Yɛs. Jiova Witnɛs dɛn biliv se “na Gɔd tɛl pipul ɔltin we rayt” na di wan ol Baybul, “ɛn ɔl dɛn tin de gud.” (Sɛkɛn Lɛta To Timoti 3:​16) Dat min se na Gɔd tɛl pipul ɔltin we de insay di pat dɛn we pipul dɛn de kɔl di Ol Tɛstamɛnt ɛn di Nyu Tɛstamɛnt. Jiova Witnɛs dɛn de kɔl dɛn pat ya na di Baybul as di Ibru Skripchɔ dɛn ɛn di Kristian Grik Skripchɔ dɛn. Dat de mek wi nɔ de tek sɔm pat dɛn na di Baybul fɔ se dɛn impɔtant pas di ɔda pat dɛn ɔ dɛn dɔn kɔmɔt na stayl.

 Gɔd bin tɛl di apɔsul Pɔl fɔ rayt se: “Ɔltin we rayt na Gɔd in Buk na fɔ lan wi sɔntin.” (Lɛta Fɔ Rom 15:4) So, impɔtant tin dɛn de we di Ibru Skripchɔ dɛn de tich wi. Wan pan di impɔtant tin dɛn we i de tich wi na bɔt tin dɛn we bin dɔn apin trade trade we go bɛnifit wi ɛn sɔm gud advays dɛn we go ɛp wi.

•   Tin dɛn we bin dɔn apin trade trade we go bɛnifit wi. Insay di Ibru Skripchɔ dɛn, dɛn rayt bɔt aw Gɔd mek ɔltin ɛn aw mɔtalman sin. If wi nɔ bin no dɛn tin dɛn de, wi nɔ bin fɔ ebul ansa kwɛsyɔn dɛn lɛk: Wetin mek Gɔd mek wi? Wetin mek mɔtalman de day? (Jɛnɛsis 2:7, 17) Apat frɔm dat, di Ibru Skripchɔ dɛn tɔk bɔt di we aw Gɔd bin de trit pipul dɛn lɛk wi; di sem tin dɛn we de mek wi gladi ɛn mek wi at pwɛl bin de mit dɛnsɛf.—Jems 5:​17.

•   Gud advays we go ɛp wi. Di Baybul buk dɛn lɛk Prɔvabs ɛn Ɛkliziastis, we de insay di Ibru Skripchɔ dɛn, gɛt sɔm impɔtant tin dɛn we go sho wi aw fɔ liv wi layf fayn wan. Dɛn gɛt advays dɛn we go sho aw fɔ mek wi famili gɛt gladi at (Prɔvabs 15:17), aw fɔ si wok (Prɔvabs 10:4; Ɛkliziastis 4:6), ɛn di bɛst we aw yɔŋ pipul dɛn go liv dɛn layf (Ɛkliziastis 11:9–12:1).

 Apat frɔm dat, wi go gɛt bɛnifit if wi stɔdi di Lɔ we Gɔd bin gi Mozis we de frɔm Jɛnɛsis to Ditarɔnɔmi. Pan ɔl we da Lɔ de nɔ gɛt natin fɔ du wit Kristian dɛn, i gɛt sɔm impɔtant advays dɛn we go ɛp wi fɔ liv wi layf di we we go mek wi gladi.—Lɛvitikɔs 19:18; Ditarɔnɔmi 6:5-7.