1, 2. Aw di apɔsul Pɔl bin sho se i rili gladi fɔ di blɛsin we Gɔd de gi wi we i nɔ fit fɔ gɛt?

DI APƆSUL Pɔl bin tɔk fɔ tru se: “Di gud we [Gɔd] du fɔ mi mek a du plɛnti tin fɔ am na mi layf.” (Rid Fɔs Lɛta Fɔ Kɔrint 15:​9, 10.) Pɔl bin no klia wan se i nɔ wok fɔ mek Gɔd sɔri fɔ am ɛn i nɔ ivin fit fɔ mek Gɔd sɔri fɔ am. I bin dɔn de mek di Kristian dɛn sɔfa.

² Bifo Pɔl day, i bin rayt to Timoti se: “A tɛl Jizɔs Krays, di Masta, tɛnki. Nain de gi mi trɛnk fɔ du dis wok ɛn nain pik mi fɔ du am bikɔs i si se a go du am gud.” (Fɔs Lɛta To Timoti 1:​12-14) Us wok Pɔl bin de tɔk bɔt? I bin tɛl di ɛlda dɛn we de na di kɔngrigeshɔn na Ɛfisɔs se: “A nɔ tek mi layf mek natin, bɔt a want dɔn ɔl di wok we di Masta, Jizɔs gi mi fɔ du. Dis wok ya na fɔ tɛl pipul di Gud Nyuz bɔt aw Gɔd gud ɛn aw i lɛk mɔtalman.”—Di Apɔsul Dɛn Wok [Akt] 20:​24.

3. Us impɔtant wok Pɔl bin gɛt? (Luk di pikchɔ nia dis atikul in taytul.)

 ³ Us “Gud Nyuz” Pɔl bin de prich bɔt, ɛn aw dis gud nyus bin de sho di blɛsin we Jiova de gi wi we wi nɔ fit fɔ gɛt? Pɔl bin tɛl di Kristian dɛn na Ɛfisɔs se: “Una dɔn yɛri se Gɔd dɔn blɛs mi fɔ du di wok we go ɛp una.” (Lɛta Fɔ Ɛfisɔs 3:​1, 2) Jizɔs bin tɛl Pɔl fɔ prich di gud nyus to di wan dɛn we nɔto Ju. So dis bin mek i pɔsibul fɔ lɛ pipul dɛn we kɔmɔt na ɔda neshɔn dɛn kam jɔyn di Mɛsaya fɔ rul na in Kiŋdɔm. (Rid Lɛta Fɔ Ɛfisɔs 3:​5-8.) Pɔl bin prich wit zil ɛn i bin sɛt gud ɛgzampul fɔ Kristian dɛn we de tide. I bin sho se di blɛsin we Gɔd de gi wi we wi nɔ fit fɔ gɛt, nɔto fɔ natin.

4, 5. Wetin mek wi go se di “Gud Nyuz bɔt wɛn Gɔd go rul” ɛn “di Gud Nyuz bɔt aw Gɔd gud ɛn aw i lɛk mɔtalman” na di sem?

⁴ Insay dis tɛm we di wɔl want dɔn, di wok we Jiova in pipul dɛn gɛt na fɔ prich di “Gud Nyuz bɔt wɛn Gɔd go rul . . . so dat ɔlman go gɛt di chans fɔ yɛri ɛn biliv di Gud Nuyz.” (Matyu 24:​14) Di gud nyus bɔt di Kiŋdɔm na di sem wit “di Gud Nyuz bɔt aw Gɔd gud ɛn aw i lɛk mɔtalman.” Wetin mek wi se so? Ɔl di blɛsin dɛn we wi go gɛt frɔm Gɔd in Kiŋdɔm na bikɔs Jiova gud. (Lɛta Fɔ Ɛfisɔs 1:​3) Pɔl bin sho se i gladi fɔ di blɛsin we Jiova de gi wi we wi nɔ fit fɔ gɛt bay we i bin de prich wit zil. Wi de falamakata Pɔl in ɛgzampul?—Rid Lɛta Fɔ Rom 1:14-16.

⁵ Insay di atikul we de bifo dis wan, wi bin lan bɔt bɔku we dɛn aw wi de bɛnifit frɔm di blɛsin we Jiova de gi wi we wi nɔ fit fɔ gɛt pan ɔl we wi de sin. Bikɔs wi dɔn rili bɛnifit, wi gɛt wok fɔ du. Dis wok na fɔ tich pipul dɛn bɔt aw Jiova de sho se i lɛk wi ɛn aw dɛngo bɛnifit. Aw wi go ɛp ɔda pipul dɛn fɔ gladi fɔ di blɛsin dɛn we Gɔd de gi wi we wi nɔ fit fɔ gɛt?

6, 7. We wi tɛl ɔda pipul dɛn bɔt di day we Jizɔs day fɔ wi, aw dat de mek dɛn no di gud nyus bɔt di blɛsin we Gɔd de gi wi we wi nɔ fit fɔ gɛt?

⁶ Tide, bɔku pipul dɛn nɔ de fil bad we dɛn de sin, so dɛn nɔ no wetin mek mɔtalman nid pɔsin we go pul dɛn pan sin ɛn day. Bɔt bɔku pipul dɛn dɔn kam fɔ si se di we aw dɛn de liv dɛn layf nɔ de mek dɛn gɛt gladi at. Bɔku pipul dɛn nɔ kin no wetin na sin, aw i de ambɔg wi, ɛn wetin wi nid fɔ du fɔ lɛ wi nɔ de sin, pas we dɛn kin tɔk to Jiova Witnɛs dɛn. We pipul dɛn we rili want fɔ no mɔ bɔt Gɔd kin ɔndastand wetin na sin, dɛn kin gladi fɔ no se Jiova bin dɔn sɛn in Pikin na di wɔl fɔ kam pul wi pan sin ɛn day. Jiova du dat bikɔs in na Gɔd we gud ɛn i lɛk wi pasmak.—Jɔn In Fɔs Lɛta 4:​9, 10.

⁷ Luk wetin Pɔl tɔk bɔt Jiova in Pikin we i lɛk, i se: “Na in day mek wi fri, so dat Gɔd go fɔgiv wi sin dɛn, bikɔs i lɛk wi di kayn we we wi nɔ fit fɔ gɛt.” (Lɛta Fɔ Ɛfisɔs 1:​7) Di day we Jizɔs day na di bɛst we we Gɔd dɔn sho se i rili lɛk wi ɛn wi nɔ fit fɔ lɛ i lɛk wi so. Wi kin rili gladi fɔ no se if wi sho se wi biliv pan dis day we Jizɔs day fɔ wi, Gɔd go fɔgiv wi sin dɛn ɛn wi go gɛt klin kɔnshɛns! (Di Ibru Pipul Dɛn 9:​14) Dis na gud nyus we wi fɔ rili tɛl ɔda pipul dɛn!

8. Wetin mek mɔtalman dɛn we de sin nid fɔ bi Gɔd in padi bak?

⁸ If pipul dɛn nɔ sho se dɛn biliv pan di day we Jizɔs day, Gɔd de si dɛn as in ɛnimi dɛn. So wi gɛt wok fɔ du, wi fɔ tɛl dɛn se i pɔsibul fɔ lɛ dɛn bi Gɔd in padi. Di apɔsul Jɔn bin se: “Ɛnibɔdi we biliv pan Gɔd in Pikin go gɛt layf we go de sote go; bɔt ɛnibɔdi we nɔ du wetin di Pikin se, nɔ go gɛt di tru layf we go de sote go, ɛn Gɔd go stil de pɔnish am.” (Jɔn 3:​36) Wi gladi we Jizɔs in day dɔn mek am pɔsibul fɔ lɛ wi bi Gɔd in padi. Pɔl bin se: “Fɔ tru, una we bin dɔn tɔn una bak pan Gɔd ɛn bi in ɛnimi dɛn bikɔs na wikɛd tin dɛn nɔmɔ una de tink bɔt, i dɔn mek wi bi in padi bak we i alaw in Pikin fɔ kam day fɔ wi, so dat wi go oli, wi nɔ go gɛt ɛni bɔt, ɛn wi nɔ go gɛt wan blem bifo am.”—Lɛta Fɔ Kɔlɔse 1:​21, 22.

9, 10. (a) Us wok Krays dɔn gi in anɔyntɛd brɔda dɛn? (b) Aw di “ɔda ship dɛn” de ɛp di anɔyntɛd dɛn?

⁹ Krays dɔn gi in anɔyntɛd brɔda dɛn we de na di wɔl wan wok fɔ du. Dis wok na fɔ “mek ɔda padi dɛn fɔ Gɔd.” Pɔl bin tɛl dɛn se: “Na Gɔd du ɔl dis, nain mek Krays mek wi bi in padi dɛn, so dat wi go tap fɔ bi pipul we nɔ lɛk am, ɛn di wok we Krays gi wi na fɔ mek wi go mek ɔda padi dɛn fɔ Gɔd. Wi de tɛl pipul se Gɔd de mek mɔtalman bi Gɔd in padi dɛn tru Krays. Gɔd nɔ de mak mɔtalman in sin igen fɔ pɔnish am bambay, ɛn i dɔn tɛl wi fɔ tɛl dɛn aw dɛn go bi in padi dɛn. So na di mɛsej dis we Krays gi wi fɔ una, lɛkɛ se Gɔd insɛf de tɔk to una; na fɔseka Krays, wi de beg una: una alaw Gɔd mek i mek una tap fɔ bi pipul we nɔ lɛk am, ɛn bi in padi dɛn.”—Sɛkɛn Lɛta Fɔ Kɔrint 5:​18-20.

¹⁰ Na big ɔnɔ di “ɔda ship dɛn” gɛt fɔ ɛp di anɔyntɛd dɛn fɔ du dis wok. (Jɔn 10:​16) As mɛsenja dɛn fɔ Krays, di “ɔda ship” de du big pat pan dis wok fɔ tich pipul dɛn di tru ɛn ɛp dɛn fɔ gɛt tayt padi biznɛs wit Jiova. Dis na impɔtant pat pan di prichin wok fɔ tɛl pipul dɛn di gud nyus bɔt di blɛsin we Gɔd de gi wi we wi nɔ fit fɔ gɛt.

11, 12. Wetin mek na gud nyus fɔ mek pipul dɛn no se dɛn go ebul pre to Jiova?

¹¹ Bɔku pipul dɛn kin pre bikɔs i kin mek dɛn fil fayn, bɔt dɛn nɔ rili biliv se Gɔd de lisin to dɛn prea dɛn. Dɛn nid fɔ no se Jiova “de ansa wi prea.” Devid we na wan pan di man dɛn we rayt di Sam buk bin tɔk se: “Yu we de ansa wi prea, ɔlman na [di] wɔl go kam fɔ wɔship yu. Wɛn wi bad bin dɔn tumɔs pan wi, yu fɔgiv wi sin dɛn.”—Sam 65:​2, 3.

¹² Jizɔs bin tɛl in disaypul dɛn se: “If una tek mi nem pre fɔ ɛnitin, a go du di tin we una want mek a du.” (Jɔn 14:​14) Dis min se wi kin pre fɔ “ɛnitin” wans na sɔntin we Jiova gri fɔ. Jɔn bin rayt se: “Wi biliv se wɛn wi kam bifo Gɔd ɛn aks am fɔ ɛnitin, i go yɛri wi ɛn gi wi, if na dat in want.” (Jɔn In Fɔs Lɛta 5:​14) I rili fayn fɔ ɛp pipul dɛn no se prea nɔto sɔntin we jɔs de mek dɛn fil fayn, bɔt na wan we we wi kin “kam bifo Gɔd.” (Di Ibru Pipul Dɛn 4:​16) We wi tich pipul dɛn aw fɔ pre di rayt we, to di rayt Pɔsin, ɛn fɔ di rayt tin, wi de ɛp dɛn fɔ bi Jiova in padi ɛn gɛt kɔrej we dɛn gɛt prɔblɛm.—Sam 4:​1; 145:​18.

13, 14. (a) Us big big ɔnɔ anɔyntɛd Kristian dɛn go gɛt tumara bambay? (b) Us fayn wok anɔyntɛd Kristian dɛn go du fɔ mɔtalman?

¹³ Insay di nyu wɔl, Jiova go gi wi bɔku ɔda blɛsin dɛn we wi nɔ fit fɔ gɛt. Aw i go du dat? I go gi di 144,000 we go rul wit Krays na ɛvin wan big big ɔnɔ. Pɔl bin sho wetin na dis ɔnɔ we i rayt se: “Gɔd sɔri fɔ wi ɛn bikɔs i lɛk wi bad wan, i gi wi layf wit Krays, pan ɔl we in Spirit bin dɔn lɛf wi we wi nɔ bin gri fɔ du wetin i tɛl wi fɔ du. Na di lɛk we Gɔd lɛk wi we wi nɔ fit fɔ gɛt dɔn sev wi.” Pɔl tɔk bak se: “Lɛ wi prez Gɔd we na Masta Jizɔs Krays in Papa, bikɔs i dɔn blɛs wi we gɛt wanwɔd wit Krays wit ɔl dɛn blɛsin we de na ɛvin.”—Lɛta Fɔ Ɛfisɔs 1: 3; 2:​4, 5.

¹⁴ Wi nɔ go ebul fɔ imajin ɔl di fayn fayn blɛsin dɛn we Jiova dɔn kip fɔ anɔyntɛd Kristian dɛn we dɛn de rul wit Krays na ɛvin. (Lyuk 22:​28-30; Lɛta Fɔ Filipay 3:​20, 21; Jɔn In Fɔs Lɛta 3:​2) Na to di anɔyntɛd dɛn Jiova go gi in blɛsin we mɔtalman nɔ fit fɔ gɛt. I go du am wan spɛshal we. Dɛn go bi “di Nyu Jerusɛlɛm,” we na Krays in yawo. (Rɛvɛleshɔn 3:​12; 17:​14; 21:​2, 9, 10) Dɛn go ɛp Jizɔs fɔ “mɛn ɔl dɛn pipul ɔlɔbɔt na [di] wɔl.” Dɛn go ɛp fɔ pul mɔtalman pan sin ɛn day ɛn ɛp dɛn fɔ bi pafɛkt pipul dɛn.—Rid Rɛvɛleshɔn 22:​1, 2, 17.

15, 16. Tumara bambay, aw Jiova go sho se i lɛk di “ɔda ship dɛn”?

¹⁵ Lɛta Fɔ Ɛfisɔs 2:​7 se insay di nyu wɔl, Gɔd go gi wi blɛsin dɛn we wi nɔ fit fɔ gɛt “sote go.” Da tɛm de, ɔlman we de na di wɔl go si aw Gɔd “lɛk wi.” (Lyuk 18:​29, 30) Wan pan di bɛst we we Jiova go sho se i lɛk wi, na we i go gi layf bak to di wan dɛn we dɔn day. (Job 14:​13-15; Jɔn 5:​28, 29) Udat dɛn go gɛt layf bak? Fetful man ɛn uman dɛn we bin dɔn day bifo Krays day, ɛn di “ɔda ship dɛn” we go day fetful wan to Jiova insay di las dez. Ɔl dɛn  fetful pipul ya go gɛt layf bak ɛn dɛn go kɔntinyu fɔ sav Jiova.

¹⁶ Bɔku bɔku pipul dɛn we nɔ bin no Gɔd bifo dɛn day, go gɛt layf bak. Di apɔsul Jɔn bin rayt se: “A si dɛn pipul we bin dɔn day, dɛn bigman ɛn dɛn ɔdinari pipul, dɛn ɔl tinap bifo di chia. Sɔmbɔdi opin sɔm buk dɛn, dɔn i opin wan ɔda buk we dɛn pipul we gɛt layf sote go dɛn nem bin rayt. . . . Ɔl dɛn wan we bin dɔn day na wata kɔmɔt na di wata kam ɔp; ɔl dɛn wan we bin dɔn day we bin de na grev, rayz.” (Rɛvɛleshɔn 20:​12, 13) Di wan dɛn we go gɛt layf bak go gɛt chans fɔ lan bɔt Jiova ɛn dɛn go gɛt chans bak fɔ gri fɔ lɛ i rul dɛn. Dɛn go gɛt fɔ lan ɛn fala di Baybul in advays dɛn ɛn di nyu lɔ dɛn we go de insay di “buk dɛn.” Di nyu lɔ dɛn go bi wan ɔda we we Jiova go sho se i lɛk wi pasmak.

17. Wetin wi fɔ mɛmba we wi de du di prichin wok?

¹⁷ Na naw mɔ i impɔtant fɔ mek wi prich di gud nyus bɔt di Kiŋdɔm bikɔs i nɔ go te igen di wɔl go dɔn! (Mak 13:​10) I fayn fɔ mek wi mɛmba se di men rizin we mek wi de prich na fɔ ɔnɔ Jiova. Aw wi go ebul fɔ du dis? Wi fɔ tɛl pipul dɛn se ɔl di blɛsin dɛn we wi go gɛt na di nyu wɔl, na bikɔs Jiova rili gud to wi.

18, 19. Aw wi go ɔnɔ Jiova fɔ di blɛsin we i gi wi we wi nɔ fit fɔ gɛt?

¹⁸ We wi de prich to pipul dɛn, i go fayn mek wi tɛl dɛn se we Krays de rul na in Kiŋdɔm, mɔtalman go gɛt ɔl di blɛsin dɛn we in day kam wit ɛn wi go de pafɛkt smɔl smɔl. Di Baybul se: “Gɔd go fri dɛn, . . . lɛkɛ aw Gɔd in pikin dɛn dɔn fri.” (Lɛta Fɔ Rom 8:​21) Na di lɛk we Jiova lɛk wi nɔmɔ na in go mek dis pɔsibul.

¹⁹ Wi gɛt di ɔnɔ fɔ tɛl ɔlman bɔt di fayn prɔmis we de na Rɛvɛleshɔn 21:​4, 5: “[Gɔd] go mek dɛn nɔ kray igen; dɛn nɔ go day igen; ebi at ɛn waala nɔ go de igen; nɔbɔdi nɔ go kray igen, bikɔs dɛn tin we bin de fɔs nɔ go de igen.” Ɛn Jiova we sidɔm na di ay chia we kiŋ kin sidɔm fɔ rul tɔk se: “Luk, a de mek ɔltin nyu!” I tɔk bak se: “Rayt dɛn wɔd ya dɔŋ, bikɔs dɛn na tru ɛn pipul kin biliv dɛn.” We wi prich di gud nyus wit zil, wi de rili ɔnɔ Jiova fɔ di blɛsin we i gi wi we wi nɔ fit fɔ gɛt!