A bin laf bikɔs a nɔ bin tink se mi padi na pɔsin we lɛk Gɔd biznɛs. So a aks am se, “Wetin yu no bɔt di Baybul?” I nɔ bin ansa mi wantɛm wantɛm. Faynali, i tɛl mi se in mama na Jiova Witnɛs, ɛn i bin dɔn lan sɔm tin dɛn frɔm am. A bin want fɔ no mɔ, so a aks am fɔ mek i tɛl mi mɔ tin dɛn.

Wi bin tɔk fɔ lɔng tɛm da nɛt de. Mi padi bin tɛl mi se di Baybul se na Setan de rul di wɔl. (Jɔn 14:​30) Sɔntɛm yu dɔn sabi dis frɔm we dɛn bɔn yu, bɔt fɔ mi, wetin i bin de tɔk bin nyu ɛn a bin want fɔ no mɔ. A bin de yɛri ɔltɛm se na Gɔd we gud ɛn we de jɔj fia wan de rul di wɔl. Bɔt dis nɔ bin mek sɛns to mi bikɔs ɔf wetin a bin dɔn si na layf. Pan ɔl we na 26 ia nɔmɔ a bin ol, a bin dɔn si bɔku tin dɛn we de mek a wɔri.

Mi papa na bin paylɔt we bin de flay plen fɔ di Amɛrika sojaman dɛn. We a bin smɔl, a bin no se i pɔsibul fɔ mek dɛn fɛt wɔ, ɛn di sojaman dɛn bin rɛdi fɔ faya dɛn gɔn ɛnitɛm. Di wɔ na Viɛtnam bin apin di tɛm we a bin de na kɔlɛj na Kalifonia. A bin de jɔyn studɛnt dɛn fɔ fɛt fɔ wi rayt. Polisman dɛn bin de rɔnata wi wit koboko, ɛn wi bin de rɔn bikɔs dɛn faya tia gas pan wi. Di tia gas bin de chok wi ɛn wi nɔ bin ebul fɔ si fayn. Na bin tɛm we pipul dɛn bin de fɛt-fɛt, ɛn dɛn nɔ bin de obe wetin di gɔvmɛnt se. Dɛn bin de kil pipul dɛn we bin de put an pan pɔlitiks, dɛn bin de fɛt fɔ dɛn rayt, ɛn dɛn bin de rayɔt. Ɔlman bin de tɔk difrɛn tin bɔt wetin dɛn fɔ du. Wi nɔ bin ɔndastand wetin fɔ du.

Insay 1970, a bigin wok na di nɔt pat na Alaska ɛn a bin de mek bɔku mɔni. Dɔn a bin go na Lɔndɔn, a bay wan bayk, ɛn rayd go na di sawt pat, ɛn a nɔ bin gɛt ɛni patikyula say na maynd fɔ go. Afta sɔm mɔnt, a bin rich na Afrika. We a bin de go, a bin mit pipul dɛn  we bin de wish fɔ rɔnawe frɔm ɔl dɛn prɔblɛm dɛn.

So bikɔs ɔf wetin a bin de si ɛn yɛri, di tin we di Baybul de tich bin mek sɛns to mi, we i se na wikɛd pɔsin de kɔntrol di tin dɛn we de apin na di wɔl. Bɔt if nɔto Gɔd bin de kɔntrol di wɔl, wetin i de du? A bin want fɔ no.

Afta sɔm mɔnt, a bin ebul fɔ fɛn di ansa. As tɛm de go, a bin kam fɔ no ɛn lɛk bɔku man ɛn uman dɛn we bin sho se dɛn fetful to di wangren tru Gɔd, ilɛk wetin de apin to dɛn.

We a bin go bak na Lɔndɔn, a go to mi padi in mama, ɛn i gi mi wan Baybul. Leta, we a go na Amstadam, na Nɛdalands, wan brɔda bin si mi de rid ɔnda stritlayt, ɛn i ɛp mi fɔ lan mɔ. Dɔn bak, a go na Dublin, na Ayriland, ɛn a fɛn Jiova Witnɛs dɛn branch ɔfis. A nak na di frɔnt domɔt. Na de a bin mit Atɔ Matyus, we na wan brɔda we gɛt sɛns ɛn ɛkspiriɛns. A aks am fɔ stɔdi mi di Baybul, ɛn i bin gri fɔ stɔdi mi.

A bin stat fɔ stɔdi wit zil, ɛn a bin rɛdi fɔ rid di buk ɛn magazin dɛn we Jiova Witnɛs dɛn dɔn mek. Ɛn as yu no, a bin de rid di Baybul bak. A bin rili gladi! Na kɔngrigeshɔn mitin dɛn, a bin si se ivin pikin dɛn no di ansa dɛn fɔ kwɛstyɔn dɛn we ivin di wan dɛn we lan bɔku buk nɔ ebul fɔ gɛt ansa to fɔ lɔng tɛm. Kwɛstyɔn dɛn lɛk: ‘Wetin mek bad bɔku na di wɔl? Udat na Gɔd? Wetin de apin we pɔsin day?’ Ɔl mi padi dɛn na bin Witnɛs dɛn. Dat bin izi bikɔs a nɔ bin sabi ɛni ɔda pɔsin na di wan ol kɔntri. Dɛn bin ɛp mi fɔ kam fɔ lɛk Jiova ɛn fɔ want fɔ du wetin i want.

A bin baptayz insay 1972. Afta wan ia, a bigin fɔ payɔnia ɛn jɔyn wan smɔl kɔngrigeshɔn na Nyuri, na di nɔt pat na Ayriland. A bin rɛnt wan ston os we de nia di mawntin, usay Jiova Witnɛs dɛn nɔ bin de. Kaw dɛn bin de na di fil we de nia mi os, ɛn a bin de praktis mi tɔk bifo dɛn. I tan lɛk se dɛn bin de tek tɛm lisin as dɛn de cham. Dɛn nɔ bin de kansul mi, bɔt dɛn bin ɛp mi fɔ lan aw fɔ luk di ɔdiɛns we a de gi tɔk. Insay 1974, dɛn bin mek mi spɛshal payɔnia ɛn Nayjɛl Pit bin jɔyn mi, we bin bi mi padi fɔ lɔng tɛm.

Da tɛm de, bɔku fɛt-fɛt bin de na di nɔt pat na Ayriland. So sɔm pipul dɛn bin de kɔl di nɔt pat na Ayriland “di land we gɛt bɔm ɛn bulɛt.” I bin kɔmɔn fɔ si we pipul dɛn de fɛt na  strit, we dɛn bin de shut pipul dɛn, ɛn we dɛn bin de bɔm motoka dɛn. Bɔku tɛm, di prɔblɛm dɛn bin gɛt fɔ du wit pɔlitiks ɛn rilijɔn biznɛs. Bɔt di Protɛstant dɛn ɛn di Katolik dɛn bin no se Jiova Witnɛs dɛn nɔ de put an pan pɔlitiks, so wi bin ebul fɔ prich fri ɛn sef wan. Di pipul dɛn we wi bin de prich to bin no ustɛm ɛn usay di fɛt-fɛt go de, ɛn dɛn bin de wɔn wi fɔ mek wi nɔ go dɛn say dɛn de.

Bɔt stil, prɔblɛm dɛn bin de. Wan de, mi ɛn Dɛnis Karigan, we insɛf na payɔnia, bin de prich na wan tɔŋ we de nia wi, usay no Jiova Witnɛs nɔ bin de, ɛn na wantɛm nɔmɔ wi bin dɔn go de. Wan uman bin tɔk se wi de wok as sikrit British sojaman dɛn, sɔntɛm na bikɔs wi nɔ bin de tɔk lɛk aw di Ayrish pipul dɛn de tɔk. Wetin di uman tɔk bin mek wi rili fred. If yu de tɔk fayn to sojaman dɛn, dɛn go kil yu ɔ shut yu na yu ni. We wi bin tinap na do, de fil kol ɛn na wi nɔmɔ bin de, ɛn de wet fɔ di bɔs, wi si wan motoka kam pak frɔnt di shɔp usay di uman we bin lay pan wi de. I kɔmɔt na do ɛn tɔk to di tu man dɛn na di motoka. Di uman nɔ bin westɛm fɔ pɔynt to wi. Di man dɛn bin tek tɛm drayv kam nia wi ɛn aks wi tu-tri kwɛstyɔn dɛn bɔt di tɛm we di bɔs fɔ kam. We di bɔs kam, dɛn bin tɔk to di drayva. Wi nɔ bin de yɛri wetin dɛn bin de se. No ɔda pasenja nɔ bin de, so wi bin biliv se dɛn de plan fɔ du wi bad we wi kɔmɔt na di tɔŋ. Bɔt nɔto dat bin apin. As a kam dɔŋ di bɔs, a aks di drayva se: “Dɛn man dɛn we bin tɔk to yu bin aks yu bɔt wi?” I ansa se: “A no udat una bi, ɛn a bin tɛl dɛn. Una nɔ wɔri. Una sef.”

Insay 1976 we wi bin gɛt di distrikt asɛmbli a na Dublin, a bin mit Pɔlin Lomaks, we na spɛshal payɔnia we bin kɔmɔt na Ingland ɛn kam waka. Na bin spirichwal, ɔmbul, ɛn fayn sista. In ɛn in brɔda we nem Re bin mɛn na di trut. Afta wan ia, mi ɛn Pɔlin bin mared ɛn wi bin kɔntinyu spɛshal payɔnia wok na Balimina, na di nɔt pat na Ayriland.

Wi bin du di sakit wok fɔ sɔm tɛm na say dɛn lɛk Bɛlfast, Lɔndɔndɛri, ɛn ɔda eria dɛn we bin rili bad. Wi brɔda ɛn sista dɛn bin dɔn lɛf di tin dɛn we dɛn bin biliv, fɔ tek wan pɔsin bɛtɛ pas ɔda pɔsin, ɛn fɔ et ɔda pipul dɛn so dat dɛn go sav Jiova; dɛn fet bin ɛnkɔrej mi. Jiova bin rili blɛs ɛn protɛkt dɛn.

A bin de na Ayriland fɔ tɛn ia. Dɔn, insay 1981 dɛn bin invayt wi fɔ atɛnd di 72 klas na Giliad. Afta wi gradyuet, dɛn bin sɛn wi na Salon, Wɛst Afrika.

Wi bin de na wan mishɔnari om wit 11 pipul dɛn; dɛn bin rili nays. Wi ɔl bin de yuz wan kichin, tri tɔylɛt, tu batrum, wan tɛlifon, wan wɔshin mashin, ɛn wan mashin fɔ dray klos. Layt bin de go fast fast, ɛn wi nɔ kin no ustɛm i de go. Bɔku arata dɛn bin de ɔp di ruf, ɛn kobra snek dɛn bin de kam insay di ɔndasela.

Pan ɔl we i nɔ bin izi fɔ de na Salon, wi bin rili ɛnjɔy di prichin wok. Pipul dɛn bin rɛspɛkt di Baybul ɛn dɛn bin de lisin fayn we wi de tɔk to dɛn. Bɔku pan dɛn bin stɔdi di Baybul ɛn kam fɔ bi Jiova Witnɛs. Di pipul dɛn bin de kɔl mi “Mista Rɔbɔt,” ɛn dɛn bin de kɔl Pɔlin “Misis Rɔbɔt.” Bɔt afta sɔm tɛm, a bin de yuz bɔku pan mi tɛm fɔ wok na di branch ɔfis, so a nɔ bin de go fil savis bɛtɛ. Dat bin mek pipul dɛn bigin kɔl Pɔlin “Misis Pɔlin,” dɔn dɛn bigin  kɔl mi “Mista Pɔlin.” Pɔlin bin lɛk we dɛn de kɔl wi da we de!

Bɔku pan di brɔda ɛn sista dɛn bin po, bɔt Jiova bin de gi dɛn wetin dɛn nid ɔltɛm, sɔntɛnde i bin de du am wɔndaful we. (Mat. 6:​33) A mɛmba wan sista we bin jɔs gɛt mɔni fɔ bay it we in ɛn in pikin dɛn go it da de de. Bɔt i bin gi ɔl di mɔni to wan brɔda we bin sik ɛn we nɔ bin gɛt mɔni fɔ bay maleria mɛrɛsin. Leta da de de, di sista bin sɔprayz we wan uman bin kam pe am fɔ plant in ia. Dɛn kayn tin dɛn ya bin de apin bɔku tɛm.

Wi bin de na Salon fɔ nayn ia. Dɔn dɛn sɛn wi go na di Bɛtɛl na Nayjiria. Wi bin go de na branch ɔfis we big. A bin de du di sem kayn ɔfis wok we a bin de du na Salon, bɔt dis muf we wi muf na bin big chenj fɔ Pɔlin, ɛn i nɔ bin izi fɔ am. I bin dɔn yus fɔ spɛn 130 awa ɛni mɔnt na fil savis, ɛn i bin gɛt Baybul stɔdi dɛn we bin de du wɛl. Bɔt naw i de wok na di say we dɛn de so klos, ɛn i bin de mek klos dɛn we dɔn pwɛl. I bin tek sɔm tɛm fɔ lɛ i ajɔst, bɔt i bin kam fɔ no se di brɔda ɛn sista dɛn rili gladi fɔ di wok we i de du, ɛn i bin pe atɛnshɔn fɔ ɛnkɔrej in kɔmpin Bɛtɛlayt dɛn.

Wi nɔ bin sabi di kɔlchɔ we de na Nayjiria, ɛn wi bin gɛt bɔku tin fɔ lan. Wantɛm, wan brɔda bin kam na mi ɔfis fɔ sho mi wan sista we bin jɔs dɔn bigin wok na Bɛtɛl. We a stret mi an fɔ shek di sista in an, i butu bifo mi fut. Dat bin mek a rili sɔprayz! Ɛn wantɛm wantɛm tu skripchɔ dɛn kam na mi maynd, we na: Akt 10:​25, 26 ɛn Rɛvɛleshɔn 19:​10. A bin de tink to misɛf se, ‘Fɔ se a fɔ tɛl am lɛ i nɔ butu bifo mi?’ Bɔt a mɛmba bak se dɛn bin jɔs dɔn tek am na Bɛtɛl, so i sabi wetin di Baybul de tich.

As wi kɔntinyu di tɔk, a bin de rili shem. Bɔt afta dat, a du sɔm risach. A bin kam fɔ no se di sista bin de fala wan kɔstɔm we dɛn bin stil gɛt na sɔm pat dɛn na di kɔntri da tɛm de. Man dɛnsɛf bin de butu bifo pipul dɛn da sem we de. Na we aw dɛn bin de sho rɛspɛkt. Nɔto wɔship dɛn bin de wɔship pipul dɛn, ɛn ɛgzampul dɛn lɛk dande de na di Baybul. (1 Sam. 24:​8) Bikɔs a nɔ bin no bɔt da dɛn kɔstɔm de, a bin gladi we a nɔ bin tɔk ɛnitin we go mek mi sista shem.

Wi bin mit bɔku brɔda ɛn sista dɛn na  Nayjiria we dɔn sho se dɛn rili gɛt fet insay di ia dɛn we dɔn pas. Tink bɔt Ayzaya Adagbona. b I bin lan di trut we in na bin yɔŋman, bɔt dɛn bin kam fɔ no se i gɛt lɛprɔsi. Dɛn bin sɛn am na wan lɛprɔsi ɔspitul, usay na in wangren na bin Jiova Witnɛs. Pan ɔl we pipul dɛn bin de agens am, i bin ɛp pas 30 pipul dɛn we gɛt lɛprɔsi fɔ tek di trut na da say de, ɛn dɛn bin ebul fɔ gɛt wan kɔngrigeshɔn.

Insay 1996, dɛn bin sɛn wi na Kenya branch. Dis na bin mi fɔs tɛm fɔ go na di kɔntri bak frɔm di tɛm we a bin kɔmɔt de, as a tɔk na di biginin. Wi bin de na Bɛtɛl. Ɛn nɔto mɔtalman dɛn nɔmɔ bin de kam fɛn wi na Bɛtɛl, ivin mɔnki dɛn we gɛt blak fes bin de kam. Dɛn bin de tif di sista dɛn frut we dɛn bin de tot na dɛn ed. Wan de, wan sista na Bɛtɛl bin lɛf in winda opin. We i kam bak, i bin mit bɔku mɔnki dɛn de ɛnjɔy fɔ it di fud we bin de na in rum. I ala lawd wan ɛn rɔn go na do. Di mɔnki dɛnsɛf ala ɛn jomp kɔmɔt na di winda.

Mi ɛn Pɔlin bin jɔyn wan Swaili kɔngrigeshɔn. Afta shɔt tɛm, dɛn bin tɛl mi fɔ de kɔndɔkt di Kɔngrigeshɔn Buk Stɔdi (we naw wi de kɔl Kɔngrigeshɔn Baybul Stɔdi). Bɔt a nɔ bin sabi tɔk di langwej bɛtɛ. So a bin de stɔdi bifo tɛm fɔ mek a go ebul fɔ rid di kwɛstyɔn dɛn. Bɔt if di kɔmɛnt we di brɔda ɛn sista dɛn bin de gi bin difrɛn smɔl frɔm wetin de na di buk, a nɔ bin de ɔndastand dɛn. I nɔ bin rili izi! Mi at bin pwɛl fɔ di brɔda ɛn sista dɛn. A bin gladi fɔ we dɛn bin peshɛnt ɛn put dɛnsɛf dɔŋ fɔ alaw mi fɔ kɔndɔkt di mitin.

Wi nɔ bin de na Kenya rich wan ia. Dɔn insay 1997, dɛn bin invayt wi fɔ go na Bɛtɛl na Bruklin, insay Amɛrika. Naw wi de na kɔntri usay pipul dɛn gɛt bɔku mɔni, we kin kam wit in yon prɔblɛm dɛn. (Prɔv. 30:​8, 9) Bɔt ivin insay da kayn kɔntri de, wi brɔda ɛn sista dɛn de sho se dɛn gɛt strɔng fet. Wi brɔda ɛn sista dɛn de yuz dɛn tɛm ɛn di tin dɛn we dɛn gɛt fɔ sɔpɔt di gud wok we Jiova in ɔganayzeshɔn de du, nɔto fɔ mek dɛn jɛntri nɔmɔ.

Insay di ia dɛn we dɔn pas, wi dɔn si aw wi brɔda ɛn sista dɛn de sho se dɛn gɛt fet pan ɔl we di tin dɛn we de apin to dɛn difrɛn. Insay Ayriland, wi si se wi brɔda ɛn sista dɛn gɛt fet pan ɔl we fɛt-fɛt bin de de. Insay Afrika, brɔda ɛn sista dɛn de sho se dɛn gɛt fet pan ɔl we dɛn po ɛn dɛn de na ples dɛn usay Jiova Witnɛs dɛn nɔ de. Insay Amɛrika, di brɔda ɛn sista dɛn de sho se dɛn gɛt fet pan ɔl we dɛn gɛt mɔni ɛn prɔpati dɛn. Jiova go dɔn rili gladi we i de luk frɔm ɛvin ɛn si pipul dɛn we de sho se dɛn lɛk am pan ɔl we difrɛn tin dɛn de apin to dɛn.

Tɛm dɔn flay kwik kwik wan, lɛk aw “pɔsin we de mek kɔntriklos kin . . . paspas trɛd kwik kwik” wan. (Job 7:​6) Naw wi de wok wit ɔda brɔda ɛn sista dɛn na di wɔl ɛdkwata na Wɔwik, insay Amɛrika, ɛn wi rili gladi fɔ kɔntinyu fɔ wok wit pipul dɛn we rili lɛk dɛnsɛf. Wi gladi ɛn satisfay wit wetin wi ebul fɔ du fɔ sɔpɔt wi Kiŋ, Jizɔs Krays, we go blɛs in bɔku bɔku fetful disaypul dɛn jisnɔ.—Mat. 25:​34.