အိၣ်ဝဲ. လံာ်စီဆှံ ပာ်ဖျါထီၣ်ဝဲ တၢ်အုၣ်သးလၢ ကစၢ်ယွၤအိၣ်ဝဲ အနီၢ်ကီၢ်. လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပကမၤဒိၣ်ထီၣ်​ ပတၢ်နာ်လၢ ကစၢ်ယွၤအဖီခိၣ်​ ဒီးပတၢ်နာ်န့ၣ်​ ကဘၣ်ဒိးသန့ၤထီၣ်အသးလၢ ‘တၢ်သ့တၢ်ဘၣ်လၢ ကပဲာ်ထံနီၤဖးတၢ်’ ဒီး “တၢ်နၢ်ပၢၢ်” အဖီခိၣ်လီၤ. ဒီးပတၢ်နာ်အံၤ တဘၣ်ဒိးသန့ၤထီၣ်အသးလၢ တၢ်ဘူၣ်တၢ်ဘါ အတၢ်သိၣ်လိတဖၣ်​ အဖီခိၣ်ဘၣ်. (ရိမ့ၤ ၁၂:၁; ၁ ယိၤဟၣ်​ ၅:၂၀) ပကကွၢ်သကိး တၢ်အုၣ်သးလၢ အအိၣ်လၢ လံာ်စီဆှံအပူၤ.

•   တၢ်ဘၣ်တ့တဖၣ်န့ၣ်​ အိၣ်ဝဲလၢအလီၢ် တခါဘၣ်တခါ ဒီးလဲၤအသး ဂ့ၤဂ့ၤဘၣ်ဘၣ်အဃိ ပာ်ဖျါထီၣ်ဝဲလၢ တၢ်ဘၣ်တ့ကစၢ် အိၣ်ဝဲတဂၤ. လံာ်စီဆှံတဲဝဲလၢ “ဟံၣ်ကိးဖျၢၣ်ဒဲးန့ၣ်​ ပှၤလၢအတ့ထီၣ်အီၤ အိၣ်ဝဲလီၤ. ဘၣ်ဆၣ်​ ပှၤလၢ အတ့တၢ်ခဲလၢာ်တဂၤန့ၣ်​ မ့ၢ်ဝဲကစၢ်ယွၤလီၤ.” (ဧ့ၤဘြံၤ ၃:၄) တၢ်အဒိတခါအံၤန့ၣ်​ ယိယိဖိဘၣ်ဆၣ်​ ကဲဘျုးလၢ ပှၤကူၣ်ဘၣ်ကူၣ်သ့အါဂၤ အဂီၢ်. a

•   ဒ်ပမ့ၢ်ပှၤဟီၣ်ခိၣ်ဖိအသိး ပအိၣ်ဖျဲၣ်ထီၣ်ဃုာ်ဒီး တၢ်တူၢ်ဘၣ်လၢ ပအဲၣ်ဒိးသ့ၣ်ညါဝဲ တၢ်အိၣ်မူ အတၢ်ပညိၣ်​ ဒီးပကအိၣ်ဒီး တၢ်သးခုနီၢ်ကီၢ်အဂီၢ် ကဘၣ်မၤဒ်လဲၣ်. ပတၢ်လိၣ်ဘၣ်လၢ နီၢ်ခိတခီမ့ၢ်အိၣ်ဝဲ လၢလၢပှဲၤပှဲၤလံသနာ်က့ ပတၢ်တူၢ်ဘၣ်ဒ်အံၤန့ၣ်​ အိၣ်ဒံးဝဲ. ဒ်လံာ်စီဆှံ တဲဝဲအသိး မ့ၢ်လၢပ “လိၣ်ဘၣ်​ ကစၢ်ယွၤ အတၢ်ဟံးစုနဲၣ်ကျဲ” အဃိ ပတူၢ်ဘၣ်ဒ်န့ၣ်လီၤ. ပအဲၣ်ဒိးသ့ၣ်ညါ ကစၢ်ယွၤအဂ့ၢ် ဒီးဘူၣ်ထီၣ်ဘါထီၣ်အီၤန့ၣ်​ မ့ၢ်ဒၣ်ပှၤဟီၣ်ခိၣ်ဖိ အန့ဆၢၣ်လီၤ. (မးသဲ ၅:၃; လီၣ်ဖျါ ၄:၁၁) ပှၤဟီၣ်ခိၣ်ဖိ အတၢ်လိၣ်ဘၣ်လၢ နီၢ်သးတခီအံၤန့ၣ်​ ပာ်ဖျါထီၣ်ဝဲလၢ ကစၢ်ယွၤအိၣ်ဝဲ တကးဒံးဘၣ်​ ကစၢ်ယွၤန့ၣ်​ မ့ၢ်ဝဲ တၢ်အဲၣ်တၢ်ကွံကစၢ်လၢ အအဲၣ်ဒိးဝဲလၢ ပတၢ်လိၣ်ဘၣ်အံၤ ကလၢထီၣ်ပှဲၤထီၣ်အဂီၢ်လီၤ.—မးသဲ ၄:၄.

•   လံာ်စီဆှံ ဝံအတၢ်စံးပာ်တဖၣ်န့ၣ်​ ဘၣ်တၢ်ကွဲးဆိပာ်စၢၤအီၤ အနံၣ်လၢ အကယၤတဖၣ်​ ဒီးလၢခံန့ၣ်​ ဟဲလၢထီၣ်ပှဲၤထီၣ်ဝဲ လီၤတံၢ်လီၤဆဲးလီၤ. တၢ်ဂ့ၢ်တၢ်ကျိၤလၢ ဝံအတၢ်စံးပာ်အပူၤန့ၣ်​ ဟဲလၢထီၣ်ပှဲၤထီၣ်ဝဲ လီၤတံၢ်လီၤဆဲးအဃိ ပသ့ၣ်ညါသ့လၢ ဝံအတၢ်စံးပာ်အံၤန့ၣ်​ ကဟဲလၢ ပှၤလၢအဒိၣ်န့ၢ်ဒံး ပှၤဟီၣ်ခိၣ်ဖိအအိၣ်လီၤ. ဒီးပှၤတဂၤအံၤန့ၣ်​ ကဘၣ်မ့ၢ်ဒၣ်​ ကစၢ်ယွၤလီၤ.—၂ ပ့းတရူး ၁:၂၁.

•   ပှၤကွဲးလံာ်စီဆှံတဖၣ်​ အတၢ်သ့ၣ်ညါနၢ်ပၢၢ်လၢ စဲအ့ၣ်တခီန့ၣ်​ အါဒိၣ်န့ၢ်ဒံး ပှၤတစိၤဃီဒီး အဝဲသ့ၣ်လီၤ. အဒိ, ပှၤလၢပျၢၤတဖၣ်န့ၣ်​ နာ်ဝဲလၢ ဟီၣ်ခိၣ်န့ၣ်​ ကဆီ ဒီးချံး တီဃာ်အီၤလီၤ. ဘၣ်ဆၣ်​ ဖဲန့ၣ်အဆၢကတီၢ် လံာ်စီဆှံ တဲဝဲလၢ ကစၢ်ယွၤ “စဲၤလီၤဟီၣ်ခိၣ်လၢ တၢ်တမ့ၢ်ဘၣ်တၢ်ဘၣ်အလိၤလီၤ.” (ယိၤဘး ၂၆:၇) တကးဒံးဘၣ်​ လံာ်စီဆှံ ပာ်ဖျါထီၣ်ဝဲလၢ ဟီၣ်ခိၣ်န့ၣ်​ “ကဝီၤ” ဝဲလီၤ. (ယၡါယၤ ၄၀:၂၂) ပှၤကွဲးလံာ်စီဆှံတဖၣ်န့ၣ်​ ကွဲးတၢ်ဘၣ်ထဲအံၤအဃိ ပှၤအါဂၤန့ၣ်​ နာ်ဝဲလၢ ပှၤကွဲးလံာ်စီဆှံတဖၣ်အံၤ ဒိးန့ၢ်ဘၣ်​ တၢ်ဂ့ၢ်တၢ်ကျိၤလၢ ကစၢ်ယွၤအအိၣ်လီၤ.

•   ပှၤတနီၤန့ၣ်​ တဒိးန့ၢ်ဘၣ်​ အတၢ်သံကွၢ်တဖၣ်​ အတၢ်စံးဆၢ လၢအလီၤသူၣ်မံသးမုာ်ဘၣ်​ အဃိ အဝဲသ့ၣ်တနာ်ဝဲလၢ ကစၢ်ယွၤအိၣ်ဘၣ်. အဒိ, အဝဲသ့ၣ်​ သံကွၢ်ဝဲလၢ ကစၢ်ယွၤ မ့ၢ်အိၣ်ဒီး တၢ်အဲၣ်တၢ်ကွံ ဒီးတၢ်စိတၢ်ကမီၤန့ၣ်​ ဘၣ်မနုၤအဃိ ဟီၣ်ခိၣ်ပှဲၤဝဲဒီး တၢ်ကီတၢ်ခဲ ဒီးတၢ်အၢတၢ်သီတဖၣ်လဲၣ်. ဘၣ်မနုၤအဃိ တၢ်ဘူၣ်တၢ်ဘါတဖၣ်​ ဒုးအိၣ်ထီၣ်​ တၢ်လၢအတဂ့ၤဘၣ်​ အါန့ၢ်ဒံး တၢ်လၢအဂ့ၤတဖၣ်လဲၣ်. (တံတူး ၁:၁၆) လၢလံာ်စီဆှံပူၤန့ၣ်​ ပထံၣ်ဘၣ်​ တၢ်သံကွၢ်လၢ အကီဒ်အံၤတဖၣ်​ အတၢ်စံးဆၢသ့လီၤ.