၁ စီၤပၤ ၁၉:၁-၂၁
၁၉ ဒီးစီၤအၤဃာ်+ တဲဘၣ် နီၢ်အံၤစ့ဘ့ၤလး+ တၢ်လၢ စီၤအ့ၤလံယၤ မၤဝဲခဲလၢာ် ဒီးစီၤအ့ၤလံယၤ မၤသံကွံာ်ဝဲ ဝံခဲလၢာ် ဒ်လဲၣ်အဂ့ၢ်န့ၣ်လီၤ.+
၂ အဃိ နီၢ်အံၤစ့ဘ့ၤလး ဆှၢလီၤ ပှၤစိာ်တၢ်ကစီၣ်ဖိတဂၤ လၢစီၤအ့ၤလံယၤအအိၣ် ဒီးတဲဝဲလၢ “တုၤလၢ ခဲမုၢ်ဆ့ၣ် ဆၢကတီၢ်ဒ်အံၤန့ၣ် ယမ့ၢ်တမၤနၤ ဒ်နမၤအဝဲသ့ၣ် အသိးဘၣ်န့ၣ် မ်ယွၤတဖၣ် သိၣ်ဃီၣ်ယၤ ဆူၣ်ဆူၣ်တက့ၢ်.”
၃ အဃိ စီၤအ့ၤလံယၤ ပျံၤထီၣ်တၢ် ဒီးအဝဲ ဃ့ၢ်ပူၤဖျဲးအသးလီၤ.+ အဝဲ လဲၤတုၤဝဲလၢ ဝ့ၢ်ဘ့ၢ်ၡဘၤ+ လၢအအိၣ်လၢ ယူဒၤ အတၢ်ပၢဖီလာ်+ ဒီးအဝဲ ပာ်တ့ၢ်ဝဲ အပှၤမၤစၢၤတၢ်တဂၤ ဖဲန့ၣ်လီၤ.
၄ အဝဲလဲၤတၢ်လၢ ပှၢ်မုၢ်ကနၢအပူၤ တနံၤကျဲ ဒီးလဲၤဆ့ၣ်နီၤအိၣ်ဝဲလၢ ပထိးသ့ၣ်ရီ တထူၣ်အခီၣ်ထံး ဒီးဃ့ဝဲလၢ အကသံလီၤ. အဝဲတဲဝဲလၢ “အိ ယဟိဝၤယွၤဧၢ, ပှဲၤအံၤဘၣ်လံ. ခဲအံၤ ဟံးထီၣ်ကွံာ် ယသးသမူဟီ.+ ယတဂ့ၤဒိၣ်န့ၢ်ဒံး ယမိၢ်ပၢ်ဖံဖု လၢပျၢၤတဖၣ်ဘၣ်.”
၅ ဒီးစီၤအ့ၤလံယၤ မံနီၤ ဒီးမံဘၣ်အသး ဖဲပထိးသ့ၣ်ရီတထူၣ်န့ၣ် အခီၣ်ထံးလီၤ. ဘၣ်ဆၣ် မူခိၣ်ကလူးတဂၤ ထိးအီၤသတူၢ်ကလာ်+ ဒီးတဲအီၤလၢ “ဂဲၤဆၢထၢၣ် အီၣ်တၢ်ဟီ.”+
၆ ဖဲအဝဲကွၢ်ထီၣ်တၢ်အခါ အဝဲထံၣ် ကိၣ်တလိၣ်လၢ လၢၢ်ကိၢ်တဖၣ် အဖီခိၣ် ဒီးထံတကိ အိၣ်ဘူးဒီး အခိၣ်သၣ်ဃံလီၤ. အဝဲအီၣ်တၢ်အီတၢ် ဝံၤဒီး မံနီၤကဒီးဝဲလီၤ.
၇ လၢခံ ယဟိဝၤယွၤ အမူခိၣ်ကလူး ဟဲထိးကဒီးအီၤ ခံဘျီတဘျီ ဒီးတဲအီၤလၢ “နကဘၣ်လဲၤတၢ်ဖးယံၤဒံး အဃိ ဂဲၤဆၢထၢၣ် အီၣ်တၢ်ဟီ.”
၈ အဃိ အဝဲဂဲၤဆၢထၢၣ် အီၣ်တၢ်အီတၢ် ဒီးခီဖျိလၢ အအီၣ်တၢ် န့ၢ်ဂံၢ်န့ၢ်ဘါ အဃိ အဝဲဆဲးလဲၤတၢ် အသီ ၄၀* တုၤလၢ ယွၤလၢအမ့ၢ်အတီ အကစၢၢ်ဃိရ့းန့ၣ်လီၤ.+
၉ ဖဲန့ၣ်န့ၣ် အဝဲလဲၤနုာ်လီၤလၢ လ့တဖျၢၣ်အကိပူၤ+ ဒီးမံဝဲဖဲန့ၣ် တနၤလီၤ. ဒီးယဟိဝၤယွၤ တဲဘၣ်အီၤလၢ “စီၤအ့ၤလံယၤဧၢ, နဟဲမၤမနုၤ ဖဲအံၤလဲၣ်.”
၁၀ စီၤအ့ၤလံယၤ တဲအီၤလၢ “ယသးဆူၣ်လၢ တၢ်သုးမုၢ်ဂီၢ်မုၢ် အကစၢ် ယဟိဝၤယွၤအဂီၢ် သပှၢ်တၢၢ်လီၤ.+ သနာ်က့ အံၣ်စရ့လး အပှၤဂီၢ်မုၢ် တတီဒီး နတၢ်အၢၣ်လီၤအီလီၤဘၣ်.+ အဝဲသ့ၣ် မၤလီၤပှီၢ်ကွံာ် နတၢ်လုၢ်လီၢ်တဖၣ် ဒီးမၤသံကွံာ် နဝံတဖၣ် လၢနးအဃိ+ အိၣ်တ့ၢ်ထဲယၤတဂၤလီၤ. ဒီးခဲအံၤ အဝဲသ့ၣ် ဃုမၤသံယၤလီၤ.”+
၁၁ ဘၣ်ဆၣ် ကစၢ်ယွၤ တဲအီၤလၢ “ဟးထီၣ်ဒီး လဲၤဆၢထၢၣ်လၢ ကစၢၢ်လိၤ လၢယဟိဝၤယွၤ အမဲာ်ညါတက့ၢ်.” ဒီးယဟိဝၤယွၤ လဲၤခီဂာ် စီၤအ့ၤလံယၤလၢ အမဲာ်ညါ+ ဒီးကလံၤမုၢ်လၢ အဆူၣ် မၤသ့ၣ်ဖး ကစၢၢ်တဖၣ် ဒီးလၢၢ်တဖၣ်လၢ ယဟိဝၤယွၤ အမဲာ်ညါလီၤ.+ ဘၣ်ဆၣ် ယဟိဝၤယွၤ တအိၣ်လၢ ကလံၤမုၢ်အပူၤဘၣ်. ကလံၤမုၢ် ဟဲဝံၤအလီၢ်ခံ ဟီၣ်ခိၣ်ဟူးဝဲ+ ဘၣ်ဆၣ် ယဟိဝၤယွၤ တအိၣ်လၢ ဟီၣ်ခိၣ်ဟူးအပူၤဘၣ်.
၁၂ ဟီၣ်ခိၣ်ဟူး ဝံၤအလီၢ်ခံ မ့ၣ်အူကဲၤထီၣ်+ ဘၣ်ဆၣ် ယဟိဝၤယွၤ တအိၣ်လၢ မ့ၣ်အူပူၤဘၣ်. မ့ၣ်အူကဲၤထီၣ် ဝံၤအလီၢ်ခံ တၢ်ကလုၢ်သီၣ်ထီၣ်ဝဲ ကဖီလီဖိတခါလီၤ.+
၁၃ ဖဲစီၤအ့ၤလံယၤ နၢ်ဟူဝဲ တၢ်ကလုၢ်န့ၣ်အခါ အကးဘၢအမဲာ်သၣ် လၢအဆ့ဖးထီ+ ဒီးအဝဲ လဲၤဆၢထၢၣ်ဝဲလၢ လ့ကိပူၤ အခိၣ်ထိးလီၤ. ဒီးတၢ်ကလုၢ်န့ၣ် သံကွၢ်အီၤလၢ “စီၤအ့ၤလံယၤဧၢ, နဟဲမၤမနုၤ ဖဲအံၤလဲၣ်.”
၁၄ ဒီးစီၤအ့ၤလံယၤ တဲဝဲလၢ “ယသးဆူၣ်လၢ တၢ်သုးမုၢ်ဂီၢ်မုၢ် အကစၢ် ယဟိဝၤယွၤအဂီၢ် သပှၢ်တၢၢ်လီၤ. သနာ်က့ အံၣ်စရ့လးအပှၤဂီၢ်မုၢ် တတီဒီး နတၢ်အၢၣ်လီၤအီလီၤဘၣ်.+ အဝဲသ့ၣ် မၤလီၤပှီၢ်ကွံာ် နတၢ်လုၢ်လီၢ်တဖၣ် ဒီးမၤသံကွံာ် နဝံတဖၣ်လၢနးအဃိ အိၣ်တ့ၢ်ထဲယၤတဂၤလီၤ. ဒီးခဲအံၤ အဝဲသ့ၣ် ဃုမၤသံယၤလီၤ.”+
၁၅ ဒီးယဟိဝၤယွၤ တဲအီၤလၢ “က့ၤကဒါက့ၤဒီး လဲၤလၢ ဒၤမ့ၤစ့း အပှၢ်မုၢ်ကနၢတက့ၢ်. နလဲၤမ့ၢ်တုၤဖဲန့ၣ်န့ၣ် ဒိးဖှူ စီၤဃစ့လး+ ဒ်စီၤပၤတဂၤအသိးလၢ ကီၢ်စူၤရံ အဖီခိၣ်တက့ၢ်.
၁၆ ဒီးနဘၣ် ဒိးဖှူ စီၤနံၣ်ၡံ အလံၤခွါ စီၤယ့ၤဟူ+ ဒ်စီၤပၤတဂၤအသိး လၢအံၣ်စရ့လး အဖီခိၣ် ဒီးနဘၣ် ဒိးဖှူ စီၤၡၤဖး အဖိခွါ စီၤအလံၤၡါ* လၢအအိၣ်လၢ ဝ့ၢ်အၤဘ့လးမဃိလး ဒ်သိးအကကဲထီၣ်ဝံတဂၤ လၢနလီၢ်လီၤ.+
၁၇ ပှၤတဂၤဂ့ၤ တဂၤဂ့ၤလၢ အပူၤဖျဲးလၢ စီၤဃစ့လး အနးန့ၣ်+ စီၤယ့ၤဟူ ကမၤသံအီၤ+ ဒီးပှၤတဂၤဂ့ၤ တဂၤဂ့ၤလၢ အပူၤဖျဲးလၢ စီၤယ့ၤဟူ အနးန့ၣ် စီၤအလံၤၡါ ကမၤသံအီၤလီၤ.+
၁၈ ဒီးလၢကီၢ်အံၣ်စရ့လးအပူၤန့ၣ် ယပှၤဂီၢ်မုၢ်လၢ အတချံးလီၤအခီၣ်လၢ ဘဧၤလးအမဲာ်ညါ+ ဒီးတနၢမူ ဘဧၤလးဘၣ်န့ၣ်+ အိၣ်ဝဲအဂၤ ၇,၀၀၀ ဒံးလီၤ.”+
၁၉ စီၤအ့ၤလံယၤ ဟးထီၣ်ဖဲန့ၣ် ဒီးလဲၤထံၣ်ဝဲ စီၤၡၤဖးအဖိခွါ စီၤအလံၤၡါ ထဲၣ်တၢ်ဒီး ကျီၢ်ဖါ ၁၂ ခိၣ်လီၤ.* ကျီၢ်ဖါတဖၣ်အံၤ အိၣ်လၢ အမဲာ်ညါ ဒီးအဝဲထဲၣ်တၢ်ဒီး ကျီၢ်ဖါ ၁၂ ခိၣ်တခိၣ်လီၤ. ဒီးစီၤအ့ၤလံယၤ လဲၤဝဲလၢ စီၤအလံၤၡါ အအိၣ် ဒီးကွံာ်ဃီၤဝဲ အနီၢ်ကစၢ် အဆ့ဖးထီလၢ+ စီၤအလံၤၡါ အလိၤလီၤ.
၂၀ ဒီးစီၤအလံၤၡါ ပာ်တ့ၢ်ကွံာ် အကျီၢ်ဖါတဖၣ် ဒီးအဝဲလဲၤဃ့ၢ်လူၤ စီၤအ့ၤလံယၤ ဒီးတဲဝဲလၢ “ဝံသးစူၤ ပျဲယက့ၤနၢမူ ယမိၢ်ယပၢ် ဝံၤဒီး ယကလဲၤပိာ်နခံလီၤ.” ဒီးစီၤအ့ၤလံယၤ တဲဆၢက့ၤအီၤလၢ “က့ၤသၢၤ. ယတတြီနၤဘၣ်.”
၂၁ အဃိ စီၤအလံၤၡါ က့ၤဝဲဒီးဟံးန့ၢ်ဝဲ ကျီၢ်ဖါတခိၣ် ဒီးလုၢ်ထီၣ်ဝဲလီၤ. ဒီးအဝဲသူဝဲ တၢ်ထဲၣ်တၢ် အတၢ်ပီးတၢ်လီတဖၣ် ဒ်သ့ၣ်မုၣ်အသိး ဒီးချီထီၣ် ကျီၢ်ဖါအညၣ် ဒီးဒုးအီၣ်ပှၤဂီၢ်မုၢ် ဒီးပှၤဂီၢ်မုၢ်အီၣ်ဝဲလီၤ. ဝံၤဒီး အဝဲဆၢထၢၣ် ဒီးလဲၤပိာ် စီၤအ့ၤလံယၤအခံ ဒီးစးထီၣ်မၤစၢၤ စီၤအ့ၤလံယၤလီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “အနံၤ ၄၀ အနၤ ၄၀.”
^ အခီပညီမ့ၢ်ဝဲ “ကစၢ်ယွၤမ့ၢ်တၢ်အုၣ်က့ၤခီၣ်က့ၤ.”
^ မ့ၢ်စ့ၢ်ကီး “စူၣ်.”
