Na dɛn rizin dɛn ya mek Jiova Witnɛs dɛn nɔ de fɛt wɔ:

1.   Fɔ sho se dɛn de obe Gɔd. Di Baybul se Gɔd in savant dɛn go “tɔn dɛn sɔd dɛn to gɔgɔ ɛn wa nɔ go de igen.”-Ayzaya 2:4.

2.   Fɔ sho se dɛn de obe Jizɔs. Jizɔs bin tɛl di apɔsul Pita se: “Put yu sɔd bak nain ples, ɛnibɔdi we fɛt wit sɔd, na sɔd dɛn go tek kil am.” (Matyu 26:52) Jizɔs sho se in disaypul dɛn nɔ fɔ fɛt.

    Jizɔs in disaypul dɛn de obe wetin I tɛl dɛn fɔ se dɛn ɛn di “ɔda pipul dɛn na [di] wɔl nɔ de si wan we” bay we dɛn nɔ de put an pan pɔlitiks. (Jɔn 17:16) Dɛn nɔ de put an pan strayk ɔ put mɔt pan pɔsin if i disayd fɔ jɔyn soja.

3.   Fɔ sho se dɛn lɛk ɔda pipul dɛn. Jizɔs bin tɛl in disaypul dɛn fɔ ‘lɛk dɛn kɔmpin.’ (Jɔn 13:34, 35) Dat go mek dɛn ɔl bi lɛk brɔda ɛn sista pan ɔl we dɛn de na difrɛn difrɛn kɔntri dɛn. Dɛn nɔn nɔ ɛva fɛt agens dɛn brɔda ɛn sista dɛn.—1 Jɔn 3:10-12.

4.   Di fɔstɛm Kristian dɛn ɛgzampul. Wan buk we dɛn kɔl di Encyclopedia of Religion and War tɔk se: “Di fɔstɛm pipul dɛn we bin de fala Jizɔs, nɔ bin gri fɔ fɛt wɔ ɔ jɔyn soja wok.” Dɛn bin no se dɛn tin dɛn “gri wit Jizɔs in lɔ fɔ lɛk ɔda pipul dɛn ɛn fɔ lɛk wi ɛnimi dɛn.” Apat frɔm dat, wan Jaman man we nem Pita Maynɔld we stɔdi bɔt Gɔd biznɛs, bin tɔk bɔt dɛn fɔstɛm Kristian dɛn ɛn soja wok. I bin se: “I nɔ pɔsibul fɔ lɛ pɔsin bi Kristian ɛn bi sojaman di sem tɛm.”

 Jiova Witnɛs dɛn de du fayn fayn tin dɛn na di eria we dɛn de ɛn dɛn nɔ de du ɛnitin we go mek pipul dɛn fred. Wi de rɛspɛkt di gɔvmɛnt, fɔ sho se dɛn de obe di Baybul we i se:

•   “Du wetin dɛn wan we de rul na di kɔntri tɛl una fɔ du.”—Lɛta Fɔ Rom 13:1.

•   “Una gi di kiŋ na Rom wetin blant am, ɛn gi Gɔd wetin blant Gɔd.”—Matyu 22:21.

 Na fɔ dat mek wi de obe di lɔ, pe wi taks, ɛn du wetin di gɔvmɛnt se fɔ du, wans na tin we go bɛnifit ɔlman.