LƐSIN 5
Wetin Mek Gɔd Mek di Wɔl?
1. Wetin mek Gɔd mek di wɔl?
Jiova mek di wɔl fɔ mɔtalman. Na di wɔl wi fɔ de. So Gɔd nɔ bin mek Adam ɛn Iv fɔ bɔn pikin dɛn fɔ go ful-ɔp ɛvin. Gɔd bin dɔn mek enjɛl dɛn fɔ de na ɛvin. (Job 38:4, 7) Gɔd put Adam na wan fayn gadin we bin de na Idɛn. (Jɛnɛsis 2:15-17) Jiova bin want mek Adam ɛn Iv ɛn dɛn pikin dɛn ɛnjɔy layf na dis wɔl sote go.—Rid Sam 37:29; 115:16.
We Gɔd bin mek di wɔl, na di gadin we bin de na Idɛn nɔmɔ na bin Paradays. Adam ɛn Iv bin fɔ dɔn bɔn pikin dɛn te dɛn ful-ɔp di wan ol wɔl ɛn mek am Paradays. (Jɛnɛsis 1:28) Gɔd nɔ go ɛva alaw mɔtalman fɔ pwɛl di wɔl kpatakpata. Na dis wɔl mɔtalman go de sote go.—Rid Sam 104:5.
Wach di fim we gɛt di taytul: Wetin Mek Gɔd Mek di Wɔl?
2. Wetin mek di wɔl nɔto Paradays naw?
Adam ɛn Iv nɔ bin du wetin Jiova tɛl dɛn, so i drɛb dɛn na di gadin we dɛn bin de. Dis mek dɛn lɔs di chans fɔ de na Paradays. Ɛn no mɔtalman nɔ ebul mek di wɔl bi Paradays igen. Frɔm di tɛm we Gɔd drɛb Adam ɛn Iv, na bad pipul dɛn dɔn bɔku na di wɔl.—Job 9:24, NW. Rid Jɛnɛsis 3:23, 24.
Fɔ se Jiova nɔ go du wetin i bin want du fɔ mɔtalman? Nɔ, i go du am. I gɛt pawa pas ɔlman, so i go mɔs du wetin i bin want du fɔ mɔtalman. (Ayzaya 45:18) I go mek wi ɛnjɔy lɛk aw Adam ɛn Iv bin de ɛnjɔy na Paradays.—Rid Sam 37:11, 34.
3. Aw di wɔl go bi Paradays bak?
Di wɔl go bi Paradays di tɛm we Jizɔs de rul. Jizɔs go kam wit Gɔd in enjɛl dɛn fɔ kam fɛt wan wɔ we di Baybul kɔl Amagɛdɔn. Na insay dis wɔ ya i go pul ɔl di wan dɛn we nɔ de du wetin Gɔd want. Dɔn Jizɔs go put Setan na jel fɔ 1,000 ia. Natin nɔ go du Gɔd in pipul dɛn bikɔs Jizɔs go de fɔ dɛn. We di wɔl go dɔn bi Paradays, dɛn go ɛnjɔy layf we go de sote go.—Rid Rɛvɛleshɔn 20:1-3; 21:3, 4.
4. Ustɛm mɔtalman go lɛf fɔ sɔfa?
Bɔku pipul dɛn kin want no ustɛm Gɔd go mek bad tin dɛn lɛf fɔ apin. Jizɔs gi “sayn” fɔ sho ustɛm di wɔl go dɔn. Di tin dɛn we de apin naw de mek layf nɔ izi fɔ mɔtalman, ɛn dɛn de sho wi se i nɔ go te igen ‘di wɔl go dɔn.’—Rid Matyu 24:3, 7-14, 21, 22.
We Jizɔs go de rul di wɔl fɔ 1,000 ia, i go pul ɔl di tin dɛn we de mek wi sɔfa. (Sam 72:7) Nɔto Kiŋ nɔmɔ Jizɔs go bi, i go bi Ay Prist bak. Dis min se, i go fɔgiv di wan dɛn we lɛk Gɔd. Ɛn Gɔd go yuz Jizɔs fɔ mek nɔbɔdi nɔ sik, ol, ɔ day igen.—Rid Ayzaya 25:8; 33:24.
5. Udat dɛn gɛt fɔ de na Paradays?
We yu go na Kiŋdɔm Ɔl, yu go mit pipul dɛn we lɛk Gɔd ɛn we de lan fɔ du wetin i want
Na pipul dɛn we de du wetin Gɔd want. (Jɔn In Fɔs Lɛta 2:17) We Jizɔs bin de na di wɔl, i tɛl in disaypul dɛn fɔ go fɛn pipul dɛn we ɔmbul, ɛn tich dɛn wetin dɛn go du fɔ mek Gɔd lɛk dɛn. Jiova de ɛp bɔku pipul dɛn tide fɔ chenj dɛn layf so dat dɛn go ebul de na Paradays. (Zɛfinaya 2:3) We pipul dɛn kin go na Kiŋdɔm Ɔl, dɛn kin lan plɛnti tin. Man dɛn kin lan aw fɔ trit dɛn wɛf ɛn pikin dɛn. Ɛn uman dɛn kin lan aw fɔ trit dɛn man ɛn pikin dɛn. Mama, papa ɛn dɛn pikin dɛn de wɔship Gɔd togɛda na Kiŋdɔm Ɔl. Ɛn dɛn de lan aw di gud nyuz go mek dɛn layf bɛtɛ.—Rid Mayka 4:1-4.
