Li gora Yûhenna 16:1-33
16 “Min ev tişt wera gotin, wekî hûn nelikumin.
2 Hûnê ji kinîştê* bêne derxistinê. Erê, wext tê gava her kesê ku we bikuje, wê bifikire ku ew xizmetiya pîroz bona Xwedê dike.
3 Lê ewana wê usa bikin, çimkî wana ne Bav, ne jî ez nas kirime.
4 Lê min ev tişt wera gotin, wekî gava wext bê ku ew tişt biqewimin, hûn bînine bîra xwe, ku min ev yek wera gotibû.
Min serê sêrîda ev tişt wera negotin, çimkî ez tevî we bûm.
5 Niha ez diçim bal Wî, yê ku ez şandime, û tu kes ji we min napirse: ‘Tu kuda diçî?’
6 Ji bo wê yekê ku min ev tişt wera gotin, hûn gelek xemgîn bûne.
7 Lê ez rast wera dibêjim, çûyîna min bona kara we ye. Çimkî hergê ez neçim, alîkar wê neyê bal we. Lê hergê ez herim, ezê wî wera bişînim.
8 Gava ew bê, ewê dinyayêra îzbatiyên zelal derheqa gune, rastiyê û dîwanê bide,
9 pêşiyê derheqa gune, çimkî ewana baweriya xwe min naynin.
10 Paşê derheqa rastiyê, çimkî ez diçim bal Bav û hûnê îda min nevînin.
11 Û paşê jî derheqa dîwanê, çimkî serwêrê vê dinyayê hatiye dîwankirinê.
12 Hê gelek tişt hene ku wera bêjim, lê niha hûn nikarin wana fem kin.
13 Gava ew,* dêmek ruhê rastiyê bê, wê rêberiyê we bike, û alî we bike ku hûn bi temamî rastiyê fem kin. Çimkî ewê ne ku ji ber xwe xeber de, lê tiştê ku dibihê wê bêje û elamî we bike derheqa tiştên ku wê biqewimin.
14 Ewê min rûmet ke, çimkî wê wan tişta elamî we bike, çi ku ji min bihîstiye.
15 Hemû tiştên ku cem Bav hene, yên min in. Lema jî min got, ku ruhê pîroz wê wan tişta elamî we bike, çi ku ji min bihîstiye.
16 Hine wext şûnda, hûnê îda min nevînin, û dîsa hinekî şûnda, hûnê min bivînin”.
17 Hingê çend şagirtên wî hevdura gotin: “Gelo ew bi van giliya çi dixwaze bêje: ‘Hine wext şûnda, hûnê îda min nevînin, û dîsa hine wext şûnda, hûnê min bivînin’, û ‘ez diçim bal Bav’?”
18 Û wana digot: “Ev gilî, ‘hine wext şûnda’, çi tê hesabê? Em fem nakin ew çi dibêje”.
19 Îsa zanibû ku ewana çi dixwazin ji wî bipirsin û wanra got: “Hûn vê yekê ji hev dipirsin, çimkî min got: ‘Hine wext şûnda, hûnê îda min nevînin, û dîsa hine wext şûnda, hûnê min bivînin’?
20 Ez rast wera dibêjim, hûnê bigirîn û bikine qîrîn, lê dinya wê şa be. Hûnê xemgîn bin, lê xemgîniya we wê bibe şabûn.
21 Kulfet wedê zaranînê êşê dikişîne, çimkî wedê wê hatiye. Lê çaxê jêra îda zar dibe, ew ji şabûna ku zar dinê ketiye, êş û cefê xwe bîr dike.
22 Hema bi vî cûreyî, hûn jî niha xemgîn in, lê ezê we dîsa bivînim û dilê we wê bi şabûnê tije be, û tu kes wê nikaribe şabûna we ji we bistîne.
23 Wê rojê hûnê qe tiştekî ji min nepirsin. Ez rast wera dibêjim, hergê hûn pê navê min ji Bav tiştekî bixwazin, ewê bide we.
24 Heta niha we pê navê min tiştek nexwestiye. Bixwazin û hûnê bistînin, seva ku şabûna we tije be.
25 Min wera ev tişt bi mesela gotin. Wext tê ku ezê îda ne ku bi mesela wera xeber dim, lê eşkere derheqa Bav wera gilî kim.
26 Wê rojê, hûnê pê navê min ji Bav bixwazin. Lê ev nayê hesabê, ku bona we ezê bixwazim.
27 Bav we hez dike, çimkî we ez hez kirime û we bawer kiriye ku ez ji Xwedê hatime şandinê.
28 Bav ez şandime dinyayê. Niha ez dinyayê dihêlim û diçim bal Bav”.
29 Şagirtên wî gotin: “Niha tu eşkere xeber didî, û mesela nadî xebatê.
30 Îda em zanin ku tu her tiştî zanî, û ne lazim e kesek tiştekî ji te bipirse. Lema jî em bawer dikin, ku tu ji Xwedê hatî”.
31 Îsa wanra got: “Niha hûn bawer dikin?
32 Wext tê û hatiye jî, ku her kes ji we wê bireve mala xwe, û hûnê min tenê bihêlin. Lê ez tenê nînim, çimkî Bav tevî min e.
33 Min ev tişt wera gotin, seva ku bi saya min edilaya we hebe. Dinyayêda wê tengasiyên we hebin, lê hûn mêrxas bin! Min dinya alt kir”.
Спартьн
^ Yan “sînagog”, dêmek ciyê hebandina Cihûya.
^ Xebera “ew”, ku rêzên 13 û 14-da tê xebitandinê, tê hesabê “alîkar”, kîjan ku rêza 7-da heye. Îsa xebera “alîkar” ser ruhê pîroz got. Rast e Îsa vê xeberê dide xebatê ça kes, lê ew qewatek e, ne ku meriv.
