လၢညါန့ၣ် ကစၢ်ယွၤဟ့ၣ်အခွဲးလၢ ပိာ်ခွါကဟံအမါ အါန့ၢ်ဒံးတဂၤ. (၁ မိၤၡ့ ၄:၁၉; ၁၆:၁-၄; ၂၉:၁၈-၂၉) ဘၣ်ဆၣ် ဖဲကစၢ်ယွၤတ့လီၤစီၤအၤဒၣ်အခါ ကစၢ်ယွၤဟ့ၣ်လီၤအီၤ မါထဲတဂၤလီၤ. အဃိ ပသ့ၣ်ညါဘၣ်လၢ အခီၣ်ထံးန့ၣ် ကစၢ်ယွၤ တတိာ်ပာ်ဝဲလၢ ပှၤကဟံမါဟံဝၤ အါန့ၢ်ဒံးတဂၤဘၣ်.

 လၢအခီၣ်ထံးန့ၣ် ကစၢ်ယွၤ အတၢ်သိၣ်တၢ်သီ အိၣ်ဝဲလၢ ပှၤကဘၣ်ဟံမါဟံဝၤ ထဲတဂၤ. အဃိ ယ့ၣ်ၡူး က့ၤဒုးအိၣ်ထီၣ်ကဒါက့ၤ တၢ်သိၣ်တၢ်သီအံၤ. (ယိၤဟၣ် ၈:၂၈) ဖဲပှၤသံကွၢ်ယ့ၣ်ၡူးဘၣ်ဃးဒီး တၢ်ဆီဟံၣ်ဆီဃီအခါ ယ့ၣ်ၡူးတဲဝဲ “လၢအခီၣ်ထံးန့ၣ် ပှၤလၢအတ့လီၤ ပှၤဟီၣ်ခိၣ်ဖိန့ၣ် တ့လီၤဝဲ ပိာ်ခွါတဂၤ ဒီးပိာ်မုၣ်တဂၤန့ၣ် သုတဖးဘၣ်ဧီၤ. ဒီးအဆဲးတဲဝဲလၢ ‘လၢတၢ်န့ၣ်အဃိ ပိာ်ခွါကပာ်တ့ၢ် အမိၢ်အပၢ် ဒီးကလဲၤအိၣ်ဒီးအမါ ဒီးအဝဲသ့ၣ်ခံဂၤန့ၣ် ကကဲထီၣ် တၢ်တမံၤဃီလီၤ.’”—မးသဲ ၁၉:၄, ၅.

 လၢခံယ့ၣ်ၡူးအပျဲၢ်အဘီၣ်တဂၤ ကစၢ်ယွၤသးစီဆှံ ထိးဘၣ်အသးအဃိ အကွဲးဝဲဒၣ်လၢ “မ်ပိာ်ခွါတဂၤစုာ်စုာ် အိၣ်ဒီးအမါ ဒီးပိာ်မုၣ် တဂၤစုာ်စုာ်စ့ၢ်ကီး အိၣ်ဒီး အဝၤတက့ၢ်.” (၁ ကရံၣ်သူး ၇:၂) လံာ်စီဆှံတဲစ့ၢ်ကီးဝဲလၢ ပိာ်ခွါလၢ အဆီဟံၣ်ဆီဃီဝံၤ လၢအအိၣ်ဒီး မူဒါလီၤဆီလၢ ခရံာ်ဖိအတၢ်အိၣ်ဖှိၣ်အပူၤန့ၣ် အကဘၣ်မ့ၢ် “ဝၤလၢ အမါအိၣ်ထဲတဂၤ.”—၁ တံၤမသ့း ၃:၂, ၁၂.