ಬೈಬಲಿನ ದೃಷ್ಟಿಕೋನ
ದೇವರ ರೂಪ ಮತ್ತು ಗುಣಗಳು
ದೇವರಿಗೆ ಯಾವ ರೀತಿಯ ಶರೀರ ಇದೆ?
ದೇವರು ಅದೃಶ್ಯನು. —1 ತಿಮೊಥೆಯ 1:17.
ಬೈಬಲ್‌ ಏನು ಹೇಳುತ್ತದೆ?
ದೇವರು ಆತ್ಮಸ್ವರೂಪಿ ಅಂತ ಬೈಬಲ್‌ ಹೇಳುತ್ತದೆ. (2 ಕೊರಿಂಥ 3:17) ಅಂದರೆ ಮಾನವನಿಗಿಂತ ಅತೀ ಉತ್ಕೃಷ್ಟವಾದ ಶರೀರ ಅದು. ನಮ್ಮ ಕಣ್ಣಿಗೆ ಕಾಣಿಸೋದಿಲ್ಲ. ದೇವರು ‘ನಿತ್ಯತೆಯ ಅರಸ, ನಿರ್ಲಯ, ಅದೃಶ್ಯ’ ಅಂತ ಬೈಬಲ್‌ ಹೇಳುತ್ತದೆ. (1 ತಿಮೊಥೆಯ 1:17) “ದೇವರನ್ನು ಯಾರೂ ಎಂದೂ ನೋಡಿಲ್ಲ” ಅಂತ ಸಹ ಹೇಳುತ್ತದೆ.—1 ಯೋಹಾನ 4:12.
ದೇವರು ನಮಗಿಂತ ಎಷ್ಟು ಶ್ರೇಷ್ಠನೆಂದರೆ ಆತನು ನೋಡಲು ಹೇಗಿದ್ದಾನೆ ಅಂತ ಕಲ್ಪಿಸಿಕೊಳ್ಳೋದು ಅಸಾಧ್ಯ. ಅದಕ್ಕೆ ಬೈಬಲ್‌ ಹೇಳುತ್ತದೆ “ಹೀಗಿರಲು ದೇವರನ್ನು ಯಾರಿಗೆ ಹೋಲಿಸೀರಿ? ಯಾವ ರೂಪವನ್ನು ಆತನಿಗೆ ಸಮಮಾಡೀರಿ?” (ಯೆಶಾಯ 40:18) ಅತ್ಯದ್ಭುತವಾದ ಆಕಾಶ ಕೂಡ ಸರ್ವಶಕ್ತ ದೇವರ ಮುಂದೆ ಏನೂ ಅಲ್ಲ.—ಯೆಶಾಯ 40:22, 26.
ಆದರೆ ದೇವರನ್ನು ನೋಡುವ ಮತ್ತು ಮುಖಾಮುಖಿ ಮಾತಾಡುವ ಸಾಮರ್ಥ್ಯವಿರುವ ಜೀವಿಗಳಿವೆ. ದೇವರಂತೆ ಇವರಿಗೂ ಆತ್ಮಸ್ವರೂಪವಿದೆ. ಸ್ವರ್ಗದಲ್ಲಿ ಇವರ ವಾಸ. (1 ಅರಸುಗಳು 22:21; ಇಬ್ರಿಯ 1:7) ಇವರನ್ನು ದೇವದೂತರು ಅಂತ ಕರೆಯುತ್ತಾರೆ. ಈ ಬುದ್ಧಿಶಕ್ತಿಯುಳ್ಳ ಜೀವಿಗಳು ಮನುಷ್ಯರಿಗಿಂತ ಶ್ರೇಷ್ಠ. ಇವರ ಬಗ್ಗೆ ಯೇಸು ಕ್ರಿಸ್ತ ಹೇಳಿದ್ದು: “ಸ್ವರ್ಗದಲ್ಲಿರುವ ದೂತರು . . . ನನ್ನ ತಂದೆಯ ಮುಖವನ್ನು ಯಾವಾಗಲೂ ನೋಡುತ್ತಿರುತ್ತಾರೆ.”—ಮತ್ತಾಯ 18:10.
ದೇವರು ಎಲ್ಲಾ ಕಡೆ ಇದ್ದಾನಾ?
“ನೀವು ಹೀಗೆ ಪ್ರಾರ್ಥನೆಮಾಡತಕ್ಕದ್ದು: “‘ಸ್ವರ್ಗದಲ್ಲಿರುವ ನಮ್ಮ ತಂದೆಯೇ . . .”—ಮತ್ತಾಯ 6:9.
ಬೈಬಲ್‌ ಏನು ಹೇಳುತ್ತದೆ?
ದೇವರು ಸರ್ವಾಂತರ್ಯಾಮಿ ಅಂದರೆ ಅಮೂರ್ತ ಶಕ್ತಿ, ಆತನು ಎಲ್ಲಾ ಕಡೆ ಯಾವಾಗಲೂ ಇರುತ್ತಾನೆ ಅಂತ ಬೈಬಲ್‌ ಕಲಿಸೋದಿಲ್ಲ. ಬೈಬಲಿನ ಮತ್ತಾಯ 6:9 ಮತ್ತು 18:10 ರಲ್ಲಿ ದೇವರನ್ನು ತಂದೆ ಅಂತ ಯೇಸು ಕರೆದಿದ್ದಾನೆ. ಅಂದರೆ ದೇವರು ಒಬ್ಬ ವ್ಯಕ್ತಿ. ಆತನಿರುವುದು ಸ್ವರ್ಗದಲ್ಲಿ. ಅದೇ ಆತನ ನಿವಾಸ.—1 ಅರಸುಗಳು 8:43.
ತನ್ನ ಬದುಕಿನ ಕೊನೇ ದಿನಗಳಲ್ಲಿ ಯೇಸು ಹೇಳಿದ್ದು: “ನಾನು ಲೋಕವನ್ನು ಬಿಟ್ಟು ತಂದೆಯ ಬಳಿಗೆ ಹೋಗುತ್ತಿದ್ದೇನೆ.” (ಯೋಹಾನ 16:28) ಮಾನವನಾಗಿ ಜೀವಿಸಿ ಮರಣಪಟ್ಟು ನಂತರ ಆತ್ಮಜೀವಿಯಾಗಿ ಯೇಸು ಮತ್ತೆ ಜೀವ ಪಡೆದನು. ‘ದೇವರ ಸಮ್ಮುಖದಲ್ಲಿ ಕಾಣಿಸಿಕೊಳ್ಳಲು ಸ್ವರ್ಗವನ್ನು ಪ್ರವೇಶಿಸಿದನು.’—ಇಬ್ರಿಯ 9:24.
ದೇವರ ಕುರಿತ ಈ ಸತ್ಯಾಂಶಗಳನ್ನೆಲ್ಲ ತಿಳಿದುಕೊಳ್ಳುವುದರಿಂದ ಪ್ರಯೋಜನವೇನು? ಒಂದು, ದೇವರು ವ್ಯಕ್ತಿಯಾಗಿರುವುದರಿಂದ ಆತನ ಬಗ್ಗೆ ತಿಳಿದುಕೊಂಡು, ಆತನ ಜೊತೆ ಆಪ್ತತೆಯನ್ನು ಬೆಳೆಸಿಕೊಳ್ಳಬಹುದು. (ಯಾಕೋಬ 4:8) ಇನ್ನೊಂದು, ದೇವರ ರೂಪ, ಗುಣಗಳ ಬಗ್ಗೆ ನಿಜವಾದ ವಿಷಯಗಳನ್ನು ತಿಳಿದುಕೊಂಡಾಗ ನಾವು ದೇವರನ್ನು ತಪ್ಪಾದ ರೀತಿಯಲ್ಲಿ ಆರಾಧಿಸುವುದಿಲ್ಲ. ಜೀವವಿಲ್ಲದ ವಿಗ್ರಹಗಳನ್ನು, ವಸ್ತುಗಳನ್ನು ಪೂಜಿಸುವುದಿಲ್ಲ. “ಚಿಕ್ಕ ಮಕ್ಕಳೇ, ವಿಗ್ರಹಗಳಿಂದ ನಿಮ್ಮನ್ನು ಕಾಪಾಡಿಕೊಳ್ಳಿರಿ” ಅಂತ 1 ಯೋಹಾನ 5:21 ಹೇಳುತ್ತದೆ.
ಮನುಷ್ಯರು ದೇವರ ಸ್ವರೂಪದಲ್ಲಿ ಸೃಷ್ಟಿಯಾದರು ಅಂದರೆ ಅರ್ಥವೇನು?
“ದೇವರು ಮನುಷ್ಯನನ್ನು ತನ್ನ ಸ್ವರೂಪದಲ್ಲಿ ಉಂಟುಮಾಡಿದನು; ದೇವಸ್ವರೂಪದಲ್ಲಿ ಅವನನ್ನು ಉಂಟುಮಾಡಿದನು; ಅವರನ್ನು ಗಂಡುಹೆಣ್ಣಾಗಿ ನಿರ್ಮಿಸಿದನು.”—ಆದಿಕಾಂಡ 1:27.
ಬೈಬಲ್‌ ಏನು ಹೇಳುತ್ತದೆ?
ಪ್ರೀತಿ, ನ್ಯಾಯ, ವಿವೇಕದಂಥ ದೇವರ ಗುಣಗಳನ್ನು ತೋರಿಸುವ ಸಾಮರ್ಥ್ಯ ಮನುಷ್ಯರಿಗಿದೆ. ಇಷ್ಟಕ್ಕೂ ಬೈಬಲ್‌ ನಮಗೆ “ಪ್ರಿಯ ಮಕ್ಕಳಂತೆ ದೇವರನ್ನು ಅನುಕರಿಸುವವರಾಗಿರಿ. . . . ಪ್ರೀತಿಯಲ್ಲಿ ನಡೆಯುತ್ತಾ ಇರಿ” ಅಂತ ಹೇಳುತ್ತದೆ.—ಎಫೆಸ 5:1, 2.
ಸರಿಯಾದ ಆಯ್ಕೆ ಮಾಡುವ ಸ್ವಾತಂತ್ರ್ಯವನ್ನು ದೇವರು ನಮಗೆ ಕೊಟ್ಟಿದ್ದಾನೆ. ಬೇರೆ ಬೇರೆ ರೀತಿಯಲ್ಲಿ ಪ್ರೀತಿ ತೋರಿಸುವ ಸಾಮರ್ಥ್ಯವನ್ನೂ ಕೊಟ್ಟಿದ್ದಾನೆ. (1 ಕೊರಿಂಥ 13:4-7) ಹಾಗೇ ಕಲ್ಪನಾಶಕ್ತಿಯನ್ನು, ಸೌಂದರ್ಯವನ್ನು ಆಸ್ವಾದಿಸುವ ಗುಣವನ್ನು, ನಿಸರ್ಗದ ಕೌತುಕವನ್ನು ನೋಡಿ ಬೆರಗಾಗುವ ಸಾಮರ್ಥ್ಯವನ್ನೂ ದೇವರು ನಮಗೆ ಕೊಟ್ಟಿದ್ದಾನೆ. ಇದೆಲ್ಲಕ್ಕಿಂತ ಹೆಚ್ಚಾಗಿ, ದೇವರ ಬಗ್ಗೆ, ಆತನು ನಮ್ಮ ವಿಷಯದಲ್ಲಿ ಮಾಡಿರುವ ಸಂಕಲ್ಪಗಳ ಬಗ್ಗೆ ಕಲಿಯುವ ಸಾಮರ್ಥ್ಯವನ್ನು, ಬಯಕೆಯನ್ನು ನಮಗೆ ಕೊಟ್ಟಿದ್ದಾನೆ.—ಮತ್ತಾಯ 5:3.
ಬೈಬಲಿನಿಂದ ಸತ್ಯಾಂಶಗಳನ್ನು ತಿಳಿಯುವುದರಿಂದ ಸಿಗುವ ಪ್ರಯೋಜನ. ದೇವರ ಬಗ್ಗೆ ಕಲಿಯುತ್ತಾ ಹೋಗೋದಾದರೆ, ದೇವರ ಗುಣಗಳನ್ನು ಅನುಕರಿಸಲು ಶ್ರಮಿಸುವುದಾದರೆ ದೇವರ ಇಷ್ಟದ ಪ್ರಕಾರ ಜೀವಿಸುತ್ತೇವೆ. ಇದರಿಂದ ನಾವು ಹೆಚ್ಚು ಸಂತೋಷವಾಗಿರುತ್ತೇವೆ. ಜತೆಗೆ ಸಂತೃಪ್ತಿ, ನೆಮ್ಮದಿ, ಸಾರ್ಥಕತೆಯ ಭಾವ ಇರುತ್ತದೆ. (ಯೆಶಾಯ 48:17, 18) ದೇವರ ಸೊಗಸಾದ ಗುಣಗಳು ಮಾನವರ ಮನಸ್ಪರ್ಶಿಸುತ್ತದೆ, ಒಳ್ಳೇ ಜನರನ್ನು ದೇವರ ಬಳಿ ಸೆಳೆಯುತ್ತದೆ ಮತ್ತು ಶಾಶ್ವತ ಜೀವನದ ದಾರಿಯಲ್ಲಿ ಅವರನ್ನು ನಡೆಸುತ್ತದೆ. ಇಂಥ ಪ್ರಯೋಜನಗಳನ್ನು ಮಾನವರು ಪಡೆಯಬೇಕೆನ್ನುವುದೇ ದೇವರ ಆಶೆ.—ಯೋಹಾನ 6:44; 17:3. ◼ (g13-E 05)
ನಿಮಗೆ ಇವೂ ಇಷ್ಟ ಆಗಬಹುದು
ನಿಮ್ಮ ಪ್ರಶ್ನೆಗಳಿಗೆ ಬೈಬಲಿನ ಉತ್ತರ
ದೇವರು ಎಲ್ಲಾ ಕಡೆ, ಎಲ್ಲಾ ವಸ್ತುಗಳಲ್ಲಿಯೂ ಇದ್ದಾನಾ?
ದೇವರು ಎಲ್ಲಾ ಕಡೆ ಇದ್ದಾನೆ ಅಂತ ಬೈಬಲ್‌ ಹೇಳುತ್ತಾ? ದೇವರು ಒಂದು ಪ್ರತ್ಯೇಕ ಸ್ಥಳದಲ್ಲಿ ಇರೋದಾದ್ರೂ ನಮ್ಮಲ್ಲಿರೋ ಪ್ರತಿಯೊಬ್ಬರ ಬಗ್ಗೆ ಆತನಿಗೆ ಗೊತ್ತಿದೆ ಅಂತ ನಾವು ಯಾಕೆ ನಂಬಬಹುದು?
ನಿಮ್ಮ ಪ್ರಶ್ನೆಗಳಿಗೆ ಬೈಬಲಿನ ಉತ್ತರ
ದೇವರನ್ನ ಯಾರಾದ್ರೂ ನೋಡಿದ್ದಾರಾ?
ಬೈಬಲಿನಲ್ಲಿ ಒಂದು ಕಡೆ “ಯಾವ ಮನುಷ್ಯನೂ ದೇವರನ್ನ ಕಣ್ಣಾರೆ ನೋಡಿಲ್ಲ” ಅಂತಿದೆ ಇನ್ನೊಂದು ಕಡೆ ಮೋಶೆ “ಇಸ್ರಾಯೇಲಿನ ದೇವರನ್ನ” ನೋಡಿದ ಅಂತನೂ ಇದೆ. ಹಾಗಾದರೆ ಬೈಬಲ್‌ ಹೇಳೋದು ನಿಜಾನಾ ಸುಳ್ಳಾ?
