ယၤကိာ် ၃:၁-၁၈
၃ ယဒီပုၢ်ဝဲၢ်သ့ၣ်ဧၢ, သုတကြၢးကဲထီၣ် ပှၤသိၣ်လိတၢ် အါဂၤဘၣ်. ပသ့ၣ်ညါလၢ ပမ့ၢ်ကဲထီၣ် ပှၤသိၣ်လိတၢ်န့ၣ် ကစၢ်ယွၤကသမံသမိး တၢ်လၢပမၤန့ၣ် အါန့ၢ်ဒံးပှၤဂၤလီၤ.+
၂ ပဝဲခဲလၢာ် ပမၤကမၣ်တၢ်အါဘျီလီၤ.+ ပှၤတဂၤ မ့ၢ်တမၤကမၣ်တၢ်လၢ အတၢ်ကတိၤတဖၣ်ဘၣ်န့ၣ် အဝဲမ့ၢ်ပှၤလၢပှၤပှဲၤတဂၤ ဒီးပၢၤအနီၢ်ခိဒီဂၤညါ န့ၢ်ဝဲစ့ၢ်ကီးလီၤ.
၃ ဒ်သိးကသ့ၣ်ကဒိကနၣ် ပကလုၢ်အဂီၢ် ပဒုးအ့ၣ်ထီၣ်အီၤထးလၢ အကိာ်ပူၤ ဒီးပပၢၤအီၤန့ၢ်ဒီတဒုလီၤ.
၄ ကွၢ်စ့ၢ်ကီး ကဘီတဖၣ်တက့ၢ်. ကဘီတဖၣ် ဒိၣ်ထဲထဲန့ၣ်ညါ ဒီးကလံၤလၢအဆူၣ် ဆီၣ်အီၤဘၣ်ဆၣ် ပှၤကၢၤဃာ်အီၤလၢ နီၣ်ဝၢ်ဆံးဆံးဖိတဘ့ၣ်အဃိ အလဲၤဝဲဒ် ပှၤနီကဘီဖိတဂၤ အတၢ်ဘၣ်သးအသိးလီၤ.
၅ ဒ်န့ၣ်အသိး ပျ့ၤန့ၣ် မ့ၢ်ဝဲနီၢ်ခိက့ၢ်ဂီၤ ဆံးဆံးဖိတခါ ဘၣ်ဆၣ် ပတဲဂ့ၤလီၤပသးဒိၣ်မးလီၤ. ဆိကမိၣ်ကွၢ်မီၤ, မ့ၣ်အူလၣ်ဆံးဆံးဖိန့ၣ် အူအီၣ်ဝဲ ပှၢ်ဖးဒိၣ်ဒီတဘ့ၣ်ညါ သ့ဝဲလီၤ.
၆ ပျ့ၤန့ၣ် မၤအသးဒ် မ့ၣ်အူအသိးစ့ၢ်ကီးလီၤ.+ လၢပနီၢ်ခိက့ၢ်ဂီၤတဖၣ်အကျါ ပျ့ၤန့ၣ်အိၣ်ပှဲၤဒီး တၢ်တတီတလိၤ, မၤဘၣ်အၢ ပနီၢ်ခိဒီဂၤညါ,+ ဒွဲၣ်အူထီၣ် ပတၢ်အိၣ်မူလၢ မ့ၣ်အူ ဒီးအကဲၤထီၣ်ဝဲခီဖျိလၢ မ့ၣ်အူလၢအဟဲလၢ ကဟဲနၢ်လီၤ.*
၇ ဆၣ်ဖိကီၢ်ဖိအမံၤ ကိးကလုာ်ဒဲး, ထိၣ်တဖၣ်, တၢ်လၢအဘျိၣ်တဖၣ်, တၢ်အိၣ်လၢ ပီၣ်လဲၣ်ပူၤကိးကလုာ်ဒဲးန့ၣ် ဘၣ်တၢ်မၤဘှါအီၤ ဒီးပှၤဟီၣ်ခိၣ်ဖိတဖၣ် မၤဘှါအဝဲသ့ၣ် န့ၢ်ဝဲခဲလၢာ်လီၤ.
၈ ဘၣ်ဆၣ် ပျ့ၤန့ၣ် ပှၤဟီၣ်ခိၣ်ဖိ မၤဘှါအီၤ တသ့နီတဂၤဘၣ်. တၢ်လၢပျ့ၤန့ၣ် ပှၤပၢၤဃာ်အီၤတန့ၢ်ဘၣ်, အမၤဘၣ်ဒိဘၣ်ထံးတၢ် ဒီးအပှဲၤဝဲဒီးတၢ်စုၣ်တၢ်ပျၢ်လၢ အမၤသံတၢ်လီၤ.+
၉ ပသူအီၤလၢ ပကစံးထီၣ်ပတြၢၤ ပၢ်ယဟိဝၤယွၤ* အဂီၢ် ဒီးပသူစ့ၢ်ကီးအီၤလၢ ပကဆိၣ်အၢပှၤဂၤလၢ အဘၣ်တၢ်တ့လီၤအီၤ “လီၤဂာ်ဒ်ကစၢ်ယွၤအသိး” လီၤ.+
၁၀ တၢ်ဆိၣ်ဂ့ၤ ဒီးတၢ်ဆိၣ်အၢန့ၣ် ဟဲထီၣ်လၢ ပကိာ်ပူၤဒ်သိးသိးလီၤ.
ယဒီပုၢ်ဝဲၢ်သ့ၣ်ဧၢ, တၢ်ကဲထီၣ်အသးဒ်အံၤန့ၣ် တကြၢးဝဲဘၣ်ဝဲဘၣ်.+
၁၁ ထံအဆၢ ဒီးထံအခၣ်န့ၣ် ဟဲထီၣ်ဝဲလၢ ထံထီၣ်ပၢၢ်တပူၤဃီအပူၤ ကသ့ဧါ.
၁၂ ယဒီပုၢ်ဝဲၢ်သ့ၣ်ဧၢ, ချၢၣ်ဒၢအထူၣ်န့ၣ် သၣ်ထီၣ်ဝဲ သ့ၣ်စၤယံးအသၣ် ကသ့ဧါ. ဒီးစပံးမုၢ်န့ၣ် သၣ်ထီၣ်ဝဲ ချၢၣ်ဒၢအသၣ် ကသ့ဧါ.+ ဒ်န့ၣ်အသိး ထံဟီဒုးအိၣ်ထီၣ်ဝဲ ထံဆၢတသ့ဘၣ်.
၁၃ ပှၤလၢသုကျါ လၢအကူၣ်တၢ်သ့ဒီး သ့ၣ်ညါနၢ်ပၢၢ်တၢ်န့ၣ် အိၣ်တဂၤဂၤဧါ. အဝဲကြၢးပာ်ဖျါထီၣ်ဝဲ ခီဖျိလၢ လုၢ်လၢ်သကဲာ်ပဝးလၢအဂ့ၤ ဒီးအဝဲကြၢးမၤတၢ်ခဲလၢာ်လၢ တၢ်သူၣ်စူၤသးစူၤ လၢအဟဲအိၣ်ထီၣ်ခီဖျိ တၢ်ကူၣ်သ့လီၤ.
၁၄ ဘၣ်ဆၣ် သုမ့ၢ်အိၣ်ဒီး တၢ်သူၣ်က့ၣ်သးကါလၢအခၣ်+ ဒီးသးလၢအအဲၣ်ဒိး ဃုတၢ်အ့ၣ်လိာ်န့ၣ်+ တဘၣ်ပာ်ကဖၢလၢသုသး+ ဒီးတဲတၢ်လၢ အထီဒါလိာ်သးဒီး တၢ်မ့ၢ်တၢ်တီတဂ့ၤ.
၁၅ တၢ်အဝဲအံၤ တမ့ၢ်တၢ်ကူၣ်သ့လၢ အဟဲလီၤလၢထးဘၣ်. မ့ၢ်အဘၣ်ဃးဒီးဟီၣ်ခိၣ်+ ဒီးလီၤဂာ်ဒ် ဆၣ်ဖိကီၢ်ဖိတဖၣ် ဒီးတၢ်ဝံတၢ်နါတဖၣ် အသိးလီၤ.
၁၆ ဖဲတၢ်သူၣ်က့ၣ်သးကါ ဒီးသးလၢအအဲၣ်ဒိး ဃုတၢ်အ့ၣ်လိာ်မ့ၢ်အိၣ်ဝဲန့ၣ် တၢ်ဘံဘူတဖၣ် ဒီးတၢ်အၢတၢ်သီကိးမံၤဒဲး ကအိၣ်ဝဲဖဲန့ၣ်စ့ၢ်ကီးလီၤ.+
၁၇ ပှၤလၢအဒိးန့ၢ်ဘၣ် တၢ်ကူၣ်သ့လၢထးန့ၣ် အဆိကတၢၢ် ကဆှီဝဲ+ ဝံၤဒီး ဒုးအိၣ်ဃူအိၣ်ဖိးတၢ်လီၤ.+ အတမ့ၢ်ပှၤလၢ အခိၣ်ကိၤဘၣ်,+ အိၣ်ကတဲာ်ကတီၤအသးလၢ ကဒိကနၣ်တၢ်အဂီၢ်, ပှဲၤဒီးတၢ်သးကညီၤ ဒီးတၢ်မၤလၢအဂ့ၤ,+ တကွၢ်ဒိၣ်ဆံးအါစှၤတၢ်ဘၣ်+ ဒီးတပာ်မၤအသးဘၣ်.+
၁၈ တကးဒံးဘၣ် တၢ်တီတၢ်လိၤအတၤသၣ်န့ၣ် ဘၣ်တၢ်ဖှံလီၤအီၤလၢ တၢ်အိၣ်အသးလၢ အပှဲၤဒီးတၢ်ဃူတၢ်ဖိးအပူၤ+ ဒီးကဲဘျုးလၢ ပှၤလၢအမၤဃူမၤဖိးတၢ်တဖၣ် အဂီၢ်လီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ ပှၤဒွဲၣ်အူတၢ်ကမှံၤအလီၢ်လၢ အအိၣ်လၢ ဝ့ၢ်ယရူၤၡလ့ၣ်အချၢ. ကွၢ် တၢ်ကတိၤအခီပညီ.
^ ကွၢ် တၢ်ဂ့ၢ်ဘၣ်ထွဲလိာ်သး က၅.
