တၢ်ဂ့ၢ်လၢအဘၣ်ထွဲလိာ်သးဒီးလံာ်ကုခိၣ် | ဖဲပှၤလၢပအဲၣ်ဘၣ်အီၤတဂၤ သံအခါ
ပပာ်ဖျါထီၣ် ပတၢ်သူၣ်အုးသးအုးန့ၣ် မ့ၢ်တၢ်လၢအကမၣ်ဧါ
နဆိးက့ တစိၢ်ဖိအိၣ်ဝဲတဘျီဘျီဧါ. ဘၣ်သ့ၣ်သ့ၣ် မ့ၢ်လၢနဆိးက့ဒၣ် တစိၢ်ဖိဒီးဘျါက့ၤဝဲအဃိ နကသးပ့ၤနီၣ်ကွံာ် နတၢ်ဆူးတၢ်ဆါန့ၣ်လီၤ. ဘၣ်ဆၣ် တၢ်သူၣ်အုးသးအုးလၢပတူၢ်ဘၣ် ဖဲပှၤလၢပအဲၣ်ဘၣ်အီၤတဂၤသံအခါန့ၣ် တမ့ၢ်ဒ်န့ၣ်ဘၣ်. ကသံၣ်သရၣ် အဲလဲၣ် ဝီဖၢး ကွဲးဝဲလံာ်တဘ့ၣ်လၢအခိၣ်တီမ့ၢ်ဝဲ Healing a Spouse’s Grieving Heart ဒီးစံးဝဲလၢ “တၢ်လၢအကမၤလီၤမၢ်ကွံာ် တၢ်သူၣ်အုးသးအုး လၢဟဲကဲထီၣ်အသး ခီဖျိလၢ ပှၤလၢပအဲၣ်ဘၣ်အီၤတဂၤ သံအဃိန့ၣ် တအိၣ်နီတမံၤဘၣ်. ဘၣ်ဆၣ် ခီဖျိလၢပှၤဂၤ အတၢ်မၤစၢၤအဃိ ဒ်တၢ်ဆၢကတီၢ်လဲၤပူၤကွံာ်အသိး နတၢ်သူၣ်အုးသးအုး ကကိညၢ်လီၤဝဲကယီကယီလီၤ.”
အဒိ ဆိကမိၣ်ကွၢ်ဖဲ နီၢ်စၤရါသံအခါ စီၤအၤဘြၤဟၣ် အသးကအုးဝဲထဲလဲၣ်န့ၣ်တက့ၢ်. လံာ်စီဆှံစံးဝဲလၢ “စီၤအၤဘြၤဟၣ်လဲၤဒီးပာ်ဖျါထီၣ် အတၢ်သူၣ်အုးသးအုး” လၢနီၢ်စၤရါအဃိလီၤ. လၢတၢ်ကွဲးအသးအခီၣ်ထံးအပူၤန့ၣ် တၢ်ကတိၤလၢအမ့ၢ် “လဲၤဒီးပာ်ဖျါထီၣ်” အံၤအခီပညီမ့ၢ်ဝဲ စီၤအၤဘြၤဟၣ်လိၣ်ဘၣ် တၢ်ဆၢကတီၢ် ဒ်သိးအသးကမုာ်ထီၣ်က့ၤအဂီၢ်လီၤ. * တၢ်အဒိခံတမံၤန့ၣ် မ့ၢ်ဝဲစီၤယၤကိာ်လီၤ. အဝဲဘၣ်တၢ်လံၣ်န့ၢ်အီၤလၢ ဆၣ်ဖိကီၢ်ဖိတဒုအ့ၣ်သံဝဲ အဖိခွါစီၤယိၤသးန့ၣ်လီၤ. အဝဲအသူၣ်အုးသးအုး “အါနံၤအါသီ” ဒီးအဟံၣ်ဖိဃီဖိတဖၣ် မၤမုာ်ထီၣ်က့ၤအသးတန့ၢ်ဘၣ်. ပူၤကွံာ်တဘျုးနံၣ်ဝံၤအလီၢ်ခံ သနာ်က့ စီၤယၤကိာ်အသးအုးဒံးလၢ စီၤယိၤသးအတၢ်သံအဃိလီၤ.—၁ မိၤၡ့ ၂၃:၂, ခ့ခါစှီၤကျိာ်; ၃၇:၃၄, ၃၅; ၄၂:၃၆; ၄၅:၂၈.
မုၢ်မဆါတနံၤအံၤ ပှၤအါဂၤသူၣ်အုးသးအုး ခီဖျိလၢပှၤလၢအအဲၣ်ဘၣ်ဝဲတဖၣ် သံဝဲအဃိန့ၣ်လီၤ. ဆိကမိၣ်ကွၢ် တၢ်လဲၤခီဖျိခံခါအံၤတက့ၢ်.
-
က့လ် လၢအသးအိၣ်အနံၣ် ၆၀ န့ၣ်စံးဝဲလၢ “ဖဲလါယူၤလံ ၉ သီ, ၂၀၀၈ န့ၣ်ယဝၤ ရီဘၢးသံဝဲန့ၣ်လီၤ. အဝဲသံဝဲဒၣ်လၢ ကါဘၣ်ဒိဘၣ်ထံးလိာ်သး အဃိန့ၣ်လီၤ. ဒ်ညီနုၢ်အသိး ပအီၣ်ဂီၤခီတၢ်အီၣ်ဝံၤ ဒီးတချုးအဝဲလဲၤတၢ်မၤဒံးဘၣ်န့ၣ် နၢမူယၤ, ဖိးဟုယၤ, ဒီးတဲဝဲလၢ ‘ယအဲၣ်နၤ’ လီၤ. ယဝၤသံဝဲပူၤကွံာ် ၆ နံၣ်လံဘၣ်ဆၣ် ယသးဘၣ်ဒိဒံးအဖၢမုၢ်လီၤ. ယဆိကမိၣ်လၢ ယသးမုာ်ထီၣ်က့ၤတသ့လၢၤဘၣ်.”
-
အဲၣ်ထံယဲ လၢအသးအိၣ် ၈၄ နံၣ်န့ၣ် စံးဝဲလၢ “ယမါသးဘိသံအိၣ်ဝဲ ၁၈ နံၣ်လံဘၣ်ဆၣ် ယသးသယုၢ်အီၤဒီး ယသးအုးဒံးလီၤ. ဖဲယထံၣ်ဘၣ် န့ဆၢၣ်အတၢ်ဃံတၢ်လၤ တမံၤမံၤအခါန့ၣ် ယသ့ၣ်နီၣ်ဘၣ်က့ၤအီၤလီၤ. တၢ်လၢယထံၣ်ဘၣ်အံၤ အဝဲစ့ၢ်ကီး မ့ၢ်ထံၣ်ဘၣ်ဝဲန့ၣ် ကသးခုဝဲထဲလဲၣ်.”
တၢ်သူၣ်အုးသးအုး ယံာ်ယံာ်ထၢထၢဒ်အံၤန့ၣ် တမ့ၢ်တၢ်လၢအလီၤဆီတခါဘၣ်. ပှၤသူၣ်အုးသးအုး တဂၤဒီးတဂၤ တလီၤဂာ်လိာ်အသးဘၣ်. အဝဲသ့ၣ်မ့ၢ်သူၣ်အုးသးအုးန့ၣ် ပတကြၢးပာ်တၢ်ကမၣ်လၢအလိၤဘၣ်. ပမ့ၢ်အိၣ်ဒီး တၢ်သူၣ်အုးသးအုးဒိၣ်ဒိၣ်ကလဲာ်န့ၣ် ပကဘၣ်ပလီၢ်ပသးလၢ ပသုတစံၣ်ညီၣ်ဘၣ်လီၤက့ၤပသးတဂ့ၤန့ၣ်လီၤ. ပလဲၤခီဖျိ တၢ်သူၣ်အုးသးအုးကသ့ဒ်လဲၣ်.
^ လံာ်အဆၢ. 4= စီၤအၤဘြၤဟၣ် အဖိခွါ စီၤအံၤစဲး တူၢ်ဘၣ်ဝဲတၢ်သူၣ်အုးသးအုး ဒ်န့ၣ်စ့ၢ်ကီးလီၤ. အမိၢ်သံ အိၣ်သၢနံၣ်လံ ဘၣ်ဆၣ်အဝဲအသးအုးဒံးလီၤ.—၁ မိၤၡ့ ၂၄:၆၇.
တၢ်ဂ့ၤအဂၤလၢ နကဘၣ်သး
တၢးထီခိးတၢ်—လံာ်လၢတၢ်မၤလိအဂီၢ်
ကွၢ်ဆၢၣ်မဲာ်ဒီး လဲၤခီဖျိ နတၢ်သူၣ်အုးသးအုး
လံာ်စီဆှံ အတၢ်သိၣ်တၢ်သီလၢ အဘျုးအိၣ်တဖၣ်န့ၣ် ကဲဘျုးကဲဖှိၣ်ဝဲလီၤ.
ပၢၢ်ထီၣ်
တၢ်သးအုးနးမး—တၢ်လၢနကတူၢ်ဘၣ်
ပှၤလၢအတူၢ်ဘၣ် တၢ်သးအုးနးမးန့ၣ် ဖဲပှၤလၢအအဲၣ်ဝဲတဂၤ သံသဒၣ်အီၤဝံၤအလီၢ်ခံ တၢ်လၢအကတူၢ်ဘၣ်ဝဲ ဒီးတၢ်ကီတၢ်ခဲလၢ အကလဲၤခီဖျိဘၣ်ဝဲန့ၣ် မ့ၢ်မနုၤလဲၣ်.
