ရိမ့ၤ ၈:၁-၃၉
-
ဒိးန့ၢ်ဘၣ် တၢ်မူ ဒီးတၢ်သဘျ့ ခီဖျိလၢ သးစီဆှံ (၁-၁၁)
-
သးစီဆှံ အုၣ်အသးလၢ အဝဲသ့ၣ် ဘၣ်တၢ်လုၢ်ဖိအီၤ (၁၂-၁၇)
-
တၢ်ဘၣ်တ့တဖၣ် အိၣ်ခိးကွၢ်လၢ်ဝဲ ကစၢ်ယွၤအဖိတဖၣ် အတၢ်သဘျ့ (၁၈-၂၅)
-
“သးစီဆှံဃ့ကညးန့ၢ် တၢ်လၢပဂီၢ်” (၂၆, ၂၇)
-
တၢ်လၢကစၢ်ယွၤ ဃုထၢပာ်စၢၤဝဲတဖၣ် (၂၈-၃၀)
-
မၤနၢၤတၢ် ခီဖျိလၢ ကစၢ်ယွၤ အတၢ်အဲၣ်အဃိ (၃၁-၃၉)
၈ လၢတၢ်န့ၣ်အဃိ ပှၤလၢအအိၣ်ဃူအိၣ်ဖိးဒီး ယ့ၣ်ၡူးခရံာ်န့ၣ် တဘၣ်တၢ်စံၣ်ညီၣ် အဝဲသ့ၣ်ဘၣ်.
၂ သး* အတၢ်သိၣ်တၢ်သီ လၢအဒုးမူနၤဒ်သိး နကကဲ ယ့ၣ်ၡူးခရံာ်အပျဲၢ်အဘီၣ်န့ၣ် မၤထူၣ်ဖျဲးကွံာ်နၤလၢ+ တၢ်ဒဲးဘးဒီးတၢ်သံ အတၢ်သိၣ်တၢ်သီလံ.
၃ ဒီးမ့ၢ်လၢပှၤဟီၣ်ခိၣ်ဖိ အဂံၢ်စၢ်ဘါစၢ်+ ဒီးအိၣ်ဒီးတၢ်ဒဲးဘးအဃိ စီၤမိၤၡ့ အတၢ်သိၣ်တၢ်သီ တအိၣ်ဒီးတၢ်စိတၢ်ကမီၤလၢ ကမၤပူၤဖျဲးထီၣ်သုဘၣ်.+ ဘၣ်ဆၣ် ကစၢ်ယွၤမၤဝဲခီဖျိ အဆှၢလီၤအဖိခွါ+ လၢအလီၤဂာ်ဒီး ပှၤဟီၣ်ခိၣ်ဖိလၢ အအိၣ်ဒီးတၢ်ဒဲးဘး+ ဒ်သိးကမၤလီၤမၢ်ကွံာ် တၢ်ဒဲးဘးအဂီၢ်လီၤ. အဃိ ကစၢ်ယွၤစံၣ်ညီၣ်ဝဲ တၢ်ဒဲးဘးလၢ အအိၣ်လၢ တၢ်ဖံးတၢ်ညၣ်အပူၤလီၤ.
၄ လၢတၢ်န့ၣ်အဃိ တၢ်မၤလိာ်အတီအလိၤလၢ အဘၣ်ဃးဒီး စီၤမိၤၡ့ အတၢ်သိၣ်တၢ်သီန့ၣ် ဟဲလၢထီၣ်ပှဲၤထီၣ် သ့ခီဖျိလၢ ပဝဲလၢအအိၣ်မူမၤထွဲ+ ဒ်သးစီဆှံ အတၢ်ဟံးစုနဲၣ်ကျဲအသိး ဒီးတမ့ၢ်ဒ် တၢ်ဖံးတၢ်ညၣ် အတၢ်သူၣ်လီသးကွံ အိၣ်ဝဲအသိးဘၣ်.+
၅ ပှၤလၢအအိၣ်မူမၤထွဲ ဒ်တၢ်ဖံးတၢ်ညၣ် အတၢ်သူၣ်လီသးကွံ အိၣ်ဝဲအသိးန့ၣ် ဆိကမိၣ်ဝဲ ဘၣ်ဃးဒီး တၢ်လၢအဘၣ်ထွဲလိာ်သးဒီး တၢ်ဖံးတၢ်ညၣ် ထီဘိလီၤ.+ မ့မ့ၢ် ပှၤလၢအိၣ်မူမၤထွဲဒ် သးစီဆှံ အတၢ်ဟံးစုနဲၣ်ကျဲအသိးန့ၣ် ဆိကမိၣ်ဝဲဘၣ်ဃးဒီး တၢ်လၢ အဘၣ်ထွဲလိာ်သးဒီး သးစီဆှံ ထီဘိလီၤ.+
၆ ပှၤလၢအဆိကမိၣ် ဘၣ်ဃးဒီး တၢ်ဖံးတၢ်ညၣ် အတၢ်သူၣ်လီသးကွံ ထီဘိန့ၣ် ကဒိးန့ၢ်ဘၣ်တၢ်သံလီၤ.+ မ့မ့ၢ်ပှၤလၢ အဆိကမိၣ်ဘၣ်ဃးဒီး သးစီဆှံထီဘိန့ၣ် ကဒိးန့ၢ်ဘၣ်တၢ်မူ ဒီးတၢ်ဃူတၢ်ဖိးလီၤ.+
၇ ပှၤလၢအဆိကမိၣ် ဘၣ်ဃးဒီး တၢ်ဖံးတၢ်ညၣ် အတၢ်သူၣ်လီသးကွံ ထီဘိန့ၣ် ကဲထီၣ်ကစၢ်ယွၤ အဒုၣ်အဒါ,+ မ့ၢ်လၢ တၢ်ဖံးတၢ်ညၣ်န့ၣ် တဒိကနၣ်ကစၢ်ယွၤ အတၢ်သိၣ်တၢ်သီဘၣ် ဒီးဒိကနၣ်ဝဲ တသ့ဘၣ်.
၈ ပှၤလၢအအိၣ်မူဒ် တၢ်ဖံးတၢ်ညၣ် အတၢ်သူၣ်လီသးကွံ အသိးန့ၣ် မၤတၢ်ဘၣ် ကစၢ်ယွၤအသး တသ့ဘၣ်.
၉ ဘၣ်ဆၣ် ကစၢ်ယွၤ အသးစီဆှံ မ့ၢ်အိၣ်လၢသုပူၤနီၢ်ကီၢ်န့ၣ် သုကအိၣ်မူ ဒ်သးစီဆှံ အတၢ်ဟံးစုနဲၣ်ကျဲအသိး+ ဒီးတမ့ၢ်ဒ် တၢ်ဖံးတၢ်ညၣ် အတၢ်သူၣ်လီသးကွံ အသိးဘၣ်. ပှၤတဂၤဂၤ မ့ၢ်တအိၣ်ဒီး ခရံာ်အတၢ်ပာ်သူၣ်ပာ်သး* ဘၣ်န့ၣ် အဝဲတမ့ၢ် ခရံာ်အတၢ်ဘၣ်.
၁၀ ဘၣ်ဆၣ် သုမ့ၢ်အိၣ်ဃူအိၣ်ဖိးဒီးခရံာ်န့ၣ်+ သုနီၢ်ခိသံလၢ တၢ်ဒဲးဘးအဃိ သနာ်က့ သးစီဆှံန့ၣ် ဒုးမူထီၣ်သု ခီဖျိလၢ တၢ်တီတၢ်လိၤအဃိလီၤ.
၁၁ ကစၢ်ယွၤ အသးစီဆှံ ဒုးဂဲၤဆၢထၢၣ် ယ့ၣ်ၡူးလၢ တၢ်သံလီၤ. ဒီးသးစီဆှံအံၤ မ့ၢ်အိၣ်လၢသုပူၤန့ၣ် ပှၤလၢအဒုးဂဲၤဆၢထၢၣ်က့ၤ ယ့ၣ်ၡူးခရံာ်လၢ တၢ်သံတဂၤအံၤ+ ကဒုးမူထီၣ်စ့ၢ်ကီး သုနီၢ်ခိလၢ အသံသ့အံၤ+ ခီဖျိလၢ အသးစီဆှံလၢ အအိၣ်လၢသုပူၤအဃိလီၤ.
၁၂ အဃိ ဒီပုၢ်ဝဲၢ်သ့ၣ်ဧၢ, ပတလိၣ်အိၣ်မူမၤထွဲ ဒ်တၢ်ဖံးတၢ်ညၣ် အတၢ်သူၣ်လီသးကွံ အိၣ်ဝဲအသိးဘၣ်.+
၁၃ သုမ့ၢ်အိၣ်မူမၤထွဲဒ် တၢ်ဖံးတၢ်ညၣ် အတၢ်သူၣ်လီသးကွံ အိၣ်ဝဲအသိးန့ၣ် သုကသံ သပှၢ်တၢၢ်လီၤ. ဘၣ်ဆၣ် သုမ့ၢ်ပျဲ သးစီဆှံအစိကမီၤ မၤစၢၤသု ဒ်သိးသုကမၤသံကွံာ် သုနီၢ်ခိအတၢ်မၤန့ၣ်+ သုကမူလီၤ.+
၁၄ ဒီးပှၤခဲလၢာ်လၢ ကစၢ်ယွၤ အသးစီဆှံ ဟံးစုနဲၣ်ကျဲအီၤန့ၣ် မ့ၢ်ဝဲ ကစၢ်ယွၤ အဖိခွါတဖၣ်လီၤ.+
၁၅ သုတဒိးန့ၢ်ဘၣ်သးလၢ အဒုးကဲထီၣ် သုလၢကုၢ် ဒ်သိး သုကဘၣ်ပျံၤဘၣ်ဖုး ကဒီးတၢ်ဘၣ်. လၢတၢ်န့ၣ်အလီၢ် သုဒိးန့ၢ်ဘၣ်သးလၢ အလုၢ်ဖိသု ဒီးခီဖျိလၢ သးအဝဲအံၤအဃိ ပကိးထီၣ် “အးဘၤ* ပၢ်ဧၢ” လီၤ.+
၁၆ ဒီးသးစီဆှံ အုၣ်ဃုာ်အသးဒီးပသးလၢ+ ပမ့ၢ်ကစၢ်ယွၤ အဖိတဖၣ်လီၤ.+
၁၇ ပမ့မ့ၢ်ကစၢ်ယွၤ အဖိတဖၣ်န့ၣ် ပမ့ၢ်စ့ၢ်ကီး ပှၤန့ၢ်သါဘၣ်တၢ်လၢ ကစၢ်ယွၤအအိၣ် ဒီးပှၤန့ၢ်သါဘၣ်တၢ်+ ဃုာ်ဒီးခရံာ်လီၤ. ဘၣ်ဆၣ် ဒ်သိးပကဒိးန့ၢ်ဘၣ် တၢ်လၤတၢ်ကပီၤ ဃုာ်ဒီးအီၤအဂီၢ်+ ပကဘၣ်တူၢ်ဆိ တၢ်နးတၢ်ဖှီၣ်ဃုာ်ဒီးအီၤလီၤ.+
၁၈ ဒီးတၢ်နးတၢ်ဖှီၣ်လၢ ပထံၣ်ဘၣ်အီၤလၢ ဆၢကတီၢ်ခဲအံၤ ယမ့ၢ် ထိၣ်သတြီၤအီၤဒီး တၢ်လၤကပီၤလၢ အကဘၣ် တၢ်လီၣ်ဖျါထီၣ်အီၤ ခီဖျိလၢပှၤန့ၣ်+ တၢ်နးတၢ်ဖှီၣ်တဖၣ်အံၤ တမ့ၢ် တၢ်နီတမံၤဘၣ်.
၁၉ လၢတၢ်သးဆူၣ်အပူၤ တၢ်ဘၣ်တ့တဖၣ်န့ၣ် အိၣ်ခိးကွၢ်လၢ်ဝဲလၢ ကစၢ်ယွၤ ကလီၣ်ဖျါထီၣ် အဖိခွါတဖၣ်,+
၂၀ မ့ၢ်လၢ တၢ်ဘၣ်တ့တဖၣ်န့ၣ် ဘၣ်တၢ်ဟ့ၣ်လီၤကွံာ် အဝဲသ့ၣ်ဆူ တၢ်ကလီကလီ အပူၤလီၤ.+ ဘၣ်ဆၣ် တမ့ၢ်လၢ အဝဲသ့ၣ်အနီၢ်ကစၢ် အတၢ်ဘၣ်သးဘၣ်, မ့ၢ်ဖဲဒၣ် ကစၢ်ယွၤလၢ အဟ့ၣ်လီၤကွံာ်အီၤ တဂၤအသးလီၤ. သနာ်က့ ဖဲန့ၣ်အခါ အဝဲဟ့ၣ် တၢ်မုၢ်လၢ် စ့ၢ်ကီးလီၤ.
၂၁ တၢ်ဘၣ်တ့တဖၣ် ကထူၣ်ဖျဲးထီၣ်လၢ+ တၢ်အုၣ်တၢ်ကျၣ် အတၢ်ကဲကုၢ်အပူၤ ဒီးကဒိးန့ၢ်ဘၣ်ဝဲ ကစၢ်ယွၤအဖိတဖၣ် အတၢ်သဘျ့ လၢအပှဲၤဒီး တၢ်လၤကပီၤလီၤ.
၂၂ ပသ့ၣ်ညါလၢ တုၤခဲအံၤန့ၣ် တၢ်ဘၣ်တ့ခဲလၢာ် ဆဲးကအုကစွါဒီး တူၢ်ဘၣ်တၢ် ဒ်သိးသိးလီၤ.
၂၃ တကးဒံးဘၣ် ပဝဲလၢ အအိၣ်ဒီး တၤသၣ်ဆိတခါ လၢအမ့ၢ် သးစီဆှံန့ၣ် ဖဲပအိၣ်ခိးဒံးတၢ်လၢ တၢ်သူၣ်ဆူၣ်သးဆူၣ် အပူၤအခါ ပဝဲစ့ၢ်ကီး ပကအုကစွါလၢ ပသးပူၤ+ တုၤလၢ ကစၢ်ယွၤကလုၢ်ဖိပှၤ အဆၢကတီၢ်လီၤ.+ ဖဲဆၢကတီၢ် အဝဲန့ၣ် မ့ၢ်တုၤအခါ ပကထူၣ်ဖျဲးထီၣ်လၢ ပနီၢ်ခိ ခီဖျိလၢ တၢ်ပှ့ၤက့ၤအဃိလီၤ.
၂၄ ခီဖျိလၢ တၢ်မုၢ်လၢ်အံၤအဃိ ပဘၣ် တၢ်အုၣ်က့ၤခီၣ်က့ၤပှၤလီၤ. ဘၣ်ဆၣ် တၢ်မုၢ်လၢ်လၢ ပထံၣ်ဘၣ်အီၤန့ၣ် တမ့ၢ်တၢ်မုၢ်လၢ်ဘၣ်. ပှၤတဂၤ မ့ၢ်ထံၣ်ဘၣ် တၢ်တမံၤမံၤန့ၣ် မ့ၢ်အလိၣ် မုၢ်လၢ်ဝဲဒံးဧါ.
၂၅ ဘၣ်ဆၣ် ပမ့ၢ်မုၢ်လၢ်တၢ်လၢ+ ပတထံၣ်ဘၣ်န့ၣ်+ လၢတၢ်သးဆူၣ်အပူၤ ပကဆဲးခိးကွၢ်လၢ်အီၤပှဲၤဒီး တၢ်တူၢ်န့ၢ်ခီၣ်ကဲလီၤ.+
၂၆ ဒီးသးစီဆှံစ့ၢ်ကီး မၤစၢၤပှၤ ဖဲပဂံၢ်စၢ်ဘါစၢ်အခါလီၤ.+ ပသ့ၣ်ညါလၢ ပကဘၣ် ဃ့ထုကဖၣ်ဘၣ်ဆၣ် ပကဘၣ်ဃ့ တၢ်မနုၤလဲၣ်န့ၣ် တဘျီတခီၣ် ပတသ့ၣ်ညါဘၣ်. ဘၣ်ဆၣ် ဖဲပကအုကစွါ ဒီးတဲဖျါထီၣ် ပတၢ်ကတိၤတဘၣ်ဘၣ်အခါ သးစီဆှံဃ့ကညးန့ၢ် တၢ်လၢပဂီၢ် သ့ဝဲလီၤ.
၂၇ ကစၢ်ယွၤလၢ အဃုကွၢ်ပသးန့ၣ်+ သ့ၣ်ညါဝဲ တၢ်လၢသးစီဆှံ ဃ့န့ၢ်ဝဲလၢ ပှၤစီဆှံတဖၣ်အဂီၢ် မ့ၢ်လၢ သးစီဆှံဃ့တၢ်ဒ် ကစၢ်ယွၤ အတၢ်ဘၣ်သး အသိးအဃိလီၤ.
၂၈ ပသ့ၣ်ညါလၢ ကစၢ်ယွၤမၤဝဲဒ်သိး တၢ်ခဲလၢာ် ကမၤသကိးတၢ် ဒ်သိးကကဲဘျုးလၢ ပှၤလၢ အအဲၣ်ကစၢ်ယွၤ အဂီၢ်လီၤ. ပှၤတဖၣ်အံၤ ကစၢ်ယွၤ ကိးန့ၢ်အဝဲသ့ၣ် ဒ်အတၢ်တိာ်ပာ် အိၣ်ဝဲအသိးလီၤ.+
၂၉ လၢအခီၣ်ထံးန့ၣ် ကစၢ်ယွၤ သ့ၣ်ညါပာ်စၢၤဝဲလၢ အကဃုထၢ အဝဲသ့ၣ် ဒီးဆၢတဲာ်ပာ်စၢၤဝဲလၢ အဝဲသ့ၣ် ကလီၤဂာ် ဒ်အဖိခွါအသိးလီၤ.+ အဃိ ကစၢ်ယွၤအဖိခွါ ကကဲထီၣ် ဖိဝဲၢ်ကိလၢ+ အဒီပုၢ်ဝဲၢ်ခွါအါဂၤ အကျါလီၤ.+
၃၀ ဒီးပှၤလၢ အဝဲဃုထၢပာ်စၢၤအီၤတဖၣ်အံၤန့ၣ်+ အဝဲကိးန့ၢ်ဝဲ စ့ၢ်ကီးလီၤ.+ ဒီးပှၤလၢ အကိးန့ၢ်ဝဲတဖၣ်န့ၣ် အဝဲပာ်တီပာ်လိၤဝဲ စ့ၢ်ကီးလီၤ.+ ဒီးပှၤလၢ အဝဲပာ်တီပာ်လိၤဝဲတဖၣ်န့ၣ် အဝဲမၤလၤကပီၤဝဲ စ့ၢ်ကီးလီၤ.+
၃၁ ဘၣ်ဃးဒီး တၢ်ဂ့ၢ်တဖၣ်အံၤန့ၣ် ပကတဲဒ်လဲၣ်. ကစၢ်ယွၤ မ့ၢ်အိၣ်လၢ ပအိၣ်တခီန့ၣ် မတဂၤ ကထီဒါပှၤလဲၣ်.+
၃၂ အဖိခွါဒၣ်လဲာ် ကဘၣ်တူၢ်တၢ်န့ၣ် အတတြီဝဲဘၣ် ဒီးဟ့ၣ်လီၤဝဲလၢ ပဝဲခဲလၢာ်အဂီၢ်လီၤ.+ အဃိ အကဟ့ၣ်လီၤ အဖိခွါ တကးဒံးဘၣ် လၢတၢ်သူၣ်ဂ့ၤသးဝါအပူၤ အဝဲကဟ့ၣ်လီၤပှၤ တၢ်အဂၤခဲလၢာ်စ့ၢ်ကီး တမ့ၢ်ဘၣ်ဧါ.
၃၃ မတဂၤ ကပာ်ဒ့ၣ်ပာ်ကမၣ် ပှၤလၢကစၢ်ယွၤ ဃုထၢထီၣ်ဝဲ တဖၣ်လဲၣ်.+ ပှၤလၢ အပာ်တီပာ်လိၤ အဝဲသ့ၣ်န့ၣ် မ့ၢ်ဝဲကစၢ်ယွၤလီၤ.+
၃၄ မတဂၤ ကစံၣ်ညီၣ် အဝဲသ့ၣ်လဲၣ်. ယ့ၣ်ၡူးခရံာ် တူၢ်သံအသးဝံၤလံ တကးဒံးဘၣ် အဘၣ်တၢ်မၤဂဲၤဆၢထၢၣ် သမူထီၣ်က့ၤအီၤလံ. ဒီးအဝဲအိၣ်လၢ ကစၢ်ယွၤ အစုထွဲတခီ+ ဒီးဃ့ကညးန့ၢ်တၢ်လၢ ပဂီၢ်စ့ၢ်ကီးလီၤ.+
၃၅ မတဂၤ ကမၤလီၤဖးပှၤဒီး ခရံာ်အတၢ်အဲၣ်လဲၣ်.+ မ့ၢ်တၢ်နးတၢ်ဖှီၣ်, တၢ်ကိၢ်တၢ်ဂီၤ, တၢ်မၤအၢမၤနး, တၢ်သၣ်ဝံၤလီၤဒိ, တၢ်အိၣ်ဘ့ၣ်ဆ့, တၢ်လီၤဘၣ်ယိၣ် မ့တမ့ၢ် နးဧိၤဘီဧိၤ မၤဝဲကသ့ဧါ.+
၃၆ တၢ်ကွဲးအသး အိၣ်ဝဲလၢ “အဝဲသ့ၣ်အဲၣ်ဒိးမၤသံပှၤလၢ နဃိထီဘိ* ဒီးအဝဲသ့ၣ်ပာ်ပှၤဒ်သိလၢ အကဘၣ် တၢ်မၤသံအီၤ အသိးလီၤ.”+
၃၇ ဘၣ်ဆၣ် လၢတၢ်သ့ၣ်တဖၣ်အံၤ ခဲလၢာ်အပူၤ ပမၤနၢၤတၢ် လၢလၢပှဲၤပှဲၤ+ ခီဖျိပှၤတဂၤလၢ အအဲၣ်ပှၤ အဃိလီၤ.
၃၈ ယနာ် သပှၢ်တၢၢ်လၢ တၢ်သံမ့ၢ်ဂ့ၤ, တၢ်မူမ့ၢ်ဂ့ၤ, မူခိၣ်ကလူးတဖၣ်မ့ၢ်ဂ့ၤ, ပဒိၣ်တဖၣ်မ့ၢ်ဂ့ၤ, တၢ်လၢ အအိၣ်ခဲအံၤတဖၣ်မ့ၢ်ဂ့ၤ, တၢ်လၢ အကဟဲခါဆူညါတဖၣ်မ့ၢ်ဂ့ၤ, တၢ်စိတၢ်ကမီၤတဖၣ်မ့ၢ်ဂ့ၤ,+
၃၉ တၢ်လၢထးခီမ့ၢ်ဂ့ၤ, တၢ်လၢလာ်ခီမ့ၢ်ဂ့ၤ, တၢ်လၢ အဘၣ်တၢ်တ့လီၤအီၤ တမံၤဂ့ၤတမံၤဂ့ၤ မၤလီၤဖးပှၤဒီး ကစၢ်ယွၤအတၢ်အဲၣ် လၢအဘၣ်တၢ်ပာ်ဖျါထီၣ်အီၤ ခီဖျိလၢ ပကစၢ် ယ့ၣ်ၡူးခရံာ်န့ၣ် တသ့နီတမံၤဘၣ်.
တၢ်ဂ့ၢ်အဘျဲၣ်တဖၣ်
^ ဖျါလၢသးန့ၣ် အဲၣ်ဒိးတဲဝဲ သးစီဆှံ.
^ အခီပညီလိၤလိၤ “အသး.”
^ တၢ်ကတိၤတဖျၢၣ်အံၤ မ့ၢ်ဝဲ ဧ့ၤဘြံၤ မ့တမ့ၢ် အရၣ်မ့းအတၢ်ကတိၤလၢ အခီပညီမ့ၢ်ဝဲ “အိ ပၢ်ဧၢ.”
^ အခီပညီလိၤလိၤ “ဒီတနံၤ.”
