Ewana pêş dikevin û dengê girme-girma wan tê! Çar hespên zor û siyarên wan, şikleke usa zelal çêdikin ku tê bêjî niha ewana wê ji rûpêlên Kitêba Pîroz derkevin! Hespê pêşiyê, bi rengê boz e (sipî) û siyarê wî yekî qewî û hêja tê kifşê û ew padşê kifşkirî ye. Pişt wî hespekî din bi rengê sor derdikeve, siyarê kîjanî ku edilayê ser temamiya dinyayê hildide. Hespê sisiya, hespekî reş e û destê siyarê wîda mêzînek e, yê ku tevî xwe xelayî-celayê tîne. Hespê çara, hespê şînoqî dêmek spîçolkî ye, yê ku tevî xwe tîne kul-derda, hemû tiştên xirab û mirinê jî, yê ku jîyîna meriya mîna zeviya diçine! (Eyantî 6:1-8).

“Çaxê cara pêşiyê min derheqa çar siyara xwend, ez gelek tirsiyam. Min texmîn kir, ku Roja Dîwanê îda nêzîk dibe û ji bo vê yekê ku ez hazir nîbûm, min tirê ezê xilaz nebim” (Krîstal).

“Minra gelek hewas bû pêbihesim derheqa çar siyara, yên ku li ser hespên renganî rûniştibûn. Û çaxê ez mena vê xewn-xeyalê pêhesiyam, hemû tişt îda femdarî bû” (Êd).

Derheqa çar siyarên Roja Dîwanê, tu mîna Krîstalê difikirî? Yan jî tu tevî giliyên Êd qayîl î? Çi jî hebe, derketina wan siyara şikleke nas çêdikin, derheqa kîjanî ku di kitêba Eyantîda nivîsar e û ev kitêba paşin e di Kitêba Pîrozda. Lê bi rastî hûn zanin, ku femkirina vê xewn-xeyalê dikare xût wera karê bîne? Gelo çawa? Xwedê soz dide, wekî hûn dikarin bextewariya rast bivînin, hergê bixûnin, pêbihesin û bijîn li gora vê yekê, çi ku di vê kitêba pêxembertiyêda nivîsar e (Eyantî 1:1-3).

Rast e hinek meriv tirsiyane ji bo vê xeyala derheqa çar siyara, lê bi rastî nelazim e ji vê yekê bitirsin. Îro mîlyona meriv baweriya xwe qewî dikin bi saya vê xeyalê, çimkî ev yek wanara axiriya baş eyan dike. Axiriya baş dikare tera jî vebe! Ji kerema xwe gotarên din bixûne.