1, 2. Wetin mek Pɔl bin rayt lɛta to di Ibru Kristian dɛn?

INSAY di ia 61, di kɔngrigeshɔn dɛn we bin de ɔlsay na Izrɛl bin gɛt smɔl pis. Di apɔsul Pɔl bin de na prizin na Rom, bɔt i bin op se i nɔ go tu te, dɛn go pul am de. Dɛn bin jɔs dɔn fri Timoti na prizin. Na Pɔl ɛn Timoti bin de travul ɛn dɛn ɔl tu bin de op se dɛn go go fɛn dɛn brɔda dɛn na Judia. (Di Ibru Pipul Dɛn 13:​23) Bɔt i bin lɛf fayv ia fɔ mek di Kristian dɛn na Judia, ɛn mɔ di wan dɛn we bin de na Jerusɛlɛm rɔnawe. Wetin mek wi se so? Na bikɔs Jizɔs bin dɔn tɛl in disaypul dɛn se as dɛn si sojaman dɛn rawnd Jerusɛlɛm so, dɛn fɔ rɔnawe wantɛm.—Lyuk 21:​20-24.

² I bin dɔn pas 28 ia frɔm we Jizɔs bin gi in disaypul dɛn dis wɔnin. Insay dɛn tɛm dɛn de, di Kristian dɛn we bin de na Izrɛl bin kɔntinyu fɔ du wetin Jiova want, pan ɔl we pipul dɛn bin de du bɔku bad bad tin dɛn to dɛn ɛn bɔku tin dɛn bin de tɛst dɛn fet. (Di Ibru Pipul Dɛn 10:​32-34) Bɔt Pɔl bin want fɔ rɛdi dɛn fɔ wetin go apin tumara bambay, bikɔs sɔntin gɛt fɔ apin to dɛn we go tɛst dɛn fet pas ɛni ɔda tin. (Matyu 24:​20, 21; Di Ibru Pipul Dɛn 12:​4) Dɛn go nid fɔ bia ɛn gɛt strɔng  fet so dat dɛn go du wetin Jizɔs bin dɔn tɛl dɛn, we i se dɛn fɔ rɔnawe. Na dis dɛn fɔ du if dɛn want fɔ sev dɛn layf. (Rid Di Ibru Pipul Dɛn 10:​36-39.) So Jiova bin tɛl Pɔl fɔ rayt to dɛn brɔda ɛn sista dɛn ya. Naw dɛn de kɔl dis lɛta we Pɔl rayt, Di Ibru Pipul Dɛn. Pɔl bin rayt dis lɛta fɔ ɛp dɛn so dat dɛn go tinap tranga wan fɔ wetin gɛt fɔ apin.

3. Wetin mek wi want fɔ no wetin de na di Baybul buk we nem Di Ibru Pipul Dɛn?

³ Bikɔs wi na Gɔd in pipul dɛn tide, wi want fɔ no wetin de na di Baybul buk we nem Di Ibru Pipul Dɛn. Wetin mek? Na bikɔs di tɛm we wi de naw fiba di tɛm we di Kristian dɛn bin de na Judia. Di tɛm we wi de “traŋa,” ɛn bɔku pan wi brɔda ɛn sista dɛn dɔn bia siriɔs prɔblɛm dɛn we dɔn mit dɛn ɛn dɛn dɔn bia we pipul dɛn de du dɛn bɔku bad tin dɛn. (Sɛkɛn Lɛta To Timoti 3:​1, 12) Bɔt bɔku pan wi gɛt kolat naw ɛn pipul dɛn nɔ de mek wi sɔfa. So, wi nid fɔ tinap tranga wan jɔs lɛk di Kristian dɛn insay di apɔsul Pɔl in tɛm. Wetin mek? Na bikɔs i nɔ go te igen, di tin we go tɛst wi fet pas ɛni ɔda tin we dɔn ɛva tɛst wi fet go apin.—Rid Lyuk 21:​34-36.

4. Us skripchɔ, dɛn dɔn pik fɔ bi di iatɛks fɔ 2016? Wetin mek dis iatɛks fayn?

⁴ Wetin go ɛp wi fɔ rɛdi wisɛf fɔ dis tin we gɛt fɔ apin tumara bambay? Insay di Baybul buk we nem Di Ibru Pipul Dɛn, Pɔl tɛl wi bɔku tin dɛn we go ɛp wi fɔ gɛt mɔ fet. Wan tin we rili impɔtant we Pɔl mɛmba wi de na Di Ibru Pipul Dɛn 13:​1. Dis vas ɛnkɔrej wi fɔ lɛk wi brɔda dɛn ɔltɛm. Dɛn dɔn pik Di Ibru Pipul Dɛn 13:​1 fɔ bi di iatɛks fɔ 2016.

5. Wetin di Grik wɔd we Pɔl yuz min?

⁵ Wetin i min fɔ lɛk wi brɔda dɛn? Di Grik wɔd we Pɔl yuz min “di lɔv we pɔsin kin gɛt fɔ in brɔda.” Dis kayn lɔv kin de bitwin di wan dɛn we de na di sem famili ɔ bitwin tayt padi dɛn. (Jɔn 11:​36) Wi nɔ de mek lɛk se wi na brɔda ɛn sista dɛn. Wi na brɔda ɛn sista dɛn. (Matyu 23:​8) Pɔl tɔk se: “Una fɔ lɛk una kɔmpin gud, lɛkɛ aw Kristiɛn brɔda dɛn fɔ lɛk dɛnsɛf; una fɔ want fɔ rɛspɛkt una kɔmpin.” (Lɛta Fɔ Rom 12:​10) Dɛn wɔd ya we Pɔl tɔk de sho aw wi rili lɛk wi brɔda dɛn. We wi lɛk wi brɔda dɛn lɛk aw wi lɛk wi fambul dɛn ɛn lɛk dɛn di we aw Kristian fɔ lɛk in kɔmpin, dis go mek wi bi tayt padi ɛn gɛt wanwɔd.

6. Aw tru Kristian dɛn ɔndastand di wɔd “brɔda”?

⁶ Plɛnti buk dɛn nɔ kin tɔk bɔt dis lɛk we Kristian dɛn fɔ lɛk dɛnsɛf, na dɛn Kristian buk dɛn mɔ kin tɔk se wi fɔ lɛk wi kɔmpin Kristian dɛn lɛk aw wi lɛk wi brɔda dɛn. Di Ju pipul dɛn we bin de trade bin fil se dɛn “brɔda” na pɔsin we de na dɛn famili ɛn sɔm tɛm dɛn de i kin bi sɔmbɔdi we nɔ de insay dɛn famili. Bɔt ɛnibɔdi we nɔto Ju nɔto dɛn brɔda. Bɔt wi we na tru Kristian, wi “brɔda” na ɛni ɔda tru Kristian, ilɛk us kɔntri i kɔmɔt. (Lɛta Fɔ Rom 10:​12) Jiova dɔn tich wi se wi fɔ lɛk wisɛf lɛk aw brɔda dɛn lɛk dɛnsɛf. (Fɔs Lɛta Fɔ Tɛsalonayka 4:​9) Wetin mek i impɔtant fɔ sho lɔv to wi brɔda dɛn ɔltɛm?

7. (a) Wetin na di men rizin we mek wi fɔ lɛk wi brɔda dɛn? (b) Gi wan ɔda rizin we mek i impɔtant fɔ lɛ wi rili lɛk wi brɔda dɛn.

⁷ Di men rizin we mek wi fɔ lɛk wi brɔda dɛn na bikɔs Jiova tɛl wi fɔ du so. Wi nɔ go rili ebul fɔ lɛk Jiova if wi nɔ lɛk wi brɔda dɛn. (Jɔn In Fɔs Lɛta 4:​7, 20, 21) Wan ɔda rizin na dat wi nid wisɛf, mɔ we  tin tranga. We Pɔl rayt in lɛta to di Ibru Kristian dɛn, i no se i nɔ go te igen sɔm pan dɛn gɛt fɔ lɛf dɛn os ɛn prɔpati. Jizɔs bin dɔn tɛl dɛn se da tɛm de tin nɔ go izi. (Mak 13:​14-18; Lyuk 21:​21-23) So bifo da tɛm de kam, dɛn Kristian dɛn de rili nid fɔ lɛk dɛnsɛf.—Lɛta Fɔ Rom 12:​9.

8. Wetin wi nid fɔ du naw bifo da big trɔbul bigin?

⁸ Di trɔbul we go pas ɛni ɔda trɔbul we dɔn ɛva mit mɔtalman de kam jisnɔ. (Mak 13:​19; Rɛvɛleshɔn 7:​1-3) Da tɛm de wi go nid fɔ fala dis advays: “Mi pipul dɛm, una kam insay una rum dɛm ɛn lɔk una do dɛm; una ayd unasɛf lili wayl te di veksteshɔn dɔn.” (Ayzaya 26:​20) Sɔntɛm dɛn “rum dɛm” ya go min di kɔngrigeshɔn dɛn. Na de wi de wɔship Jiova wit wi brɔda ɛn sista dɛn. Bɔt wi fɔ du sɔntin, wi nɔ fɔ jɔs de mit togɛda ɔltɛm. Pɔl mɛmba di Ibru Kristian dɛn se dɛn fɔ ɛnkɔrej dɛnsɛf fɔ sho lɔv ɛn du gud to dɛn kɔmpin dɛn. (Di Ibru Pipul Dɛn 10:​24, 25) Wi nid fɔ rili lɛk wi brɔda dɛn naw bikɔs dat go ɛp wi fɔ bia ɛni prɔblɛm we go mit wi tumara bambay.

9. (a) Us chans wi gɛt fɔ sho se wi lɛk wi brɔda dɛn tide? (b) Gi ɛgzampul dɛn bɔt aw Jiova in pipul dɛn dɔn sho se dɛn lɛk dɛn brɔda dɛn.

⁹ Wi gɛt bɔku chans fɔ sho se wi lɛk wi brɔda dɛn tide bifo da big trɔbul bigin. Bɔku pan wi brɔda dɛn de sɔfa bikɔs bad bad tin dɛn dɔn apin usay dɛn de, tin dɛn lɛk atkwek, dɛn ebi ebi ren we kin pwɛl os ɛn prɔpati, dɛn big big briz, ɛn dɛn wata we kin kɔmɔt na di si. Sɔm brɔda dɛn de bia we pipul dɛn de mek dɛn sɔfa. (Matyu 24:​6-9) Ɛn mɔni biznɛs tranga bikɔs wi de liv insay dis wɔl we kɔrɔpt. (Rɛvɛleshɔn 6:​5, 6) Bɔt di mɔ we wi brɔda dɛn de gɛt prɔblɛm dɛn, na di mɔ wi de gɛt chans fɔ sho se wi lɛk dɛn. Pan ɔl we pipul dɛn na di wɔl nɔ de sho lɔv, wi nid fɔ kɔntinyu fɔ sho se wi lɛk wi brɔda dɛn. (Matyu 24:​12) ^[1]—Rid di ɛndnot ɔnda di las paregraf.

10. Wetin wi de kam tɔk bɔt naw?

¹⁰ Pan ɔl we wi kin gɛt prɔblɛm dɛn, aw wi go kɔntinyu fɔ sho se wi lɛk wi brɔda dɛn? Wetin-ɛn-wetin wi go du fɔ pruv se wi rili lɛk wi brɔda dɛn? Afta we di apɔsul Pɔl tɔk se, “una we na brɔda, . . . fɔ lɛk una kɔmpin dɛn ɔltɛm,” i bin sho Kristian dɛn difrɛn we dɛn aw dɛn kin du am. Naw lɛ wi tɔk bɔt siks pan dɛn we dɛn ya.

11, 12. Aw wi go du gud to wi brɔda ɛn sista dɛn? (Luk di pikchɔ nia dis atikul in taytul.)

¹¹ “Una nɔ fɔgɛt se, una fɔ mek dɛn trenja we kam to una tap na una os.” (Rid Di Ibru Pipul Dɛn 13:​2.) Wetin Pɔl min we i tɔk dɛn wɔd ya? Di wɔd dɛn we Pɔl yuz min fɔ “du gud to strenja.” Sɔntɛm dis mek yu mɛmba Ebraam ɛn Lɔt. Dɛn tu man ya du gud to pipul dɛn we dɛn nɔ wande sabi. Leta Ebraam ɛn Lɔt kam fɔ no se dɛn strenja ya na bin enjɛl dɛn. (Jɛnɛsis 18:​2-5; 19:​1-3) Dɛn ɛgzampul ya ɛnkɔrej di Ibru Kristian dɛn fɔ lɛk dɛn brɔda dɛn bay we dɛn de du gud to dɛn.

¹² Aw wi go du gud to wi brɔda dɛn? Na we wi mek wi brɔda ɛn sista dɛn kam na wi os fɔ it wit wi ɔ fɔ ɛnkɔrej wisɛf. Pan ɔl we wi nɔ kin yus to di sakit ovasia ɛn in wɛf, wi kin invayt dɛn na wi os we dɛn kam na wi kɔngrigeshɔn. (Jɔn In Tɔd Lɛta 5-8) Wi nɔ nid fɔ kuk bɔku bɔku it ɔ spɛn bɔku mɔni. Di men tin we wi want fɔ du na fɔ ɛnkɔrej wi brɔda dɛn, nɔto fɔ blɔf dɛn wit wetin wi gɛt. Ɛn nɔto dɛn wan dɛn nɔmɔ we go ebul fɔ du wi gud wi fɔ invayt. (Lyuk 10:​42; 14:​12-14) Di tin we rili impɔtant na dat wi nɔ fɔ bizi te wi fɔgɛt fɔ du gud to wi brɔda ɛn sista dɛn!

13, 14. Aw wi go “mɛmba dɛn pipul we de na jel”?

 ¹³ “Una mɛmba dɛn pipul we de na jel.” (Rid Di Ibru Pipul Dɛn 13:​3.) We Pɔl rayt dis, i bin de tɔk bɔt di brɔda dɛn we de na prizin fɔseka wetin dɛn biliv. Pɔl tɛl di kɔngrigeshɔn tɛnki bikɔs dɛn bin de “sɔri fɔ dɛn pipul we de na jel.” (Di Ibru Pipul Dɛn 10:​34) Insay di 4 ia we Pɔl bin de na prizin, sɔm brɔda dɛn bin de ɛp am, bɔt ɔda wan dɛn bin de fa say. Aw dɛn go ebul fɔ ɛp Pɔl? Na bay we dɛn kɔntinyu fɔ pre fɔ am siriɔs wan.—Lɛta Fɔ Filipay 1:​12-14; Di Ibru Pipul Dɛn 13:​18, 19.

¹⁴ Tide, bɔku Witnɛs dɛn de na prizin fɔseka wetin dɛn biliv. Brɔda ɛn sista dɛn we de nia dɛn kin ebul fɔ ɛp dɛn wit tin dɛn we dɛn nid. Bɔt bɔku pan wi nɔ de nia di wan dɛn we de na prizin. So aw wi go ɛp dɛn ɛn nɔ fɔgɛt bɔt dɛn? Di lɛk we wi lɛk wi brɔda dɛn go ɛp wi fɔ pre fɔ dɛn siriɔs wan. Fɔ ɛgzampul, wi kin pre fɔ wi brɔda ɛn sista dɛn, ɛn di pikin dɛn we de na prizin insay Ɛriteria, brɔda dɛn lɛk Pawlɔs Iyasu, Izak Mogos, ɛn Nɛgidi Tɛklɛmariam, we dɔn de na prizin fɔ di pas 20 ia.

15. Aw wi go sho se wi rɛspɛkt mared?

¹⁵ “Mek ɔlman rɛspɛkt mared layf.” (Rid Di Ibru Pipul Dɛn 13:​4.) Wi kin sho bak se wi lɛk wi brɔda dɛn bay we wi de liv klin layf. (Fɔs Lɛta To Timoti 5:​1, 2) Fɔ ɛgzampul, if wi du mami ɛn dadi biznɛs wit wan brɔda ɔ sista we wi nɔ mared to, wi go ambɔg da pɔsin de ɛn in famili. Ɛn i go mek bak wi brɔda dɛn bigin dawt wi. (Fɔs Lɛta Fɔ Tɛsalonayka 4:​3-8) Tink bak bɔt aw mareduman go fil we i kam fɔ no se in man de wach dɛn rud rud pikchɔ dɛn. Yu tink se i go fil se in man lɛk am ɛn rɛspɛkt mared?—Matyu 5:​28.

16. We wi satisfay wit wetin wi gɛt, aw dat go ɛp wi fɔ sho lɔv to wi brɔda dɛn?

¹⁶ “Una fɔ satisfay wit wetin una gɛt.” (Rid Di Ibru Pipul Dɛn 13:​5.) We wi biliv Jiova, dat go ɛp wi fɔ satisfay wit wetin wi gɛt. Aw dis go ɛp wi fɔ sho se wi lɛk wi brɔda dɛn? If wi satisfay wit wetin wi gɛt, wi go mɛmba se wi Kristian brɔda ɛn sista  dɛn valyu pas mɔni ɔ prɔpati. (Fɔs Lɛta To Timoti 6:​6-8) Wi nɔ go de fɛn fɔlt pan wi brɔda dɛn ɔ grɔmbul bɔt di tin dɛn we de apin na wi layf. Ɛn wi nɔ go jɛlɔs wi kɔmpin dɛn ɔ want ɔltin fɔ wisɛf. Bifo dat, if wi satisfay wit wetin wi gɛt, wi go gɛt fri-an.—Fɔs Lɛta To Timoti 6:​17-19.

17. We wi nɔ de “fred,” aw dat go ɛp wi fɔ sho se wi lɛk wi brɔda dɛn?

¹⁷ “Natin nɔ go mek [wi] fred.” (Rid Di Ibru Pipul Dɛn 13:​6.) We wi abop pan Jiova, i go ɛp wi fɔ bia ɛnikayn prɔblɛm ɛn wi nɔ go fred. Dis fred we wi nɔ go fred go ɛp wi fɔ tink di rayt we. Ɛn we wi de tink di rayt we, wi go sho se wi lɛk wi brɔda ɛn sista dɛn bay we wi de ɛnkɔrej dɛn ɛn tɔk fayn to dɛn we dɛn gɛt prɔblɛm. (Fɔs Lɛta Fɔ Tɛsalonayka 5:​14, 15) Ivin di tɛm we da big trɔbul go de na di wɔl, wi nɔ go fred bikɔs wi no se di tɛm fɔ lɛ Jiova sev wi dɔn nia.—Lyuk 21:​25-28.

18. Wetin go ɛp wi fɔ lɛk wi ɛlda dɛn mɔ?

¹⁸ “Una mɛmba di wan dɛn we de bifo una.” (Rid Di Ibru Pipul Dɛn 13:​7, 17, NW.) Di ɛlda dɛn na wi kɔngrigeshɔn kin yuz dɛn tɛm fɔ wok tranga wan fɔ wi. We wi tink bɔt ɔl wetin dɛn de du, dat go ɛp wi fɔ lɛk dɛn mɔ ɛn gladi fɔ di wok we dɛn de du. Wi nɔ ɛva want fɔ mek dɛn at pwɛl ɔ gens bikɔs wi nɔ du di rayt tin. Bifo dat, wi want fɔ rɛdi fɔ obe dɛn ɔltɛm. We wi du dis, wi de sho se wi “rɛspɛkt dɛn ɛn lɛk dɛn fɔ ɔl di wok we dɛn de du.”—Fɔs Lɛta Fɔ Tɛsalonayka 5:​13.

19, 20. Aw wi go kɔntinyu fɔ sho se wi lɛk wi brɔda dɛn mɔ ɛn mɔ?

¹⁹ Bɔku pipul dɛn no se Jiova in pipul dɛn lɛk dɛnsɛf. Semweso, insay Pɔl in tɛm, di Kristian dɛn bin lɛk dɛnsɛf. Bɔt Pɔl bin ɛnkɔrej di brɔda dɛn fɔ lɛk dɛnsɛf mɔ ɛn mɔ. I tɛl dɛn se: “Wi de beg una fɔ lɛk dɛn pas dat.” (Fɔs Lɛta Fɔ Tɛsalonayka 4:​9, 10) Fɔ tru, wi kin ebul fɔ du sɔntin ɔltɛm fɔ sho se wi lɛk wi brɔda dɛn pas aw wi lɛk dɛn naw!

²⁰ So as wi de luk wi iatɛks na wi Kiŋdɔm Ɔl insay dis ia, lɛ wi tink gud wan bɔt dɛn kwɛstyɔn ya: A go ebul fɔ du gud mɔ to mi brɔda dɛn? Aw a go ebul fɔ ɛp wi brɔda dɛn we de na prizin? A de sho se a rɛspɛkt mared? Wetin go rili ɛp mi fɔ satisfay wit wetin a gɛt? Aw a go ebul fɔ abop pan Jiova mɔ? Wetin a go tray fɔ du bak fɔ obe di wan dɛn we de bifo? If wi tray tranga wan fɔ du mɔ pan dɛn siks tin ya, di iatɛks nɔ go jɔs bi sayn na di wɔl, i go de mɛmba wi wetin Pɔl bin advays wi na Di Ibru Pipul Dɛn 13:​1 we i se wi fɔ lɛk wi brɔda dɛn ɔltɛm.