Di Baybul tɔk bɔt aw sɔm pipul dɛn we bin gɛt trɛnk bin de siz advantej pan sɔm pipul dɛn we bin wik. Wan pɔsin we yu go mɛmba na Nebɔt. * Lɛk 1,000 ia Bifo Krays, Eab, na bin kiŋ na Izrɛl. [1] I bin alaw in wɛf, Jezibɛl, fɔ kil Nebɔt ɛn in bɔy pikin dɛn so dat Eab go tek in gadin. (1 Kiŋ 21:1-16; 2 Kiŋ 9:26) Wetin mek Gɔd alaw dis kayn bad tin fɔ apin?

Lɛ wi tɔk bɔt wan impɔtant rizin : Gɔd nɔ de lay. (Taytɔs 1:2) Wetin dis gɛt fɔ du wit dis kayn wikɛd tin? Wɛl, frɔm di bigin, Gɔd bin dɔn wɔn mɔtalman se di tɔn we dɛn tɔn dɛn bak pan am go bring bɔku bɔku bad bad tin dɛn—we go mek dɛn day. Fɔ sho se wetin Gɔd in wɔd tɔk na tru, day dɔn kam pan mɔtalman frɔm we dɛn tɔn dɛn bak pan Gɔd na di gadin we bin de na Idɛn. Infakt na advantej bin mek di fɔs mɔtalman day, dat na di tɛm we Ken bin kil in brɔda Ebɛl.—Jɛnɛsis 2:16, 17; 4:8.

Gɔd in wɔd se frɔm da tɛm de “mɔtalman dɔn mek layf tranga fɔ in kɔmpin mɔtalman.” (Ɛkliziastis 8:9) Yu tink se na tru di Baybul tɔk? Jiova bin wɔn di Izrɛlayt dɛn se, dɛn Kiŋ dɛn go mek dɛn sɔfa ɛn dɛn go kray to am mek i ɛp dɛn. (1 Samiɛl 8:11-18) Ivin Kiŋ Sɔlɔmɔn we bin gɛt sɛns bin mek di pipul dɛn pe bɔku bɔku taks. (1 Kiŋ 11:43; 12:3, 4) Wikɛd kiŋ dɛn lɛk Eab, bin mek di Izrɛlayt dɛn sɔfa bad bad wan. Tink bɔt dis: If Gɔd bin stɔp ɔl dɛn tin ya fɔ apin, yu nɔ tink se i fɔ dɔn lay?

Mɛmba se Setan bin dɔn tɔk se mɔtalman dɛn de sav Gɔd bikɔs Gɔd de gi dɛn wetin dɛn want. (Job 1:9, 10; 2:4) If Gɔd bin fɔ de protɛkt ɔl in savant dɛn frɔm ɔl di bad tin dɛn we de apin, yu nɔ tink se dat fɔ dɔn sho se wetin Setan tɔk na tru? Ɛn if Gɔd bin fɔ de stɔp ɔl di bad tin dɛn we kin want fɔ apin to mɔtalman, yu nɔ tink se na Gɔd dɛn fɔ dɔn blɛm fɔ di lay we pas ɔl ɔda lay dɛn? If Gɔd bin de stɔp ɔl di bad tin dɛn we de apin, bɔku pipul dɛn fɔ dɔn tink se mɔtalman go ebul fɔ rul dɛnsɛf fayn fayn apat frɔm Gɔd. Bɔt nɔto so Gɔd in Wɔd se. Gɔd in Wɔd tɔk klia wan se mɔtalman nɔ ebul fɔ rul dɛnsɛf. (Jɛrimaya 10:23) So wi nid Gɔd in Kiŋdɔm fɔ kam, na da tɛm de nɔmɔ ɔl di bad bad tin dɛn go dɔn.

Fɔ se dis min se Gɔd nɔ de du natin fɔ stɔp di wan dɛn we de siz advantej pan dɛn kɔmpin mɔtalman? Nɔ, nɔto so i bi. Lɛ wi tɔk bɔt tu tin dɛn we Gɔd de du: Fɔs, we pɔsin siz advantej pan in kɔmpin, Gɔd de mek ɔda pipul dɛn no bɔt dat. Fɔ ɛgzampul, Gɔd in Wɔd, tɛl wi ɔl di bad tin dɛn we Jezibɛl bin plan fɔ du to Nebɔt. Di Baybul tɛl wi bak se na wan pawaful rula we nɔ want mek ɛnibɔdi no bɔt am na in de mek dɛn kayn bad tin dɛn ya apin. (Jɔn 14:30; Sɛkɔn Lɛta Fɔ Kɔrint 11:14) Di Baybul kɔl am Setan di Dɛbul. We Gɔd de mek wi no udat dɔn du bad tin ɛn udat kin mɛk pipul dɛn du bad tin, i de ɛp wi lɛ wi nɔ put wi an pan wetin bad so dat wi go gɛt layf we go de sote go.

Sɛkɔn, Gɔd dɔn tɔk se i go mek ɔl di bad tin dɛn we de apin lɛf fɔ apin. Dis mek we Gɔd dɔn mek wi no se Eab ɛn Jɛzibɛl dɔn du wetin bad ɛn di we aw i bin jɔj ɛn pɔnish dɛn, wit ɔda pipul dɛn we tan lɛk dɛn, mek wi biliv se wan de Gɔd go pɔnish ɔl di wikɛd wan dɛn. (Sam 52:1-5) Wikɛd mɔtalman dɛn dɔn pwɛl di wɔl, bɔt Gɔd dɔn tɔk se i go mek di wɔl bak to fayn ples ɛn na di wan dɛn nɔmɔ we lɛk am go de insay de. * Da tɛm de, Nebɔt we bin fetful ɛn in bɔy pikin dɛn go de na Paradays na dis wɔl sote go usay no bad tin go de apin.—Sam 37:34.