YU DƆN ɛva gɛt prɔblɛm ɛn fil se nɔbɔdi nɔ de fɔ ɛp yu? Wi de insay tɛm we “tin tranga ɛn bad,” so dat kin mek wi at pwɛl ɛn fil se na wi wangren de. (2 Tim. 3:1) Bɔt wi gɛt pipul dɛn we go ɛp wi wit wi prɔblɛm dɛn. Di Baybul sho wetin mek i impɔtant fɔ gɛt tru tru padi dɛn “di tɛm we prɔblɛm go kam.”​—Prɔv. 17:17.

Apɔsul Pɔl bin bɛnifit frɔm di padi biznɛs we i bin gɛt wit di wan dɛn we dɛn ɔl bin de travul fɔ du di mishɔnari wok. (Kol. 4:7-11) We Pɔl bin de na prizin insay Rom, in padi dɛn bin ɛp am fɔ du di wok dɛn we i nɔ bin ebul fɔ du fɔ insɛf. Fɔ ɛgzampul, Ɛpafrodaytɔs bin go wit di tin dɛn we di brɔda dɛn na Filipay bin sɛn fɔ Pɔl. (Fil. 4:18) Tikikɔs bin go wit di lɛta dɛn we Pɔl rayt na difrɛn kɔngrigeshɔn dɛn. (Kol. 4:7; luk di stɔdi not.) Pɔl bin ebul fɔ kɔntinyu fɔ ɛnkɔrej di kɔngrigeshɔn dɛn pan ɔl we i bin de ɔnda aws arɛst ɔ we i bin de na prizin bikɔs i bin gɛt padi dɛn we bin de sɔpɔt am. Aw wi go bi tru tru padi tide?

Brɔda ɛn sista dɛn de tide we de sho wetin tru tru padi dɛn kin du fɔ ɛp dɛnsɛf. Lɛ wi tɔk bɔt wan sista we bin sho se in na tru tru padi to Ilisabɛt, we na wan rɛgyula Payɔnia we de na Spen. We dɔktɔ tɛl Ilisabɛt se in mama gɛt kansa we go mek i day, di sista bin de yuz vas dɛn na di Baybul fɔ rayt mɛsej ɛn sɛn am to Ilisabɛt fɔ ɛnkɔrej am. Ilisabɛt bin tɔk se, “Dɛn mɛsej dɛn de bin de gi mi di trɛnk we a nid ɛvride ɛn mek a nɔ fil se na mi wangren de.”​—Prɔv. 18:24.

Wi kin mek wi padi biznɛs wit wi brɔda ɛn sista dɛn tayt mɔ ɛn mɔ we wi de ɛp dɛn fɔ du di prichin wok ɛn fɔ atɛnd mitin. Fɔ ɛgzampul, yu go ebul fɔ go tek wan ol brɔda ɔ sista fɔ go wit am na mitin ɔ fil savis? If yu du dat, una go mɔs ebul fɔ ɛnkɔrej unasɛf. (Rom. 1:12) Bɔt, sɔm brɔda ɛn sista dɛn nɔ ebul fɔ kɔmɔt na dɛn os. Aw wi go sho dɛn se wi na tru tru padi?

Sɔm pan wi kɔmpin Kristian dɛn gɛt wɛlbɔdi prɔblɛm ɔ ɔda tin dɛn we de mek dɛn nɔ ebul fɔ atɛnd mitin na Kiŋdɔm Ɔl. Lɛ wi tɔk bɔt wan brɔda we nem Devid in ɛgzampul we bin gɛt kansa. I pas siks mɔnt we dɛn bin de trit am fɔ kansa. We Devid bin de tek in tritmɛnt, in ɛn in wɛf Lidia, nɔ bin de atɛnd mitin na Kiŋdɔm Ɔl.

Aw di brɔda ɛn sista dɛn na di kɔngrigeshɔn bin ɛp dɛn. Sɔm pan di brɔda ɛn sista  dɛn na Kiŋdɔm Ɔl bin de tray fɔ yuz vidiokɔnfrɛns fɔ tɔk to dɛn afta ɛni mitin. Ɛn we Devid ɛn Lidia gi kɔmɛnt, di brɔda ɛn sista dɛn kin sɛn mɛsej to dɛn fɔ ɛnkɔrej dɛn. Aw dat bin mek dɛn fil? Dat bin mek Devid ɛn Lidia nɔ fil se nɔbɔdi nɔ bisin bɔt dɛn.

Yu go ebul mek arenjmɛnt fɔ prich wit di wan dɛn we nɔ ebul fɔ kɔmɔt na dɛn os? If wi tray fɔ ajɔst wi shɛdul smɔl fɔ ɛp dɛn, wi go mek dɛn no se wi nɔ fɔgɛt bɔt dɛn. (Prɔv. 3:27) Yu go ebul mek arenjmɛnt fɔ mek una rayt lɛta ɔ du tɛlifon witnɛsin? Di wan dɛn we nɔ ebul fɔ kɔmɔt na dɛn os kin ebul fɔ yuz vidiokɔnfrɛns fɔ jɔyn mitin fɔ fil savis. Devid ɛn Lidia bin rili gladi fɔ dis arenjmɛnt. Devid bin tɔk se, “Di shɔt tɛm we wi kin spɛn wit di brɔda ɛn sista dɛn fɔ mitin fɔ fil savis ɛn prea kin rili ɛnkɔrej wi.” Dɔn, if i pɔsibul, yu kin aks di pɔsin we nɔ ebul fɔ kɔmɔt na in os if yu kin go wit yu Baybul stɔdi na in os wan wan tɛm fɔ mek una du di stɔdi togɛda.

We wi de wok wit wi brɔda ɛn sista dɛn we nɔ ebul fɔ kɔmɔt na os ɛn notis di fayn kwaliti dɛn we dɛn gɛt, dat go mek wi padi biznɛs wit dɛn tayt. Fɔ ɛgzampul, we una de prich togɛda ɛn yu si aw dɛn de yuz Gɔd in Wɔd fayn fayn wan fɔ tɔch pipul dɛn at, sɔntɛm dat go mek yu gɛt rɛspɛkt fɔ dɛn mɔ. We yu de ɛp yu kɔmpin Kristian dɛn fɔ prich ɛn atɛnd di mitin dɛn, yu go gɛt bɔku padi dɛn.​—2 Kɔr. 6:13.

We tin nɔ bin izi fɔ Pɔl, in padi Taytɔs bin go fɛn am ɛn dat bin kɔrej am. (2 Kɔr. 7:​5-7) Dis ɛgzampul mɛmba wi se i nɔ jɔs du fɔ kɔrej wi brɔda ɛn sista dɛn bay wetin wi de se, bɔt wi fɔ de wit dɛn ɛn du wetin wi ebul fɔ ɛp dɛn.​—1 Jɔn 3:18.

Wi brɔda ɛn sista dɛn na Rɔshia dɔn sɛt fayn ɛgzampul fɔ sɔpɔt dɛn kɔmpin Kristian dɛn. Lɛ wi tɔk bɔt Sage ɛn in wɛf Tatiyana dɛn ɛkspiriɛns. Afta polis dɛn sach dɛn os, dɛn bin go wit dɛn na polis steshɔn fɔ aks dɛn kwɛstyɔn dɛn. Na Tatiyana fɔs dɛn lɛf fɔ go bak na os. Sage tɔk se: “As Tatiyana rich na os so, wan sista we bin gɛt maynd go na wi os. Ɛn ɔda brɔda ɛn sista dɛn kam fɔ ɛp wi pak wi os bak.”

Sage kɔntinyu fɔ tɔk se: “A lɛk Prɔvabs 17:17 we se: ‘Tru tru padi de sho lɔv ɔltɛm, ɛn na brɔda we dɛn bɔn fɔ di tɛm we prɔblɛm go kam.’ Insay dis tɛm we pipul dɛn de mek a sɔfa we mi wangren nɔ ebul fɔ bia, na in a ebul fɔ ɔndastand wetin dɛn wɔd dɛn ya min. Jiova dɔn gi mi padi dɛn we gɛt maynd fɔ de wit mi fɔ ɛp mi.” a

As wi de gɛt prɔblɛm dɛn we nɔ rili izi, wi go nid padi dɛn we wi kin abop pan. Wi go nid dɛn mɔ di tɛm fɔ da big big trɔbul. So lɛ wi tray tranga wan fɔ bi tru tru padi naw!—1 Pit. 4:​7, 8.