Bɔku advays dɛn de we pipul dɛn kin gi fɔ ɛp sɔmbɔdi we in pɔsin day. Bɔt nɔto ɔl dɛn advays dɛn de kin ɛp. Fɔ ɛgzampul, sɔm pipul dɛn go advays yu lɛ yu nɔ kray ɔ lɛ yu nɔ mek pipul dɛn no aw yu de fil. Ɔda pipul dɛn go advays yu fɔ kray ɛn sho aw yu de rili fil. Di Baybul gɛt fayn advays dɛn, we gri wit wetin masta sabi bukman dɛn dɔn kam fɔ no tide.

Na sɔm kɔntri dɛn we man kray, dɛn kin se in nɔto man. Bɔt yu tink se wi fɔ shem fɔ kray usay bɔku pipul dɛn de? Dɔktɔ dɛn we de stɔdi mɔtalman in bren dɔn gri se i nɔmal fɔ lɛ sɔmbɔdi kray we in pɔsin day. We yu de kray fɔ yu pɔsin we dɔn day, i go ɛp yu fɔ bia pan ɔl we yu de fil bad fɔ yu pɔsin we yu lɛk we dɔn day. We wi kip di pen  na wi at ɔ kray na wi at, dat nɔ go gud fɔ wi ɛn i kin ambɔg wi. Di Baybul nɔ tɛl wi se i bad fɔ kray we wi pɔsin day ɔ we man kray, i min se in nɔto man. Fɔ ɛgzampul, lɛ wi tink bɔt Jizɔs. Pan ɔl we i bin gɛt di pawa fɔ gi layf bak to di wan dɛn we dɔn day, i bin stil kray usay bɔku pipul dɛn de fɔ in padi we i lɛk, we na Lazarɔs we bin dɔn day!—Jɔn 11:​33-35.

Sɔntɛnde wi kin vɛks we wi de kray fɔ wi pɔsin we dɔn day, mɔ we i day wantɛm wantɛm ɔ i day di tɛm we wi nɔ bin de fil se i go day. Bɔku rizin dɛn de we kin mek sɔmbɔdi vɛks we in pɔsin day, lɛk we pɔsin we i rɛspɛkt tɔk sɔntin we nɔ mek sɛns. Wan man na Sawt Afrika we nem Mayk bin ɛksplen se: “A bin ol 14 ia we mi papa day. We a bin de na di bɛrin, wan bigman na di Anglikan chɔch tɔk se Gɔd nid gud pipul dɛn ɛn i kin tek dɛn kwik kwik wan. * Dat bin mek a vɛks bikɔs wi bin rili nid wi papa. Naw 63 ia dɔn pas, bɔt a stil de fil am.”

Sɔmbɔdi kin fil bad we in pɔsin day bikɔs i kin fil se na wetin i du na in mek di pɔsin day. Mɔ we di pɔsin day di tɛm we i nɔ bin de tink se i go day. I go bigin de wɔnda ɛn tɔk se, ‘If a bin dɔn du dis ɛn dis i nɔ bin fɔ dɔn day.’ Ɔ sɔntɛm di las tɛm we yu ɛn di pɔsin mitɔp una bin agyu. Dis kin mek yu fil bad mɔ.

If yu de fil bad ɔ yu vɛks bikɔs yu pɔsin dɔn day, i nɔ go fayn fɔ lɛ yu kip am na yu at. Bifo dat, i go fayn fɔ tɔk to yu padi we go lisin to yu ɛn ɛp yu fɔ no se i nɔmal fɔ fil da we de we yu pɔsin day. Di Baybul tɛl wi se: “Gud padi de sho lɔv ɔltɛm, ɛn in na brɔda we dɛn bɔn fɔ di tɛm dɛn we prɔblɛm kin de.”—Prɔvabs 17:​17, NW.

We wi pɔsin day, di bɛst Padi we wi go ɛva gɛt na di Pɔsin we mek wi, dat na Jiova Gɔd. Pre to am ɛn tɛl am aw yu de fil bikɔs i “bisin bɔt [yu].” (Pita In Fɔs Lɛta 5:​7, NW) Apat frɔm dat, i prɔmis se i go gi “kol at, we mɔtalman nɔ ebul ɔndastand” to di wan dɛn we du so. (Lɛta Fɔ Filipay 4:​6, 7) Ɛn na fɔ alaw Gɔd fɔ ɛp yu wit in Wɔd, di Baybul, we go kɔrej yu. Rayt sɔm skripchɔ dɛn na pepa we go kɔrej yu. (Rid di bɔks we de na dis pej.) I go fayn fɔ kram sɔm pan dɛn skripchɔ dɛn de. We yu tink gud wan bɔt dɛn skripchɔ dɛn de, i go ɛp yu na nɛt we yu wangren de ɛn we yu nɔ ebul fɔ slip.—Ayzaya 57:​15.

I nɔ tu te yet we wan 40 ia ol man we wi go kɔl Jak, in wɛf day. Na kansa bin kil in wɛf. Jak tɔk se sɔntɛnde i kin rili fil lɛk se na in wangren de. Bɔt i tɔk se: “We a pre to Jiova, a nɔ kin fil se na mi wangren de. Bɔku tɛm, a kin wek na nɛt ɛn a nɔ kin ebul fɔ slip igen. Afta we a kin dɔn rid ɛn tink gud wan bɔt sɔm skripchɔ dɛn na di Baybul we kin kɔrej mi ɛn tɛl Jiova aw a de fil, mi at kin kol ɛn a nɔ kin wɔri tumɔs igen. Dɔn a kin ebul fɔ slip.”

Wan yɔŋ uman we na Vanɛsa, in mama bin sik ɛn day. Insɛf bin si aw prea gɛt pawa. I bin tɔk se: “Di tɛm dɛn we tin nɔ kin rili izi fɔ mi, a kin jɔs kɔl Gɔd in nem ɛn bɔs kray. Jiova kin lisin to mi prea dɛn, ɛn i kin ɛp mi ɔltɛm.”

Di wan dɛn we kin gi advays to pipul dɛn we dɛn pɔsin dɔn day advays se di wan dɛn we de kray fɔ dɛn pɔsin we dɔn day fɔ de ɛp ɔda pipul dɛn ɔ du sɔm wok dɛn na dɛn eria. We dɛn du so, i go mek dɛn gladi ɛn ɛp dɛn fɔ bia. (Di Apɔsul Dɛn Wok [Akt] 20:​35) Bɔku Kristian dɛn we dɛn pɔsin dɔn day dɔn kam fɔ no se we dɛn de ɛp ɔda pipul dɛn, dat dɔn rili kɔrej dɛn.—Sɛkɛn Lɛta Fɔ Kɔrint 1:​3, 4.