьринә» (Зәбур 34:18).

• Чахе мәрʹа рʹебәри лазьм ә: Йаһоԝа «аԛьл» у сәрԝахтийе дьдә мә у рʹебәрийе мә дькә бь сайа Хәбәра хԝә, демәк Кʹьтеба Пироз (Зәбур 32:8).

Ньһерʹандьна нәрʹаст дәрһәԛа Хԝәдайе кӧ һʹәму дәра йә

Ньһерʹандьна нәрʹаст: Зәбур 139:8-да те готьне, ԝәки Хԝәде һʹәму дәра йә. Ԝедәре ньвисар ә: «Һәгәр рʹабьмә әʹзмен, Тӧ ль ԝьр и, бәржер һәрʹьмә дийаре мьрийа, диса ԝьр и».

Рʹасти: Ве рʹезеда найе готьне дәрһәԛа ԝе йәке, кӧ Хԝәде кʹидәре йә. Зәбурда бь поетик те шьровәкьрьне, ԝәки щийед ӧса тʹӧнә кӧ жь Хԝәде вәшарти бә у фьрԛи тʹӧнә әм кʹидәре бьн жи, әԝ дькарә али мә бькә.