Dis wɔl gɛt ɔl wetin mɔtalman, animal, ɛn plant nid fɔ liv. I gɛt bɔku bɔku wata, we de mek ɔltin we gɛt layf, kɔntinyu fɔ liv. Di we aw di wɔl ling smɔl, di we aw i de go rawnd di san, ɛn di rod we i de pas fɔ go rawnd di san so pafɛkt dat i dɔn ɛp fɔ mek ɔl di wata we de na di wɔl nɔ dray ɔ tɔn to ays. Di wɔl gɛt ɔda kayn briz dɛn we dɛn kɔl gas ɛn i gɛt wan ɔda pawaful tin we dɛn kɔl magnɛt we de rawnd di wɔl. Dɛn tin ya de fɔ blɔk dɛn bad bad tin dɛn we kin kɔmɔt na di san fɔ mek dɛn nɔ ambɔg di wɔl. Di we aw plant ɛn animal de sɔpɔt dɛnsɛf, rili wɔndaful. Dis dɔn mek bɔku pipul dɛn dɔn kam fɔ gri se dis wɔl we wi de so gɛt rizin we mek dɛn mek am.—Rid Ayzaya 45:18.

Bɔt yu go de wɔnda: ‘Fɔ se di sɔfa we wi de sɔfa ɛn di advantej we mɔtalman de tek pan in kɔmpin na sɔm pan di rizin dɛn dat we mek dɛn mek di wɔl?’—Rid Ditarɔnɔmi 32:4, 5.

Di Pɔsin we mek dis wɔl, bin want mek i bi say usay pipul dɛn go de wit gladi at. Ɛn i bin mek am fɔ pipul dɛn we rɛspɛkt dɛn kɔmpin ɛn we lɛk di Pɔsin we mek dɛn. So dis de sho wi se di layf we mɔtalman gɛt, impɔtant pas di layf we plant ɛn animal dɛn gɛt. Wi ebul fɔ no di Pɔsin we mek wi, ɛn wi kin ebul fɔ falamakata am fɔ sho lɔv ɛn fɔ du wetin rayt.—Rid Ɛkliziastis 12:13; Mayka 6:8.

Di Pɔsin we mek wi, ebul fɔ du ɔl wetin i want fɔ du. So wi shɔ se i gɛt fɔ pul di tin dɛn we de mek wi sɔfa, di wan dɛn we de tek advantej pan dɛn kɔmpin, ɛn mek di wɔl bi pafɛkt ples usay mɔtalman go de ɛn gɛt gladi at.—Rid Sam 37:11, 29; Ayzaya 55:11.