Job 9:1-35
9 Na de Job tɔk se:
2 “Fɔ tru a no se na so i bi.
Bɔt aw mɔtalman go gɛt rayt we i gɛt kes wit Gɔd?
3 If pɔsin want fɔ agyu wit Am,*Di pɔsin nɔ go ansa ɛniwan pan In wan tawzin kwɛstyɔn dɛn we I go aks.
4 I gɛt sɛns, ɛn i pawaful.
Udat go chalenj am we bad tin nɔ go apin to am?
5 I de muv* mawntin dɛn we nɔbɔdi nɔ de no;I de tɔnoba dɛn we i vɛks.
6 I de shek di wɔl kɔmɔt usay i de,So dat in pila dɛn go trimbul.
7 I de tɛl di san nɔ fɔ shayn,Ɛn i de mek di sta dɛn nɔ shayn.
8 Na insɛf sɛf strɛch di ɛvin,Ɛn i de waka pantap di big swɛlin dɛn na di si.
9 Na in mek di Ash,* di Kisil,* ɛn di Kayma sta dɛn,*Ɛn di sta dɛn na di sawt pat na di skay.*
10 I de du gret tin dɛn ɛn tin dɛn we nɔ pɔsibul fɔ faynd awt,Wɔndaful tin dɛn we pɔsin nɔ ebul fɔ kɔnt.
11 I pas nia mi, ɛn a nɔ ebul fɔ si am;I pas mi bɔt a nɔ no se na in.
12 We i tek sɔntin na pɔsin in an, udat go chalenj am?
Udat go aks am se, ‘Wetin yu de du?’
13 Natin nɔ go stɔp Gɔd fɔ lɛ i nɔ vɛks;Ivin di wan dɛn we de ɛp Reab* go butu bifo am.
14 Na dat mek a fɔ rili tek tɛm we a de ansa am,A fɔ tek tɛm pik mi wɔd dɛn we a de agyu wit am!
15 Ivin if na mi gɛt rayt, a nɔ go ansa am.
A go jɔs beg mi jɔj* fɔ sɔri fɔ mi.
16 If a kɔl am, i go ansa mi?
A nɔ biliv se i go lisin to mi vɔys,
17 I de yuz big big briz fɔ nyamanyama mi,Ɛn i de ad pan mi wund dɛn fɔ no rizin.
18 I nɔ de gi mi chans fɔ blo;I de kɔntinyu fɔ mek bad bad tin dɛn de mit mi.
19 If na sɔntin we gɛt fɔ du wit pawa, na in gɛt pawa.
If na sɔntin we gɛt fɔ du wit jɔstis, i go aks se: ‘Udat go tɛl mi se a rɔng?’*
20 If na mi bin gɛt rayt, na mi yon mɔt go kɔndɛm mi;Ilɛksɛf a kɔntinyu fɔ waka tret wit Gɔd,* i go se a dɔn du bad.*
21 Ilɛksɛf a de waka tret wit Gɔd,* a nɔ gɛt kɔnfidɛns pan misɛf;A gens wit* dis mi layf.
22 Ɔl na di sem. Na dat mek a de tɔk se,‘I de dɔnawe wit di inosɛnt wan dɛn* jɔs lɛk aw i de dɔnawe wit di wikɛd wan dɛn.’
23 If flɔd mek pɔsin day jɔs lɛk dat,I go laf di inosɛnt pɔsin we de sɔfa.
24 I an ova di wɔl to di wikɛd wan dɛn;I kɔva di jɔj dɛn na di wɔl dɛn yay.*
If nɔto in, na udat?
25 Mi layf de rɔn fast pas rɔnman;I de go fast, ɛn a nɔ de ɛnjɔy ɛni gud tin.
26 I de go smut lɛk bot dɛn we dɛn mek wit gras,Lɛk igul dɛn we de flay kam dɔŋ fɔ tek tin fɔ it.
27 If a tɔk se: ‘A de fɔgɛt di tin dɛn we a de kɔmplen bɔt,A go chenj di we aw a de fil ɛn gladi,’
28 A go stil de fred bikɔs ɔf ɔl mi pen dɛn,
A no se yu nɔ go si se a inosɛnt.
29 Yu go se a gilti.*
So wetin mek a fɔ sɔfa fɔ natin?
30 If a was wit wata frɔm sno we dɔn mɛlt,Ɛn a was mi an wit sop,
31 Da tɛm de yu go put mi insay ol,So dat ivin mi klos dɛn sɛf go et mi.
32 In nɔto mɔtalman lɛk mi we fɔ mek a ansa am,We fɔ mek wi tu go na kɔt togɛda.
33 Nɔbɔdi nɔ de we go kɔt kes* bitwin wi,We go bi jɔj fɔ wi.*
34 If i go lɛf fɔ bit mi*Ɛn mek di tin dɛn we i de du nɔ mek a fred,
35 Da tɛm de a nɔ go fred fɔ tɔk to am,Bikɔs mi nɔto di kayn pɔsin we de fred fɔ tɔk.
Futnot Dɛn
^ Ɔ “fɔ kɛr Am go na kɔt.”
^ Ɔ “pul kɔmɔt.”
^ I kin bi di Gret Bia sta dɛn (Ɔsa Mejɔ).
^ I kin bi di Oriɔn sta dɛn.
^ I kin bi di Piledis sta dɛn we de na wan sta grup we nem Tarɔs.
^ Insay Ibru, “di rum we de insay insay na di sawt.”
^ I kin bi wan pawaful animal na di si.
^ Ɔ i kin bi, “di wan we kɛr mi go kɔt.”
^ Insay Ibru, “go kɔl mi.”
^ Ɔ “Ilɛksɛf a inosɛnt.”
^ Insay Ibru, “bɛnbɛn.”
^ Ɔ “Ilɛksɛf a inosɛnt.”
^ Ɔ “A et; A nɔ lɛk.”
^ Ɔ “di wan dɛn we de waka tret na Gɔd in yay.”
^ Insay Ibru, “fes dɛn.”
^ Insay Ibru, “wikɛd.”
^ Ɔ “we go bi midulman.”
^ Insay Ibru, “We go put in an pan wi tu.”
^ Insay Ibru, “pul in ken kɔmɔt pan mi.”
