ယိၤဟၣ် ၁:၁-၅၁
၁ လၢအခီၣ်ထံးန့ၣ် တၢ်ကလုၢ်အိၣ်ဝဲ+ ဒီးတၢ်ကလုၢ်န့ၣ် အိၣ်ဝဲဒီးကစၢ်ယွၤ+ ဒီးတၢ်ကလုၢ်န့ၣ် မ့ၢ်ယွၤတဂၤ စ့ၢ်ကီးလီၤ.+
၂ လၢအခီၣ်ထံးန့ၣ် အဝဲအိၣ်ဒီး ကစၢ်ယွၤလီၤ.
၃ တၢ်ခဲလၢာ် ဟဲကဲထီၣ်အသး ခီဖျိလၢအီၤလီၤ.+ ဒီးမ့တမ့ၢ် ခီဖျိလၢအီၤဘၣ်န့ၣ် တၢ်တဟဲကဲထီၣ်အသး နီတမံၤဘၣ်.
တၢ်လၢအဟဲကဲထီၣ်အသး
၄ ခီဖျိလၢအီၤန့ၣ် မ့ၢ်ဝဲတၢ်မူလီၤ. ဒီးတၢ်မူအဝဲန့ၣ် မ့ၢ်ဝဲပှၤဟီၣ်ခိၣ်ဖိ အတၢ်ကပီၤလီၤ.+
၅ ဒီးတၢ်ကပီၤန့ၣ် ကပီၤထီၣ်လၢ တၢ်ခံးကျါ+ ဘၣ်ဆၣ် တၢ်ခံးမၤနၢၤအီၤ တန့ၢ်ဘၣ်.
၆ ပှၤလၢအဘၣ် တၢ်ဆှၢလီၤအီၤဒ် ကစၢ်ယွၤ အပှၤခၢၣ်စးတဂၤ ဟဲဝဲလီၤ. ဒီးအမံၤမ့ၢ်ဝဲ စီၤယိၤဟၣ်လီၤ.+
၇ အဝဲဟဲဒ် ပှၤအုၣ်အသးတဂၤလၢ ကအုၣ်အသး ဘၣ်ဃးဒီး တၢ်ကပီၤအဝဲန့ၣ်အဂ့ၢ်+ ဒ်သိး ပှၤအကလုာ်ကလုာ် ကနာ်တၢ် ခီဖျိလၢအီၤလီၤ.
၈ အဝဲတမ့ၢ်တၢ်ကပီၤ အဝဲန့ၣ်ဘၣ်.+ ဘၣ်ဆၣ် အဝဲဘၣ်အုၣ်အသး ဘၣ်ဃးဒီး တၢ်ကပီၤ အဝဲန့ၣ်အဂ့ၢ်လီၤ.
၉ တၢ်ကပီၤနီၢ်ကီၢ်လၢ အဟ့ၣ်ထီၣ် တၢ်ကပီၤလၢ ပှၤအကလုာ်ကလုာ်အဂီၢ်န့ၣ် တယံာ်ဘၣ် ဟဲကတုၤလၢ ဟီၣ်ခိၣ်ချၢလီၤ.+
၁၀ ဟီၣ်ခိၣ်ဟဲကဲထီၣ်ဝဲ ခီဖျိလၢအီၤ+ ဒီးအဝဲအိၣ်ဘၣ်လၢ ဟီၣ်ခိၣ်ချၢ+ ဘၣ်ဆၣ် ဟီၣ်ခိၣ် တသ့ၣ်ညါအီၤဘၣ်.
၁၁ ဒီးအဝဲဟဲလၢ အနီၢ်ကစၢ်ထံကီၢ် ဘၣ်ဆၣ် အပှၤကလုာ်ဒၣ်ဝဲ တတူၢ်လိာ်အီၤဘၣ်.
၁၂ မ့မ့ၢ်ပှၤကိးဂၤဒဲးလၢ အတူၢ်လိာ်အီၤန့ၣ် အဝဲဟ့ၣ်လီၤဝဲ တၢ်ခွဲးတၢ်ယာ် ဒ်သိး အဝဲသ့ၣ် ကကဲထီၣ် ကစၢ်ယွၤအဖိတဖၣ်,+ မ့ၢ်လၢအဝဲသ့ၣ် စူၢ်က့ၤနာ်က့ၤအမံၤ အဃိလီၤ.+
၁၃ အဝဲသ့ၣ်တဖၣ်န့ၣ် တအိၣ်ဖျဲၣ်ထီၣ်လၢ အမိၢ်ပၢ်အဃိဘၣ် ဒီးတမ့ၢ်လၢ ပှၤဟီၣ်ခိၣ်ဖိ အတၢ်ဘၣ်သးအဃိ စ့ၢ်ကီးဘၣ်. အဝဲသ့ၣ် အိၣ်ဖျဲၣ်ထီၣ် ခီဖျိလၢ ကစၢ်ယွၤလီၤ.+
၁၄ ဒီးတၢ်ကလုၢ်န့ၣ် ကဲထီၣ်ဝဲ ပှၤဟီၣ်ခိၣ်ဖိ*+ ဒီးအိၣ်ဝဲလၢပကျါ ဒီးပထံၣ်ဘၣ် အလၤကပီၤ လၢအမ့ၢ် တၢ်လၤကပီၤလၢ ပၢ်တဂၤဟ့ၣ်လီၤဝဲ အဖိခွါနီၢ်နီၢ် ထဲတဂၤဧိၤလီၤ.+ ဒီးအဝဲပှဲၤဒီး တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်မ့ၢ်တၢ်တီလီၤ.
၁၅ (စီၤယိၤဟၣ် အုၣ်အသး ဘၣ်ဃးဒီးအဂ့ၢ် ဒီးကိးပသူထီၣ်ဝဲလၢ “ပှၤတဂၤအံၤ မ့ၢ်ပှၤလၢ ယတဲဘၣ်အဂ့ၢ်လၢ ‘ပှၤတဂၤလၢ အဟဲလၢယလီၢ်ခံန့ၣ် လဲၤလၢယမဲာ်ညါလံ, မ့ၢ်လၢ တချုးလၢ ယအိၣ်မူဒံးဘၣ်န့ၣ် အဝဲအိၣ်မူဆိပာ်စၢၤလၢ ယမဲာ်ညါ အဃိလီၤ.’”)+
၁၆ မ့ၢ်လၢအဝဲပှဲၤဒီး တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်မ့ၢ်တၢ်တီအဃိ ပဝဲခဲလၢာ် ပဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ် တဘျီဝံၤတဘျီလီၤ.
၁၇ ဒီးတၢ်သိၣ်တၢ်သီန့ၣ် ကစၢ်ယွၤ ဟ့ၣ်လီၤဝဲ ခီဖျိလၢ စီၤမိၤၡ့,+ မ့မ့ၢ်တၢ်သးကညီၤ ဒိၣ်ဒိၣ်မုၢ်မုၢ်+ ဒီးတၢ်မ့ၢ်တၢ်တီန့ၣ် ဟဲခီဖျိလၢ ယ့ၣ်ၡူးခရံာ်လီၤ.+
၁၈ ပှၤတဂၤမး တထံၣ်ဘၣ် ကစၢ်ယွၤ နီတဘျီဘၣ်.+ ဖိခွါနီၢ်နီၢ်ထဲတဂၤဧိၤ လၢအမ့ၢ် ယွၤတဂၤ*+ ဒီးအိၣ်ဝဲလၢ ပၢ်အကပၤန့ၣ်*+ မ့ၢ်ပှၤလၢ အတဲဖျါထီၣ် ကစၢ်ယွၤအဂ့ၢ်လီၤ.+
၁၉ ဖဲပှၤယူဒၤဖိ ဆှၢလီၤဝဲ ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ်လၢ အအိၣ်ဟဲလၢ ဝ့ၢ်ယရူၤၡလ့ၣ် ဒ်သိးကသံကွၢ် စီၤယိၤဟၣ်လၢ “နမ့ၢ်မတဂၤလဲၣ်” အခါ စီၤယိၤဟၣ် အုၣ်အသး ဒ်လၢလာ်အံၤအသိးလီၤ.+
၂၀ အဝဲအၢၣ်လီၤဝဲတီတီ ဒီးတဲဆၢဝဲလၢ “ယတမ့ၢ်ခရံာ်ဘၣ်.”
၂၁ ဒီးအဝဲသ့ၣ် သံကွၢ်အီၤလၢ “မ့မ့ၢ်ဒ်န့ၣ်န့ၣ် နကဲ စီၤအ့ၤလံယၤဧါ.”+ အဝဲတဲဆၢဝဲလၢ “ယတမ့ၢ်အီၤဘၣ်.” ဒီးအဝဲသ့ၣ် သံကွၢ်အီၤလၢ “မ့ၢ်နကဲဝံလၢ ဘၣ်တၢ် တဲဆိပာ်အီၤတဂၤန့ၣ်ဧါ.”+ ဒီးအဝဲတဲဆၢဝဲလၢ “တမ့ၢ်ဘၣ်.”
၂၂ အဝဲသ့ၣ်တဲအီၤလၢ “ဒ်သိး ပကတဲဘၣ်က့ၤ ပှၤလၢ အမၢလီၤပှၤအဂီၢ် တဲဘၣ်ပှၤလၢ နမ့ၢ်မတဂၤလဲၣ် ဒီးတဲဘၣ်ပှၤလၢ နဂ့ၢ်နကျိၤမီၤ.”
၂၃ အဝဲတဲဝဲလၢ “ဒ်ဝံယၡါယၤ တဲဝဲအသိး+ ပှၤလၢ အကလုၢ်သီၣ်ထီၣ်လၢ ပှၢ်မုၢ်ကနၢလၢ ‘မၤလိၤထီၣ်ကျဲလၢ ယဟိဝၤယွၤ* အမဲာ်ညါ’+ တဂၤန့ၣ် မ့ၢ်ယၤလီၤ.”
၂၄ ပှၤတဖၣ်န့ၣ် ပှၤဖၤရံၤၡဲ ဆှၢလီၤဝဲလီၤ.
၂၅ အဃိ အဝဲသ့ၣ် သံကွၢ်စီၤယိၤဟၣ်လၢ “နမ့တမ့ၢ်ခရံာ်, စီၤအ့ၤလံယၤ မ့တမ့ၢ် ဝံလၢ ဘၣ်တၢ်တဲဆိပာ်အီၤ တဂၤဘၣ်န့ၣ် ဘၣ်မနုၤအဃိ နဒိးဘျၢတၢ်လဲၣ်.”
၂၆ စီၤယိၤဟၣ် တဲဆၢက့ၤ အဝဲသ့ၣ်လၢ “ယဒိးဘျၢတၢ်လၢ ထံလီၤ. ဘၣ်ဆၣ် ပှၤတဂၤလၢ အအိၣ်လၢသုကျါ လၢသုတသ့ၣ်ညါအီၤဘၣ်န့ၣ်
၂၇ မ့ၢ်ဝဲပှၤလၢ အဟဲလၢယလီၢ်ခံ ဒီးထဲလၢ ယကဃဲၣ်လီၤကွံာ် အခီၣ်ဖံးပျံၤဒၣ်လဲာ် ယတကြၢးဘၣ်.”+
၂၈ တၢ်မၤအသးတဖၣ်န့ၣ် ကဲထီၣ်အသးလၢ ထံကျိယၢ်ဒ့ၣ်အဝၢ်ဘးခီ လၢဘ့ၤသနံ ဖဲစီၤယိၤဟၣ် ဒိးဘျၢတၢ်အလီၢ်လီၤ.+
၂၉ လၢခံတနံၤန့ၣ် စီၤယိၤဟၣ်ထံၣ် ယ့ၣ်ၡူး ဟဲလၢအအိၣ်လီၤ. ဒီးစီၤယိၤဟၣ် တဲဝဲလၢ “ကွၢ်မီၤ, အဝဲမ့ၢ် ယွၤအသိဖိလၢ+ အစိာ်ထီၣ်ကွံာ် ဟီၣ်ခိၣ်+ အတၢ်ဒဲးဘးလီၤ.+
၃၀ ပှၤတဂၤအံၤ မ့ၢ်ပှၤလၢ ယတဲအဂ့ၢ်လၢ ‘ပှၤတဂၤလၢ အဟဲလၢယလီၢ်ခံန့ၣ် လဲၤလၢယမဲာ်ညါလံ, မ့ၢ်လၢ တချုးလၢ ယအိၣ်မူဒံးဘၣ်န့ၣ် အဝဲအိၣ်မူဆိပာ်စၢၤလၢ ယမဲာ်ညါအဃိလီၤ.’+
၃၁ ယၤစ့ၢ်ကီး လၢညါ ယတသ့ၣ်ညါအီၤဘၣ်. ဘၣ်ဆၣ် ယဟဲဒိးဘျၢတၢ်လၢထံ ဒ်သိး ပှၤအံၣ်စရ့လးဖိ ကသ့ၣ်ညါအီၤအဂီၢ်လီၤ.”+
၃၂ စီၤယိၤဟၣ်စ့ၢ်ကီး အုၣ်အသးလၢ “ယထံၣ်သးစီဆှံ ဟဲလီၤလၢမူခိၣ် ဒ်ထိၣ်လွံၢ်အသိး ဒီးအိၣ်ဝဲလၢ အလိၤလီၤ.+
၃၃ ယၤစ့ၢ်ကီး လၢညါ ယတသ့ၣ်ညါအီၤဘၣ်. ဘၣ်ဆၣ် ပှၤတဂၤလၢ အဆှၢလီၤယၤ လၢယကဒိးဘျၢ တၢ်လၢထံန့ၣ် တဲပာ်စၢၤယၤလၢ ‘ပှၤတဂၤဂၤလၢ နထံၣ်ဘၣ် သးစီဆှံဟဲလီၤ ဒီးအိၣ်ဝဲလၢအလိၤန့ၣ်+ အဝဲမ့ၢ် ပှၤတဂၤလၢ အကဒိးဘျၢတၢ်လၢ သးစီဆှံလီၤ.’+
၃၄ ယထံၣ်ဘၣ်လံ ဒီးယအုၣ်ယသးလၢ ပှၤတဂၤအံၤမ့ၢ်ဝဲ ကစၢ်ယွၤအဖိခွါလီၤ.”+
၃၅ လၢခံတနံၤန့ၣ် စီၤယိၤဟၣ် ဆၢထၢၣ်ဒီးအပျဲၢ်ခံဂၤ
၃၆ ဒီးဖဲအဝဲကွၢ် ယ့ၣ်ၡူးဟးအခါ အတဲဝဲလၢ “ကွၢ်မီၤ, အဝဲမ့ၢ် ယွၤအသိဖိလီၤ.”+
၃၇ ဖဲအပျဲၢ်ခံဂၤနၢ်ဟူ စီၤယိၤဟၣ် တဲဝဲဒ်န့ၣ်အခါ အဝဲသ့ၣ်ပိာ်ထီၣ် ယ့ၣ်ၡူးအခံလီၤ.
၃၈ ယ့ၣ်ၡူး ဃၣ်ဃီၤအသးဒီး ထံၣ်လၢ အဝဲသ့ၣ်ပိာ်အခံ အဃိ ယ့ၣ်ၡူးတဲအဝဲသ့ၣ်လၢ “သုဃုတၢ်မနုၤလဲၣ်.” ဒီးအဝဲသ့ၣ် တဲအီၤလၢ “ရၤဘံဧၢ, (အခီပညီမ့ၢ်ဝဲ “သရၣ်”) နအိၣ်နဆိးဖဲလဲၣ်.”
၃၉ အတဲဘၣ်အဝဲသ့ၣ်လၢ “ဟဲ ဒီးသုကထံၣ်ဘၣ်လီၤ.” အဃိ အဝဲသ့ၣ် လဲၤဒီးထံၣ်ဝဲ ယ့ၣ်ၡူး အတၢ်အိၣ်တၢ်ဆိးအလီၢ်လီၤ. ဖဲန့ၣ်အခါ ဘၣ်ဖဲ ဟါလီၤခီ ၄ နၣ်ရံၣ်ဃၣ်ဃၣ်* ဒီးတၢ်တနံၤန့ၣ် အဝဲသ့ၣ် အိၣ်ဒီးအီၤလီၤ.
၄၀ စီၤၡံမိၣ်ပ့းတရူး အဒီပုၢ်ဝဲၢ်ခွါ စီၤအၣ်ဒရ့းန့ၣ်+ မ့ၢ်ဝဲပှၤခံဂၤ အကျါတဂၤလၢ အနၢ်ဟူဝဲတၢ်လၢ စီၤယိၤဟၣ်တဲဝဲ ဒီးပိာ်ထီၣ် ယ့ၣ်ၡူးအခံလီၤ.
၄၁ အဆိကတၢၢ်န့ၣ် စီၤအၣ်ဒရ့း လဲၤထံၣ်လိာ်အသးဒီး အဒီပုၢ်ဝဲၢ်ခွါ စီၤၡံမိၣ် ဒီးတဲအီၤလၢ “ပထံၣ်ဘၣ် မ့းၡံအၤလံ”+ (အခီပညီမ့ၢ်ဝဲ “ခရံာ်”)
၄၂ ဒီးအဝဲ လဲၤကိးအီၤလၢ ယ့ၣ်ၡူးအအိၣ်လီၤ. ဖဲယ့ၣ်ၡူး ကွၢ်အီၤအခါ ယ့ၣ်ၡူးတဲအီၤလၢ “နမ့ၢ် စီၤယိၤဟၣ်အဖိခွါ စီၤၡံမိၣ်+ ဒီးနကဘၣ် တၢ်ကိးက့ၤနၤလၢ စီၤက့ၤဖးလီၤ” (အခီပညီမ့ၢ်ဝဲ “စီၤပ့းတရူး”).+
၄၃ လၢခံတနံၤန့ၣ် ယ့ၣ်ၡူး အဲၣ်ဒိးလဲၤလၢ ကၤလံၤလါလီၤ. ဒီးအဝဲထံၣ် စီၤဖံလံးပူး+ ဒီးတဲဘၣ်အီၤလၢ “ဟဲပိာ်ယခံတက့ၢ်.”
၄၄ စီၤဖံလံးပူးန့ၣ် အိၣ်ဟဲလၢ ဘ့ၤသစဲဒၤ လၢအမ့ၢ် ဝ့ၢ်တဖျၢၣ်ဃီလၢ စီၤအၣ်ဒရ့း ဒီးစီၤပ့းတရူး အိၣ်ဝဲန့ၣ်လီၤ.
၄၅ စီၤဖံလံးပူး လဲၤထံၣ်လိာ်အသးဒီး စီၤနၤသန့လး+ ဒီးတဲအီၤလၢ “ပှၤလၢ စီၤမိၤၡ့ အတၢ်သိၣ်တၢ်သီ ဒီးဝံအတၢ်ကွဲးအသး ပာ်ဖျါထီၣ်ဝဲ အဂ့ၢ်တဂၤန့ၣ် ပထံၣ်န့ၢ်အီၤလံ. အဝဲမ့ၢ် စီၤယိၤသးအဖိခွါ+ ပှၤနစၤရ့းဖိ ယ့ၣ်ၡူးလီၤ.”
၄၆ ဘၣ်ဆၣ် စီၤနၤသန့လး တဲဘၣ်အီၤလၢ “တၢ်လၢအဂ့ၤတမံၤမံၤ ဟဲထီၣ်လၢ ဝ့ၢ်နစၤရ့းအပူၤ ကသ့ဧါ.” စီၤဖံလံးပူး တဲအီၤလၢ “ဟဲကွၢ်သၢၤ.”
၄၇ ဒီးဖဲယ့ၣ်ၡူးထံၣ်ဝဲ စီၤနၤသန့လး ဟဲလၢအအိၣ်အခါ ယ့ၣ်ၡူးတဲဝဲလၢ “ကွၢ်မီၤ, အဝဲမ့ၢ် ပှၤအံၣ်စရ့လးဖိ နီၢ်ကီၢ်တဂၤလၢ တၢ်လီတၢ်ဝ့ၤ တအိၣ်လၢ အပူၤဘၣ်လီၤ.”+
၄၈ စီၤနၤသန့လး တဲဘၣ်အီၤလၢ “နသ့ၣ်ညါယၤဒ်လဲၣ်.” ယ့ၣ်ၡူး တဲဆၢအီၤလၢ “တချုးလၢ စီၤဖံလံးပူး ကိးနၤဒံးဘၣ် ဒီးဖဲနအိၣ်လၢ ချၢၣ်ဒၢထူၣ် အဖီလာ်အခါန့ၣ် ယထံၣ်နၤလံ.”
၄၉ စီၤနၤသန့လး တဲဆၢဝဲလၢ “သရၣ်ဧၢ,* နမ့ၢ် ကစၢ်ယွၤအဖိခွါ ဒီးနမ့ၢ် အံၣ်စရ့လး အစီၤပၤလီၤ.”+
၅၀ ယ့ၣ်ၡူး တဲဆၢအီၤလၢ “မ့ၢ်လၢ ယတဲနၤလၢ ယထံၣ်နၤလၢ ချၢၣ်ဒၢထူၣ် အဖီလာ်အဃိ နနာ်ယၤဧါ. နကထံၣ်ဘၣ် တၢ်လၢအလီၤကမၢကမၣ် ဒိၣ်န့ၢ်အန့ၣ်လီၤ.”
၅၁ ဒီးယ့ၣ်ၡူး တဲအီၤလၢ “ယကတဲသု တီတီလၢ သုကထံၣ်ဘၣ် မူခိၣ်အိးထီၣ်အသး ဒီးကစၢ်ယွၤ အမူခိၣ်ကလူးတဖၣ် ဟဲလီၤလၢ ပှၤကညီဖိခွါအအိၣ် ဒီးက့ၤထီၣ်ဝဲလၢ မူခိၣ်လီၤ.”+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “တၢ်ညၣ်.”
^ မ့ၢ်စ့ၢ်ကီး “ဖိခွါထဲတဂၤဧိၤလၢ ယွၤတ့လီၤဝဲလၢအနီၢ်ကစၢ်.”
^ မ့ၢ်စ့ၢ်ကီး “လၢပၢ်အသးနါပှၢ်.” အဲၣ်ဒိးတဲဝဲ ဒိးန့ၢ်ဘၣ် အတၢ်ဘၣ်သး လီၤလီၤဆီဆီ.
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ အခီပညီလိၤလိၤ “မုၢ်ဟဲထီၣ်ဝံၤအလီၢ်ခံ အနၣ်ရံၣ် ၁၀ ဃၣ်ဃၣ်.”
^ အခီပညီလိၤလိၤ “ရၤဘံဧၢ.”
