Sam 19:1-14
To di wan we de dayrɛkt. Devid in siŋ.
19 Di ɛvin de sho Gɔd in glori;Di skay de tɔk bɔt di wok we i dɔn du wit in an.
2 Ɛvride, dɛn de kɔntinyu fɔ tɔk,Ɛn ɛvri nɛt, dɛn de sho wetin i sabi.
3 Dɛn nɔ de tɔk wan wɔd,Nɔbɔdi nɔ de yɛri dɛn vɔys;
4 Bɔt ɔlsay na di wɔl dɛn de yɛri dɛn sawnd,Ɛn dɛn mɛsej dɔn rich ɔlsay.
I dɔn mek tɛnt fɔ di san na ɛvin;
5 I tan lɛk ɔkɔ we de kɔmɔt na in rum;I de gladi lɛk pawaful man we de rɔn.
6 I de kɔmɔt na wan pat na di skay,Ɛn i rawnd go rich na di ɔda pat na di skay;Natin nɔ de ayd pan in hit.
7 Jiova in lɔ dɛn pafɛkt, dɛn de mek pɔsin gɛt trɛnk bak.
Pɔsin kin abop pan di tin dɛn we Jiova de tɛl am fɔ du,
I de mek di wan we nɔ gɛt sɛns gɛt sɛns.
8 Di tin dɛn we Jiova de se rayt, i de mek pɔsin gladi;Jiova in kɔmandmɛnt dɛn klin, ɛn i de mek pɔsin si klia wan.
9 Di fred we pɔsin de fred Jiova piɔ, i go de sote go.
Jiova in jɔjmɛnt dɛn tru, dɛn kɔrɛkt ɔltɛm.
10 Dɛn valyu fawe pas gold,Dɛn valyu pas klin gold,Ɛn dɛn swit pas ɔni we de kɔmɔt na ɔni os.
11 Na dɛn yu dɔn yuz fɔ wɔn yu savant;If i kɔntinyu fɔ fala dɛn, i go gɛt big blɛsin.
12 Udat go no we i mek mistek?
Duya, fɔgiv mi fɔ sin dɛn we a nɔ no se a kɔmit.
13 Nɔ alaw yu savant fɔ du tin we i nɔ gɛt rayt fɔ du;Lɛ dɛn nɔ kɔntrol mi.
Da tɛm de, a nɔ go gɛt wan bɔt,Ɛn yu go si se a nɔ sin bay wilful.
14 E Jiova, mi Rɔk ɛn di Wan We De Sev mi,Lɛ di wɔd dɛn we a de tɔk ɛn di tin dɛn we a de tink bɔt na mi at,
Bi tin dɛn we de mek yu gladi.
