Prɔvabs 14:1-35
14 Uman we rili gɛt sɛns de bil in os,Bɔt di wan we ful de pwɛl am wit in yon an.
2 Di wan we de du tin tret de fred Jiova,Bɔt di wan we kruk nɔ gɛt wan rɛspɛkt fɔ am.
3 Di prawd wɔd dɛn we fulman dɛn de tɔk tan lɛk we yu nak pɔsin wit ken,Bɔt wetin di wan we gɛt sɛns de tɔk go protɛkt dɛn.
4 We no kaw nɔ de, di say usay dɛn de put it fɔ dɛn de klin;Bɔt di pawa we man kaw gɛt de mek bɔku bɔku tin de fɔ avɛst.
5 Witnɛs we de tɔk tru nɔ de lay,Bɔt witnɛs we nɔ de tɔk tru de lay ɛnitɛm we i de tɔk.
6 Pɔsin we nɔ gɛt wan rɛspɛkt de fɛn sɛns, ɛn i nɔ go gɛt am;Bɔt pɔsin we de ɔndastand go no sɔntin izi wan.
7 Avɔyd fulman,Bikɔs yu nɔ go gɛt sɛns frɔm wetin i de tɔk.
8 Di sɛns we sɛnsman gɛt de mek i ɔndastand usay i de go,Bɔt na di ful we fulman ful na in de ful am.*
9 Fulman de laf we i du bad,Bɔt di wan we de du tin tret, rɛdi fɔ mek pis.
10 Na pɔsin nɔmɔ no di pen we de na in at,Ɛn nɔbɔdi nɔ go no di gladi-at we i gɛt.
11 Dɛn go pwɛl wikɛd pɔsin in os,Bɔt di wan we de du tin tret in tɛnt go de big mɔ ɛn mɔ.
12 Di tin we pɔsin de du kin luk fayn na in yay,Bɔt i go mek i ɛnd-ɔp fɔ day.
13 Ivin we pɔsin de laf, pen kin stil de na in at,Ɛn gladi gladi kin ɛnd-ɔp pan pwɛlat.
14 Di wan we nɔ de tek kɔntrol go gɛt di pe fɔ di tin dɛn we i de du,Bɔt gud pɔsin go gɛt blɛsin fɔ wetin i de du.
15 Di wan we nɔ gɛt ɛkspiriɛns de biliv ɛnitin we dɛn tɛl am,Bɔt di wan we gɛt sɛns de tink bifo i mas.
16 Di wan we gɛt sɛns de tek tɛm, ɛn i de avɔyd tin we bad,Bɔt di wan we nɔ gɛt sɛns nɔ de tek tɛm, ɛn i de mek ova-kɔnfidɛns.
17 Di wan we de vɛks kwik de du tin lɛk fulman,Bɔt dɛn et pɔsin we de tek tɛm tink bɔt sɔntin.
18 Di wan we nɔ gɛt ɛkspiriɛns in bɛnifit na ful,Bɔt di wan we gɛt sɛns in bɛnifit na fɔ no sɔntin.
19 Bad pipul dɛn go butu bifo di wan dɛn we gud,Ɛn di wan dɛn we wikɛd go butu na di wan dɛn we de du wetin rayt dɛn get.
20 We pɔsin po, ivin in neba dɛn de et am,Bɔt jɛntriman gɛt bɔku padi dɛn.
21 Di wan we nɔ lɛk in neba de sin,Bɔt ɛnibɔdi we sho sɔri-at to di wan dɛn we pipul dɛn nɔ tek mek natin gɛt gladi-at.
22 Di wan dɛn we de plan bad go go di rɔng we.
Bɔt pipul dɛn go sho lɔv we nɔ de chenj, ɛn dɛn go fetful to di wan dɛn we want fɔ du gud.
23 Pɔsin we de wok tranga wan go bɛnifit,Bɔt ɛmti tɔk de mek pɔsin nɔ gɛt natin.
24 Jɛntri tan lɛk krawn to di wan dɛn we gɛt sɛns;Bɔt fulman go kɔntinyu fɔ ful.
25 Witnɛs we de tɔk tru de sev ɔda pipul dɛn layf,Bɔt di wan we de ful ɔda pipul dɛn de lay ɛnitɛm we i tɔk.
26 Pɔsin we de fred Jiova rili gɛt kɔnfidɛns,Ɛn dat go protɛkt in pikin dɛn.
27 Fɔ fred Jiova tan lɛk wata we de gi layf,I de mek pɔsin avɔyd trap dɛn we de mek i day.
28 Kiŋ we gɛt bɔku bɔku pipul dɛn ɔnda am rili gɛt ɔnɔ,Bɔt rula we nɔ gɛt pipul dɛn ɔnda am in pawa go dɔn.
29 Di wan we nɔ de vɛks kwik de rili si fa,Bɔt di wan we nɔ de peshɛnt de sho se i ful.
30 Kolat de mek pɔsin gɛt wɛlbɔdi,Bɔt fɔ jɛlɔs tan lɛk sik we de mek pɔsin in bon dɛn rɔtin.
31 Di wan we de mek kruk pan pɔsin we pipul dɛn nɔ tek mek natin de fityay di Wan We Mek am,Bɔt ɛnibɔdi we sho sɔri-at to di wan we po de prez Am.
32 Na di bad tin we wikɛd pɔsin de du na in de mek i fɔdɔm,Bɔt we pɔsin we de du wetin rayt waka tret, dat go protɛkt am.
33 Pɔsin we de ɔndastand nɔ de tɔk bɔt di sɛns we de na in at,Bɔt di wan we nɔ gɛt sɛns de tɔk bɔt in yon.
34 Fɔ du wetin rayt de mek neshɔn gɛt prez,Bɔt sin de disgres pipul dɛn.
35 Kiŋ kin gladi fɔ savant we de du tin wit sɛns,Bɔt i kin vɛks pan di wan we de du shemful tin dɛn.
Futnot Dɛn
^ Ɔ i kin bi, “ɔda pipul dɛn.”
