Akt 17:1-34
17 We dɛn de go, dɛn pas na Amfipolis ɛn Apolonia ɛn kam na Tɛsalonayka, usay di Ju dɛn sinagɔg* bin de.
2 Pɔl go na dɛn sinagɔg* jɔs lɛk aw i dɔn yus fɔ de du, ɛn fɔ tri sabat, i yuz di Skripchɔ dɛn fɔ ɛp dɛn ɔndastand;
3 i bin de ɛksplen ɛn yuz skripchɔ dɛn fɔ sho se di Krays bin nid fɔ sɔfa ɛn gɛt layf bak. I se: “Dis Jizɔs we a de tɛl una bɔt, na in na di Krays.”
4 Dis mek sɔm pan dɛn biliv di Masta ɛn bigin fɔ fala Pɔl ɛn Saylas, ɛn bɔku bɔku Grik dɛn we bin de wɔship Gɔd ɛn plɛnti pan di impɔtant uman dɛn bin biliv di Masta.
5 Bɔt di Ju dɛn jɛlɔs ɛn gɛda sɔm wikɛd ɛn aydul man dɛn we bin de na di makit. Dɔn dɛn mek wan grup ɛn mek ala ala na di siti. Dɛn atak Jesin in os, ɛn dɛn bin de fɛn Pɔl ɛn Saylas fɔ briŋ dɛn na do to di grup.
6 We dɛn nɔ si dɛn, dɛn drɛg Jesin ɛn sɔm pan di brɔda dɛn go to di rula dɛn na di siti ɛn tɔk lawd wan se: “Di man dɛn we dɔn kɔz trɔbul na di wan ol wɔl dɔn kam ya,
7 ɛn Jesin wɛlkɔm dɛn na in os. Ɔl dɛn man ya de agens Siza in lɔ dɛn; dɛn se ɔda kiŋ de we na Jizɔs.”
8 We di krawd ɛn di rula dɛn na di siti yɛri dɛn tin ya, dɛn kɔnfyuz;
9 ɛn we Jesin ɛn di ɔda wan dɛn gi di mɔni we dɛn fɔ gi fɔ bel dɛnsɛf, dɛn lɛf dɛn fɔ go.
10 As nɛt kam so, di brɔda dɛn mek Pɔl ɛn Saylas go na Beria. We dɛn rich de, dɛn go na di Ju dɛn sinagɔg.*
11 Dɛn pipul ya bin rili rɛdi fɔ lan pas di wan dɛn we de na Tɛsalonayka, bikɔs dɛn bin rili want fɔ lisin to Gɔd in wɔd, ɛn dɛn bin de tek tɛm chɛk di Skripchɔ dɛn ɛvride fɔ si if di tin dɛn we dɛn dɔn yɛri na tru.
12 Dis mek bɔku pan dɛn biliv di Masta, ɛn sɔm pan di Grik uman dɛn we pipul dɛn rɛspɛkt ɛn sɔm man dɛn biliv di Masta.
13 Bɔt we di Ju dɛn we de na Tɛsalonayka no se Pɔl de prich Gɔd in wɔd bak na Beria, dɛn kam de fɔ put wɔd na di pipul dɛn yes ɛn mek dɛn vɛks.
14 Dɔn wantɛm wantɛm, di brɔda dɛn mek Pɔl go na di si, bɔt Saylas ɛn Timoti lɛf de.
15 Bɔt di wan dɛn we go lɛf Pɔl, go wit am te dɛn rich na Atɛns. Dɛn tɔn bak afta dɛn tɛl dɛn se Saylas ɛn Timoti fɔ kam to Pɔl kwik kwik wan.
16 We Pɔl bin de wet fɔ dɛn na Atɛns, i* fil bad we i si se di siti bin ful-ɔp wit aydɔl dɛn.
17 So i go na di sinagɔg* ɛn bigin fɔ ɛp di Ju dɛn ɛn ɔda pipul dɛn we de wɔship Gɔd fɔ ɔndastand di Skripchɔ dɛn. Ɛn ɛvride i bin de ɛp di wan dɛn bak we de na di makit fɔ ɔndastand.
18 Bɔt sɔm pan di Ɛpikyurian ɛn Stoik pipul dɛn we lɛk mɔtalman sɛns bigin fɔ agyu wit am, ɛn sɔm bin de tɔk se: “Wetin dis man we de tɔk bɔku want fɔ tɛl wi?” Ɔda wan dɛn se: “I tan lɛk se i de prich bɔt ɔda gɔd dɛn.” Dɛn tɔk dis bikɔs Pɔl bin de prich di gud nyuz bɔt Jizɔs ɛn bɔt aw di wan dɛn we dɔn day go gɛt layf bak.
19 So dɛn ol am ɛn kɛr am go na di Ariopagɔs ɛn aks am se: “Wetin na dis nyu tin we yu de tich?
20 Yu de tɔk bɔt tin dɛn we wi nɔ wande yɛri yet, ɛn wi want fɔ no wetin dɛn tin ya min.”
21 Infakt, we ɔl di Atɛnian dɛn ɛn di fɔrina dɛn we de* de nɔ gɛt ɛni wok fɔ du, dɛn kin jɔs de tɔk bɔt ɔ lisin to sɔntin we nyu.
22 Pɔl tinap midul di Ariopagɔs ɛn se:
“Man dɛn na Atɛns, a dɔn si se pan ɛnitin we una de du, i luk lɛk se una de fred di gɔd dɛn mɔ pas aw ɔda pipul dɛn de fred dɛn.*
23 Fɔ ɛgzampul, we a bin de pas ɛn tek tɛm wach di tin dɛn we una kin yuz fɔ wɔship, a ivin si wan ɔlta usay una rayt se, ‘To wan Gɔd we Wi Nɔ Sabi.’ So na dis Gɔd we una de wɔship pan ɔl we una nɔ sabi am, na in a de tɛl una bɔt.
24 Di Gɔd we mek di wɔl ɛn ɔltin we de insay de, we na di Masta fɔ ɛvin ɛn di wɔl, nɔ de liv na tɛmpul dɛn we dɛn mek wit an,
25 ɛn i nɔ nid ɛnibɔdi fɔ ɛp am, bikɔs i nɔ nid ɛnitin, ɛn na in gi ɔlman layf, briz fɔ blo, ɛn ɔltin.
26 Ɛn na frɔm wan man i mek ɔl di neshɔn dɛn fɔ mek dɛn de na dis wɔl, ɛn i dɔn pik di rayt tɛm dɛn ɛn mek bawndri dɛn usay mɔtalman fɔ de,
27 so dat dɛn go luk fɔ Gɔd. If dɛn rili tray tranga wan fɔ fɛn am, dɛn go si am. Infakt, i nɔ de fa frɔm ɛniwan pan wi.
28 Na in gi wi layf, na in mek wi de muv, ɛn na in mek wi de na ya, jɔs lɛk aw sɔm pan una pipul dɛn we de rayt pɔɛm bin dɔn se, ‘Wi na in pikin dɛn.’
29 “So, bikɔs wi na Gɔd in pikin dɛn, wi nɔ fɔ tink se Gɔd tan lɛk gold, silva, ston, ɔ lɛk sɔntin we mɔtalman kav ɛn dizayn.
30 Na tru se tɛm bin de we pipul dɛn bin de du dɛn tin ya bikɔs dɛn nɔ no ɛn Gɔd nɔ du dɛn ɛnitin, bɔt naw i de tɛl ɔlman we de ɔlsay se dɛn fɔ ripɛnt,
31 bikɔs i dɔn pik wan de we i go jɔj di wan ol wɔl di rayt we. I go yuz wan man we i dɔn pik fɔ du dat, ɛn i dɔn pruv se dat go apin bay we i gi di man layf bak.”
32 We dɛn yɛri se pɔsin we dɔn day gɛt layf bak, sɔm pan dɛn bigin fɔ laf, ɛn ɔda wan dɛn se: “Wi go lisin to yu bak ɔda tɛm fɔ no mɔ bɔt dis.”
33 So Pɔl lɛf dɛn,
34 bɔt sɔm pipul dɛn jɔyn am ɛn dɛn biliv di Masta. Sɔm pan dɛn na Dayonisiɔs we na bin jɔj na di kɔt na Ariopagɔs, ɛn wan uman we nem Damaris ɛn ɔda wan dɛn.
Futnot Dɛn
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Insay Grik, “in spirit.”
^ Rid Baybul Wɔd dɛn Minin.
^ Ɔ “go waka.”
^ Ɔ “lɛk Gɔd biznɛs pas ɔda pipul dɛn.”
