Apɔsul Pɔl bin rayt to in kɔmpin ɛlda we na Timoti se: “A de tɛl yu bifo Gɔd ɛn Krays Jizɔs ɛn di enjɛl dɛn we Gɔd dɔn pik, fɔ mek yu du dɛn tin ya, bɔt yu nɔ fɔ disayd bifo yu no di tru ɔ tek wan pɔsin bɛtɛ pas ɔda pɔsin.”—1 Tim. 5:21.

Fɔs, wi go tɔk bɔt di enjɛl dɛn we nɔ de pat pan di enjɛl dɛn we apɔsul Pɔl bin tɔk bɔt. I klia se di enjɛl dɛn we apɔsul Pɔl tɔk bɔt nɔto di 144,000. Di tɛm we Pɔl bin rayt to Timoti, no anɔyntɛd Kristian nɔ bin dɔn go yet na ɛvin. Di apɔsul dɛn ɛn ɔda anɔyntɛd Kristian dɛn nɔ bin dɔn bi spirit yet, so nɔto dɛn na “di enjɛl dɛn we Gɔd dɔn pik.”—1 Kɔr. 15:​50-54; 1 Tɛs. 4:​13-17; 1 Jɔn 3:2.

Dɔn bak, “di enjɛl dɛn we Gɔd dɔn pik” nɔ go bi di enjɛl dɛn we nɔ bin obe Jiova di tɛm fɔ di Flɔd. Dɛn enjɛl dɛn de bin jɔyn Setan ɛn tɔn to dimɔn dɛn we Jizɔs bin tɔk agens. (Jɛn. 6:2; Lyuk 8:​30, 31; 2 Pit. 2:4) Tumara bambay, Jiova go put dɛn na di ol we nɔ gɛt bɔtɔm fɔ 1,000 ia ɛn afta dat i go dɔnawe wit dɛn ɛn Setan.—Jud 6; Rɛv. 20:​1-3, 10.

“Di enjɛl dɛn we Gɔd dɔn pik” we Pɔl bin tɔk bɔt go mɔs bi di enjɛl dɛn na ɛvin we de sɔpɔt “Gɔd ɛn Krays Jizɔs.”

I pas ɔmɔs tawzin fetful enjɛl dɛn we de. (Ibru. 12:​22, 23) Wi nɔ fɔ tink se dɛn ɔl de gɛt di sem wok di sem tɛm. (Rɛv. 14:​17, 18) Mɛmba se wan tɛm, Jiova bin gi wan enjɛl di wok fɔ dɔnawe wit 185,000 Asirian sojaman dɛn. (2 Kiŋ 19:35) I go bi se Gɔd dɔn gi bɔku ɔda enjɛl dɛn di wok fɔ “pul ɔl di tin dɛn we de mek pipul dɛn sin ɛn di pipul dɛn we nɔ de obe lɔ kɔmɔt na [Jizɔs] in Kiŋdɔm.” (Mat. 13:​39-41) I go bi se Gɔd dɔn gi ɔda enjɛl dɛn bak di wok fɔ “gɛda di wan dɛn we Gɔd dɔn pik” fɔ go na ɛvin. (Mat. 24:31) Ɛn stil, Gɔd gi ɔda enjɛl dɛn di wok fɔ “protɛkt wi ɛnisay we [wi] go.”—Sam 91:11; Mat. 18:10; Luk bak Matyu 4:11; Lyuk 22:43.

Sɔntɛm “di enjɛl dɛn we Gɔd dɔn pik” we 1 Timoti 5:21 tɔk bɔt go mɔs bi di enjɛl dɛn we Gɔd dɔn gi di wok fɔ ɛp fɔ kia fɔ di kɔngrigeshɔn dɛn. Di ɔda vas dɛn ɛp wi fɔ no se Pɔl bin gi advays bɔt aw di ɛlda dɛn fɔ du dɛn wok, ɛn i tɔk se di wan dɛn we de na di kɔngrigeshɔn fɔ rɛspɛkt di ɛlda dɛn. We di ɛlda dɛn de du dɛn wok, dɛn “nɔ fɔ disayd bifo [dɛn] no di tru ɔ tek wan pɔsin bɛtɛ pas ɔda pɔsin” ɛn dɛn fɔ tek tɛm tink bifo dɛn disayd wetin fɔ du. Wan gud rizin we mek dɛn fɔ fala di advays we Pɔl gi na bikɔs dɛn de wok “bifo Gɔd ɛn Krays Jizɔs ɛn di enjɛl dɛn we Gɔd dɔn pik.” Dis mek wi no klia wan se sɔm enjɛl dɛn de we gɛt wok dɛn we gɛt fɔ du wit di kɔngrigeshɔn, lɛk fɔ protɛkt Gɔd in pipul dɛn, fɔ mek shɔ se di prichin wok de go bifo, ɛn fɔ tɛl Jiova wetin de apin.—Mat. 18:10; Rɛv. 14:6.