I izi fɔ lɛ wi tink se di Setan we wi kin rid bɔt na di Baybul na di bad tin we de na wi at. Bɔt na dat rili di Baybul de tich? If na so di Baybul de tich, wetin mek di Baybul tɛl wi se Setan bin de tɔk wit Jizɔs Krays ɛn wit Gɔd insɛf sɛf we gɛt pawa pas ɔlman? Lɛ wi tɔk bɔt tu ɛgzampul dɛn we sho se Setan bin tɔk wit Jizɔs ɛn Gɔd.

We Jizɔs bin bigin in prichin wok, Setan tɛmpt am tri tɛm. Fɔs, Setan bin tray fɔ tɛmpt Jizɔs fɔ yuz di pawa we Gɔd gi am, fɔ satisfay insɛf di tɛm we i bin angri. Sɛkɔn, Setan bin tɛst Jizɔs fɔ put in layf pan denja ɛn mek pipul dɛn kɔle am. Di las wan, Setan se i go mek Jizɔs rul ɔl di gɔvmɛnt dɛn na di wɔl if Jizɔs wɔship am wan tɛm nɔmɔ. Jizɔs  nɔ bin gri fɔ du ɔl dɛn tri tin ya we Setan bin want lɛ i du. Jizɔs bin de yuz di Baybul fɔ ansa Setan ɛnitɛm we Setan tɛmpt am.—Matyu 4:1-11; Lyuk 4:1-13.

To udat Jizɔs bin de tɔk? Na to di bad tin we bin de na in at? Di Baybul se: “Dɛn dɔn tɛst am ɔlkayn we jɔs lɛk wisɛf, bɔt i nɔ gɛt wan sin.” (Di Ibru Pipul Dɛn 4:15) Di Baybul tɔk bak se: “I nɔ wande sin, ɛn i nɔ bin gɛt wan lay na in mɔt.” (Pita In Fɔs Lɛta 2:22) Jizɔs bin pafɛkt, ɛn i bin kɔntinyu fɔ du wetin Gɔd want. I nɔ bin ɛva alaw ɛni bad tin fɔ de na in at. So wi dɔn si klia wan se Jizɔs nɔ bin de tɔk to ɛni bad tin we de na in at; i bin de tɔk to rial pɔsin.

Dis sem tɔk we Setan bin tɔk to Jizɔs gi wi ɔda rizin dɛn we mek wi no se Setan na rial pɔsin.

• Mɛmba se di Dɛbul bin se i go gi Jizɔs ɔl di gɔvmɛnt dɛn na di wɔl if i wɔship am. (Matyu 4:8, 9) If Setan nɔto bin rial pɔsin dis gi we i bin se i go Jizɔs di gɔvmɛnt dɛn na di wɔl nɔ bin fɔ min natin. Apat frɔm dat, Jizɔs nɔ bin aks Setan usay i pul dis kayn pawa.

• Afta we Jizɔs bin dɔn tɛl Setan se i nɔ go du wetin i tɛl am fɔ du, di Baybul se Setan “lɛf am ɛn wet fɔ ɔda fayn tɛm.” (Lyuk 4:13) Wetin yu go se bɔt Setan na ya, yu go se na jɔs di bad tin we de na pɔsin in at ɔ na tranga-yes pɔsin we de tray fɔ ambɔg mɔtalman?

• Mɛmba se “enjɛl dɛn kam ɛn bigin fɔ ɛnkɔrej” Jizɔs. (Matyu 4:11) Yu tink se dɛn enjɛl ya we bin kam ɛp ɛn ɛnkɔrej Jizɔs na rial spirit pipul dɛn? Yɛs, na rial spirit pipul dɛn. So wetin mek wi fɔ de tink se Setan na jɔs di bad tin we de na wi at, nɔto rial spirit pɔsin?

Di sɛkɔn ɛgzampul, na bɔt wan man we bin de fred Gɔd, we nem Job. We di Baybul de tɔk bɔt Job in stori, i sho wi tu tɛm usay di Dɛbul ɛn Gɔd bin de tɔk. Ɔl tu dɛn tɛm ya, Gɔd bin tɔk fayn tin bɔt Job, bikɔs Job bin de du wetin i want. Setan se na wetin Gɔd de gi Job na in mek i de sav am. I se Gɔd de pe Job so dat Job go wɔship am. Di Dɛbul bin de tray fɔ se in sabi Job bɛtɛ wan pas di we aw Gɔd sabi am. So Jiova bin alaw Setan fɔ pul ɔl wetin Job bin gɛt na in an. I alaw Setan fɔ kil Job in pikin dɛn, ɛn put sik pan am. * As tɛm de go, ɔlman bin kam fɔ si klia wan se wetin Jiova bin tɔk bɔt Job na di rayt tin ɛn dis bin sho se Setan na layman. Gɔd bin blɛs Job bikɔs i bin du wetin i want.—Job 1:6-12; 2:1-7.

Insay dis tɔk we Jiova ɛn Setan bin de tɔk, yu tink se Jiova bin de tɔk to di bad tin we de na in at? Di Baybul tɔk se: “Di tru Gɔd pafɛkt pan ɔl wetin i de du.” (2 Samiɛl 22:31) Di Baybul tɔk bak se: “Jiova Gɔd we na di Ɔlmayti, oli, i oli, i oli.” (Rɛvɛleshɔn 4:8) Di wɔd oli min kiln, sɔntin we nɔ gɛt wan dɔti pan am, sɔntin we nɔ gɛt sin. Jiova pafɛkt ɛn i nɔ gɛt wan bɔt. So i nɔ gɛt ɛni bad we insay am.

Sɔm pipul dɛn go stil agyu se Job nɔto bin rial pɔsin, so dɛn se di tɔk we Setan ɛn Gɔd tɔk na jɔs lay lay stori. Bɔt yu tink se dis mek sɛns? Ɔda buk dɛn na di Baybul sho se Job na rial pɔsin. Fɔ ɛgzampul, insay Jems 5:7-11, i sho wi se Job na gud ɛgzampul we go ɛp Kristian dɛn fɔ bia we tin tranga, ɛn i de gi wi kɔrej fɔ no se Jiova go blɛs wi fɔ di bia we wi de bia. If Job nɔto bin rial pɔsin ɛn di bad bad tin dɛn we Setan bin de du to am na jɔs ɛmti stori, yu tink se in ɛgzampul fɔ dɔn ɛp wi lɛk aw i de ɛp wi so naw? Wan ɔda ɛgzampul fɔ sho se Job na bin rial pɔsin de insay Izikɛl 14:14, 20. Insay dɛn vas ya, dɛn put Job in nem wit tu ɔda man dɛn we bin du wetin rayt na Gɔd in yay, dat na Noa ɛn Daniɛl. Jɔs lɛk Noa ɛn Daniɛl, Job insɛf na bin rial pɔsin. Job na man we bin rili gɛt fet pan Gɔd. If Job na bin rial pɔsin, yu nɔ tink se di wan we bin de mek i sɔfa insɛf na rial pɔsin?

Di Baybul dɔn sho wi klia wan se Setan na rial spirit pɔsin. Bɔt sɔntɛm yu go de wɔnda, ‘Setan go ebul fɔ du ɛni bad tin to mi ɛn mi famili insay dis wɔl we wi de so tide?’

Lɛ wi se bɔku bad pipul dɛn jɔs kam na di siti usay yu de. Wetin yu tink se go apin? Yu go si se ɔlman go de fred ɛn na soso bad abit go de na di eria. Naw lɛ wi tɔk bɔt sɔntin we fiba dis sem ɛgzampul: Setan in dɛbul dɛn we  dɛnsɛf na rial spirit pipul dɛn, bin tɔn dɛn bak pan Gɔd, so Gɔd drɛb dɛn kam dɔŋ na dis wɔl. Wetin dɔn apin frɔm we dɛn kam dɔŋ ya? Wɛl, tink bɔt wetin yu de yɛri ɛn si na di nyus, di wan we de apin na yu kɔntri ɛn di wan dɛn we de apin na ɔda man kɔntri.

• Yu de si di we aw fɛt-fɛt de bɔku, ivin we i nɔ mek wan sɛns ɛn pan ɔl we dɛn de tray fɔ stɔp am?

• Yu de si di bɔku bɔku we aw pipul dɛn de ɛnjɔy wit tin dɛn we nɔ fayn, lɛk juju biznɛs, pan ɔl we mama ɛn papa dɛn nɔ want dat?

• Yu de si di we aw pipul dɛn de pwɛl di wɔl, pan ɔl we sɔm pipul dɛn de rili tray fɔ mek i nɔ pwɛl?

• We yu wach di wɔl, yu tink se sɔntin rili rɔng wit am, lɛk se pawaful pɔsin de we de tray fɔ push mɔtalman pan trɔbul?

Duya luk udat di Baybul se de biɛn ɔl di trɔbul dɛn na di wɔl. Di Baybul se: “Dɛn ib di big dragɔn dɔŋ, da snek we bin de trade trade, di wan we dɛn kɔl Dɛbul ɛn Setan, we de ful ɔlman na di wɔl. Dɛn ib am dɔŋ na di wɔl, ɛn dɛn ib in enjɛl dɛn dɔŋ wit am. . . . Big trɔbul de na di wɔl ɛn di si, bikɔs di Dɛbul dɔn kam dɔŋ to una ɛn i vɛks bad bad wan, bikɔs i no se na shɔt tɛm lɛf fɔ am.” (Rɛvɛleshɔn 12:9, 12) Afta bɔku pipul dɛn dɔn kam fɔ si ɔl di rizin dɛn we de sho se Setan na rial pɔsin, dɛn dɔn gri se Setan na wikɛd spirit pɔsin, we de mek ɔl dɛn bad bad tin ya apin na di wɔl.

Yu go de wɔnda aw yu go protɛkt yusɛf. Dat na impɔtant tin fɔ tink bɔt. Di ɔda atikul we wi de kam tɔk bɔt go sho wi sɔm fayn tin dɛn we go ɛp wi.