Akt 11:1-30
11 Di apɔsul dɛn ɛn di brɔda dɛn we bin de na Judia yɛri se pipul dɛn na ɔda neshɔn dɔn biliv Gɔd in wɔd.
2 So we Pita kam ɔp na Jerusɛlɛm, di wan dɛn we se pipul dɛn fɔ sakɔmsayz bigin fɔ tɔk bad bɔt* am
3 se: “Yu go na pipul dɛn os we nɔ sakɔmsayz ɛn it wit dɛn.”
4 So Pita ɛksplen to dɛn gud gud wan wetin apin. I se:
5 “A bin de na wan siti we dɛn kɔl Jɔpa de pre, ɛn a si vishɔn. Insay di vishɔn, a si sɔntin lɛk big linin klos we dɛn ol na di 4 kɔna dɛn de kam dɔŋ frɔm ɛvin, ɛn i kam rayt dɔŋ to mi.
6 We a luk insay gud gud wan, a si animal dɛn we gɛt 4 fut, wayl animal dɛn, animal dɛn we de drɛg na grɔn, ɛn bɔd dɛn we de flay na di skay.
7 Dɔn a yɛri wan vɔys tɛl mi se: ‘Pita, grap, kil ɛn it!’
8 Bɔt a se: ‘Nɔ, Masta, bikɔs ɛnitin we nɔ klin ɛn we pɔsin nɔ fɔ it nɔ wande kam insay mi mɔt.’
9 Fɔ di sɛkɔn tɛm, di vɔys frɔm ɛvin tɔk se: ‘Lɛf fɔ se di tin dɛn we Gɔd dɔn klin, dɔti.’
10 Di sem tin apin di tɔd tɛm, ɛn ɔltin go ɔp bak na ɛvin.
11 Dɔn da sem tɛm de, tri man dɛn we dɛn sɛn to mi frɔm Sizeria, bin tinap na di os usay wi bin de.
12 Dɔn di spirit tɛl mi fɔ go wit dɛn ɛn mek a nɔ dawt atɔl. Dɛn siks brɔda dɛn ya go wit mi, ɛn wi go insay di man in os.
13 “I tɛl wi bɔt aw i si wan enjɛl tinap na in os ɛn tɛl am se: ‘Sɛn sɔm man dɛn na Jɔpa mek dɛn kɔl Saymɔn we dɛn kin kɔl Pita,
14 ɛn i go tɛl yu wetin yu ɛn ɔl di wan dɛn we de na yu os fɔ du fɔ mek una go sev.’
15 Bɔt we a bigin fɔ tɔk, di oli spirit kam pan dɛn jɔs lɛk aw i bin kam pan wi di fɔs tɛm.
16 So a mɛmba wetin di Masta bin dɔn de tɔk, we i kin se: ‘Jɔn bin de baptayz pipul dɛn wit wata, bɔt Gɔd go baptayz una wit oli spirit.’
17 So if Gɔd gi dɛn di sem fri gift we i gi to wi we biliv di Masta Jizɔs Krays, udat na mi we go ebul fɔ stɔp Gɔd?”
18 We dɛn yɛri dɛn tin ya, dɛn lɛf fɔ agyu,* ɛn dɛn prez Gɔd se: “So Gɔd dɔn opin di we fɔ mek pipul dɛn na ɔda neshɔn dɛn ripɛnt so dat dɛn go gɛt layf.”
19 Di wan dɛn we bin skata bikɔs ɔf di trɔbul we bin de we dɛn kil Stivin go te rich na Fonishia, Sayprɔs, ɛn Antiɔk, bɔt na to Ju dɛn nɔmɔ dɛn bin de prich Gɔd in wɔd.
20 Bɔt sɔm pan di man dɛn we de wit dɛn we kɔmɔt Sayprɔs ɛn Sayrini kam na Antiɔk ɛn bigin fɔ tɔk to di pipul dɛn we de tɔk Grik ɛn tɛl dɛn di gud nyuz bɔt Masta Jizɔs.
21 Apat frɔm dat, Jiova* in an bin de wit dɛn, ɛn bɔku pan dɛn biliv ɛn fala di Masta.
22 Di kɔngrigeshɔn na Jerusɛlɛm yɛri bɔt dɛn, ɛn dɛn sɛn Banabas fɔ go na Antiɔk.
23 We i rich de ɛn si di we aw Gɔd dɔn sho in spɛshal gudnɛs* to di disaypul dɛn, i gladi ɛn bigin fɔ ɛnkɔrej dɛn ɔl fɔ kɔntinyu fɔ obe di Masta wit ɔl dɛn at.
24 In na bin gud man we bin rili gɛt oli spirit ɛn fet. Ɛn plɛnti pipul dɛn biliv di Masta.
25 So i go na Tasɔs fɔ luk gud wan fɔ Sɔl.
26 We i si am, i briŋ am kam na Antiɔk. Fɔ wan ol ia, dɛn bin de mit wit di kɔngrigeshɔn ɛn tich bɔku pipul dɛn. Ɛn na Antiɔk fɔs Gɔd mek dɛn bigin fɔ kɔl di disaypul dɛn Kristian.
27 Insay dɛn tɛm dɛn de, sɔm prɔfɛt dɛn kɔmɔt na Jerusɛlɛm ɛn kam na Antiɔk.
28 Wan pan dɛn we nem Agabɔs grap, ɛn di oli spirit mek i tɔk se tɛm go kam we tin fɔ it go rili shɔtin na di wan ol wɔl. Ɛn dat bin rili apin insay Klɔdiɔs in tɛm.
29 So di disaypul dɛn mekɔp dɛn maynd fɔ sɛn sɔm tin dɛn to di brɔda dɛn we de na Judia. Dɛn ɔl mekɔp dɛn maynd fɔ gi akɔdin to wetin dɛn gɛt.
30 Ɛn na dat dɛn du; dɛn gi Banabas ɛn Sɔl fɔ go gi di ɛlda dɛn.
Futnot Dɛn
^ Ɔ “agyu wit.”
^ Insay Grik, “dɛn sɛt dɛn mɔt.”
^ Rid Baybul Wɔd dɛn Minin.
^ Rid Baybul Wɔd dɛn Minin.
