ဖဲယ့ၣ်ၡူး စးထီၣ်မၤဝဲ ကစၢ်ဟါတၢ်အီၣ်အခါ အပျဲၢ်အဘီၣ် အဂၤ ၇၀ တအိၣ်ဒီးအီၤဘၣ်န့ၣ် တမ့ၢ်ခီဖျိလၢ ယ့ၣ်ၡူး တဘၣ်သူၣ်ဘၣ်သး အဝဲသ့ၣ် မ့တမ့ၢ် အဝဲသ့ၣ် ပာ်တ့ၢ်ကွံာ် ယ့ၣ်ၡူးအဃိဘၣ်. ဖဲန့ၣ်အခါ အိၣ်ဒၣ်ယ့ၣ်ၡူး ဘၣ်သးအိၣ်ဒီး အတၢ်မၢဖိတဖၣ်လီၤ.

တၢ်မၢဖိ ၁၂ ဂၤမ့ၢ်ဂ့ၤ ယ့ၣ်ၡူးအပျဲၢ်အဘီၣ် အဂၤ ၇၀ မ့ၢ်ဂ့ၤ ယ့ၣ်ၡူး ဘၣ်သူၣ်ဘၣ်သး အဝဲသ့ၣ် ကိးဂၤဒဲး. ခီၣ်ထံးခါန့ၣ် ယ့ၣ်ၡူးဃုထၢထီၣ်ဝဲ ပှၤ ၁၂ ဂၤလၢ အပျဲၢ်အဘီၣ်တဖၣ်အကျါ ဒီးကိးအဝဲသ့ၣ်လၢ တၢ်မၢဖိတဖၣ်. (လူၤ ၆:၁၂-၁၆) ဒီးဖဲယ့ၣ်ၡူးအိၣ်လၢ ကၤလံၤလါအခါ “ယ့ၣ်ၡူးကိးဖှိၣ် ပှၤတဆံခံဂၤ” ဒီး “ဆှၢလီၤအဝဲသ့ၣ် ဒ်သိးကစံၣ်တဲၤတဲလီၤ ကစၢ်ယွၤအဘီအမုၢ် ဒီးကမၤဘျါက့ၤတၢ် အဂီၢ်.” (လူၤ ၉:၁-၆) လၢခံ ဖဲယ့ၣ်ၡူးအိၣ်လၢ ကီၢ်ယူဒၤအခါ ယ့ၣ်ၡူး “ဃုထၢထီၣ်ဝဲ ပှၤအဂၤ ၇၀ ဒီးဆှၢလီၤဆိ အဝဲသ့ၣ် ခံဂၤခံဂၤ.” (လူၤ ၉:၅၁; ၁၀:၁) အဃိ ယ့ၣ်ၡူး အပျဲၢ်အဘီၣ်လၢ အစံၣ်တဲၤတဲလီၤ အဂ့ၢ်န့ၣ် အိၣ်ဝဲလၢ တၢ်လီၢ်တဘျုးတီၤညါ.

ပှၤယူဒၤဖိလၢ အကဲထီၣ် ယ့ၣ်ၡူးအပျဲၢ်အဘီၣ်စ့ၢ်ကီး မၤသကိးဝဲ ဘူၣ်လဲၤကပာ်ဒီး အဟံၣ်ဖိဃီဖိ ကိးနံၣ်ဒဲး. (၂ မိၤ ၁၂:၆-၁၁, ၁၇-၂၀) ဒီးတချုးလၢ ယ့ၣ်ၡူးကသံ ဒံးဘၣ်န့ၣ် အီၤဒီး အတၢ်မၢဖိတဖၣ် လဲၤဝဲလၢ ယရူၤၡလ့ၣ်. သနာ်က့ ဖဲန့ၣ်အခါ အတကိးဖှိၣ် အပျဲၢ်အဘီၣ် ခဲလၢာ်လၢ အအိၣ်လၢ ကီၢ်ယူဒၤ, ကၤလံၤလါ ဒီးပ့ၤရံယၤ လၢကမၤဘူၣ်လဲၤကပာ် လီၤဘီလီၤမုၢ်ဘၣ်. ဖဲန့ၣ်အခါ အိၣ်ဒၣ်ယ့ၣ်ၡူး ဘၣ်သးအိၣ်ဒီး အတၢ်မၢဖိတဖၣ်လီၤ. ယ့ၣ်ၡူး တဲဘၣ် အဝဲသ့ၣ်လၢ “တချုးလၢ ယဘၣ်တူၢ်တၢ်ဒံးဘၣ်န့ၣ် ယအဲၣ်ဒိးအီၣ် ဘူၣ်လဲၤကပာ်အံၤဒီးသု ဒိၣ်မး.”—လူၤ ၂၂:၁၅.

ဘၣ်မနုၤအဃိ ယ့ၣ်ၡူး ဘၣ်သးအိၣ်ဒီး အဝဲသ့ၣ်လဲၣ်န့ၣ် တၢ်ဂ့ၢ်အိၣ်ဝဲ. တယံာ်လၢၤဘၣ်န့ၣ် ယ့ၣ်ၡူး ကဘၣ်သံဒ် “ယွၤအသိဖိလၢ အစိာ်ထီၣ်ကွံာ် ဟီၣ်ခိၣ် အတၢ်ဒဲးဘး.” (ယိၤ ၁:၂၉) ဒီးယ့ၣ်ၡူး ကဘၣ်သံဖဲ ယရူၤၡလ့ၣ် လၢအမ့ၢ် တၢ်လီၢ်လၢ ပှၤလုၢ်ထီၣ်တၢ်လၢ ကစၢ်ယွၤအအိၣ်. ပမ့ၢ်ဘၣ်ကွၢ် ဘူၣ်လဲၤကပာ် အသိဖိန့ၣ် အဒုးသ့ၣ်နီၣ် ပှၤအံၣ်စရ့လးဖိလၢ ယဟိဝၤယွၤ မၤထူၣ်ဖျဲးထီၣ် အဝဲသ့ၣ်လၢ ကီၢ်အဲၤကူပတူး. သနာ်က့ ယ့ၣ်ၡူး အတၢ်သံန့ၣ် ကဲဘျုးဝဲအါန့ၢ် ဘူၣ်လဲၤကပာ်အသိဖိဒံး. ခီဖျိလၢ ယ့ၣ်ၡူး ဟ့ၣ်လုၢ်ထီၣ်သးအဃိ အမၤထူၣ်ဖျဲးထီၣ် ပှၤဟီၣ်ခိၣ်ဖိလၢ တၢ်ဒဲးဘးဒီးတၢ်သံ. (၁ ကရံၣ် ၅:၇, ၈) ဒီးယ့ၣ်ၡူး အတၢ်ဟ့ၣ်လုၢ်ထီၣ်အံၤ အိးဟိထီၣ်ကျဲလၢ တၢ်မၢဖိ ၁၂ ဂၤ ကကဲထီၣ်ဘၣ်စ့ၢ်ကီး ခရံာ်ဖိတၢ်အိၣ်ဖှိၣ် အတၢ်သူၣ်ထီၣ် အခီၣ်ထံး. (အ့း ၂:၂၀-၂၂) ပထံၣ်ဘၣ်စ့ၢ်ကီးလၢ ဝ့ၢ်စီဆှံ လၢအမ့ၢ် ယရူၤၡလ့ၣ် လၢအအိၣ်လၢမူခိၣ်န့ၣ် အိၣ်ဒီး “လၢၢ်အခီၣ်ထံး ၁၂ ဖျၢၣ်” ဒီးလၢလၢၢ်တဖၣ်အံၤ အလိၤန့ၣ် “မံၤအိၣ်ဝဲ ၁၂ ဖျၢၣ် လၢအမ့ၢ်သိဖိ အတၢ်မၢဖိ ၁၂ ဂၤ အမံၤ.” (လီၣ် ၂၁:၁၀-၁၄) ဒီးပသ့ၣ်ညါဘၣ်လၢ တၢ်မၢဖိလၢ အသးတီတဖၣ်အံၤ အိၣ်ဒီးမူဒါ လီၤလီၤဆီဆီလၢ ကမၤလၢပှဲၤထီၣ် ယဟိဝၤယွၤ အတၢ်တိာ်ပာ်. အဃိ ဖဲယ့ၣ်ၡူး မၤဝဲဘူၣ်လဲၤကပာ် အလီၢ်ခံကတၢၢ်တဘျီ ဒီးကစးထီၣ်မၤဝဲ ကစၢ်ဟါတၢ်အီၣ် အဆိကတၢၢ်တဘျီအခါ ယ့ၣ်ၡူး ဘၣ်သးအိၣ်ဒီး အဝဲသ့ၣ်.

ဖဲယ့ၣ်ၡူးမၤဝဲ ကစၢ်ဟါတၢ်အီၣ်အခါ အပျဲၢ်အဘီၣ် အဂၤ ၇၀ ဒီးအပျဲၢ်အဘီၣ် လၢအဂၤတဖၣ် တအိၣ်ဒီးအီၤဘၣ်. သနာ်က့ အပျဲၢ်အဘီၣ်လၢ အသးတီ ကိးဂၤဒဲးန့ၣ် ကဒိးန့ၢ်ဘၣ်အဘျုးလၢ ကစၢ်ဟါတၢ်အီၣ် တနၤန့ၣ်စ့ၢ်ကီး. ဒီးလၢခံ ယ့ၣ်ၡူးအပျဲၢ်အဘီၣ်လၢ အကဲထီၣ် ခရံာ်ဖိလၢ အဘၣ်တၢ်ဒိးဖှူအီၤခဲလၢာ်န့ၣ် ကပၣ်ဃုာ်ဘၣ်လၢ ဘီမုၢ်အတၢ်အၢၣ်လီၤလၢ ယ့ၣ်ၡူးမၤဝဲဒီး တၢ်မၢဖိတဖၣ် ဖဲတၢ်တနၤန့ၣ်.—လူၤ ၂၂:၂၉, ၃၀.