ယံးရမံယၤ ၂၉:၁-၃၂
၂၉ ဝံယံးရမံယၤလၢ အအိၣ်လၢ ဝ့ၢ်ယရူၤၡလ့ၣ်န့ၣ် ဆှၢလီၤလံာ်ပရၢတဘ့ၣ်ဆူ ပှၤလၢအအိၣ်ပာ်စၢၤလၢ ဝ့ၢ်ယရူၤၡလ့ၣ်လၢ စီၤနဘူၤကးန့စၢ် က့ၤဖီၣ်ဝဲဆူ ဘၤဘူၤလိၣ်ခဲလၢာ် အအိၣ်လီၤ. ပှၤတဖၣ်န့ၣ် ပၣ်ဃုာ်ဒီး ပှၤသူၣ်က့သးပှၢ်တဖၣ်လၢ အအိၣ်လၢ ပှၤလၢအဘၣ် တၢ်က့ၤဖီၣ်အီၤတဖၣ်အကျါ, ပှၤလုၢ်တၢ်ဒိၣ်တဖၣ်, ဝံတဖၣ် ဒီးပှၤဂီၢ်မုၢ်တဖၣ်လီၤ. လံာ်ပရၢတဘ့ၣ်အံၤ ဘၣ်တၢ်ပာ်ဖျါထီၣ်အီၤ လၢလာ်အံၤလီၤ.
၂ ဒီးအဝဲဆှၢလီၤ လံာ်ပရၢ ဖဲစီၤပၤယံးကၤနံယၤ,+ စီၤပၤအမိၢ်,+ ပဒိၣ်တဖၣ်, ယူဒၤဒီးဝ့ၢ်ယရူၤၡလ့ၣ် အပဒိၣ်ဖးဒိၣ်တဖၣ်, ပှၤစုသ့ဖိတဖၣ် ဒီးပှၤပိာ်ထးဖိတဖၣ် လၢအအိၣ်လၢ ဝ့ၢ်ယရူၤၡလ့ၣ်အပူၤ ဘၣ်တၢ်က့ၤဖီၣ်အီၤ ဝံၤအလီၢ်ခံလီၤ.+
၃ ဝံယံးရမံယၤ ဆှၢလီၤဝဲ လံာ်ပရၢတဘ့ၣ်န့ၣ်လၢ စီၤၡၤဖၣ်+ အဖိခွါ စီၤအ့လၤစၤ ဒီးစီၤဃံးလကံယၤ အဖိခွါ စီၤကမၤရယၤ အစုပူၤလီၤ. ပှၤတဖၣ်န့ၣ် ယူဒၤအစီၤပၤစံးဒကံယၤ+ ဆှၢလီၤအီၤလၢ ဘၤဘူၤလိၣ်ဆူ ဘၤဘူၤလိၣ် အစီၤပၤနဘူၤကးန့စၢ် အအိၣ်လီၤ. လံာ်ပရၢန့ၣ် တဲဝဲလၢ
၄ “သုဝဲ ပှၤဂီၢ်မုၢ်ခဲလၢာ်လၢ အအိၣ်ပာ်စၢၤလၢ ဝ့ၢ်ယရူၤၡလ့ၣ် ဒီးဘၣ်တၢ်က့ၤဖီၣ်သုလၢ ဘၤဘူၤလိၣ်အပူၤသ့ၣ်ဧၢ, ယၤ, တၢ်သုးမုၢ်ဂီၢ်မုၢ် အကစၢ်ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဘၣ်သုလၢ
၅ ‘တ့ထီၣ်ဟံၣ် ဒီးအိၣ်လၢအပူၤတက့ၢ်. သူၣ်လီၤဖျးလီၤ တၤသူတၤသၣ်ကရၢၢ် ဒီးအီၣ်အသၣ်တက့ၢ်.
၆ ဆီဟံၣ်ဆီဃီ ဒီးထီၣ်ဖိထီၣ်လံၤတက့ၢ်. ဒုးဖျီသုဖိမုၣ် ဖိခွါတဖၣ်ဒ်သိး အဝဲသ့ၣ်စ့ၢ်ကီး ကထီၣ်ဖိထီၣ်လံၤတက့ၢ်. မ်သုအါထီၣ်ဂီၢ်ထီၣ်ဖဲန့ၣ် ဒီးတဘၣ်လီၤစှၤတဂ့ၤ.
၇ ဒီးဃုတၢ်မုာ်တၢ်ခုၣ်လၢ ဝ့ၢ်တဖျၢၣ်လၢ တၢ်က့ၤဖီၣ်သုလၢ အပူၤန့ၣ်တက့ၢ်. ဝ့ၢ်တဖျၢၣ်အံၤ တၢ်မုာ်တၢ်ခုၣ်မ့ၢ်အိၣ်မး သုကအိၣ်ဘၣ် မုာ်မုာ်ခုၣ်ခုၣ်အဃိ ဃ့ထုကဖၣ်တၢ်လၢ ယဟိဝၤယွၤ အအိၣ်လၢ ဝ့ၢ်တဖျၢၣ်အံၤ အဂီၢ်တက့ၢ်.+
၈ ယၤ, တၢ်သုးမုၢ်ဂီၢ်မုၢ် အကစၢ်ယဟိဝၤယွၤ လၢအမ့ၢ် အံၣ်စရ့လး ကစၢ်ယွၤန့ၣ် တဲဝဲလၢ “တဘၣ်ပျဲလၢ သုဝံတဖၣ် ဒီးပှၤလၢအဖး တၢ်ကမၤအသးလၢ ခါဆူညါတဖၣ် လၢအအိၣ်လၢသုကျါန့ၣ် လံၣ်န့ၢ်လီန့ၢ်သုတဂ့ၤ.+ ဒီးတဘၣ်ဒိကနၣ် တၢ်မံမီၢ်တဖၣ်လၢ အဝဲသ့ၣ် မံမီၢ်ဝဲန့ၣ်တဂ့ၤ.
၉ ‘ယတဆှၢလီၤ အဝဲသ့ၣ်ဘၣ် သနာ်က့ အဝဲသ့ၣ် တဲသု ဝံအတၢ်စံးပာ်လၢ အတမ့ၢ်တတီဘၣ်တဖၣ် လၢယမံၤအပူၤလီၤ.’+ ယၤ, ယဟိဝၤယွၤ တဲဝဲဒ်န့ၣ်လီၤ.”’
၁၀ “ယဟိဝၤယွၤ တဲဝဲလၢ ‘အနံၣ် ၇၀ မ့ၢ်ပှဲၤထီၣ်လၢ ဘၤဘူၤလိၣ်အပူၤန့ၣ် ယကအံးထွဲကွၢ်ထွဲက့ၤသု+ ဒီးယကမၤလၢပှဲၤ ယတၢ်အၢၣ်လီၤ ခီဖျိလၢ ယကဟဲက့ၤကိးကဒါက့ၤသုလၢ သုလီၢ်သုကျဲဖဲအံၤလီၤ.’+
၁၁ “ယဟိဝၤယွၤ တဲဝဲလၢ ‘တၢ်လၢ ယကမၤန့ၢ်သုန့ၣ် ယသ့ၣ်ညါအီၤ လီၤတံၢ်လီၤဆဲးလီၤ. ယကဟ့ၣ်သု တၢ်မုာ်တၢ်ခုၣ် ဒီးတမ့ၢ် တၢ်ကီတၢ်ခဲဘၣ်.+ ဒီးယကဟ့ၣ်သု တၢ်မုၢ်လၢ်+ ဒီးတၢ်အိၣ်မူလၢ အဂ့ၤလၢ ခါဆူညါလီၤ.
၁၂ သုကကိးထီၣ်ယၤ ဒီးဟဲဃ့ထုကဖၣ် လၢယအိၣ် ဒီးယကဒိကနၣ်သုလီၤ.’+
၁၃ “‘မ့ၢ်လၢ သုကဃုယၤလၢ သုသးဒီဖျၢၣ်+ အဃိ သုကဃုယၤဒီး သုကထံၣ်န့ၢ်ယၤလီၤ.+
၁၄ ယဟိဝၤယွၤ တဲဝဲလၢ ‘ယကပျဲလၢ သုကထံၣ်န့ၢ်ယၤလီၤ.’+ ဒီးယဟိဝၤယွၤ တဲဝဲလၢ ‘သုပှၤလၢ အဘၣ်တၢ်က့ၤဖီၣ်အီၤတဖၣ်န့ၣ် ယကပာ်ဖှိၣ်ထီၣ်က့ၤ အဝဲသ့ၣ် ဒီးယကပာ်ဖှိၣ်ထီၣ်သုလၢ ပှၤကိးကလုာ်ဒဲးအကျါ ဒီးဖဲတၢ်လီၢ်ခဲလၢာ်လၢ ယမၤလီၤပြံလီၤပြါသုလီၤ.+ ဒီးယကဟဲက့ၤကိးကဒါက့ၤသုလၢ တၢ်လီၢ်လၢ ပှၤဟဲဖီၣ်န့ၢ်သု အလီၢ်လီၤ.’+
၁၅ “ဘၣ်ဆၣ် သုတဲလၢ ‘ယဟိဝၤယွၤ ဒုးအိၣ်ထီၣ်န့ၢ်ပှၤ ဝံတဖၣ်လၢ ဘၤဘူၤလိၣ် အပူၤလံ.’
၁၆ “ဘၣ်ဃးဒီး စီၤပၤလၢ အဆ့ၣ်နီၤလၢ စီၤဒၤဝံးအလီၢ်ပစိာ်အလိၤ,+ ပှၤဂီၢ်မုၢ်ခဲလၢာ်လၢ အအိၣ်လၢ ဝ့ၢ်တဖျၢၣ်အံၤအပူၤ ဒီးသုဒီပုၢ်ဝဲၢ်တဖၣ် လၢအတဘၣ်တၢ်က့ၤဖီၣ်အီၤ ဒ်သိးဒီးသုဘၣ်န့ၣ် ယဟိဝၤယွၤ တဲဝဲဒ်အံၤလီၤ.
၁၇ ‘တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ယကစံၣ်ညီၣ် အဝဲသ့ၣ်လၢ နး, တၢ်သၣ်ဝံၤလီၤဒိ ဒီးတၢ်ဆါသံသတြိာ်လီၤ.+ ဒီးယကဒုးကဲထီၣ် အဝဲသ့ၣ် ဒ်သိးဒီး ချၢၣ်ဒၢသၣ်လၢ အတဂ့ၤနီတစဲးဘၣ် တုၤဒၣ်လဲာ် ပှၤအီၣ်ဝဲတသ့ဘၣ်.”’+
၁၈ “‘ဒီးယကလူၤ အဝဲသ့ၣ်လၢနး,+ တၢ်သၣ်ဝံၤလီၤဒိ ဒီးတၢ်ဆါသံသတြိာ်လီၤ. ယကဒုးကဲထီၣ် အဝဲသ့ၣ်လၢ တၢ်လီၤပျံၤလီၤဖုးအလီၢ် လၢဘီမုၢ်ခဲလၢာ်လၢ အအိၣ်လၢ ဟီၣ်ခိၣ်ချၢ+ အဂီၢ်လီၤ. ပှၤကကမၢကမၣ်လၢ အဝဲသ့ၣ်အဃိ, ပှၤကဆိၣ်အၢအဝဲသ့ၣ် ဒီးပှၤကဆိကမိၣ်ဆံး အဝဲသ့ၣ်လီၤ.*+ ဒီးပှၤကဒုၣ်ဒွဲၣ်အဝဲသ့ၣ် ဖဲတၢ်လီၢ်လၢ ယမၤလီၤပြံလီၤပြါ အဝဲသ့ၣ်လၢ ပှၤကလုာ်တဖၣ်အကျါ+
၁၉ မ့ၢ်လၢ အဝဲသ့ၣ် တဒိကနၣ် ယတၢ်ကတိၤတဖၣ်လၢ ယဆှၢလီၤန့ၢ် အဝဲသ့ၣ်ခီဖျိ ယခ့ယပှၤဝံတဖၣ်ဘၣ် အဃိလီၤ.’ ယဟိဝၤယွၤ တဲဝဲလၢ ‘ယဆှၢလီၤ ဝံတဖၣ် တဘျီဝံၤတဘျီလီၤ.’+
ယဟိဝၤယွၤ တဲဝဲလၢ “‘သုဝဲစ့ၢ်ကီး သုတဒိကနၣ်ဘၣ်.’+
၂၀ “အဃိ ပှၤဂီၢ်မုၢ်လၢ အအိၣ်ပာ်စၢၤလၢ ဝ့ၢ်ယရူၤၡလ့ၣ် လၢအဘၣ်တၢ်က့ၤဖီၣ်အီၤ ဆူဘၤဘူၤလိၣ်ဧၢ, ဒိကနၣ် ယၤ, ယဟိဝၤယွၤ အတၢ်ကတိၤတက့ၢ်.
၂၁ ဘၣ်ဃးဒီး စီၤကိလယၤအဖိခွါ စီၤအၤဃာ် ဒီးစီၤမၤစ့ယၤအဖိခွါ စီၤစံးဒကံယၤ လၢအတဲသုလၢ ဝံအတၢ်စံးပာ် လၢအတမ့ၢ်တတီဘၣ်တဖၣ် လၢယမံၤအပူၤန့ၣ်+ ယၤ, တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲလၢ ‘ယကဟ့ၣ်လီၤကွံာ် အဝဲသ့ၣ်လၢ ဘၤဘူၤလိၣ်အစီၤပၤ နဘူၤကးန့စၢ် အစုပူၤ ဒီးအဝဲ ကမၤသံကွံာ် အဝဲသ့ၣ်လၢ သုမဲာ်ညါလီၤ.
၂၂ ဒီးတၢ်လၢ အကဲထီၣ်အသးဒီး အဝဲသ့ၣ်န့ၣ် ယူဒၤအပှၤဂီၢ်မုၢ်လၢ အဘၣ်တၢ်က့ၤဖီၣ်အီၤလၢ အအိၣ်လၢ ဘၤဘူၤလိၣ်အပူၤခဲလၢာ်န့ၣ် ကယၢၤထီၣ်ဝဲဒ် တၢ်ဆိၣ်အၢအသိး ဒီးကတဲလၢ “မ်ယဟိဝၤယွၤ ဒုးကဲထီၣ်နၤ ဒ်စီၤစံးဒကံယၤ ဒီးစီၤအၤဃာ်လၢ ဘၤဘူၤလိၣ်အစီၤပၤ ဒွဲၣ်အူထီၣ်ကွံာ်အီၤလၢမ့ၣ်အူ အသိးန့ၣ်တက့ၢ်.”
၂၃ အဝဲသ့ၣ် မၤတၢ်လၢ အလီၤမဲာ်ဆှးလၢ ပှၤအံၣ်စရ့လးဖိအကျါ+ ဒီးအဲၣ်ဘၢမါအဲၣ်ဘၢဝၤဒီး ပှၤလၢအဃၢၤတဖၣ်အမါလီၤ. ယတမၢလီၤအဝဲသ့ၣ်ဘၣ် သနာ်က့ အဝဲသ့ၣ် တဲတၢ်လံၣ်တၢ်လီလၢ ယမံၤအပူၤလီၤ.+
“‘“ယမ့ၢ်ပှၤအုၣ်အသးတဂၤလၢ အသ့ၣ်ညါ တၢ်ဂ့ၢ်တဖၣ်န့ၣ်လီၤ.”+ ယဟိဝၤယွၤ တဲဝဲဒ်န့ၣ်လီၤ.’”
၂၄ “နဘၣ်တဲဘၣ် စီၤၡမါယၤ+ လၢအအိၣ်ဟဲလၢ န့ဃလၣ် အတၢ်လီၢ်န့ၣ်လၢ
၂၅ ‘တၢ်သုးမုၢ်ဂီၢ်မုၢ် အကစၢ်ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ “နဆှၢလီၤ လံာ်ပရၢတဖၣ်လၢနမံၤ ဆူပှၤလုၢ်တၢ်ဒိၣ် စီၤမၤစ့ယၤ အဖိခွါ စီၤစဖါနယၤအအိၣ်,+ ဆူပှၤလုၢ်တၢ်ဒိၣ်ခဲလၢာ်အအိၣ် ဒီးဆူကယဲၢ်ပှၤအိၣ်လၢ ဝ့ၢ်ယရူၤၡလ့ၣ်အပူၤ အအိၣ်လီၤ. ဒီးလံာ်ပရၢန့ၣ် တဲဝဲလၢ
၂၆ ‘လၢပှၤလုၢ်တၢ်ဒိၣ် စီၤယဟိၤယဒါအလီၢ်န့ၣ် ယဟိဝၤယွၤ ဒုးကဲထီၣ်နၤ, စီၤစဖါနယၤလၢ ပှၤလုၢ်တၢ်ဒိၣ် ဒ်သိး နကကဲထီၣ် ပှၤကွၢ်ထွဲတၢ်လၢ ယဟိဝၤယွၤ အတၢ်လုၢ်ဟံၣ်ပူၤ အဂီၢ်လီၤ. ဒီးနကဘၣ်ဖီၣ် ပှၤလၢအပျုၢ်တဂၤဂ့ၤ တဂၤဂ့ၤလၢ အမၤထီၣ်အသး ဒ်ဝံအသိးလီၤ. ဒီးနကဘၣ်ကျီၤတံၢ်ဃာ်အီၤလၢ သ့ၣ်ကျီၤ ဒီးကျီၤတံၢ်ဃာ် အကိာ်ဘိလၢ ထးကျီၤလီၤ.+
၂၇ မ့မ့ၢ်ဒ်န့ၣ်န့ၣ် စီၤယံးရမံယၤ လၢအအိၣ်ဟဲလၢ ဝ့ၢ်ဧၤနသိး+ ဒီးအမၤထီၣ်အသး ဒ်ဝံအသိး လၢသုမဲာ်ညါန့ၣ် ဘၣ်မနုၤအဃိ နတသိၣ်ဃီၣ်အီၤဘၣ်လဲၣ်.+
၂၈ အဝဲဆှၢလီၤ တၢ်ကစီၣ်လၢပအိၣ် လၢဘၤဘူၤလိၣ်အပူၤ ဒီးတဲဝဲလၢ ပကဘၣ်အိၣ်ဖဲအံၤ ဖးယံာ်ဒံးအဃိ တ့ထီၣ်ဟံၣ် ဒီးအိၣ်လၢအပူၤတက့ၢ်. သူၣ်လီၤဖျးလီၤ တၤသူတၤသၣ်ကရၢၢ် ဒီးအီၣ်အသၣ်တက့ၢ်.”’”’+
၂၉ ဖဲပှၤလုၢ်တၢ်ဒိၣ် စီၤစဖါနယၤ+ ဖးဝဲလံာ်ပရၢတဘ့ၣ်အံၤလၢ ဝံယံးရမံယၤ အမဲာ်ညါအခါ
၃၀ ယဟိဝၤယွၤ တဲဘၣ် ဝံယံးရမံယၤလၢ
၃၁ “ဆှၢလီၤတၢ်ကစီၣ်လၢ ပှၤဂီၢ်မုၢ်လၢ အဘၣ်တၢ်က့ၤဖီၣ်အီၤ ခဲလၢာ်အအိၣ် ဒီးတဲလၢ ‘ဘၣ်ဃးဒီး စီၤၡမါယၤ လၢအအိၣ်ဟဲလၢ န့ဃလၣ်အတၢ်လီၢ်န့ၣ် ယၤ, ယဟိဝၤယွၤ တဲလၢ “ယတဆှၢလီၤ စီၤၡမါယၤဘၣ် သနာ်က့ အဝဲတဲသုလၢ ဝံအတၢ်စံးပာ် ဒီးအဂုာ်ကျဲးစၢး မၤဝဲဒ်သိး သုကနာ်န့ၢ် တၢ်လံၣ်တၢ်လီအဃိ+
၃၂ ယၤ, ယဟိဝၤယွၤ တဲလၢ ‘ယကစံၣ်ညီၣ် စီၤၡမါယၤ လၢအအိၣ်ဟဲလၢ န့ဃလၣ်အတၢ်လီၢ် ဒီးအစၢၤအသွဲၣ်တဖၣ်လီၤ. မ့ၢ်လၢ အဟ့ၣ်သဆၣ်ထီၣ် ပှၤဂၤလၢ ကထီဒါ ယၤ, ယဟိဝၤယွၤအဃိ အစၢၤအသွဲၣ်တဂၤမး တမူဘၣ်လၢ ပှၤဂီၢ်မုၢ်အံၤအကျါဘၣ်. ဒီးတၢ်အဂ့ၤလၢ ယကမၤလၢ ယပှၤဂီၢ်မုၢ်အဂီၢ်န့ၣ် အတထံၣ်ဘၣ်ဝဲဘၣ်.’”’” ယဟိဝၤယွၤ တဲဝဲဒ်န့ၣ်လီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ကွ့ကလံၤ လၢအဃိ.”
