LƐSIN 16

Wetin Jizɔs Bin Du We I Bin De na di Wɔl?

PLE

Bɔku pipul dɛn de tink bɔt Jizɔs as yɔŋbebi, prɔfɛt we gɛt sɛns, ɔ wan man we gɛt fɔ day. Bɔt yu tink se wi go ebul fɔ lan mɔ bɔt am if wi lan bɔt di tin dɛn we i bin de du we i de na di wɔl? Insay dis lɛsin, wi go lan bɔt sɔm impɔtant tin dɛn we Jizɔs bin du ɛn aw dɛn go bɛnifit yu.

1. Wetin na di men wok we Jizɔs bin de du?

Di men wok we Jizɔs bin de du na fɔ “prich di gud nyuz bɔt Gɔd in Kiŋdɔm.” (Rid Lyuk 4:43.) I bin de prich di gud nyuz fɔ se Gɔd go mek wan kiŋdɔm ɔ gɔvmɛnt we go sɔlv ɔl di prɔblɛm dɛn we mɔtalman gɛt. a Jizɔs bin wok tranga wan insay tri ɛn af ia fɔ tɛl pipul dɛn dis fayn mɛsej.—Matyu 9:35.

2. Wetin mek Jizɔs bin de pafɔm mirekul dɛn?

Di Baybul tɔk bɔt bɔku “pawaful wok dɛn, wɔndaful tin dɛn, ɛn sayn dɛn we Gɔd yuz [Jizɔs] fɔ du.” (Akt 2:22) Gɔd bin gi Jizɔs pawa fɔ kɔntrol di wɛda, fɔ fid bɔku bɔku pipul dɛn, mɛn di wan dɛn we sik, ɛn ivin gi layf bak to di wan dɛn we bin day. (Matyu 8:23-27; 14:15-21; Mak 6:56; Lyuk 7:11-17) Jizɔs in mirekul dɛn bin de sho klia wan se na Gɔd sɛn am. Ɛn dɛn bin de sho bak se Jiova gɛt pawa fɔ sɔlv ɔl wi prɔblɛm dɛn.

3. Wetin wi kin lan frɔm di we aw Jizɔs bin liv in layf?

Jizɔs bin de obe Jiova pan ɔltin. (Rid Jɔn 8:29.) Pan ɔl we pipul dɛn bin de tray fɔ stɔp Jizɔs, i bin du ɔl wetin in Papa tɛl am fɔ du te to di tɛm we i day. Jizɔs in ɛgzampul pruv se i pɔsibul fɔ lɛ mɔtalman sav Gɔd ilɛksɛf tin tranga fɔ am. So Jizɔs lɛf “patan fɔ [wi] fɔ fala in futmak gud gud wan.”—1 Pita 2:21.

LAN MƆ

Lan mɔ bɔt aw Jizɔs bin de prich di gud nyuz ɛn pafɔm mirekul dɛn.

4. Jizɔs bin de prich di gud nyuz

Jizɔs bin de waka fɔ lɔng na rod dɛn we gɛt dɔst fɔ prich di gud nyuz to bɔku pipul dɛn. Rid Lyuk 8:1, dɔn una tɔk bɔt dɛn kwɛstyɔn dɛn ya:

Yu tink se na di wan dɛn we bin de gɛda fɔ lisin to Jizɔs nɔmɔ i bin de prich to?
Wetin Jizɔs bin de du fɔ fɛn pipul dɛn fɔ mek i prich to dɛn?

Gɔd bin dɔn tɔk se di Mɛsaya go prich di gud nyuz. Rid Ayzaya 61:1, 2, dɔn una tɔk bɔt dɛn kwɛstyɔn dɛn ya:

Aw Jizɔs bin du wetin dis prɔfɛsi se?
Yu tink se pipul dɛn we de naw nid fɔ yɛri di gud nyuz?

5. Jizɔs bin tich impɔtant lɛsin dɛn

Jizɔs nɔ bin jɔs de prich di gud nyuz bɔt Gɔd, bɔt i bin de tich fayn lɛsin dɛn bak. Lɛ wi tɔk bɔt sɔm ɛgzampul dɛn frɔm wetin i bin tɔk ɔp wan mawntin. Rid Matyu 6:14, 34 ɛn 7:12, dɔn una tɔk bɔt dɛn kwɛstyɔn dɛn ya:

Us fayn advays Jizɔs bin gi insay dɛn vas dɛn de?
Yu tink se dis advays go ɛp pipul dɛn tide?

6. Jizɔs bin pafɔm mirekul dɛn

Jiova bin gi Jizɔs pawa fɔ pafɔm bɔku mirekul dɛn. Fɔ si wan ɛgzampul, rid Mak 5:25-34 ɔ ple di VIDIO. Dɔn una tɔk bɔt di kwɛstyɔn dɛn we de dɔŋ.

VIDIO: Jizɔs Mɛn Wan Uman We Bin Sik (5:10)

Insay di vidio, wetin di sik uman bin rili biliv?
Wetin yu lɛk bɔt dis mirekul?

Rid Jɔn 5:36, dɔn una tɔk bɔt dis kwɛstyɔn:

Wetin Jizɔs in mirekul dɛn bin de “sho” ɔ pruv bɔt am?

Yu bin no?

Bɔku pan di tin dɛn we wi no bɔt Jizɔs na tin dɛn we de insay di 4 Gɔspɛl dɛn we na Matyu, Mak, Lyuk, ɛn Jɔn. Ɛniwan pan dɛn Gɔspɛl rayta dɛn de bin rayt difrɛn tin dɛn bɔt Jizɔs. Ɛn we wi put ɔl dɛn tin dɛn de togɛda, i de mek wi no bɔku tin bɔt Jizɔs in layf.

Na MATYU

fɔs bin rayt in Gɔspɛl. I bin tɔk bɔt di tin dɛn we Jizɔs bin tich, ɛn tɔk mɔ bɔt di tin dɛn we i bin tich bɔt Gɔd in Kiŋdɔm.
MAK

in yon Gɔspɛl shɔt pas ɔl di ɔda wan dɛn. I tɔk bɔt bɔku fayn fayn tin dɛn.
LYUK

in tɔk bɔt di we aw prea bin impɔtant to Jizɔs ɛn di fayn we aw i bin de trit uman dɛn.
JƆN

mek wi no di kayn pɔsin we Jizɔs bin bi ɛn di tin dɛn we i bin de tɔk bɔt wit in tayt padi dɛn ɛn ɔda pipul dɛn.