လံာ်စီဆှံ အိၣ်ဂၢၢ်ဆိးကျၢၤဝဲ တုၤလၢပစိၤခဲအံၤလီၤ. လၢတၢ်န့ၣ်အဃိ မုၢ်မဆါတနံၤအံၤ နဒိးန့ၢ်ဘၣ်လံာ်စီဆှံ ဒီးနဖးဘၣ်အီၤသ့န့ၣ်လီၤ. ဖဲနဃုထၢ လံာ်စီဆှံလၢပှၤကွဲးကျိာ်ထံအီၤ ဂ့ၤဂ့ၤဘၣ်ဘၣ်တဘ့ၣ်အခါ နနာ်သ့လၢအဘၣ်တၢ်ကွဲးအီၤဒ် တၢ်ကွဲးအသးလၢအခီၣ်ထံးအသိးန့ၣ်လီၤ. * တၢ်ကွဲးကူက့ၤ လံာ်စီဆှံလၢပျၢၤတဖၣ် လီၤအုၣ်လီၤကျၣ်သ့, ဘၣ်တၢ်ဂုာ်ကျဲးစၢး မၤဟးဂီၤအီၤ, ဒီးအတၢ်ကစီၣ် ဘၣ်တၢ်ဂုာ်ကျဲးစၢး ဆီတလဲအီၤသနာ်က့ ဘၣ်မနုၤအဃိ လံာ်စီဆှံအံၤ အိၣ်ဂၢၢ်ဆိးကျၢၤဝဲ တုၤလၢပစိၤခဲအံၤလဲၣ်. လံာ်စီဆှံတဘ့ၣ်အံၤ လီၤဆီဒီးလံာ်အဂၤဒ်လဲၣ်.

ပှၤဃုသ့ၣ်ညါ လံာ်စီဆှံအါဂၤ တူၢ်လိာ်ဝဲ စီၤပီလူးအတၢ်ကတိၤလၢ အစံးဝဲလၢ “ကယဲၢ်တၢ်ကွဲးအသးခဲလၢာ်န့ၣ်, ကွဲးအသးလၢ ယွၤအသးစီဆှံ” လီၤ. (၂ တံၤမသ့း ၃:၁၆) အဝဲသ့ၣ်နာ်ဝဲလၢ လံာ်စီဆှံမ့ၢ် ယွၤအကလုၢ်ကထါဒီး ကစၢ်ယွၤဒီသဒၢအီၤအဃိ အိၣ်ဂၢၢ်ကျၢၤဝဲ တုၤလၢပစိၤခဲအံၤန့ၣ်လီၤ. ဖၣ်စဲၣ် လၢပဖးဘၣ်တ့ၢ်အဂ့ၢ်တဂၤန့ၣ် အဲၣ်ဒိးသ့ၣ်ညါဝဲလၢ မ့ၢ်လံာ်စီဆှံဟဲလၢ ယွၤအအိၣ်နီၢ်ကီၢ်ဧါန့ၣ်လီၤ. လၢတၢ်န့ၣ်အဃိ အဝဲပာ်လီၤအသးလၢ ကမၤလိဝဲ လံာ်စီဆှံလၢ အနီၢ်ကစၢ်န့ၣ်လီၤ. တၢ်လၢအဝဲ သ့ၣ်ညါထီၣ်ဝဲတဖၣ်န့ၣ် ဒုးကမၢကမၣ်အီၤလီၤ. တယံာ်ဘၣ်ဒီး အဝဲသ့ၣ်ညါထီၣ်ဝဲလၢ တၢ်လၢ ပှၤကိးလီၤအသးလၢခရံာ်ဖိတဖၣ် သိၣ်လိဝဲတဖၣ်န့ၣ် တအိၣ်လၢ လံာ်စီဆှံအပူၤဘၣ်. တကးဘၣ်အမဲာ်ညါ ဖဲအဝဲနၢ်ပၢၢ်ထီၣ် ကစၢ်ယွၤအတၢ်တိာ်ပာ်လၢ ဟီၣ်ခိၣ်အဂီၢ်အခါန့ၣ် ထုးန့ၢ်အသးဒိၣ်မးလီၤ.

အဝဲစံးဝဲလၢ “လံာ်စီဆှံ မ့ၢ်ယွၤအတၢ်ဟ့ၣ်န့ၣ် ခဲအံၤ ယနာ်သပှၢ်တၢၢ်လံ. ကစၢ်ယွၤတ့လီၤ မူခိၣ်ဟီၣ်ခိၣ် မ့ၢ်သ့န့ၣ် အစိအကမီၤကအိၣ်ဝဲလၢ ကဟ့ၣ်လီၤပှၤ လံာ်တဘ့ၣ် ဒီးကဒီသဒၢဝဲလံာ်အံၤအဂီၢ်လီၤ. မ့တမ့ၢ်ဒ်န့ၣ်န့ၣ် ကကဲထီၣ်လၢ ကစၢ်ယွၤ အစိအကမီၤတအိၣ်လၢလၢပှဲၤပှဲၤလၢ ကမၤတၢ်ကိးမံၤဒဲးဘၣ်. ယကတဲလၢ ကစၢ်ယွၤ မၤတၢ်ကိးမံၤဒဲး တသ့ဘၣ်န့ၣ် ဘၣ်ကသ့ဧါ.”—ယၡါယၤ ၄၀:၈.