ကစၢ်​ယွၤ​ဟ့ၣ်​ပှၤ တၢ်ဟ့ၣ်​လီၤဆီ​တခါ​လၢ အမ့ၢ် တၢ်​ဃ့​ထုကဖၣ်​ ဒ်သိး​ပ​က​တဲတၢ်​ဒီး​အီၤ ဒီး​ပာ်ဖျါ​ထီၣ်​ ပ​တၢ်​တူၢ်​ဘၣ်​တဖၣ်​န့ၣ်​လီၤ. ဝံ​တဂၤ​လၢ အမ့ၢ်​စီၤ​ဒၤဝံး​န့ၣ်​ ဃ့​ဘါ​ထုကဖၣ်​လၢ ကစၢ်​ယွၤ​အ​အိၣ်ဒီး တဲ​ဝဲ​လၢ “ပှၤလၢ​အ​နၢ်ဟူ တၢ်ဘါ​ထုကဖၣ်​ဧၢ, တၢ်ညၣ်​ခဲလၢာ် က​ဟဲ​ဆူ​န​အိၣ်​လီၤ.” (စံးထီၣ်​ပတြၢၤ ၆၅:၂) ဒ်သိး​ကစၢ်​ယွၤ က​ဒိကနၣ်​ ပ​တၢ်​ထုကဖၣ်​ဒီး က​ဆိၣ်ဂ့ၤ​ပှၤ​အဂီၢ် ပ​က​​ဘၣ်​မၤ​ဒ်လဲၣ်.

န​နီၢ်ကစၢ်​တၢ်​ဃ့​ဘါ​ထုကဖၣ်​န့ၣ်​ မၤစၢၤ​နၤ​ဒ်သိး န ‘က​လူ​လီၤ​န​သး​လၢ [ယွၤ] အမဲာ်​ညါ’ ဒီး​တဲ​ဖျါထီၣ်​ န​တၢ်​တူၢ်​ဘၣ်​နီၢ်နီၢ်​တဖၣ်​လီၤ. (စံးထီၣ်​ပတြၢၤ ၆၂:၈) သ့တၢ်လၢာ်​ကစၢ် ပာ်လုၢ်​ပာ်ပှ့ၤ​ဝဲ တၢ်​ဃ့​ဘါ​ထုကဖၣ်​လၢ အ​ဟဲထီၣ်​လၢ ပ​သးပူၤ​နီၢ်နီၢ်​န့ၣ်​လီၤ.

ကစၢ်​ယွၤ​န့ၣ်​ အ​မံၤလၤ​သၣ်ကပီၤ အိၣ်​ဝဲ​အါမး ဘၣ်ဆၣ်​ အ​နီၢ်ကစၢ်​အ​မံၤ​န့ၣ်​ အိၣ်​ဝဲ​ထဲ​တဖျၢၣ်​ဧိၤ​န့ၣ်​လီၤ. “ယဲဒၣ်အံၤ ယ​မ့ၢ် [“ယဟိဝၤ”, NWT] ယွၤ​လီၤ. အ​ဝဲ​န့ၣ်​မ့ၢ် ယ​မံၤ​လီၤ.” (ယၡါယၤ ၄၂:၈) လၢ​လံာ်စီဆှံ​ပူၤ​န့ၣ်​ မံၤ​လၢ အမ့ၢ် ယဟိဝၤ​ယွၤ​န့ၣ်​ ​ဘၣ်​တၢ်​ပာ်ဖျါ​အီၤ အိၣ်​လၢ​အဘျီ ၇,၀၀၀ ဃၣ်ဃၣ်​ညါ​လီၤ. ဖဲ​ဝံ​အါဂၤ ဃ့​ဘါ​ထုကဖၣ်​လၢ ကစၢ်​ယွၤ​အိၣ်​အခါ အဝဲသ့ၣ်​သူဝဲ ကစၢ်​ယွၤ​အ​မံၤ​န့ၣ်​လီၤ. စီၤ​အၤဘြၤဟၣ်​ တဲ​ဝဲ​လၢ “ယွၤ​ဧၢ [“ယဟိဝၤ”, NWT] ဝံသးစူၤ . . . ယ​က​​ဘၣ်​စံး​က​ဒီး​ယဲ [တၢ်​ဒီး​နၤ].” (၁ မိၤၡ့ ၁၈: ၃၀, ခ့ခါစှီၤကျိာ်) အဃိ ဖဲ​ပ​ဃ့​ဘါ​ထုကဖၣ်​အခါ ပ​ကြၢး​သူ ကစၢ်​ယွၤ​အ​မံၤ လၢ​အမ့ၢ် ယဟိဝၤ​ယွၤ​န့ၣ်​လီၤ.

ပ​မ့ၢ်​ဃ့​ဘါ​ထုကဖၣ်​လၢ ကျိာ်​တ​ကျိာ်​ဂ့ၤ​တ​ကျိာ်​ဂ့ၤ​န့ၣ်​ ကစၢ်​ယွၤ​နၢ်ပၢၢ်​ဝဲ ပ​တၢ်​ဆိကမိၣ်​ဒီး ပ​တၢ်​တူၢ်​ဘၣ်​ခဲလၢာ်​န့ၣ်​လီၤ. အ​ကလုၢ်​ကထါ ပာ်ဖျါ​ထီၣ်​န့ၢ်​ပှၤလၢ “ယွၤ​တ​ကွၢ်ဒိၣ်​ဆံး အါ​စှၤ​​ဘၣ်​ပှၤကညီ​ဘၣ်. မ့ၢ်​အ​တူၢ်လိာ် ပှၤလၢ​အ​ပျံၤ​အီၤ, ဒီး​မၤ​တၢ်တီ​တၢ်လိၤ​လၢ ပှၤ​ကိး​ကလုာ်​ဒဲး​အကျါ​လီၤ.”—မၤတၢ် ၁၀:၃၄, ၃၅.

ဘၣ်ဆၣ်​ ဒ်သိး​ကစၢ်​ယွၤ က​ဆိၣ်ဂ့ၤ​ပှၤ​အဂီၢ် ထဲဒၣ်​ပ​ဃ့​ဘါ​ထုကဖၣ်​န့ၣ်​ တလၢပှဲၤ​ဒံး​ဘၣ်. တၢ်ဂ့ၢ်​လၢခံ​တခါ​န့ၣ်​ ပ​က​တဲသကိး ပ​​ဘၣ်​မၤ​မနုၤ​လဲၣ်န့ၣ်​လီၤ.