ပကဘၣ် အိၣ်မူဒ်လဲၣ်န့ၣ် ပတၢ်ဘၣ်တ့ကစၢ် ယဟိဝၤယွၤ သ့ၣ်ညါဝဲ အဂ့ၤကတၢၢ်. ဒီးခီဖျိလၢ အတၢ်ဟံးစုနဲၣ်ကျဲန့ၣ် အဂ့ၤလၢပဂီၢ်အဃိ အဘၣ်သးလၢ ပကမၤထွဲ အတၢ်ဟံးစုနဲၣ်ကျဲ. ပမ့ၢ်မၤထွဲ ယဟိဝၤယွၤ အတၢ်မၤလိာ်န့ၣ် ပသ့ၣ်ညါလၢ အကဲဘျုးလၢပဂီၢ် သပှၢ်တၢၢ်. ဒီးကမၤစၢၤပှၤလၢ ပကဆၢတဲာ်တၢ် လၢအဘၣ်. အဃိ ပကဒိးန့ၢ်ဘၣ် တၢ်မုာ်တၢ်ခုၣ် ဒီးတၢ်သးခု.

 ပမ့ၢ်ဘၣ်သး အိၣ်မူမၤထွဲ ယဟိဝၤယွၤ အတၢ်ဘျၢန့ၣ် ပကဘၣ် ဆီတလဲ ပတၢ်ဆိကမိၣ် ဒီးတၢ်လၢပမၤ. သနာ်က့ တၢ်လၢ ပမၤတန့ၢ်ဘၣ်န့ၣ် ယဟိဝၤယွၤ တမၢပမၤဘၣ်. ယဟိဝၤယွၤ ကဲဝဲ ပတၢ်ဘၣ်တ့ကစၢ်အဃိ တၢ်လၢ ပမၤန့ၢ် ဒီးပမၤတန့ၢ်ဘၣ်န့ၣ် အသ့ၣ်ညါဝဲဂ့ၤဂ့ၤ. ဒီးပမ့ၢ်သ့ၣ်ညါအါထီၣ် ယဟိဝၤယွၤအဂ့ၢ်န့ၣ် ပကထံၣ်ဘၣ်လၢ “အတၢ်မၤလိာ်တဖၣ်န့ၣ် တကဲထီၣ် တၢ်ဝံဃၢလၢပဂီၢ်ဘၣ်.”—၁ ယိၤဟၣ် ၅:၃.

ခီဖျိလၢ ယဟိဝၤယွၤ ကမၤစၢၤပှၤအဃိ ပအိၣ်မူဒ် အတၢ်ဘၣ်သးအသိးသ့. ယဟိဝၤယွၤ ကမၤစၢၤပှၤခီဖျိ အကလုၢ်ကထါ လံာ်စီဆှံ လၢအဟ့ၣ်ပှၤ တၢ်ဂံၢ်တၢ်ဘါ ဒီးတၢ်မုၢ်လၢ်.

ပှၤအကကွဲၢ် လၢဟီၣ်ခိၣ်ဒီဘ့ၣ်ညါ သ့ၣ်ညါဘၣ်ဝဲလၢ အဝဲသ့ၣ် အိၣ်မူမၤထွဲ လံာ်စီဆှံ အတၢ်ဟ့ၣ်ကူၣ်အဃိ အတၢ်အိၣ်မူ ဂ့ၤထီၣ်ဒိၣ်မး. ပဟ့ၣ်ဂံၢ်ဟ့ၣ်ဘါနၤလၢ နကဃုသ့ၣ်ညါကွၢ် လံာ်စီဆှံ အတၢ်ဟ့ၣ်ကူၣ်စ့ၢ်ကီး. မၤလိကွၢ် လံာ်ဘရိၣ်ခၠၣ် လၢအဒိးသန့ၤထီၣ်သးလၢ လံာ်စီဆှံ တဘ့ၣ်အံၤ. လံာ်တဘ့ၣ်အံၤ အခိၣ်တီမ့ၢ်ဝဲ အိၣ်မူလီၤထူလီၤယိာ် ပှဲၤဒီးတၢ်သးခု ဒီးနမၤန့ၢ်အီၤလၢ jw.org အပူၤသ့ ဒီးနတလိၣ်ဟ့ၣ်အပှ့ၤဘၣ်. လံာ်ဘရိၣ်ခၠၣ်တဘ့ၣ်အံၤ အအိၣ်ဒီး တၢ်မၤလိတဖၣ်အံၤ–

• လံာ်စီဆှံ မၤစၢၤနၤ သ့ဒ်လဲၣ်

• လံာ်စီဆှံအၢၣ်လီၤပှၤ တၢ်အိၣ်မူလၢ အလီၤသးခု လၢခါဆူညါအဂီၢ်

• လံာ်စီဆှံန့ၣ် နနာ်အီၤသ့ဧါ

ပမ့ၢ်ဃုသ့ၣ်ညါ မၤလိအါထီၣ် ကစၢ်ယွၤ အကလုၢ်ကထါ လံာ်စီဆှံန့ၣ် ပကထံၣ်ဘၣ်လၢ လံာ်စီဆှံန့ၣ် အကဲဘျုးလၢပဂီၢ် လၢစိၤခဲအံၤဒံး. ပကသ့ၣ်ညါဘၣ်လၢ “ခဲအံၤမ့ၢ်ဂ့ၤ ခါဆူညါမ့ၢ်ဂ့ၤ ပှၤသန့ၤသးလၢ ကစၢ်ယွၤ အတၢ်ဘျၢတဖၣ် သ့လီၤထူလီၤယိာ်.” (စံးထီၣ်ပတြၢၤ ၁၁၁:၈) အဃိ ပမ့ၢ်မၤထွဲ လံာ်စီဆှံ အတၢ်ဟ့ၣ်ကူၣ် လၢပတၢ်အိၣ်မူပူၤန့ၣ် ပကဒိးန့ၢ်ဘၣ်အဘျုး သပှၢ်တၢၢ်. သနာ်က့ ယဟိဝၤယွၤ တမၢဆူၣ်ပှၤလၢ ပကအိၣ်မူမၤထွဲ ဒ်အတၢ်ဟံးစုနဲၣ်ကျဲ အသိးဘၣ်. (၅ မိၤၡ့ ၃၀:၁၉, ၂၀; ယိၤၡူ ၂၄:၁၅) အဃိ ပဝဲကိးဂၤဒဲး ပကဘၣ်ဃုထၢ တခါခါ.