Wan ɛdlayn na di Frankfurter Rundschau nyuspepa bin tɔk se “I Tan Lɛk se na Famili Sɛlibreshɔn.” Di wan dɛn we bin atɛnd di program bin gri wit wetin dɛn rayt na di ɛdlayn.

Kala we bin kɔmɔt Poto Riko bin tɔk se: “Dɛn mek a fil lɛk se na mi os a de!”

Sera we kɔmɔt Ɔstrelia bin tɔk se: “A bin fil lɛk se na mi yon famili a go fɛn bɔt dɛn de ɔda say na di wɔl.”

Wetin bin mek dɛn fil da we de? Frɔm Julay 18 to Julay 20, 2014, Jiova Witnɛs dɛn bin gɛt wan intanashɔnal kɔnvɛnshɔn na Commerzbank-Arena insay Frankfɔt na, Jamani. Na lɛk 37,000 pipul dɛn bin atɛnd di kɔnvɛnshɔn.

Di wan dɛn we bin atɛnd di program, bin gɛda fɔ lan frɔm di Baybul. Insay di program dɛn bin de rid frɔm di Baybul, dɛn bin pre, dɛn akt tu drama dɛn, ɛn dɛn gi fayn fayn tɔk dɛn frɔm tɔpik dɛn we de na di Baybul.

Di wan dɛn we bin atɛnd di program na bin Jiova Witnɛs dɛn we de na di kɔntri ɛn i pas lɛk 3,000 pipul dɛn we kɔmɔt na difrɛn kɔntri dɛn. Sɔm pan dɛn kɔntri dɛn ya na Amɛrika, Briten, Gris, Libanɔn, Ɔstrelia, Sabya, ɛn Sawt Afrika. Na lɛk 234 Jiova Witnɛs dɛn we de yuz ɔl dɛn tɛm fɔ sav Jiova, lɛk mishɔnari dɛn, bin kɔmɔt na 70 kɔntri dɛn fɔ atɛnd di program.

Dɛn bin yuz wɛbkast fɔ sho sɔm say dɛn na di program na 19 ɔda say dɛn na Jamani, Ɔstria, ɛn Swizaland. We dɛn kɔnt ɔl di wan dɛn we atɛnd di program na di difrɛn say dɛn, di nɔmba rich 204,046.

Di program we dɛn bin gɛt na Frankfɔt bin de insay Grik, Inglish, ɛn Jaman. Na ɔda say dɛn na di program dɛn bin de translet difrɛn tɔk dɛn insay 17 langwej dɛn, ɛn dɛn langwej dɛn ya na Arabik, Chayniz, Tamil, ɛn insay tu sayn langwej dɛn.

Pan ɔl we Jiova Witnɛs dɛn bin de tɔk difrɛn langwej dɛn, kɔmɔt na difrɛn kɔntri dɛn ɛn dɛn gɛt difrɛn kɔlchɔ, dɛn nɔ bin skata bɔt di lɛk we dɛn lɛk dɛnsɛf de mek dɛn gɛt wanwɔd. (Jɔn 13:​34, 35) Dɛn bin de si ɛn trit dɛnsɛf as brɔda ɛn sista dɛn.

Tobias we kɔmɔt na Briten bin tɔk se: “Wi si fɔ wisɛf sɛf fɔ se di lɛk we wi lɛk wi brɔda dɛn we de ɔlsay na di wɔl nɔ gɛt bawndri.”

Deviana we kɔmɔt na Poto Riko bin tɔk se: “A bin mit mi kɔmpin Jiova Witnɛs dɛn we kɔmɔt na 20 kɔntri dɛn. Wi gɛt wanwɔd bikɔs wi lɛk Gɔd ɛn wi kɔmpin dɛn.”

Malkɔm we kɔmɔt Ɔstrelia bin tɔk se: “Na wan smɔl tɔŋ na de a tek di trut. A bin dɔn de rid ɛn wach fim dɛn bɔt di kayn wanwɔd we de insay di ɔganayzeshɔn. Bɔt we a kam si am fɔ misɛf dat dɔn ɛp mi fɔ ɔdastand wetin i rili min. Dat bin ɛp mi fɔ gɛt mɔ fet.”

Sɔm brɔda ɛn sista dɛn we de na 58 kɔngrigeshɔn dɛn na Frankfɔt bin pripia gift dɛn ɛn dɛn bin arenj fɔ mek dɛn go ɛnjɔy dɛnsɛf wit di wan dɛn we kɔmɔt ɔda say fɔ kam atɛnd di kɔnvɛnshɔn.

Sintia we bin kɔmɔt na Amɛrika bin tɔk se: “Wi bin ɛnjɔy di fayn fayn tin dɛn we di brɔda ɛn sista dɛn bin du fɔ wi. A nɔ go ɛva fɔgɛt di gud tin dɛn ɛn di kayn we we di brɔda ɛn sista dɛn sho se dɛn lɛk wi.”

Saymɔn we de na Jamani bin tɔk se: “Wi bin de rili sho se wi lɛk wisɛf, wi bin de mek fɔn. Wi kin lan bɔku tin dɛn frɔm wisɛf.”

Emi we kɔmɔt Ɔstrelia bin tɔk se: “Di program we wi bin gɛt da ivintɛm de ɛp mi fɔ no se as Jiova Witnɛs dɛn, wi nɔ de liv wi layf lɛk se wi nɔ de ɛnjɔy wisɛf atɔl. Wi no aw fɔ mek fɔn.”

Di kɔnvɛnshɔn we bin de na Frankfɔt na bin wan pan di intanashɔnal kɔnvɛnshɔn dɛn we dɛn bin gɛt na nayn kɔntri dɛn we de difrɛn say dɛn na di wɔl.

We dɛn bin aks wan pan di wan dɛn we atɛnd di kɔnvɛnshɔn na Frankfɔt, i bin tɔk se: “Imajin se yu si yu fambul, we na yu brɔda, bɔt yu nɔ bin no se na yu brɔda. As una mitɔp so i wɛlkɔm yu na in os ɛn i sho se i lɛk yu. Yu de rili gladi di kayn we we yu nɔ go ebul fɔ ɛksplen. If yu tayms da we de aw yu de fil bay 37,000 tɛm, yu go no wetin i rili tan lɛk fɔ de na da kɔnvɛnshɔn de.”