Wi ɔl kin tink bɔt tumara bambay. Wi kin tink bɔt aw layf go tan lɛk fɔ wi ɛn di wan dɛn we wi lɛk. Wi kin aks kwɛstyɔn dɛn lɛk: ‘Di wɔl go bi bɛtɛ ples fɔ mi pikin dɛn tumara bambay? Sɔntin gɛt fɔ kam pwɛl di wɔl kpatakpata? Sɔntin de we a fɔ du fɔ mek mi tumara bambay go fayn?’ Wi kin aks dɛn kwɛstyɔn ya bikɔs na so mɔtalman de. Wi kin want fɔ no if op de, wi kin want fɔ mek shɔ, wi kin want fɔ plan aw fɔ liv wi layf, ɛn wi nɔ kin want mek ɛnitin ambɔg wetin wi de du. If yu ebul fɔ no mɔ bɔt tumara bambay, yu go mek shɔ se yu rɛdi fɔ am ɔlkayn we.

So, aw yu tumara bambay go tan lɛk? Ɛnibɔdi de we no? Di masta sabi bukman dɛn we kin tray fɔ tɔk bɔt wetin gɛt fɔ apin tumara bambay, kin tɔk sɔm tin dɛn we kin apin, bɔt bɔku nɔ kin apin. Bɔt pipul dɛn dɔn tɔk se Gɔd in ebul fɔ tɔk bɔt sɔntin we gɛt fɔ apin, ɛn we di tɛm rich, wetin i tɔk de apin. Gɔd in Wɔd, di Baybul insɛf se: “Frɔm di biginin a dɔn anawns di ɛndin ɛn frɔm lɔntɛm, di tin we nɔ bi yet.” (Ayzaya 46:10) Di tin dɛn we Gɔd dɔn tɔk, dɔn apin?

Wetin mek i fayn fɔ lɛ yu no bɔt di tin dɛn we Gɔd bin dɔn tɔk, we dɔn apin trade trade? If yu kam fɔ si se sɔmbɔdi we de stɔdi di wɛda kin tɔk di kɔrɛkt tin ɔltɛm bɔt aw di wɛda go tan lɛk ɛvride na di say we yu de, yu go biliv dis pɔsin gud gud wan, nɔto so? Ɛn yu go want fɔ pe atɛnshɔn to wetin i go tɔk bɔt aw di wɛda go tan lɛk tumara. Semweso, if yu kam fɔ no se ɛnitin we Gɔd tɔk de apin, yu go mɔs want fɔ no bɔt di tin dɛn we i dɔn tɔk bɔt yu tumara bambay.

DƐN GO PWƐL WAN BIG BIG TƆŊ KPATAKPATA:

Na wɔndaful tin fɔ lɛ sɔmbɔdi tɔk kɔrɛkt wan se wan big big tɔŋ, we dɔn pawaful fɔ lɔng lɔng tɛm, go pwɛl jisnɔ. Na dat Gɔd bin du. I bin yuz wan pan in  prɔfɛt dɛn fɔ tɔk se wan tɔŋ we dɛn kɔl Ninivɛ, go pwɛl kpatakpata. (Zɛfinaya 2:13-15) Wetin di pipul dɛn we kin rayt bɔt tin dɛn we dɔn pas, tɔk bɔt dis? Dɛnsɛf gri se wetin Gɔd tɔk bin apin. Insay di ia 632 bifo Krays, di pipul dɛn na Babilɔn ɛn di pipul dɛn na Midia bin go fɛt di pipul dɛn na Ninivɛ ɛn tek dɛn tɔŋ na dɛn an. Dis tin bin apin lɛk 15 ia so afta Gɔd bin dɔn tɔk se i go bi. Gɔd bin tɔk bak se Ninivɛ go “dray arara lɛk ples we pɔsin nɔ go ebul tap.” Yu tink se dis tin we Gɔd bin tɔk bifo tɛm, bin apin? Yɛs, i bin apin. Pan ɔl we dis big tɔŋ ɛn di smɔl smɔl tɔŋ dɛn we bin de nia am bin big lɛk 130,000 eka, di pipul dɛn we bin go fɛt ɛn win di tɔŋ nɔ bin yuz am, lɛk aw ɔda pipul dɛn tink se dɛn fɔ du. Bifo dat, dɛn pwɛl am kpatakpata. Yu tink se ɛnibɔdi de we bin fɔ ebul tɔk dɛn tin ya, ɛn i bi di we aw i tɔk am?

DƐN GO BƆN MƆTALMAN BON DƐN:

Udat go ebul fɔ sho sɔmbɔdi in nem ɛn di famili usay i go kɔmɔt, 300 ia bifo tɛm, ɛn tɔk se di pɔsin go bɔn mɔtalman bon dɛn pan ɔlta ɛn ivin sho di tɔŋ usay di ɔlta go de? If dɛn kayn tin ya apin, bɔku pipul dɛn go no bɔt di pɔsin we tɔk am. Gɔd in prɔfɛt bin tɔk se “wan bɔbɔ go bɔn na Devid in layn we go nem Josaya . . . , ɛn i go bɔn mɔtalman bon dɛn” na wan ɔlta we de na wan tɔŋ we dɛn kɔl Bɛtɛl. (Fɔs Kiŋ 13:1, 2) Afta lɛk tri ɔndrɛd ia, wan kiŋ we nem Josaya, bin kɔmɔt frɔm Devid in famili. Dis nem Josaya nɔto nem we plɛnti pipul dɛn bin sabi dɛn tɛm dɛn de. Jɔs lɛk aw di prɔfɛt bin tɔk am, na so i bi. Josaya bin ‘pul di bon dɛn we de insay di grev dɛn ɛn bɔn dɛn na di ɔlta’ we de na Bɛtɛl. (Sɛkɛn Kiŋ 23:14-16) Yu tink se ɛnibɔdi go ebul tɔk ɔl dɛn tin ya if nɔto Gɔd tɛl am?

DƐN GO PUL WAN GƆVMƐNT KƆMƆT NA PAWA:

Yu go mɔs sɔprayz if sɔmbɔdi ebul sho di rayt nem we dɛn go gi wan man, lɔng lɔng tɛm bifo dɛn bɔn am. Di pɔsin se dis man we dɛn go bɔn, go pul wan men gɔvmɛnt we bin de rul di ol wɔl. I ivin sho di we aw dɛn go pul dis gɔvmɛnt kɔmɔt na pawa. Na dat Gɔd bin du. I bin tɔk se na wan man we nem Sayrɔs go pul dis gɔvmɛnt kɔmɔt na pawa. Ɛn Sayrɔs go fri di Ju pipul dɛn we bin de ɔnda dis gɔvmɛnt ɛn ɛp dɛn fɔ bil dɛn oli tɛmpul bak. Pantap dat, Gɔd sho di we aw Sayrɔs go pul dis gɔvmɛnt kɔmɔt na pawa. I se  Sayrɔs go mek ɔda rod fɔ lɛ di wata pas so dat di riva nɔ go dip igen, ɛn Gɔd se di pipul dɛn na Babilɔn go lɛf dɛn get dɛn opin, we go mek Sayrɔs ɛn in man dɛn ebul fɔ ɛnta. (Ayzaya 44:27–45:2) Yu tink se ɔl dɛn tin ya we Gɔd tɔk, bin apin lɛk aw i tɔk am? Di wan dɛn we kin rayt bɔt tin dɛn we dɔn pas, bin tɔk se Sayrɔs bin rili pul da gɔvmɛnt de na pawa. Sayrɔs ɛn in sojaman dɛn bin mek ɔda rod fɔ lɛ di wata pas, so dat bin mek di riva nɔ dip igen. Ɛn in ɛn in sojaman dɛn bin mit di get dɛn opin ɛn dɛn go insay di tɔŋ. Afta dat, Sayrɔs bin fri di Ju pipul dɛn ɛn tɛl dɛn fɔ go bil dɛn tɛmpul bak na Jerusɛlɛm. I kin at fɔ lɛ dɛn kayn tin ya bi bikɔs Sayrɔs nɔ bin de wɔship di Ju pipul dɛn Gɔd. (Ɛzra 1:1-3) Apat frɔm Gɔd, udat de we go ebul fɔ tɔk ɔl dɛn tin ya ɛn i bi lɛk aw i tɔk am?

Wi dɔn tɔk bɔt tri ɛgzampul dɛn we de sho se Gɔd kin tɔk kɔrɛkt wan bɔt tin dɛn we nɔ bi yet. Nɔto dɛn tin ya nɔmɔ we Gɔd dɔn tɔk, dɔn bi. Di Ju pipul dɛn lida we nem Jɔshwa, bin tɔk wan tru tin bɔt Gɔd we di Ju pipul dɛn bin no bɔt. I bin se: “Dɛn fɔ mɛmba ɔltɛm na dɛn at ɛn sol se natin nɔ de we PAPA GƆD bin se i go du we i nɔ du.” (Jɔshwa 23:1, 2, 14) Di pipul dɛn we Jɔshwa bin de oba nɔ go tɔk se Gɔd nɔ bin du ɔl wetin i bin dɔn tɔk. Bɔt aw Gɔd kin mek wetin i tɔk, bi? Di we aw Gɔd kin du sɔntin rili difrɛn frɔm di we aw mɔtalman kin du sɔntin. Dis na impɔtant tin fɔ lɛ yu no, bikɔs Gɔd dɔn tɔk sɔm wɔndaful tin dɛn we gɛt fɔ apin tumara bambay ɛn dɛn tin ya gɛt sɔntin fɔ du wit yu layf.

Mɔtalman kin tɔk se sɔntin go bi, afta dɛn dɔn stɔdi wetin sayɛnsman dɛn kin tɔk, ɛn we dɛn kin wach di we aw tin dɛn de apin na di wɔl, ɔ we sɔm pipul dɛn we kin tɔk se dɛn no sɔntin we ɔdinari pipul dɛn nɔ no. Afta mɔtalman kin dɔn tɔk wetin dɛn tink se go bi, dɛn kin jɔs sidɔm ɛn wet fɔ si wetin go apin.—Prɔvabs 27:1.

Bɔt Gɔd nɔ tan lɛk mɔtalman, in no ɔltin. I ɔndastand ɔltin bɔt mɔtalman; di we aw wi tan, di we aw wi de tink, fil, ɛn di tin dɛn we wi kin want fɔ du. So na dis mek Gɔd kin no aw pɔsin go biev, ɛn i ivin no wetin di pipul dɛn na difrɛn difrɛn kɔntri dɛn, go du. Bɔt nɔto dɛn tin ya nɔmɔ Gɔd ebul fɔ du. I ebul fɔ du tin dɛn we pas dis. I kin ivin kɔntrol ɛn chenj di we aw tin dɛn de apin na di wɔl fɔ mek shɔ se wetin i tɔk, kam fɔ bi. I se: “Mi wɔd we de kɔmɔt na mi mɔt . . . nɔ go tɔn bak kan to mi i nɔ du natin, bɔt . . . i go du wɛl pan di tin we a sɛn am fɔ go du.” (Ayzaya 55:11) Sɔntɛnde di tin dɛn we Gɔd kin tɔk se go bi, kin mek wi no wetin i gɛt fɔ du tumara bambay. Gɔd kin mek shɔ se ɔl wetin i tɔk, bi.

Ɛnibɔdi de we go ebul tɛl yu di tru bɔt wetin go apin tumara bambay to yu ɛn di wan dɛn we yu lɛk? If yu kam fɔ no se ebi ebi briz ɛn ren we de pwɛl tin dɛn gɛt fɔ kam, yu go mɔs du sɔntin fɔ sev yu layf. Na di sem tin yu fɔ du we kam pan di tin dɛn we di Baybul tɔk se gɛt fɔ apin. Gɔd dɔn tɔk se i nɔ go te igen, i go chenj di we aw tin dɛn de apin ɔlsay na di wɔl. (Rid di bɔks we se “ Wetin Gɔd Dɔn Tɔk bɔt Tumara Bambay?”) Dis tin we Gɔd dɔn tɔk se go apin, difrɛn frɔm wetin bɔku masta sabi bukman dɛn dɔn tɔk se go apin.

Di tin dɛn we de apin na di wɔl tan lɛk stori. Dɛn bin dɔn rayt am insay di Baybul. So di Baybul go ɛp wi fɔ no aw di stori go ɛnd. Gɔd se: “Frɔm di biginin a dɔn anawns di ɛndin.” I tɔk bak se: “Na Mi disishɔn go tinap, ɛn a go du ɔl wetin a mek ɔp.” (Ayzaya 46:10) Yu ɛn yu famili go ebul fɔ ɛnjɔy tumara bambay. Aks Jiova Witnɛs dɛn bɔt di tin dɛn we di Baybul dɔn tɔk se gɛt fɔ apin. Jiova Witnɛs dɛn nɔ de tɔk se na spirit de tɛl dɛn wetin fɔ tɔk, ɛn dɛn nɔ gɛt spɛshal pawa fɔ no wetin gɛt fɔ apin tumara bambay. Bɔt dɛn na pipul dɛn we de stɔdi di Baybul, ɛn dɛn go ebul fɔ sho yu di gud tin dɛn we Gɔd de du fɔ mek yu ɛnjɔy yu tumara bambay.