1 Kɔrintians 13:1-13
-
Lɔv—bɛtɛ fa fawe (1-13)
13 If a de tɔk mɔtalman dɛn langwej ɛn enjɛl dɛn langwej bɔt a nɔ gɛt lɔv, a dɔn tan lɛk we dɛn wap kɔpa instrumɛnt* ɔ we dɛn nak simbal.*
2 Ɛn if a gɛt di gift fɔ tɔk wetin Gɔd se ɛn ɔndastand ɔl di oli sikrit dɛn ɛn a no ɔltin, ɛn if a gɛt fet we so strɔng dat a ebul fɔ muv mawntin dɛn, bɔt a nɔ gɛt lɔv, mi na natin.*
3 Ɛn if a gi ɔl wetin a gɛt fɔ fid ɔda pipul dɛn, ɛn if a an ova mi bɔdi so dat a go bost, bɔt a nɔ gɛt lɔv, a nɔ go gɛt ɛni bɛnifit atɔl.
4 Lɔv de mek pɔsin peshɛnt ɛn du gud. Lɔv nɔ de mek pɔsin jɛlɔs. I nɔ de mek pɔsin bost, i nɔ de mek pɔsin prawd,
5 i nɔ de mek pɔsin biev bad we,* i nɔ de mek pɔsin du wetin in want, i nɔ de mek pɔsin vɛks kwik. I nɔ de mek pɔsin kip grɔj na in at.
6 I nɔ de mek pɔsin gladi fɔ tin we nɔ rayt, bɔt i de mek pɔsin gladi fɔ tin we na tru.
7 I de mek pɔsin nɔ giv-ɔp ilɛk wetin apin, i de mek pɔsin biliv ɔltin, i de mek pɔsin op fɔ ɔltin, i de mek pɔsin bia ɔltin.
8 Lɔv nɔ de ɛva fel. Bɔt if pɔsin gɛt di gift fɔ tɔk wetin Gɔd se, dat go stɔp; if pɔsin gɛt di gift fɔ tɔk difrɛn langwej dɛn, dat go stɔp; if pɔsin gɛt di gift fɔ no tin dɛn, dat go stɔp.
9 Nɔto ɔltin wi no ɛn di prɔfɛsi we wi de tɔk nɔ kɔmplit,
10 bɔt we di kɔmplit wan kam, di wan we nɔ kɔmplit nɔ go de igen.
11 We a bin smɔl, a bin de tɔk lɛk pikin, tink lɛk pikin, si tin lɛk pikin; bɔt naw we a dɔn big, a dɔn lɛf fɔ biev lɛk pikin.
12 Bɔt naw wi de luk insay mɛtal glas ɛn wi nɔ de si klia wan, bɔt da tɛm de i go bi fes-to-fes. Naw a nɔ no ɔltin, bɔt da tɛm de a go no di kɔrɛkt tin,* jɔs lɛk aw Gɔd no di kɔrɛkt tin bɔt mi.
13 Bɔt naw na dɛn tri tin ya lɛf: fet, op, ɛn lɔv; bɔt di wan we pas dɛn ɔl na lɔv.
Futnot Dɛn
^ Insay Grik, “gɔng.”
^ Na tu tin dɛn we dɛn kin yuz fɔ ple myuzik. Dɛn gɛt rawnd shep, ɛn dɛn kin mek lawd sawnd we dɛn nak dɛn tu togɛda.
^ Ɔ “a nɔ gɛt ɛni yus.”
^ Ɔ “rud we.”
^ Ɔ “ɔltin.”
