Lyuk 4:1-44
4 Jizɔs kɔmɔt na di Jɔdan, ɛn di oli spirit bin de pan am. Di spirit dayrɛkt am fɔ go difrɛn say dɛn na di wildanɛs*
2 fɔ 40 dez. I nɔ bin it ɛnitin dɛn tɛm dɛn de, so we di 40 dez dɔn, i angri; dɔn di Dɛbul tɛmt am.
3 Di Dɛbul tɛl am se: “If yu na Gɔd in pikin, tɛl dis ston fɔ tɔn to bred.”
4 Bɔt Jizɔs tɛl am se: “Dɛn rayt se, ‘Nɔto it* nɔmɔ go mek mɔtalman kɔntinyu fɔ liv.’”
5 Nain di Dɛbul kɛr am go ɔp wansay ɛn insay shɔt tɛm, i sho am ɔl di kiŋdɔm dɛn na di wɔl.
6 Dɔn di Dɛbul tɛl am se: “A go mek yu kɔntrol ɔl dɛn kiŋdɔm ya ɛn gi yu ɔl di gud tin dɛn we de de, bikɔs dɛn de na mi an naw, ɛn a go gi ɛnibɔdi we a want fɔ gi.
7 So if yu wɔship mi wan tɛm nɔmɔ, ɔl dɛn tin ya go bi yu yon.”
8 Jizɔs tɛl am se: “Dɛn rayt se: ‘Na Jiova* yu Gɔd yu fɔ wɔship, ɛn na in nɔmɔ yu fɔ sav.’”
9 Na de di Dɛbul kɛr am go na Jerusɛlɛm ɛn mek i tinap pantap di wɔl* na di tɛmpul, ɛn i tɛl am se: “If yu na Gɔd in pikin, jomp go dɔŋ,
10 bikɔs dɛn rayt se: ‘I go sɛn in enjɛl dɛn to yu, fɔ protɛkt yu,’
11 ɛn ‘Dɛn go ol yu na dɛn an so dat yu nɔ go nak yu fut pan ston.’”
12 Na de Jizɔs tɛl am se: “Di Skripchɔ dɛn se, ‘Yu nɔ fɔ tɛst Jiova* yu Gɔd.’”
13 So we di Dɛbul dɔn fɔ tɛmt am, i lɛf am fɔ ɔda fayn tɛm.
14 Jizɔs go na Galili ɛn Gɔd in spirit bin de pan am. Di gud tin dɛn we pipul dɛn bin de tɔk bɔt am rich na ɔl di eria dɛn we de nia de.
15 Ɛn i bigin fɔ tich na dɛn sinagɔg* dɛn, ɛn ɔlman bin de ɔnɔ am.
16 We i go na Nazarɛt, usay i mɛn, i go na di sinagɔg* di Sabat de, jɔs lɛk aw i dɔn yus fɔ du, ɛn i tinap fɔ rid.
17 So dɛn gi am prɔfɛt Ayzaya in skrol, dɔn i opin di skrol ɛn fɛn di say we dɛn rayt se:
18 “Jiova* in spirit de pan mi, bikɔs i dɔn anɔynt mi fɔ tɛl di po pipul dɛn gud nyuz. I sɛn mi fɔ tɛl di wan dɛn we na slev se dɛn go fri ɛn fɔ tɛl di wan dɛn we blayn se dɛn go si bak, ɛn mek di wan dɛn we de sɔfa lɛf fɔ sɔfa,
19 ɛn fɔ prich bɔt di ia we Jiova* go blɛs dɛn.”
20 Afta dat i rol di skrol ɛn gi am bak to di atɛndant, dɔn i sidɔm; ɔlman in yay bin de pan am na di sinagɔg.*
21 Dɔn i tɛl dɛn se: “Dis skripchɔ we una jɔs yɛri dɔn apin tide.”
22 Ɛn dɛn ɔl bigin fɔ tɔk gud tin dɛn bɔt am ɛn kɔle di fayn fayn wɔd dɛn we i de tɔk, ɛn dɛn bin de tɔk se: “Dis na Josɛf in pikin, nɔto so?”
23 Na de i tɛl dɛn se: “A no se una go pul parebul fɔ mi se, ‘Dɔktɔ, mɛn yusɛf. Di tin dɛn we wi yɛri se yu du na Kepanyɔm, du am bak na ya usay yu gro ɔp.’”
24 So i se: “Fɔ tru a de tɛl una se, no prɔfɛt nɔ de we dɛn de rɛspɛkt na di say we i gro ɔp.
25 Fɔ ɛgzampul, a de tɛl una fɔ tru se: Insay Ilayja in tɛm bɔku uman dɛn we dɛn man dɔn day bin de na Izrɛl. Insay da tɛm de, ren nɔ kam fɔ tri ia siks mɔnt, ɛn tin fɔ it bin rili shɔtin ɔlsay na di land.
26 Bɔt Gɔd nɔ sɛn Ilayja to ɛniwan pan dɛn uman dɛn de, bifo dat, i sɛn am na Zɛrafat, we de na Saydɔn, to wan uman we in man dɔn day.
27 Ɛn insay prɔfɛt Ilaysha in tɛm, bɔku pipul dɛn bin gɛt lɛprɔsi na Izrɛl, bɔt Ilaysha nɔ mɛn ɛniwan pan dɛn, na Neman nɔmɔ we kɔmɔt Siria i mɛn.”
28 Ɔl di wan dɛn na di sinagɔg* we yɛri wetin i tɔk vɛks bad bad wan,
29 ɛn dɛn grap ɛn pul am na di siti kwik kwik wan ɛn kɛr am go na di ɛj pat na di mawntin usay dɛn bil dɛn siti, fɔ sɛn am go dɔŋ.
30 Bɔt i kɔmɔt midul dɛn ɛn go in we.
31 Dɔn i go dɔŋ na wan siti na Galili we nem Kepanyɔm. Ɛn i bin de tich di pipul dɛn di Sabat de,
32 ɛn dɛn kɔle di we aw i de tich, bikɔs wetin i bin de tich dɛn kɔmɔt frɔm Gɔd.
33 Wan man bin de na di sinagɔg* we gɛt dimɔn, ɛn i ala lawd wan se:
34 “E-ya! Jizɔs di Nazarin, wetin yu want frɔm wi? Yu kam fɔ dɔnawe wit wi? A no udat yu rili bi. Yu na di Oli Wan we Gɔd sɛn.”
35 Bɔt Jizɔs tɔk pan am se: “Sɛt yu mɔt ɛn kɔmɔt insay di man.” Di dimɔn ib di man bifo dɛn ɛn kɔmɔt insay am, bɔt i nɔ du am ɛni bad tin.
36 So dis mek dɛn ɔl sɔprayz ɛn bigin fɔ tɛl dɛn kɔmpin dɛn se: “Uskayn tin dis? I de tɔk wit pawa ɛn sho se i gɛt rayt fɔ tɛl di dimɔn dɛn wetin fɔ du, ɛn dɛn de obe am!”
37 So pipul dɛn bin de tɔk bɔt am na ɔl di kɔna dɛn we de nia da eria de.
38 We Jizɔs kɔmɔt na di sinagɔg,* i go na Saymɔn in os. Saymɔn in mɔdɛnlɔ bin gɛt ay fiva, so dɛn beg Jizɔs fɔ ɛp am.
39 So i tinap nia am ɛn mek di fiva lɛf am. Di uman grap wantɛm wantɛm ɛn bigin fɔ mek it fɔ dɛn.
40 Bɔt we di san de go dɔŋ, ɔl di wan dɛn we gɛt pipul dɛn we gɛt difrɛn sik dɛn briŋ dɛn to am. I le in an pan dɛn ɔl ɛn mɛn dɛn.
41 Dimɔn dɛn bak bin de kɔmɔt insay bɔku pipul dɛn. Di dimɔn dɛn bin de ala se: “Yu na Gɔd in Pikin.” Bɔt i bin de tɔk pan dɛn ɛn nɔ alaw dɛn fɔ tɔk, bikɔs dɛn no se in na di Krays.
42 We doklin, i go na wan ples usay pipul dɛn nɔ de. Bɔku pipul dɛn bigin fɔ luk fɔ am, ɛn dɛn go usay i bin de. Dɛn tray fɔ stɔp am lɛ i nɔ go.
43 Bɔt i tɛl dɛn se: “A fɔ prich di gud nyuz bɔt Gɔd in Kiŋdɔm na ɔda siti dɛn bak, bikɔs na dat mek Gɔd sɛn mi.”
44 So i go prich na di sinagɔg* dɛn we de na Judia.
Futnot Dɛn
^ Rid Baybul Wɔd dɛn Minin.
^ Ɔ “bred.”
^ Rid Baybul Wɔd dɛn Minin.
^ Ɔ “relin; di say we ay pas ɔl.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
