ပှၤ​ဟီၣ်ခိၣ်​ဖိ​တဂၤ က​အိၣ်မူ​ဘၣ် ၃၆၅ နံၣ် ဒု​တ​လီၤ​နာ်​နီ​တစဲး​ဘၣ်. မ့ၢ်​လၢ​အ​တၢ်အိၣ်မူ​ထီ​န့ၢ်ဒံး​ပှၤလၢ အ​အိၣ်မူ​လၢ​မုၢ်မဆါ​တနံၤ​အံၤ​လွံၢ်​စး​ညါ​လီၤ. ဘၣ်ဆၣ် ပ​မ့ၢ်​ထိၣ်သတြီၤ​ကွၢ်​ဒီး ပှၤလၢ​အ​အိၣ်မူ​ဖဲ​န့ၣ်​အခါ စီၤ​ဃနိာ်​အသး​တ​ပှၢ်​ထဲ​န့ၣ်​ညါ​ဘၣ်. ပူၤကွံာ်​အ​နံၣ်​ယဲၢ်​ကထိဘျဲၣ်​န့ၣ် ပှၤ​ဟီၣ်ခိၣ်​ဖိ​တဖၣ်​အသး​သမူ​ထီ​န့ၢ်ဒံး ပှၤလၢ​အ​အိၣ်မူ​ဘၣ်​လၢ​ဆၢကတီၢ်​ခဲအံၤ​လီၤ. အဒိ ဖဲ​စီၤ​ဃနိာ်​အိၣ်ဖျဲၣ်​ထီၣ်ဝဲ​အခါ ပှၤ​ဟီၣ်ခိၣ်​ဖိ​အဆိ​ကတၢၢ်​တဂၤ​လၢ အမ့ၢ်​စီၤ​အၤဒၣ်​န့ၣ် အသး​နံၣ်​အိၣ်ဝဲ ၆၀၀ ဘျဲၣ်လံ​ဒီး အဝဲ​ဆဲး​အိၣ်မူ​ဒံးဝဲ​အ​နံၣ် ၃၀၀ န့ၣ်​လီၤ. စီၤ​အၤဒၣ်​အစၢၤ​အသွဲၣ်​တနီၤနီၤ အိၣ်မူ​ဘၣ်​ယံာ်​န့ၢ်ဒံး စီၤ​အၤဒၣ်​န့ၣ်​လီၤ. အဃိ စီၤ​ဃနိာ်​မ့ၢ်​အိၣ်ဝဲ​အ​နံၣ် ၃၆၅ သနာ်က့ ဘၣ်​သ့ၣ်​သ့ၣ် အသး​က​ဖျါ​စၢ်​ဒံးဝဲ​လီၤ. ဒီး​တၢ်​ခဲလၢာ်​မ့ၢ်​လဲၤ​အသး​ဂ့ၤဂ့ၤ​ဘၣ်​ဘၣ်​န့ၣ် အဝဲ​က​ဆဲး​အိၣ်မူ​ဘၣ်​ဒံး အ​နံၣ်​အါမး​လီၤ. ဘၣ်ဆၣ် တၢ်ဂ့ၢ်ကီ​ကဲထီၣ်​အသး​တခါ​လီၤ.

ခဲအံၤ​န့ၣ်​စီၤ​ဃနိာ် အ​တၢ်အိၣ်မူ လီၤဘၣ်ယိၣ်​ဝဲ​ဒိၣ်မး​လံ. အဝဲ​တဲဘၣ်​ကစၢ်​ယွၤ အ​တၢ်ကစီၣ်​လၢ ပှၤ​ကမျၢၢ်​အ​အိၣ်​ဘၣ်ဆၣ် အဝဲသ့ၣ်​တဘၣ်​အသး​လၢ တၢ်ကစီၣ်​အံၤ​နီ​တစဲး​ဘၣ်. စီၤ​ဃနိာ်​က​ထံၣ်ဘၣ်​ဝဲ​လၢ ပှၤ​သ့ၣ်​တဖၣ်​န့ၣ်​သးပှံၢ်​ထီၣ်​အီၤ​ဒီး အဝဲသ့ၣ်​အ​မဲာ်သၣ် ထီၣ်လါ​ဝဲ​လီၤ. ပှၤ​ကမျၢၢ်​တဖၣ်​အံၤ​သးဟ့​အီၤ, ကနၣ်​အ​တၢ်ကစီၣ် တ​မုာ်​နီ​တစဲး​ဘၣ်​ဒီး သးဆါ​ဝဲ​ကစၢ်​ယွၤ ခီဖျိ​လၢ အ​ဆှၢလီၤ​စီၤ​ဃနိာ်​န့ၣ်​လီၤ. ပှၤလၢ​အအၢ​အသီ​သ့ၣ်​တဖၣ်​အံၤ မၤဆါ​ယဟိဝၤ​ယွၤ တ​သ့​ဘၣ် ဘၣ်ဆၣ် အဝဲသ့ၣ်​အဲၣ်ဒိး​မၤဆူၣ်​မၤစိး စီၤ​ဃနိာ်​သပှၢ်​ကတၢၢ်​လီၤ. အဃိ ထံၣ်တမှံ​ကွၢ်​လၢ စီၤ​ဃနိာ်​ဘၣ်​ဃ့ၢ်​ပူၤဖျဲး​အသး​လၢ အသး​သမူ​အဂီၢ်​တက့ၢ်. ဘၣ်​သ့ၣ်​သ့ၣ် အဝဲ​က​ဆိကမိၣ်​ဝဲ​လၢ တၢ်မ့ၢ်​ကဲထီၣ်​အသး​ဒီး​ယၤ​ဒ်အံၤ​သၢ​ပျၢၤ​ဒု မ့ၢ်​ယ​က​ထံၣ်ဘၣ်​က့ၤ​ယ​ဟံၣ်ဖိ​ဃီဖိ​ဒံး​ဧါ. မ့ၢ်​အဝဲ​ဆိကမိၣ်​ထီၣ်​အမါ, အ​ဖိမုၣ်​ဒီး​အ​ဖိခွါ​စီၤ​မသူၤၡလၤ မ့တမ့ၢ် အ​လံၤခွါ​စီၤ​လ့ၤမ့း​အဂ့ၢ်​ဧါ. (၁ မိၤၡ့ ၅:၂၁-၂၃, ၂၅) မ့ၢ်​စီၤ​ဃနိာ်​အကျဲ​ကတၢၢ်​လံဧါ.

ပ​တ​သ့ၣ်ညါ​ဘၣ်​စီၤ​ဃနိာ်​အဂ့ၢ်​အါအါ​ဘၣ်. မ့ၢ်​လၢ​လံာ်စီဆှံ​အဆၢ​လၢ အ​ပာ်ဖျါ​ထီၣ်​စီၤ​ဃနိာ်​အဂ့ၢ်​န့ၣ် အိၣ်ဝဲ​ထဲ​သၢ​တီၤလီၤ. (၁ မိၤၡ့ ၅:၂၁-၂၄; ဧ့ၤဘြံၤ ၁၁:၅; ယူဒၤ ၁၄, ၁၅) ဘၣ်ဆၣ် လံာ်စီဆှံ​အဆၢ​တဖၣ်​အံၤ ပာ်ဖျါ​ထီၣ်​န့ၢ်​ပှၤလၢ စီၤ​ဃနိာ်​အိၣ်ဒီး​တၢ်နာ်​လၢ​အဂၢၢ်​အ​ကျၢၤ​လီၤ. မ့ၢ်​န​ဘၣ်​လုၢ်အီၣ်လုၢ်အီ​န​ဟံၣ်ဖိ​ဃီဖိ​ဧါ. ဒ်သိး​န​က​မၤတၢ်​လၢ​အဘၣ်​အဂီၢ် မ့ၢ်​အကီ​လၢ​နဂီၢ်​ဧါ. မ့မ့ၢ်​ဒ်​န့ၣ်​န့ၣ် န​မၤလိ​န့ၢ်​တၢ်​လၢ စီၤ​ဃနိာ်​အ​အိၣ်​သ့ဝဲ​လီၤ.

ဖဲ​စီၤ​ဃနိာ်​အိၣ်မူဝဲ​အဆၢ​ကတီၢ်​န့ၣ် ပှၤ​ဟီၣ်ခိၣ်​ဖိ​တဖၣ် မၤ​တၢ်အၢ​တၢ်သီ​အါမး​လီၤ. စးထီၣ်​လၢ​စီၤ​အၤဒၣ်​တုၤ​လီၤ​လၢ စီၤ​ဃနိာ်​န့ၣ် အိၣ်ဝဲ​နွံ​စိၤ​လီၤ. ဖဲ​န့ၣ်​အခါ ပှၤ​ဟီၣ်ခိၣ်​ဖိ​တဖၣ်​န့ၣ် တ​ယံၤထီၣ်​ဒီး​တၢ်အိၣ်မူ​အလၢ​အပှဲၤ လၢ​စီၤ​အၤဒၣ်​ဒီး​နီၢ်​အံၣ်အု မၤ​လီၤမၢ်​ကွံာ်ဝဲ​အဃိ ပှၤ​ဟီၣ်ခိၣ်​ဖိ​အသး​သမူ ထီ​ဒံးဝဲ​လီၤ. ဘၣ်ဆၣ် လၢ​နီၢ်သး​ဒီး လုၢ်လၢ်​သကဲာ်ပဝး​တခီ​န့ၣ် လဲၤ​တပျာ်​ဖးယံၤ​လံ. တၢ်မၤ​ဆူၣ်​မၤစိး​အိၣ်ဝဲ​အါမး​လီၤ. တၢ်မၤ​ဆူၣ်​မၤစိး​န့ၣ် စးထီၣ်​အသး​ဖဲ​ပှၤ​ခံ​စိၤ​တစိၤ​လီၤ. ဖဲ​န့ၣ်​အခါ စီၤ​ကၤယံၣ်​မၤသံ​အပုၢ် စီၤ​ဟ့းဘ့းလး​လီၤ. ဒီး​ဖျါ​လၢ​စီၤ​ကၤယံၣ် အစၢၤ​အသွဲၣ်​တဂၤ ပာ်ကဖၢလၢ​အသး မ့ၢ်​လၢ​အ​သးဆူၣ်​လၢ က​မၤဆူၣ်​မၤစိး​တၢ်​ဒီး ဟ့ၣ်ကၣ်​တၢ်​အါန့ၢ်ဒံး​စီၤ​ကၤယံၣ်​လီၤ. မ့မ့ၢ်​ဖဲ​ပှၤ​သၢ​စိၤ​တစိၤ​န့ၣ် တၢ်အၢ​တၢ်သီ​ဟဲ​ပၢၢ်ထီၣ်​လၢ အသီ​တခါ​လီၤ. ဖဲ​န့ၣ်​အဆၢ​ကတီၢ် ပှၤ​စးထီၣ်​ကိးဝဲ​ယဟိဝၤ​ယွၤ​အ​မံၤ ဘၣ်ဆၣ် တမ့ၢ်​လၢ​တၢ်​ယူးယီၣ်​ပာ်ကဲ​အ​ပူၤ​ဘၣ်. ဖျါ​လၢ​အဝဲသ့ၣ်​ကတိၤ​ထီဒါ ယွၤ​အ​မံၤ​စီဆှံ​ဒီး သူ​အီၤ​လၢ​တၢ်​တ​ပာ်ကဲ​အ​ပူၤ​လီၤ.—၁ မိၤၡ့ ၄:၈, ၂၃-၂၆.

ဖဲ​စီၤ​ဃနိာ်​အ​စိၤ​န့ၣ် တၢ်​ဘူၣ်ထီၣ်​ဘါထီၣ်​လၢ​အ​ကမၣ် ရၤလီၤ​အသး​အါမး​လီၤ. အဃိ ဖဲ​စီၤ​ဃနိာ်​ဒိၣ်ထီၣ်​အဆၢ​ကတီၢ် အဝဲ​ဘၣ်​ဃုထၢ​လၢ မ့ၢ်​အဝဲ​က​လူၤ​ပိာ်ထွဲ ပှၤအဂၤ​တဖၣ်​အခံ​ဧါ. မ့တမ့ၢ် က​ဃု​သ့ၣ်ညါ​ယဟိဝၤ​ယွၤ လၢ​အမ့ၢ်​ယွၤ​အမ့ၢ်​အတီ​လၢ အ​တ့လီၤ​မူခိၣ်​ဒီး​ဟီၣ်ခိၣ်​ဧါ. ဖဲ​စီၤ​ဃနိာ်​နၢ်ဟူ​ဘၣ် စီၤ​ဟ့းဘ့းလး​အဂ့ၢ်​န့ၣ် ကဲထီၣ်​တၢ်ဂံၢ်​တၢ်ဘါ​လၢ​အဂီၢ်​လီၤ. မ့ၢ်​လၢ​စီၤ​ဟ့းဘ့းလး ဘူၣ်ထီၣ်​ဘါထီၣ် ယဟိဝၤ​ယွၤ​လၢ ကျဲ​လၢ​အဘၣ်​ကစၢ်​အသး​တုၤ​လီၤ​လၢ အဘၣ်​တၢ်​မၤသံ​အီၤ​တစု​အဃိ​လီၤ. စီၤ​ဃနိာ်​စ့ၢ်ကီး​ဆၢတဲာ်​လီၤအသး​လၢ က​မၤ တၢ်ဘၣ်​ကစၢ်​ယွၤ​အသး​လီၤ. ၁ မိၤၡ့ ၅:၂၂ တဲဘၣ်​ပှၤလၢ– “စီၤ​ဃနိာ်​လဲၤတၢ်​ဒီး​ယွၤ” လီၤ. လံာ်စီဆှံ​ပာ်ဖျါ​ထီၣ်ဝဲ​လၢ စီၤ​ဃနိာ်​မ့ၢ်​ပှၤ​အဆိ​ကတၢၢ်​တဂၤ​လၢ အ​လဲၤတၢ်​ဒီး​ကစၢ်​ယွၤ လီၤ. လံာ်စီဆှံ​တ​ဆၢ​အံၤ ဒုး​နၢ်ပၢၢ်​ပှၤလၢ စီၤ​ဃနိာ်​မ့ၢ်​ပှၤလၢ အ​ယူးယီၣ်​ပာ်ကဲ​ကစၢ်​ယွၤ​လၢ ပှၤလၢ​အ​တ​အဲၣ်​ထူ​အဲၣ်​ယွၤ​တဖၣ် အကျါ​လီၤ.

လံာ်စီဆှံ​တ​ဆၢ​အံၤ ပာ်ဖျါ​ထီၣ်​စ့ၢ်ကီး​ဝဲ​လၢ ဖဲ​စီၤ​ဃနိာ်​ထီၣ်ဖိ​စီၤ​မသူၤၡလၤ ဝံၤ​အလီၢ်​ခံ အဝဲ​ဆဲး​လဲၤတၢ်​ဒီး​ယဟိဝၤ​ယွၤ​လီၤ. အဃိ ပ​ထံၣ်ဘၣ်​လၢ ဖဲ​စီၤ​ဃနိာ်​အိၣ် ၆၅ နံၣ်​ဃၣ်ဃၣ်​အခါ​န့ၣ် အဝဲ​အိၣ်ဒီး​အဟံၣ်​ဖိ​ဃီဖိ​လီၤ. စီၤ​ဃနိာ်​အိၣ်ဒီး​အမါ​ဒီး “အ​ဖိမုၣ်​ဒီး​အ​ဖိခွါ” ဘၣ်ဆၣ် အမါ​အ​မံၤ​ဒ်လဲၣ် ဒီး​အဖိ​အိၣ်​ပှဲၤ​ဂၤ​လဲၣ်န့ၣ် လံာ်စီဆှံ​တ​ပာ်ဖျါ​ထီၣ်ဝဲ​ဘၣ်. ပၢ်​တဂၤ​မ့ၢ်​အဲၣ်ဒိး​လဲၤတၢ်​ဒီး​ယွၤ ဖဲ​အဝဲ​လုၢ်အီၣ်လုၢ်အီ အဟံၣ်​ဖိ​ဃီဖိ​အခါ​န့ၣ် အဝဲ​က​ဘၣ်​ကွၢ်ထွဲ​အဟံၣ်​ဖိ​ဃီဖိ ဒ်​တၢ်ဘၣ်​ကစၢ်​ယွၤ​အသး​လီၤ. အဃိ စီၤ​ဃနိာ်​နၢ်ပၢၢ်​ဝဲ​လၢ ယဟိဝၤ​ယွၤ​အဲၣ်ဒိးဝဲ​လၢ အ​က​တီ​လၢ​အမါ​အ​ဖီခိၣ်​လီၤ. (၁ မိၤၡ့ ၂:၂၄) ဒီး​စီၤ​ဃနိာ်​ဂုာ်ကျဲးစၢး​လၢ အဂ့ၤ​ကတၢၢ်​ဒ်သိး က​သိၣ်လိ​အဖိ​လၢ ယဟိဝၤ​ယွၤ​အဂ့ၢ်​လီၤ. အ​တၢ်​ဂုာ်ကျဲးစၢး​န့ၣ် ကဲထီၣ်​လိၣ်ထီၣ်​ဝဲ​စ့ၢ်ကီး​ဧါ.

ယွၤ​အ​ကလုၢ်​ကထါ ပာ်ဖျါ​ထီၣ်​န့ၢ်​ပှၤ​ထဲ​တစဲးဖိ​လီၤ. အဒိ ဘၣ်ဃး​ဒီး​စီၤ​ဃနိာ်​အ​ဖိခွါ စီၤ​မသူၤၡလၤ​အ​တၢ်နာ် အိၣ်​ဒ်လဲၣ်​န့ၣ် ပ​တ​သ့ၣ်ညါ​လီၤတံၢ်​လီၤဆဲး​ဘၣ်. ဘၣ်ဆၣ် ပ​သ့ၣ်ညါ​လၢ အဝဲ​မ့ၢ်​ပှၤလၢ အသး​နံၣ်​ထီကတၢၢ် ဒီး​အဝဲ​သံဝဲ​တနံၣ်​ဃီ ဖဲ​ထံလုၢ်ဘၢ​တၢ်​န့ၣ်​လီၤ. ဒီး​စီၤ​မသူၤၡလၤ​ထီၣ်ဖိ​ဝဲ​စီၤ​လ့ၤမ့း​လီၤ. ဖဲ​စီၤ​လ့ၤမ့း​အ​ဖု​စီၤ​ဃနိာ် တချုး​သံ​ဒံး​န့ၣ် အဝဲ​အိၣ်ဝဲ​အ​နံၣ် တ​ကယၤဘျဲၣ်​လံ. ဒီး​ဖဲ​စီၤ​လ့ၤမ့း​ဒိၣ်ထီၣ်​အခါ အဝဲ​မ့ၢ်​ပှၤလၢ​အိၣ်ဒီး​တၢ်နာ်​စ့ၢ်ကီး​လီၤ. ယဟိဝၤ​ယွၤ​ထိၣ်ဟူး​ထိၣ်ဂဲၤ​ထီၣ်​အသး​လၢ က​တဲဝဲ​ဝံ​အ​တၢ်စံးပာ် ဘၣ်ဃး​ဒီး​စီၤ​နိအၤ​လၢ​အမ့ၢ် စီၤ​လ့ၤမ့း​အ​ဖိခွါ​န့ၣ်​လီၤ. ဖဲ​ထံလုၢ်ဘၢ​တၢ်​ဝံၤ​အလီၢ်​ခံ ဝံ​အ​တၢ်စံးပာ်​အံၤ ဟဲ​လၢထီၣ်​ပှဲၤထီၣ်​ဝဲ​လီၤ. စီၤ​နိအၤ​န့ၣ် လီၤဂာ်​ဒီး​အ​ဖု​ဖးဒိၣ်​စီၤ​ဃနိာ်​အဃိ လံာ်စီဆှံ​ပာ်ဖျါ​ထီၣ်ဝဲ​လၢ အဝဲ​လဲၤတၢ်​ဒီး​ကစၢ်​ယွၤ​စ့ၢ်ကီး​လီၤ. စီၤ​နိအၤ​တထံၣ်​ဘၣ်​ဝဲ စီၤ​ဃနိာ်​နီတဘျီ​ဘၣ်. ဘၣ်ဆၣ် စီၤ​ဃနိာ်​ပာ်လီၤ​တဲာ်​တ့ၢ်​ဒိ​တဲာ်​လၢ​အဂ့ၤ​လီၤ. စီၤ​ဃနိာ်​အ​ပၢ်​လၢ​အမ့ၢ် စီၤ​ယၤရ့း​န့ၣ် သံဝဲ​ဖဲ​စီၤ​နိအၤ​အသး​နံၣ်​အိၣ်ဝဲ ၃၆၆ နံၣ်​န့ၣ်​လီၤ. အဃိ ဘၣ်​သ့ၣ်​သ့ၣ် အဝဲ​က​တဲဘၣ်​စီၤ​နိအၤ​လၢ စီၤ​ဃနိာ်​အဂ့ၢ်​အကျိၤ မ့တမ့ၢ် စီၤ​နိအၤ​က​နၢ်ဟူ​ဘၣ်​ဝဲ​လၢ အ​ပၢ်​စီၤ​လ့းမ့း​အ​အိၣ် မ့တမ့ၢ် လၢ​အ​ဖု​စီၤ​မသူၤၡလၤ​အ​အိၣ်​လီၤ.—၁ မိၤၡ့ ၅:၂၅-၂၉; ၆:၉; ၉:၁.

စီၤ​ဃနိာ်​ဒီး စီၤ​အၤဒၣ် လီၤဆီ​လိာ်အသး​ထဲလဲၣ်​န့ၣ် ဆိကမိၣ်​ကွၢ်​တက့ၢ်. စီၤ​အၤဒၣ်​မ့ၢ်တ့ၢ် ပှၤလၢ​အလၢ​အပှဲၤ​တဂၤ ဘၣ်ဆၣ် အဝဲ​မၤ​ကမၣ်​ယဟိဝၤ​ယွၤ ဒီး​ပာ်လီၤ​တၢ်အဒိ​အ​တဲာ်​လၢ အ​တဂ့ၤ​ဘၣ်. မ့မ့ၢ်​စီၤ​ဃနိာ်​န့ၣ် မ့ၢ်​ပှၤလၢ​အ​တလၢ​တ​ပှဲၤ ဘၣ်ဆၣ် အဝဲ​လဲၤတၢ်​ဒီး​ယွၤ, ပာ်ဖျါ​ထီၣ်​တၢ်နာ် ဒီး​ပာ်လီၤ​တဲာ်​တၢ်အဒိ​အ​တဲာ်​လၢ အဂ့ၤ​လၢ​အစၢၤ​အသွဲၣ်​တဖၣ်​အဂီၢ်​လီၤ. ဖဲ​စီၤ​ဃနိာ်​အိၣ်ဝဲ ၃၀၈ နံၣ်​အခါ စီၤ​အၤဒၣ်​လၢ​အမ့ၢ်​ပှၤလၢ​အ​အဲၣ်​လီၤ​ထဲ​အသး​န့ၣ်​သံဝဲလီၤ. ဖဲ​န့ၣ်​အခါ​န့ၣ် မ့ၢ်​စီၤ​အၤဒၣ် အဘူး​အတံၢ်​တဖၣ် က​သးအုး​ဒီး​ဟီၣ်ဝဲ​ဧါ. ပ​တ​သ့ၣ်ညါ​ဘၣ်. ဘၣ်ဆၣ် စီၤ​ဃနိာ်​ဆဲး “လဲၤတၢ်​ဒီး​ယွၤ​လီၤ.”—၁ မိၤၡ့ ၅:၂၄.

န​မ့မ့ၢ်​ပှၤလၢ က​ဘၣ်​လုၢ်အီၣ်လုၢ်အီ န​ဟံၣ်ဖိ​ဃီဖိ​န့ၣ် န​မၤလိ​န့ၢ်​တၢ်​လၢ စီၤ​ဃနိာ်​အ​အိၣ်​သ့​အါမံၤ​လီၤ. အရ့ဒိၣ်​လၢ န​က​ကွၢ်ထွဲ​န​ဟံၣ်ဖိ​ဃီဖိ​အ​တၢ်လိၣ်ဘၣ်​လၢ နီၢ်ခိ​တခီ, ဘၣ်ဆၣ် တၢ်​လၢ​အရ့ဒိၣ်​ကတၢၢ်​န့ၣ် မ့ၢ်ဝဲ​န​က​ဘၣ်​ကွၢ်ထွဲ​အဝဲသ့ၣ်​လၢ နီၢ်သး​တခီ​လီၤ. (၁ တံၤမသ့း ၅:၈) န​မၤ​လၢပှဲၤ​အဝဲသ့ၣ် အ​တၢ်လိၣ်ဘၣ်​လၢ​နီၢ်သး​တခီ ခီဖျိ​လၢ​န​တၢ်​စံး​တၢ်ကတိၤ ဒီး​တၢ်​လၢ​န​မၤဝဲ​တဖၣ်​န့ၣ် သ့ဝဲ​လီၤ. န​မ့ၢ်​ဃုထၢ​လၢ​န​က​လဲၤတၢ်​ဒီး​ယွၤ ဒ်​စီၤ​ဃနိာ်​အသိး ဒီး​မၤထွဲ​ယွၤ​အ​တၢ်ဘျၢ​လၢ န​တၢ်အိၣ်မူ​အ​ပူၤ​န့ၣ် န​က​ပာ်လီၤ​န့ၢ်​အဝဲသ့ၣ် တၢ်အဒိ​အ​တဲာ်​လၢ​အဂ့ၤ ဒ်သိး​အဝဲသ့ၣ်​က​ကွၢ်လိမၤဒိး​ဝဲ​အဂီၢ်​လီၤ.

စီၤ​ဃနိာ်​အိၣ်မူ​ဘၣ်​လၢ ပှၤအၢ​ပှၤသီ​အကျါ​အဃိ အဝဲ​က​တူၢ်ဘၣ်​ဝဲ​လၢ အ​အိၣ်​သယုၢ်သညိ​လီၤ. ဘၣ်ဆၣ် မ့ၢ်​ယဟိဝၤ​ယွၤ​ပာ်သူၣ်​ပာ်သး​အီၤ​ဧါ. ပာ်သူၣ်​ပာ်သး​ဝဲ​လီၤ. ဘၣ်​တနံၤ​န့ၣ် ယဟိဝၤ​ယွၤ​ဆဲးကျိး​ဒီး​အခ့အပှၤ အတီ​အလိၤ​စီၤ​ဃနိာ်​လီၤ. ကစၢ်​ယွၤ​ဟ့ၣ်လီၤ စီၤ​ဃနိာ်​တၢ်ကစီၣ်​လၢ အဝဲ​က​ဘၣ်​တဲဘၣ်​ပှၤလၢ အ​အိၣ်မူ​ဘၣ်​ဖဲ​န့ၣ်​အဆၢ​ကတီၢ်​လီၤ. အဃိ ကစၢ်​ယွၤ​ဒုး​ကဲထီၣ်​စီၤ​ဃနိာ် လၢ​ဝံ​တဂၤ​ဒီး​အဝဲ​မ့ၢ်​ဝံ​အဆိ​ကတၢၢ်​တဂၤ​လၢ အ​တၢ်ကစီၣ်​ဘၣ်​တၢ်​ပာ်ဖျါ​ထီၣ်​အီၤ​လၢ လံာ်စီဆှံ​အ​ပူၤ​လီၤ. အ​နံၣ်​လၢ​အ​ကထိ​တဖၣ် ပူၤကွံာ်​ဝံၤ​အလီၢ်​ခံ ကစၢ်​ယွၤ​ထိၣ်ဟူး​ထိၣ်ဂဲၤ​ထီၣ် စီၤ​ယူဒၤ​လၢ​အမ့ၢ်​ယ့ၣ်ၡူး အ​ဒီပုၢ်ဝဲၢ်​ခိၣ်ချၢ​ဒ်သိး က​ကွဲးလီၤ​ဝဲ​စီၤ​ဃနိာ်​အ​တၢ်စံးပာ်​န့ၣ်​လီၤ. *

စီၤ​ဃနိာ်​အ​တၢ်စံးပာ်​န့ၣ် မ့ၢ်​မနုၤ​လဲၣ်. အဝဲ​တဲဝဲ​လၢ– “ကွၢ်ကွၢ်, ကစၢ်​ဟဲ​လီၤ​ဒီး အ​ပှၤ​စီဆှံ​အ​ကလး​တဖၣ်, ဒ်သိး​အ​က​စံၣ်ညီၣ်​ပှၤ​ခဲလၢာ်, ဒီး​က​ဘိးဘၣ်​သ့ၣ်ညါ ပှၤလၢ​အ​တယူး​တယီၣ်​ဘၣ်​ယွၤ, လၢ​အ​တၢ်မၤ​ခဲလၢာ်​ဘၣ်ဃး​ဒီး တၢ်​တယူး​တယီၣ်​ဘၣ်​ယွၤ, လၢ​အ​မၤဝဲ​အိၣ်ဒီး အ​တၢ်​တယူး​တယီၣ်​ဘၣ်​ယွၤ, ဒီး​လၢ​အ​တၢ်ကတိၤ အအၢ​အသီ​ခဲလၢာ် လၢ​ပှၤ​တၢ်ဒဲးဘး​ဖိ​လၢ အ​တယူး​တယီၣ်​ဘၣ်​ယွၤ​တဖၣ်, ကတိၤ​ထီဒါ​အီၤ​လီၤ.” (ယူဒၤ ၁၄, ၁၅) တၢ်​လၢ​စီၤ​ဃနိာ်​စံးပာ်ဝဲ​တဖၣ် က​ဟဲကဲထီၣ်​အသး သပှၢ်​ကတၢၢ်​အဃိ အဝဲ​ပာ်ဖျါ​ထီၣ်ဝဲ​ဒ် အ​ဟဲကဲထီၣ်​တ့ၢ်​အသး​လံ​န့ၣ်​လီၤ. ဒီး​ပ​ထံၣ်ဘၣ်​လၢ ဝံ​အ​တၢ်စံးပာ်​အါတီၤ ပာ်ဖျါ​ထီၣ်ဝဲ​တၢ်ဂ့ၢ်​ဒ်​န့ၣ်​စ့ၢ်ကီး​လီၤ.—ယၡါယၤ ၄၆:၁၀.

ဘၣ်​သ့ၣ်​သ့ၣ် စီၤ​ဃနိာ်​စံၣ်တဲၤ​တဲလီၤ​တၢ်​ဆူ ကယဲၢ်​ပှၤလၢ​အ​ထံၣ်ဘၣ်​ဝဲ​တဖၣ်​အ​အိၣ်​လီၤ. လၢတၢ်န့ၣ်​အဃိ အဝဲ​က​တူၢ်ဘၣ်​ဝဲ​ဒ်လဲၣ်. တၢ်​စံၣ်ညီၣ်​အ​ကစီၣ်​အံၤ ဆူၣ်​ထဲလဲၣ်​န့ၣ် န​ပာ်သူၣ်​ပာ်သး​စ့ၢ်ကီး​ဧါ. အဝဲ​သူ​တၢ်ကတိၤ​တဖျၢၣ်​လၢ​အမ့ၢ်​တၢ် “တယူး​တယီၣ်​ဘၣ်​ယွၤ” န့ၣ်​အိၣ်ဝဲ​လွံၢ်​ဘျီ ဒ်သိး​က​စံၣ်ညီၣ်​ပှၤ​တဖၣ်​အံၤ, အဝဲသ့ၣ်​အ​တၢ်မၤ, တၢ်​လၢ​အဝဲသ့ၣ်​မၤဝဲ ဒီး​အဝဲသ့ၣ်​မၤဝဲ​လၢ​ကျဲ​ဒ်လဲၣ်​န့ၣ်​လီၤ. အဃိ ဝံ​အ​တၢ်စံးပာ်​အံၤ ဟ့ၣ်ပလီၢ်​ဝဲ​ပှၤ​ဟီၣ်ခိၣ်​ဖိ​ကိးဂၤ​ဒဲး​လၢ ဟီၣ်ခိၣ်​လၢ​ဆၢကတီၢ်​ဖဲ​န့ၣ်​န့ၣ် အၢ​သီ​ဝဲ​ဒိၣ်မး​လီၤ. ဝံ​အ​တၢ်စံးပာ်​တဲဝဲ​လၢ ဟီၣ်ခိၣ်​လၢ​ဆၢကတီၢ်​ဖဲ​န့ၣ် က​ဘၣ်​တၢ်မၤ​ဟးဂီၤ​အီၤ​ဖဲ ယဟိဝၤ​ယွၤ​ဟဲ​ဒီး “အ​ပှၤ​စီဆှံ​အ​ကလး​တဖၣ်” အခါ​လီၤ. ပှၤ​စီဆှံ​အ​ကလး​တဖၣ်​န့ၣ် အဲၣ်ဒိး​တဲဝဲ​လၢ မူခိၣ်​ကလူး​လၢ​အ​ဂံၢ်ဆူၣ်​ဘါဆူၣ်​တဖၣ် လၢ​အိၣ်​ကတဲာ်​ကတီၤ​အသး​လၢ က​ဒုးတၢ်​အဂီၢ်​လီၤ. စီၤ​ဃနိာ်​စံၣ်တဲၤ​တဲလီၤ​တၢ်ကစီၣ်​အံၤ ထဲ​တဂၤဧိၤ​သနာ်က့ အ​တဲဝဲ​ဒူဒူ​လီၤ. ဘၣ်​သ့ၣ်​သ့ၣ် ပှၤသးစၢ်​စီၤ​လ့ၤမ့း ထံၣ်ဘၣ်​ဝဲ​အ​ဖု စံၣ်တဲၤ​တဲလီၤ​တၢ်​ဒ်အံၤ လၢ​တၢ်သးဒူ​အဃိ အဝဲ​က​ကမၢ​ကမၣ်​ဝဲ​ဒိၣ်မး​လီၤ.

ပ​မ့ၢ်​ဆိကမိၣ်​ထံ​ဘၣ်ဃး​ဒီး စီၤ​ဃနိာ်​အ​တၢ်နာ်​န့ၣ် ပ​က​အဲၣ်ဒိး​သံကွၢ်လီၤ​ပ​သး​လၢ မ့ၢ်​ပ​ထံၣ်​ဟီၣ်ခိၣ်​အံၤ​ဒ်​ယွၤ​ထံၣ်ဝဲ​အသိး​ဧါ. တၢ်​စံၣ်ညီၣ်​အ​ကစီၣ်​လၢ စီၤ​ဃနိာ်​တဲဝဲ​န့ၣ် ဘၣ်ထွဲ​လိာ်အသး​ဒီး ဟီၣ်ခိၣ်​လၢ​စီၤ​ဃနိာ်​အ​စိၤ တကးဒံးဘၣ် ဘၣ်ထွဲ​လိာ်အသး​ဒီး​ဟီၣ်ခိၣ်​လၢ မုၢ်မဆါ​တနံၤညါအံၤ​စ့ၢ်ကီး​လီၤ. ဒ်​စီၤ​ဃနိာ်​ဟ့ၣ်ပလီၢ်​ပာ်စၢၤ​ဝဲ ဘၣ်ဃး​ဒီး​ယဟိဝၤ​ယွၤ​အ​တၢ်​စံၣ်ညီၣ်​အသိး ဖဲ​စီၤ​နိအၤ​အ​စိၤ​န့ၣ် ယွၤ​စံၣ်ညီၣ်​ဟီၣ်ခိၣ်​လၢ​ထံ ဒီး​မၤ​ဟးဂီၤ​ကွံာ်​ပှၤလၢ အ​တယူး​တယီၣ်​ဘၣ်​ယွၤ​လီၤ. ကစၢ်​ယွၤ​အ​တၢ်​စံၣ်ညီၣ်​လၢ​ဆၢကတီၢ်​ဖဲ​န့ၣ် မ့ၢ်​တၢ်အဒိ​အ​တဲာ်​လၢ ယွၤ​အ​တၢ်​စံၣ်ညီၣ်​လၢ အ​က​ဟဲ​လၢ​ခါဆူညါ​န့ၣ်​လီၤ. (မးသဲ ၂၄:၃၈, ၃၉; ၂ ပ့းတရူး ၂:၄-၆) ဒ်​လၢညါ​အသိး မုၢ်မဆါ​တနံၤ​အံၤ​စ့ၢ်ကီး ကစၢ်​ယွၤ​ဒီး​အ​မူခိၣ်​ကလူး​စီဆှံ​တဖၣ် က​စံၣ်ညီၣ်​ဟီၣ်ခိၣ်​လၢ အအၢ​အသီ​အံၤ တီတီ​လိၤလိၤ​လီၤ. ပဝဲ​ခဲလၢာ်​ပ​က​ဘၣ် ဆိကမိၣ်​ထံ စီၤ​ဃနိာ်​အ​တၢ်​ဟ့ၣ်ပလီၢ် ဒီး​ဟ့ၣ်​နီၤလီၤ​အီၤ​ဆူ ပှၤဂၤ​အ​အိၣ်​လီၤ. ဘၣ်​သ့ၣ်​သ့ၣ် ပ​ဟံၣ်ဖိ​ဃီဖိ ဒီး​ပ​တံၤသကိး​သ့ၣ်​တဖၣ် တ​တူၢ်လိာ်​ပ​တၢ်ကစီၣ်​ဘၣ်​အဃိ တဘျီတခီၣ်​ပ​က​တူၢ်ဘၣ်​လၢ ပ​အိၣ်​သယုၢ်သညိ​ထဲ​တဂၤဧိၤ​လီၤ. ဘၣ်ဆၣ် ဒ်​ယဟိဝၤ​ယွၤ​တ​ပာ်တ့ၢ်​ကွံာ် စီၤ​ဃနိာ်​အသိး အဝဲ​တ​ပာ်တ့ၢ်​ကွံာ်​အခ့အပှၤ​လၢ မုၢ်မဆါ​တနံၤ​အံၤ​စ့ၢ်ကီး​ဘၣ်.

စီၤ​ဃနိာ်​အသး​သမူ ကတၢၢ်​ကွံာ်ဝဲ​လၢ ကျဲ​ဒ်လဲၣ်. စီၤ​ဃနိာ်​အ​တၢ်သံ​န့ၣ် မ့ၢ်​တၢ်​လၢ အ​လီၤ​ကမၢ​ကမၣ် ဒီး​လီၤသး​စဲ​ဝဲ​ဒိၣ်မး​လီၤ. ၁ မိၤၡ့ ပာ်ဖျါ​ထီၣ်ဝဲ​ယိယိ​ဖိ​လၢ– “စီၤ​ဃနိာ်​လဲၤတၢ်​ဒီး​ယွၤ​လီၤ. ဒီး​တအိၣ်​ဘၣ်​ဝဲ​ဘၣ်. အဂ့ၢ်ဒ်အံၤ, ယွၤ​ဟံးန့ၢ်​အီၤ​လီၤ.” (၁ မိၤၡ့ ၅:၂၄) ကစၢ်​ယွၤ​ဟံးန့ၢ်​စီၤ​ဃနိာ်​လၢ ကျဲ​ဒ်လဲၣ်. တၢ်မၢဖိ​ပီလူး​တဲဖျါထီၣ်​ဝဲ​လၢ– “လၢ​တၢ်နာ်, စီၤ​ဃနိာ်​ဒိး​တၢ်​လဲက့ၤ​အသး ဒ်သိး​အ​သု​တထံၣ်​တၢ်သံ​တဂ့ၤ​လီၤ. ဒီး​တၢ်​ဃု​အီၤ​တ​န့ၢ်​လၢၤဘၣ်. အဂ့ၢ်ဒ်အံၤ, ယွၤ​လဲက့ၤ​အီၤ​လီၤ. အဂ့ၢ်ဒ်အံၤ, တချုး​တၢ်​လဲက့ၤ​အီၤ​ဒီး, တၢ်အုၣ်​အသး​လၢ​ယွၤ ဘၣ်​အသး​လၢ​အီၤ​လီၤ.” (ဧ့ၤဘြံၤ ၁၁:၅) စီၤ​ပီလူး​တဲဝဲ​လၢ စီၤ​ဃနိာ်​ဘၣ် “တၢ်​လဲက့ၤ​အသး​ဒ်သိး​အ​သု​တထံၣ်​တၢ်သံ” န့ၣ် အခီပညီ​ဒ်လဲၣ်. ပှၤလၢ​အ​ကွဲးကျိာ်ထံ​လံာ်စီဆှံ​တနီၤ ကွဲးဝဲ​လၢ ယွၤ​ဟံးထီၣ်​စီၤ​ဃနိာ်​ဆူ​မူခိၣ်​လီၤ. ဘၣ်ဆၣ် တမ့ၢ်​ဒ်​န့ၣ်​ဘၣ်. လံာ်စီဆှံ​ပာ်ဖျါ​ထီၣ်ဝဲ​လၢ ယ့ၣ်ၡူး​ခရံာ်​မ့ၢ် ပှၤ​အဆိ​ကတၢၢ်​တဂၤ​လၢ လဲၤထီၣ်​ဆူ​မူခိၣ်​လီၤ.—ယိၤဟၣ် ၃:၁၃.

မ့မ့ၢ်​ဒ်​န့ၣ်​န့ၣ် စီၤ​ဃနိာ် “ဒိး​တၢ်​လဲက့ၤ​အသး” ဒ်သိး​အ​သု “တထံၣ်​တၢ်သံ​တဂ့ၤ” အဂီၢ်​န့ၣ် အဲၣ်ဒိးစံးဝဲ​အခီပညီ​ဒ်လဲၣ်. ဖျါ​လၢ​ယဟိဝၤ​ယွၤ​လဲက့ၤ အသး​သမူ​ဆူ​တၢ်သံ​ဒ်သိး စီၤ​ဃနိာ် တဘၣ်​တၢ်​မၤသံ​အီၤ ဆှုၣ်မဲာ်​ကဲၤမဲာ်​လၢ ပှၤအၢ​ပှၤသီ​အစုပူၤ​တဂ့ၤ​အဂီၢ်​လီၤ. ဘၣ်ဆၣ် တချုး​လၢ​စီၤ​ဃနိာ်​သံ​ဒံး​ဘၣ်​န့ၣ် အဝဲ​ဒိးန့ၢ်​ဘၣ်​ဝဲ “တၢ်အုၣ်​အသး​လၢ​ယွၤ ဘၣ်​အသး​လၢ​အီၤ​လီၤ.” လၢ​ကျဲ​ဒ်လဲၣ်. ဖဲ​စီၤ​ဃနိာ်​ဘူးထီၣ်​က​သံ​အခါ ဘၣ်​သ့ၣ်​သ့ၣ် ကစၢ်​ယွၤ က​ဒုးထံၣ်​အီၤ​တၢ်ထံၣ်​လၢညါခီ ဘၣ်ဃး​ဒီး​ဟီၣ်ခိၣ်​ပၤရဒံစူး​လီၤ. ဖဲ​အဝဲ​ဒိးန့ၢ်​ဘၣ်​ဝဲ တၢ်အုၣ်​အသး​အံၤ​လၢ အ​ပာ်ဖျါ​ထီၣ်​န့ၢ်​အီၤ​လၢ ယဟိဝၤ​ယွၤ​ဘၣ်​အသး​လၢ​အီၤ​ဝံၤ​အလီၢ်​ခံ အဝဲ​မံ​မုာ်ဝဲ​လၢ​တၢ်သံ​အ​ပူၤ​လီၤ. ဘၣ်ဃး​ဒီး စီၤ​ဃနိာ်​ဒီး ပှၤတီ​ပှၤလိၤ​ပိာ်မုၣ်​ဒီး​ပိာ်ခွါ​အဂၤ​တဖၣ်​န့ၣ် တၢ်မၢဖိ​ပီလူး​ကွဲးဖျါ​ထီၣ်ဝဲ​လၢ အဝဲသ့ၣ်– “သံဝဲ​လၢ​တၢ်နာ်​အ​ပူၤ​လီၤ.” (ဧ့ၤဘြံၤ ၁၁:၁၃) လၢတၢ်န့ၣ်​အလီၢ်​ခံ ဘၣ်​သ့ၣ်​သ့ၣ် စီၤ​ဃနိာ်​အဒုၣ်အဒါ​တဖၣ် က​ဟး​ဃုဝဲ​အစိၣ်​ဘၣ်ဆၣ် ဃုကွၢ်​အီၤ “တ​န့ၢ်​လၢၤဘၣ်.” ဘၣ်​သ့ၣ်​သ့ၣ် ယဟိဝၤ​ယွၤ​မၤ​လီၤမၢ်​ကွံာ် စီၤ​ဃနိာ်​အစိၣ်​ဒ်သိး​အ​သု​တ​မၤတၢ်​လၢ အ​လီၤရၢၢ်​လီၤစၢၢ် မ့တမ့ၢ် သူ​အီၤ​လၢ​က​ဆီၣ်ထွဲ တၢ်ဘူၣ်​တၢ်ဘါ​အ​ကမၣ်​တဂ့ၤ​အဂီၢ်​လီၤ. *

လံာ်စီဆှံ​အဆၢ​လၢ အ​ပာ်ဖျါ​ထီၣ်​စီၤ​ဃနိာ်​အဂ့ၢ်​န့ၣ် ပ​ထံၣ်ဘၣ်​လံ. ခဲအံၤ ပ​က​ထံၣ်တမှံ​ကွၢ်​လၢ စီၤ​ဃနိာ်​အ​တၢ်အိၣ်မူ က​ကတၢၢ်​ဝဲ​ဒ်လဲၣ်​အဂ့ၢ်​န့ၣ်​လီၤ. ဒီး​ဘၣ်ဃး​တၢ်ဂ့ၢ်​လၢ​ပ​က​ထံၣ်တမှံ​ကွၢ်​တဖၣ်​အံၤ ပ​က​ဘၣ်​သ့ၣ်နီၣ်​ထီၣ်​လၢ အ​တမ့ၢ်​တၢ်​လၢ​ပ​သ့ၣ်ညါ​လီၤတံၢ်​လီၤဆဲး​ဘၣ်. ထံၣ်တမှံ​ကွၢ်​လၢ စီၤ​ဃနိာ်​ဘၣ်​ဃ့ၢ်ကွံာ်​လၢ အသး​သမူ​အဂီၢ် ဒီး​လီၤဘှံးလီၤတီၤ​ဝဲ​ဒိၣ်မး​န့ၣ်​တက့ၢ်. ခီဖျိ​လၢ စီၤ​ဃနိာ်​ရၤလီၤ​တၢ်​စံၣ်ညီၣ်​ကစီၣ်​အဃိ အဒုၣ်အဒါ​တဖၣ် သးပှံၢ်​ထီၣ်​တၢ်ဖး​ဒိၣ် ဒီး​လူၤ​ဃု​အီၤ​လီၤ. စီၤ​ဃနိာ်​ထံၣ်န့ၢ် တၢ်အိၣ်​ခူသူၣ်​အလီၢ် လၢ​က​အိၣ်ဘှံး​အိၣ်သါ​ဝဲ တစိၢ်​တလီၢ် ဘၣ်ဆၣ် အဝဲ​သ့ၣ်ညါ​ဝဲ​လၢ အိၣ်​ခူသူၣ်​ဝဲ​ဖဲ​န့ၣ် ယံာ်​ယံာ်​တ​သ့​ဘၣ်. ခဲအံၤ​အဝဲ​သ့ၣ်ညါ​ဝဲ​လၢ ပှၤ​က​မၤသံ​အီၤ​ဆှုၣ်မဲာ်​ကဲၤမဲာ်​န့ၣ်​ဘူးထီၣ်ဝဲ​လံ. ဖဲ​အဝဲ​အိၣ်ဘှံး​အခါ ဃ့​ဘါ​ထုကဖၣ်​ဝဲ​ဆူ ကစၢ်​ယွၤ​အ​အိၣ်​လီၤ. ဝံၤဒီး​တၢ်မုာ်​တၢ်ခုၣ်​လၢ အ​ဒိၣ်​အမုၢ်​တခါ​ဟဲ​လီၤ​လၢ​အလိၤ​လီၤ. ဒီး​အဝဲ​ထံၣ်ဘၣ် တၢ်ထံၣ်​လၢညါခီ လီၤဂာ်​ဒ်​အဝဲ​လဲၤ​အိၣ်ဘၣ်​လၢ တၢ်လီၢ်​လၢ​အဂၤ​တတီၤ​န့ၣ်​လီၤ.

ဖဲ​န့ၣ်​အဆၢ​ကတီၢ် ဖျါ​လၢ​ဟီၣ်ခိၣ်​လၢ​အသီ အိၣ်ဖျါ​ထီၣ်​လၢ​အမဲာ်​ညါ​လီၤ. ဒီး​ဖျါဃံ​ဖျါလၤ​ဒ် ဧ့ၤဒ့ၣ်​တၤသၣ်​အလီၢ် ဘၣ်ဆၣ် မူခိၣ်​ကလူး​လၢ​က​တြီဃာ် ပှၤ​ဟီၣ်ခိၣ်​ဖိ​ဒ်သိး အ​သု​တ​လဲၤနုာ်​လီၤ​တဂ့ၤ​အဂီၢ်​န့ၣ် တအိၣ်​ဝဲ​ဘၣ်. တၢ်လီၢ်​ဖဲ​အံၤန့ၣ် အိၣ်​ပှဲၤ​ဒီး​ပိာ်မုၣ်​ဒီး​ပိာ်ခွါ​လၢ အိၣ်ဒီး​အဂံၢ်​အဘါ​လၢပှဲၤ ဒီး​တၢ်​အိၣ်ဆူၣ်​အိၣ်ချ့​လၢ​အဂ့ၤ​န့ၣ်​လီၤ. တကးဒံးဘၣ် တၢ်မုာ်​တၢ်ခုၣ်​အိၣ်ဝဲ​လၢ​လၢပှဲၤပှဲၤ​လီၤ. ဒီး​ဖဲ​န့ၣ်​န့ၣ် တၢ်​သူၣ်ဟ့​သးဟ့, တၢ်​မၤအၢ​မၤသီ​လၢ စီၤ​ဃနိာ်​ထံၣ်ဘၣ်​ဝဲ​လၢညါ​တဖၣ်​န့ၣ် တအိၣ်​လၢၤဘၣ်. ဖဲ​န့ၣ်​အခါ စီၤ​ဃနိာ်​တူၢ်ဘၣ်​ဝဲ ယဟိဝၤ​ယွၤ​အ​တၢ်အဲၣ် ဒီး​သ့ၣ်ညါ​ဝဲ​လၢ ယဟိဝၤ​ယွၤ​ဘၣ်သူၣ်​ဘၣ်သး​အီၤ​လီၤ. ဝံၤဒီး အဝဲ​သ့ၣ်ညါ​လီၤတံၢ်​လီၤဆဲး​လၢ အဝဲ​အဲၣ်ဒိး​အိၣ်ဝဲ​လၢ​တၢ်လီၢ်​တတီၤ​အံၤ ဒီး​လၢခံ​န့ၣ် ကအိၣ်​ဘၣ်​ဝဲ​ဖဲ​န့ၣ်​သပှၢ်​ကတၢၢ်​လီၤ. ဖဲ​တၢ်မုာ်​တၢ်ခုၣ်​လုၢ်ဘၢ​အီၤ အဆၢ​ကတီၢ် စီၤ​ဃနိာ်​ဘံၣ်​လီၤ​အမဲာ်​လၢ တၢ်​မံသပ့ၤ​ဖး​ယိာ်​အ​ပူၤ​လၢ အမ့ၢ်​တၢ်သံ​လီၤ.

တုၤ​လီၤ​လၢ မုၢ်မဆါ​တနံၤ​အံၤန့ၣ် အဝဲ​မံ​ဝဲ​လၢ တၢ်သံ​အ​ပူၤ​လီၤ. ဘၣ်ဆၣ် ယဟိဝၤ​ယွၤ တ​သးပ့ၤနီၣ်​အီၤ​နီတဘျီ​ဘၣ်. လၢခံ​န့ၣ် ဒ်​ယ့ၣ်ၡူး​အၢၣ်လီၤ​ပာ်ဝဲ​အသိး မုၢ်​က​အိၣ်ဝဲ​တနံၤ​လၢ ကယဲၢ်​ပှၤလၢ​ကစၢ်​ယွၤ​သ့ၣ်နီၣ်ထီၣ်​က့ၤ​အီၤ​တဖၣ် က​နၢ်ဟူ​ခရံာ်​အ​ကလုၢ် ဒီး​ဟဲ​က့ၤထီၣ်ဝဲ​လၢ တၢ်သွၣ်ခိၣ်​အ​ပူၤ​လီၤ. ဖဲ​န့ၣ်​အဆၢ​ကတီၢ် ပှၤသံ​တဖၣ်​က​စီၣ်ထီၣ်​အ​မဲာ်ချံ ဒီး​က​ထံၣ်ဘၣ်​ဝဲ​ဟီၣ်ခိၣ်​သီ​ဃံလၤ​လၢ အပှဲၤ​ဒီး​တၢ်မုာ်​တၢ်ခုၣ်​န့ၣ်​လီၤ.—ယိၤဟၣ် ၅:၂၈, ၂၉.

မ့ၢ်​န​အဲၣ်ဒိး​အိၣ်မူ​ဘၣ် ဖဲ​န့ၣ်​စ့ၢ်ကီး​ဧါ. န​မ့ၢ်​ထံၣ်​လိာ်သး​ဒီး စီၤ​ဃနိာ်​န့ၣ် န​သး​က​ခု​ထဲလဲၣ်​န့ၣ် ဆိကမိၣ်​ကွၢ်​တက့ၢ်. ဖဲ​န့ၣ်​အခါ န​က​မၤလိ​န့ၢ်ဘၣ်​တၢ်​လၢ​အ​လီၤသူၣ်ပိၢ်သးဝး​လၢ အ​အိၣ်​အါမး​လီၤ. အဒိ ဖဲ​မၢ​ကၢာ်​တၢ်​လၢ​ပ​ထံၣ်တမှံ​ကွၢ်​ဘၣ်ဃး​ဒီး စီၤ​ဃနိာ်​အ​တၢ်သံ​န့ၣ် ဘူး​က​ဘၣ်​စ့ၢ်ကီး​ဧါ​န့ၣ် အဝဲ​က​တဲ​နၢ်ပၢၢ်​ပှၤလီၤ. ဘၣ်ဆၣ် ခဲအံၤ​တၢ်​လၢ​အရ့ဒိၣ်​လၢ ပ​က​ဘၣ်​မၤလိ​န့ၢ်​တၢ်​လၢ စီၤ​ဃနိာ်​အ​အိၣ်​န့ၣ် အိၣ်ဝဲ​တခါ​လီၤ. စီၤ​ပီလူး​တဲ​ဖျါထီၣ် စီၤ​ဃနိာ်​အဂ့ၢ်​ဝံၤ​အလီၢ်​ခံ အဝဲ​တဲ​နၢ်ပၢၢ်​ပှၤ​ဘၣ်ဃး​ဒီး​တၢ်ဂ့ၢ်​တခါ​အံၤ​လီၤ. အဝဲ​တဲဝဲ​လၢ– “မ့မ့ၢ်​တၢ်နာ်​တအိၣ်​ဘၣ်​ဒီး, တၢ်ဘၣ် [ယွၤ] အသး​တ​သ့​ဘၣ်.” (ဧ့ၤဘြံၤ ၁၁:၆) တၢ်ဂ့ၢ်​တခါ​အံၤ ကဲထီၣ်​တၢ်​ဟ့ၣ်ဂံၢ်​ဟ့ၣ်ဘါ​ဖးဒိၣ်​တခါ​လၢ ပ​က​ကွၢ်လိ​စီၤ​ဃနိာ်​အ​တၢ်နာ်​န့ၣ်​လီၤ.