Prɔvabs 10:1-32
10 Sɔlɔmɔn in parebul dɛn.
Pikin we gɛt sɛns de mek in papa gladi,Bɔt pikin we ful de mek in mama in at pwɛl.
2 Di jɛntri we wikɛd pɔsin de gɛt nɔ go bɛnifit am,Bɔt fɔ du wetin rayt go mek pɔsin nɔ day.
3 Jiova nɔ go mek pɔsin we de du wetin rayt angri,Bɔt i go mek pɔsin we wikɛd nɔ gɛt wetin i rili want.
4 An we aydul de briŋ kam po,Bɔt an we de wok tranga wan de briŋ kam jɛntri.
5 Pikin we de du tin wit sɛns de gɛda plant dɛn insay dray sizin,Bɔt pikin we nɔ gɛt shem de slip dip dip wan di tɛm fɔ avɛst.
6 Blɛsin de pan di wan we de du wetin rayt,Bɔt di wikɛd wan in mɔt de ayd fɛt-fɛt.
7 Di tin we dɛn de mɛmba* bɔt pɔsin we de du wetin rayt go briŋ kam blɛsin,Bɔt wikɛd pɔsin in nem go rɔtin.
8 Pɔsin we gɛt sɛns go gri fɔ lɛ dɛn tɛl am wetin fɔ du,Bɔt di wan we de tɔk fulish tin dɛn go sɔfa fɔ dat.
9 Di wan we de du tin tret wan go waka sef,Bɔt dɛn go kech di wan we de du tin bɛnbɛn we.
10 Di wan we de wink in yay kɔni we de briŋ pwɛlat,Ɛn di wan we de tɔk fulish tin dɛn go sɔfa fɔ dat.
11 Di wan we de du wetin rayt in mɔt de gi layf,Bɔt di wikɛd wan in mɔt de ayd fɛt-fɛt.
12 Na etrɛd de kam wit plaba,Bɔt lɔv de kɔba ɔlkayn sin.
13 Sɛns de na di wan we de tink gud gud wan in lip,Bɔt ken de fɔ di wan we nɔ gɛt sɛns in bak.
14 Di wan dɛn we gɛt sɛns lɛk fɔ no sɔntin.Bɔt di wan we ful in mɔt de briŋ kam trɔbul.
15 Mɔniman in jɛntri na in strɔng siti,
Bɔt poman in trɔbul na in po.
16 Di tin dɛn we di wan we de du wetin rayt de du, de mek i gɛt layf,Bɔt di tin dɛn we di wikɛd wan de du de mek i sin.
17 Di wan we de tek kɔrɛkshɔn tan lɛk rod we de gi layf,*Bɔt di wan we de tɔn in bak pan kɔrɛkshɔn de mek ɔda pipul dɛn go di rɔng we.
18 Di wan we de ayd di et we i et pɔsin de lay,Ɛn di wan we de tɔk bad tin dɛn* bɔt ɔda pɔsin nɔ gɛt sɛns.
19 Pɔsin we de tɔk bɔku, go mɔs mek mistek,Bɔt ɛnibɔdi we de kɔntrol wetin i de tɔk de du tin wit sɛns.
20 Wetin di wan we de du wetin rayt de tɔk tan lɛk di bɛst silva,Bɔt di wikɛd wan in at nɔ gɛt bɛtɛ valyu.
21 Di tin dɛn we di wan we de du wetin rayt de tɔk de bɛnifit* bɔku pipul dɛn,Bɔt pɔsin we fulish go day bikɔs i nɔ gɛt sɛns.
22 Na Jiova in blɛsin de mek pɔsin jɛntri,Ɛn I nɔ de ad no pen* pan am.
23 Fɔ put an pan shemful tin tan lɛk gem to fulman,Bɔt sɛns de fɔ di pɔsin we de tink gud gud wan fɔ ɔndastand.
24 Di tin we wikɛd pɔsin de fred go apin to am,Bɔt di wan we de du wetin rayt go gɛt wetin i want.
25 We big big briz blo ɛn ɛvi ren kam, i de kɛr di wikɛd wan go,Bɔt di wan we de du wetin rayt tan lɛk fawndeshɔn we go de sote go.
26 Jɔs lɛk viniga na pɔsin in tit ɛn smok na pɔsin in yay,Na so lezi pɔsin tan to di wan we sɛn am.*
27 Fɔ fred Jiova de mek pɔsin gɛt lɔng layf,Bɔt di wan we wikɛd go day kwik.
28 Di tin we di wan we de du wetin rayt de ɛkspɛkt* de mek i gladi,Bɔt di wikɛd wan nɔ go gɛt wetin i op fɔ.
29 Di we aw Jiova de du tin tan lɛk sef ples fɔ di wan we nɔ gɛt wan fɔlt,Bɔt i min trɔbul fɔ di wan we de du bad.
30 Natin nɔ go ɛva mek di wan we de du wetin rayt fɔdɔm,Bɔt di wikɛd wan nɔ go de igen na di wɔl.
31 Wetin di wan we de du wetin rayt de tɔk de gi sɛns,Bɔt dɛn go dɔnawe wit di wan we de tɔk tin we nɔ rayt.
32 Di wan we de du wetin rayt no aw fɔ tɔk fayn tin,Bɔt di wikɛd wan de tɔk tin we nɔ rayt.
Futnot Dɛn
^ Ɔ “Wetin dɛn no.”
^ Ɔ i kin bi, “de na di rod we de gi layf.”
^ Ɔ “de prɛd rumɔ.”
^ Ɔ “de gayd.”
^ Ɔ “no trɔbul.”
^ Ɔ “to di wan we gi am wok.”
^ Ɔ “de op fɔ.”
