တၢ်ကတိၤအိးထီၣ်
“သုကကွၢ်လိပှၤလၢအနာ်တၢ် ဒီးဝံသးစူၤတၢ်သတးဒီး န့ၢ်သါတၢ်စံးပာ်တဖၣ်လီၤ.” —ဧ့ၤဘြံၤ ၆:၁၂.
၁, ၂. ပှၤတီပှၤလိၤလၢ လံာ်စီဆှံပာ်ဖျါထီၣ်ဝဲန့ၣ် ပှၤလဲၤတရံးအံးက့ၤကွၢ်က့ၤတၢ်တဂၤ ထံၣ်ဝဲဒ်လဲၣ်, ဒီးဘၣ်မနုၤအဃိ ပတူၢ်ဘၣ်လၢ အဝဲသ့ၣ်မ့ၢ်ပတံၤသကိးလၢအဂ့ၤလဲၣ်.
ဖဲပှၤလဲၤတရံးအံးက့ၤကွၢ်က့ၤတၢ်တဂၤ ဟ့ၣ်တၢ်စံၣ်တဲၤတဲလီၤတၢ် ဝံၤအလီၢ်ခံန့ၣ် ဒီပုၢ်ဝဲၢ်မုၣ်တဂၤတဲဝဲလၢ “ဖဲဒီပုၢ်ဝဲၢ်ခွါတဂၤအံၤ တဲတၢ်ဂ့ၢ်ဘၣ်ဃးဒီး ပှၤလၢလံာ်စီဆှံပာ်ဖျါထီၣ်ဝဲတဖၣ်အခါ လီၤဂာ်ဒ်သိးဒီး အဝဲသ့ၣ်မ့ၢ်အတံၤသကိးတံၢ်နီၢ်လီၤ.” ဒီပုၢ်ဝဲၢ်မုၣ်တဂၤအံၤ ကတိၤတၢ်န့ၣ် ဘၣ်ဝဲလီၤ. ခီဖျိလၢ ဒီပုၢ်ဝဲၢ်ခွါတဂၤအံၤ ဃုသ့ၣ်ညါဒီးသိၣ်လိဝဲ လံာ်စီဆှံအိၣ်လံအနံၣ်ဖးအါလံအဃိ အဝဲတူၢ်ဘၣ်ဝဲလၢ ပှၤတီပှၤလိၤလၢ လံာ်စီဆှံပာ်ဖျါထီၣ်ဝဲန့ၣ် ကဲထီၣ်အတံၤသကိးဖးယံာ်လံ.
၂ ပှၤလၢလံာ်စီဆှံပာ်ဖျါထီၣ်ဝဲတဖၣ် မ့ၢ်ကဲထီၣ်ပတံၤသကိးန့ၣ် ကလီၤသးခုဝဲထဲလဲၣ်. ပှၤသ့ၣ်တဖၣ်အံၤ မ့ၢ်ပှၤနီၢ်ကီၢ်လၢနဂီၢ်ဧါ. အဒိ ထံၣ်ကမှံကွၢ်လၢ နမ့ၢ်ဟးလိၣ်ကွဲဒီးတဲသကိးတၢ်ဒီး စီၤနိအၤ, စီၤအၤဘြၤဟၣ်, နီၢ်ရူၤသး, စီၤအ့ၤလံယၤ ဒီးနီၢ်အ့ၤစတၢ်န့ၣ် နကတူၢ်ဘၣ်ဒ်လဲၣ်. တကးဒံးဘၣ် ဆိကမိၣ်ကွၢ်, ဖဲနနၢ်ဟူဘၣ်အဝဲသ့ၣ်အတၢ်ဟ့ၣ်ကူၣ် ဒီးတၢ်ဟ့ၣ်ဂံၢ်ဟ့ၣ်ဘါအဆၢကတီၢ်န့ၣ် ကကဲဘျုးလၢနတၢ်အိၣ်မူအဂီၢ်ထဲလဲၣ်.—ဖး ကတိၤဒိ ၁၃:၂၀ တက့ၢ်.
၃. (က) ပမ့ၢ်မၤလိပှၤတီပှၤလိၤအဂ့ၢ်လၢ လံာ်စီဆှံအပူၤန့ၣ် ပကဒိးန့ၢ်ဘၣ်အဘျုးဒ်လဲၣ်. (ခ) ပကဆိကမိၣ်ကွၢ် တၢ်သံကွၢ်မနုၤတဖၣ်လဲၣ်.
၃ ဖဲပှၤ “အတီ . . . ဂဲၤဆၢထၢၣ်က့ၤ” အခါ ပကဲထီၣ်အဝဲသ့ၣ်အတံၤသကိး သ့ဝဲသပှၢ်ကတၢၢ်လီၤ. (မၤတၢ် ၂၄:၁၅) ဆၢကတီၢ်ခဲအံၤစ့ၢ်ကီး, ပမ့ၢ်မၤလိ ပှၤတီပှၤလိၤအတၢ်နာ်အဂ့ၢ်န့ၣ် ပကဒိးန့ၢ်ဘၣ် တၢ်အဘျုးန့ၣ်လီၤ. လၢကျဲဒ်လဲၣ်. တၢ်မၢဖိပီလူးတဲဝဲလၢ “သုကကွၢ်လိပှၤလၢအနာ်တၢ် ဒီးဝံသးစူၤတၢ်သတးဒီး န့ၢ်သါတၢ်စံးပာ်တဖၣ်လီၤ.” (ဧ့ၤ. ၆:၁၂) တချုးလၢ ပစးထီၣ်မၤလိ ပှၤတီပှၤလိၤအတၢ်နာ်အဂ့ၢ်န့ၣ် ပကသမံသမိးကွၢ် တၢ်သံကွၢ်သၢဖျၢၣ်လၢအ ဘၣ်ဃးဒီးစီၤပီလူးအတၢ်ကတိၤလၢ ထးတဖၣ်အံၤန့ၣ်လီၤ. ၁, တၢ်နာ်န့ၣ်မ့ၢ်တၢ်မနုၤလဲၣ်. ၂, ဘၣ်မနုၤအဃိ ပလိၣ်ဘၣ်တၢ်နာ်လဲၣ် ဒီး ၃, ပကွၢ်လိမၤဒိး ပှၤတီပှၤလိၤလၢ လံာ်စီဆှံအပူၤကသ့ဒ်လဲၣ်.
တၢ်နာ်န့ၣ်—မ့ၢ်တၢ်မနုၤလဲၣ် ဒီးဘၣ်မနုၤအဃိ ပလိၣ်ဘၣ်တၢ်နာ်လဲၣ်
၄. ဘၣ်ဃးဒီး တၢ်နာ်န့ၣ် ပှၤအါဂၤဆိကမိၣ်ဝဲဒ်လဲၣ်, ဒီးဘၣ်မနုၤအဃိအဝဲသ့ၣ်အတၢ်ဆိကမိၣ်န့ၣ် ကမၣ်ဝဲလဲၣ်.
၄ တၢ်နာ်န့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ်တခါလီၤ. ဒီးလၢလံာ်အံၤအပူၤ ပကမၤလိဘၣ်လၢ ပှၤတီပှၤလိၤတဖၣ်အံၤ ထံၣ်ဝဲလၢတၢ်နာ်န့ၣ် မ့ၢ်တၢ်လၢအရ့ဒိၣ်ဝဲလီၤ. ဘၣ်ဆၣ် မုၢ်မဆါတနံၤအံၤ တၢ်နာ်န့ၣ် တမ့ၢ်တၢ်အရ့ဒိၣ်လၢပှၤအါဂၤအဂီၢ်ဘၣ်. ဒီးပှၤအါဂၤ ဆိကမိၣ်ဝဲလၢ ပှၤလၢအအိၣ်ဒီးတၢ်စူၢ်တၢ်နာ်န့ၣ် မ့ၢ်ဒၣ်အဝဲသ့ၣ် ဟးနာ်ကြီတၢ် ဒီးတၢ်အုၣ်အသးလၢ အကဆီၣ်ထွဲအဝဲသ့ၣ်အတၢ်နာ်န့ၣ် တအိၣ်ဝဲဘၣ်. ဘၣ်ဆၣ် အဝဲသ့ၣ်မ့ၢ်ဆိကမိၣ်ဝဲဒ်အံၤန့ၣ် ကမၣ်ဝဲလီၤ. တၢ်နာ်နီၢ်နီၢ်န့ၣ် တမ့ၢ်လၢပဟးနာ်ကြီတၢ်ဘၣ်. ပမ့ၢ်နာ်ကြီတၢ်န့ၣ် မ့ၢ်တၢ်လၢအလီၤဘၣ်ယိၣ်ဒိၣ်မးလီၤ. ဒီးထဲပနာ်ကစၢ်ယွၤန့ၣ် တလၢပှဲၤဒံးဘၣ် မ့ၢ်လၢ “တၢ်နါတဖၣ်နာ်စ့ၢ်ကီးတၢ်, ဒီးကနိးကစုာ်လီၤ.”—ယၤ. ၂:၁၉.
၅, ၆. (က) ပတၢ်နာ်န့ၣ် ဒိးသန့ၤထီၣ်အသးလၢ တၢ်ဂ့ၢ်မနုၤခံမံၤအဖီခိၣ်လဲၣ်. (ခ) ပတၢ်နာ်ကဘၣ်ဂၢၢ်ကျၢၤဝဲထဲလဲၣ်န့ၣ် ဟ့ၣ်တၢ်အဒိတက့ၢ်.
၅ တၢ်နာ်နီၢ်နီၢ်န့ၣ် မ့ၢ်တၢ်မနုၤလဲၣ်. လံာ်စီဆှံပာ်ဖျါထီၣ်ဝဲအခီပညီလီၤ. (ဖး ဧ့ၤဘြံၤ ၁၁:၁ တက့ၢ်.) စီၤပီလူးစံးဝဲလၢ တၢ်နာ်န့ၣ် ဒိးသန့ၤထီၣ်အသးလၢ တၢ်ဂ့ၢ်ခံမံၤအဖီခိၣ်လီၤ. ဒီးတၢ်ဂ့ၢ်ခံမံၤအံၤ ပထံၣ်အီၤလၢ ပမဲာ်ချံတသ့ဘၣ်. တၢတမံၤန့ၣ် ပမ့ၢ် “တထံၣ်ဘၣ်” သနာ်က့ ပနာ်တၢ်လၢအအိၣ်ဝဲနီၢ်ကီၢ်လီၤ. အဒိ ယဟိဝၤယွၤ, အဖိခွါ ဒီးယွၤအဘီအမုၢ်န့ၣ် အိၣ်လၢမူခိၣ် ဘၣ်ဆၣ်ပထံၣ်အီၤလၢပမဲာ် တသ့ဘၣ်. ခံမံၤတမံၤ, တၢ်လၢပ “မုၢ်လၢ်” အီၤလၢ ခါဆူညါအဂီၢ်န့ၣ် ပနာ်လၢကဟဲလၢထီၣ်ပှဲၤထီၣ်ဝဲ သပှၢ်ကတၢၢ်လီၤ. အဒိ ဆၢကတီၢ်ခဲအံၤ ဟီၣ်ခိၣ်ပၤရဒံစူးလၢ ယွၤအဘီအမုၢ်ကဒုးအိၣ်ထီၣ်ဝဲန့ၣ် ပထံၣ်အီၤတသ့ဒံးဘၣ်. မ့မ့ၢ်ဒ်န့ၣ်န့ၣ် ပမ့ၢ်နာ်တၢ်လၢ ပထံၣ်အီၤတသ့ဘၣ်တဖၣ်အံၤန့ၣ် အခီပညီမ့ၢ်ဝဲပဟးနာ်ကြီတၢ်ဧါ.
၆ တမ့ၢ်လ့ၤတက့ၤဘၣ်. စီၤပီလူးစံးဝဲလၢ တၢ်နာ်နီၢ်နီၢ်န့ၣ် ဒိးသန့ၤထီၣ်အသးလၢ တၢ်အုၣ်အသးလၢ အဂၢၢ်ကျၢၤတဖၣ်အဖီခိၣ်လီၤ. ဒီးအဝဲတဲဝဲလၢ တၢ်စူၢ်တၢ်နာ်န့ၣ် မ့ၢ် ‘တၢ်မုၢ်လၢ်အတၢ်သန့ၤပသး’ လီၤ. တၢ်ကတိၤတဖျၢၣ်အံၤ ပှၤကွဲးကျိာ်ထံက့ၤအီၤလၢ “တၢ်န့ၢ်သါအလံာ်အုၣ်သး” သ့ဝဲစ့ၢ်ကီးလီၤ. အဒိ ဆိကမိၣ်ကွၢ်လၢ ပှၤတဂၤပာ်လီၤအသးလၢ အဝဲကဟ့ၣ်နၤဟံၣ်တဖျၢၣ်တက့ၢ်. အဝဲယူာ်ဃီၤအစုဆူနအိၣ်, ဟ့ၣ်နၤတၢ်န့ၢ်သါအလံာ်အုၣ်သး ဒီးတဲဝဲလၢ “အအံၤ, နဟံၣ်လၢအသီတဖျၢၣ်” န့ၣ်လီၤ. အဝဲတအဲၣ်ဒိးတဲဝဲလၢ လံာ်အုၣ်သးတဘ့ၣ်အံၤ မ့ၢ်နဟံၣ်နီၢ်ကီၢ်ဘၣ်. အဝဲအဲၣ်ဒိးတဲဝဲလၢ လံာ်အုၣ်သးအံၤ မ့ၢ်တၢ်အုၣ်အသးလၢ နကဒိးန့ၢ်ဘၣ်ဟံၣ်တဖျၢၣ်အံၤ သပှၢ်ကတၢၢ်လီၤ. ဒ်န့ၣ်အသိး ပမ့ၢ်အိၣ်ဒီးတၢ်နာ်နီၢ်နီၢ်န့ၣ် ပသ့ၣ်ညါသပှၢ်ကတၢၢ်လၢ ကစၢ်ယွၤအတၢ်စံးပာ်တဖၣ်လၢ လံာ်စီဆှံအပူၤအံၤ ကဟဲလၢထီၣ်ပှဲၤထီၣ်ဝဲလီၤ.
၇. တၢ်နာ်နီၢ်နီၢ်န့ၣ် ပပာ်ဖျါထီၣ်အီၤကသ့လၢကျဲဒ်လဲၣ်.
၇ တၢ်နာ်နီၢ်နီၢ်န့ၣ် အိၣ်သူၣ်ထီၣ်အသးလၢ ပတၢ်သ့ၣ်ညါယဟိဝၤယွၤအဖီခိၣ်န့ၣ်လီၤ. ဒီးပတၢ်နာ်အံၤ တကဒံကဒါဝဲနီတစဲးဘၣ်. ခီဖျိလၢ ပအိၣ်ဒီးတၢ်နာ်အဃိ ပထံၣ်ယဟိဝၤယွၤ ဒ်ပပၢ်လၢအပှဲၤဒီးတၢ်အဲၣ်တၢ်ကွံတဂၤအသိးလီၤ. တကးဒံးဘၣ် ပနာ်လၢအတၢ်စံးပာ်တဖၣ် ကဟဲလၢထီၣ်ပှဲၤထီၣ်ဝဲ ကိးခါဒဲးလီၤ. ဘၣ်ဆၣ် ပတၢ်နာ်မ့ၢ်တအိၣ်ဘၣ်ဒီးတၢ်မၤန့ၣ် လီၤဂာ်ဒီးတၢ်သံလီၤ. အဒိ ဒ်သိးပကဆဲးအိၣ်မူဘၣ်အဂီၢ် ပကဘၣ်မၤပှဲၤပဂံၢ်ပဘါထီဘိလီၤ. ဒ်န့ၣ်အသိး ပတၢ်နာ်ကဆဲးမူအဂီၢ် ပကဘၣ်ပာ်ဖျါထီၣ်အီၤလၢ တၢ်မၤန့ၣ်လီၤ.—ယၤ. ၂:၂၆.
၈. ဘၣ်မနုၤအဃိ တၢ်နာ်န့ၣ်မ့ၢ်တၢ်လၢအရ့ဒိၣ်ဝဲလဲၣ်.
၈ ဘၣ်မနုၤအဃိ တၢ်နာ်န့ၣ် မ့ၢ်တၢ်လၢအရ့ဒိၣ်ဝဲလဲၣ်. စီၤပီလူးပာ်ဖျါထီၣ်ဝဲတၢ်စံးဆၢလၢ အဂ့ၤကတၢၢ်န့ၣ်လီၤ. (ဖး ဧ့ၤဘြံၤ ၁၁:၆ တက့ၢ်.) အဝဲစံးဝဲလၢ ပတၢ်နာ်မ့ၢ်တအိၣ်ဘၣ်န့ၣ် ပသုးဘူးပသးဆူယဟိဝၤယွၤအအိၣ် ဒီးမၤအတၢ်ဘၣ်သး တသ့ဝဲဘၣ်. လၢတၢ်န့ၣ်အဃိ ပမ့ၢ်အဲၣ်ဒိး မၤလၤကပီၤ ပပၢ်ယဟိဝၤယွၤ ဒီးသုးဘူးပသးဆူအအိၣ်န့ၣ် ပကဘၣ်အိၣ်ဒီးတၢ်နာ်န့ၣ်လီၤ.
၉. ယဟိဝၤယွၤ သ့ၣ်ညါဝဲလၢ ပလိၣ်ဘၣ်တၢ်နာ်အဃိ အဝဲကတဲာ်ကတီၤန့ၢ်ပှၤတၢ်မနုၤလဲၣ်.
၉ ယဟိဝၤယွၤ သ့ၣ်ညါဝဲလၢ ပလိၣ်ဘၣ်တၢ်နာ်အဃိ ကစၢ်ပာ်လီၤဝဲ ပှၤလၢအဒိဂ့ၤတဲာ်ဘၣ် ဒ်သိးကသိၣ်လိပှၤလၢ ပမၤဒိၣ်ထီၣ်ပတၢ်နာ်ကသ့ဒ်လဲၣ်အဂ့ၢ်န့ၣ်လီၤ. ဒီးကစၢ်ယွၤရဲၣ်ကျဲၤဝဲ ဒ်သိးပှၤဒိဂ့ၤတဲာ်ဘၣ်လၢ အအိၣ်ဒီးတၢ်နာ်ဂၢၢ်ကျၢၤန့ၣ် ကတီခိၣ်ရိၤမဲတၢ်လၢ ခရံာ်ဖိတၢ်အိၣ်ဖှိၣ်အပူၤလီၤ. ဘၣ်ဃးဒီး ပှၤသ့ၣ်တဖၣ်အံၤ လံာ်စီဆှံစံးဝဲလၢ “မၤထွဲအတၢ်နာ်အခံတက့ၢ်.” (ဧ့ၤ. ၁၃:၇) တကးဒံးဘၣ် စီၤပီလူးစံးဝဲလၢ ပှၤတီပှၤလိၤလၢပျၢၤန့ၣ် မ့ၢ်ဝဲ “ပှၤအုၣ်အသးဂီၢ်မုၢ်” လီၤ. ဒီးအဝဲသ့ၣ်တဖၣ်န့ၣ် ပာ်လီၤတၢ်ဒိဂ့ၤတဲာ်ဘၣ်လၢပဂီၢ်လီၤ. (ဧ့ၤ. ၁၂:၁) ယဟိဝၤယွၤအခ့အပှၤလၢ အအိၣ်ဒီးတၢ်နာ်ဂၢၢ်ကျၢၤန့ၣ် အိၣ်အါန့ၢ်ဒံးစီၤပီလူးကွဲးဖျါထီၣ်ဝဲဖဲ ဧ့ၤဘြံၤ အဆၢဒိၣ် ၁၁ အပူၤလီၤ. လံာ်စီဆှံ ပာ်ဖျါထီၣ်ဝဲ ပိာ်မုၣ်ဒီးပိာ်ခွါ, သးစၢ်ဒီးသးပှၢ်တဖၣ်လၢ အတၢ်အိၣ်မူလီၤဆီလိာ်သး ဘၣ်ဆၣ်အဝဲသ့ၣ်အိၣ်ဒီးတၢ်နာ်ဂၢၢ်ဂၢၢ်ကျၢၤကျၢၤန့ၣ်လီၤ. လၢတၢ်န့ၣ်အဃိ ပှၤတဖၣ်အံၤ ကဲထီၣ်တၢ်မၤလိလၢပဂီၢ် သ့ဝဲလီၤ.
ပကွၢ်လိမၤဒိး ပှၤအဂၤတဖၣ်အတၢ်နာ်ကသ့ဒ်လဲၣ်
၁၀. ဒ်သိးပကွၢ်လိမၤဒိး ပှၤတီပှၤလိလၢပျၢၤတဖၣ်ကသ့အဂီၢ် ဖဲပမၤပနီၢ်ကစၢ်တၢ်မၤလိလံာ်စီဆှံအခါ ပကဘၣ်မၤဒ်လဲၣ်.
၁၀ နမ့ၢ်တသ့ၣ်ညါ ပှၤတဂၤအဂ့ၢ်လီၤတံၢ်လီၤဆဲးန့ၣ် နကွၢ်လိမၤဒိးအီၤ တသ့ဝဲလ့ၤတက့ၤဘၣ်. ဖဲနဖးလံာ်တဘ့ၣ်အံၤအခါ နကထံၣ်ဘၣ် တၢ်ဂ့ၢ်တၢ်ကျိၤလၢ ပှၤဃုသ့ၣ်ညါပာ်စၢၤဝဲ ဘၣ်ဃးဒီး ပှၤတီပှၤလိၤလၢပျၢၤတဖၣ်အံၤအဂ့ၢ်န့ၣ်လီၤ. လၢတၢ်န့ၣ်အဃိ လံာ်အံၤကကဲထီၣ်တၢ်မၤစၢၤ ဒ်သိးနကွၢ်လိမၤဒိး အဝဲသ့ၣ်ကသ့အဂီၢ်လီၤ. နၤစ့ၢ်ကီး နမ့ၢ်ဃုသ့ၣ်ညါအါထီၣ် အဝဲသ့ၣ်အဂ့ၢ်လၢ နနီၢ်ကစၢ်ဒၣ်နဲန့ၣ် ကဂ့ၤဝဲလီၤ. ဖဲနမၤနီၢ်ကစၢ်တၢ်မၤလိလံာ်စီဆှံအခါ သူလံာ်လဲၢ်လၢ ပတၢ်ကရၢကရိထုးထီၣ်ဝဲတဖၣ်တက့ၢ်. ဒီးဖဲနဆိကမိၣ်ထံ တၢ်လၢနမၤလိအီၤတဖၣ်အခါန့ၣ် ဂုာ်ကျဲးစၢးထံၣ်ကမှံကွၢ် တၢ်လီၢ်တၢ်ကျဲ ဒီးတၢ်အိၣ်အသးလၢ လံာ်စီဆှံပာ်ဖျါထီၣ်ဝဲန့ၣ်တက့ၢ်. အါန့ၢ်အန့ၣ် ပှၤတီပှၤလိၤလၢပျၢၤတဖၣ်အံၤ တူၢ်ဘၣ်တၢ်ဒ်လဲၣ်န့ၣ် အိၣ်ကွၢ်လၢအဝဲသ့ၣ်အလီၢ်တက့ၢ်. ဖဲနမၤဒ်န့ၣ်အခါ ပှၤသ့ၣ်တဖၣ်အံၤ ကကဲထီၣ်ပှၤနီၢ်ကီၢ်လၢနဂီၢ် ဒီးနကတူၢ်ဘၣ်လၢ အဝဲသ့ၣ်မ့ၢ်နတံၤသကိးလၢအဂ့ၤန့ၣ်လီၤ.
၁၁, ၁၂. (က) ဒ်သိးနကတူၢ်ဘၣ်လၢ စီၤအၤဘြၤဟၣ် ဒီးနီၢ်စၤရါ ကမ့ၢ်နတံၤသကိးအဂီၢ်န့ၣ် နကဘၣ်မၤဒ်လဲၣ်. (ခ) နဒိးန့ၢ်ဘၣ်တၢ်မၤလိလၢ နီၢ်ဃးနၤ, ဝံအ့ၤလံယၤ ဒီးစီၤၡမူၤအ့လးအအိၣ် ကသ့ဒ်လဲၣ်.
၁၁ နမ့ၢ်သ့ၣ်ညါအဝဲသ့ၣ်အဂ့ၢ် လီၤတံၢ်လီၤဆဲးန့ၣ် နကအဲၣ်ဒိးကွၢ်လိမၤဒိးအဝဲသ့ၣ်လီၤ. အဒိ ဆိကမိၣ်ကွၢ်လၢ ယဟိဝၤယွၤအတၢ်ကရၢကရိ ဟ့ၣ်လီၤနၤမူဒါလၢအသီတခါန့ၣ်တက့ၢ်. ဘၣ်သ့ၣ်သ့ၣ် နကဘၣ်သုးလီၢ်သုးကျဲဆူ တၢ်လီၢ်လၢပှၤလိၣ်ဘၣ် ပှၤစံၣ်တဲၤတဲလီၤတၢ်ဖိအလီၢ် မ့တမ့ၢ် ပှၤကမၢနမၤကွၢ် တၢ်စံၣ်တဲၤတဲလီၤတၢ် အကျိၤအကျဲလၢ နတမၤညီနုၢ်အီၤတဖၣ်န့ၣ်လီၤ. ဖဲနဃ့ထုကဖၣ် ဒီးထိၣ်ထံစီၤထံက့ၤ မူဒါအံၤအဆၢကတီၢ် နမ့ၢ်ဆိကမိၣ်ထီၣ်က့ၤ စီၤအၤဘြၤဟၣ်အဒိအတဲာ်န့ၣ် ကကဲထီၣ်တၢ်မၤစၢၤလၢနဂီၢ်သပှၢ်ကတၢၢ်လီၤ. စီၤအၤဘြၤဟၣ် ဒီးနီၢ်စၤရါ အိၣ်မူဘၣ်ဝဲလၢဝ့ၢ်အူၢ်အပူၤမုာ်မုာ်ခုၣ်ခုၣ် ဘၣ်ဆၣ်အဝဲသ့ၣ်ဟးထီၣ် လၢတၢ်သူၣ်အိၣ်သးအိၣ်အပူၤ အဃိအဝဲသ့ၣ်ဒိးန့ၢ်ဘၣ်တၢ်ဆိၣ်ဂ့ၤအါမးလီၤ. နမ့ၢ်ကွၢ်လိမၤဒိးအဝဲသ့ၣ်အဒိအတဲာ်န့ၣ် နကတူၢ်ဘၣ်လၢ နသ့ၣ်ညါအဝဲသ့ၣ် အါန့ၢ်ဒံးလၢညါန့ၣ်လီၤ.
၁၂ အဂၤတမံၤ ပှၤလၢနရ့ဒီးအီၤဘူးဘူးတံၢ်တံၢ်တဂၤ မ့ၢ်သးက့ၣ်နၤန့ၣ် နသးကဘၣ်ဒိ ဒီးနမ့ၢ်တအဲၣ်ဒိးထီၣ်တၢ်အိၣ်ဖှိၣ်လၢၤဘၣ်န့ၣ် နကမၤဒ်လဲၣ်. ဖဲန့ၣ်အဆၢကတီၢ် နမ့ၢ်ဆိကမိၣ်ထံက့ၤလၢ နီၢ်ဃးနၤ ကွၢ်ဆၢၣ်မဲာ်ဘၣ်ဝဲ နီၢ်ပနံးနၤအတၢ်သးက့ၣ် ဘၣ်ဆၣ်အဝဲဆဲးမၤယဟိဝၤယွၤအတၢ်ဘၣ်သးအဂ့ၢ်န့ၣ် ကကဲထီၣ်တၢ်မၤစၢၤ ဒ်သိးနမၤတၢ်လၢအဘၣ်ကသ့အဂီၢ်လီၤ. တကးဒံးဘၣ် နကတူၢ်ဘၣ်လၢ နီၢ်ဃးနၤ ကဲထီၣ်နတံၤသကိးလၢနအဲၣ်ဘၣ်အီၤတဂၤလီၤ. ဒ်န့ၣ်အသိး နသးမ့ၢ်ဟးဂီၤ ဒီးနမ့ၢ်တူၢ်ဘၣ်လၢ ပှၤသူအီၣ်နၤ တသ့လၢၤဘၣ်န့ၣ် ဖဲနမၤလိတၢ်ကီတၢ်ခဲလၢ ဝံအ့ၤလံယၤတူၢ်ဘၣ်ဝဲ ဒီးယဟိဝၤယွၤမၤမုာ်ထီၣ်က့ၤအသးဒ်လဲၣ်အဂ့ၢ်န့ၣ် နကတူၢ်ဘၣ်လၢ ဝံအ့ၤလံယၤမ့ၢ်နတံၤသကိးတဂၤလီၤ. မ့မ့ၢ် ပှၤသးစၢ်တဖၣ်န့ၣ် ဖဲအဝဲသ့ၣ်ထီၣ်ကၠိအဆၢကတီၢ် ကထံၣ်ဘၣ်ဝဲတၢ်လ့ပစီအကလုာ်ကလုာ်လီၤ. လၢတၢ်န့ၣ်အဃိ အဝဲသ့ၣ်မ့ၢ်မၤလိဘၣ်ဝဲလၢ စီၤၡမူၤအ့လးတကွၢ်လိမၤဒိးဝဲ စီၤဧ့လံၤအဖိခွါတဖၣ်အလုၢ်လၢ်သကဲာ်ပဝးလၢ အလီၤရၢၢ်လီၤစၢၢ်န့ၣ် အဝဲသ့ၣ်ကထံၣ်ဝဲ စီၤၡမူၤအ့လးဒ်အတံၤသကိးတဂၤအသိးန့ၣ်လီၤ.
၁၃. ပမ့ၢ်ကွၢ်လိမၤဒိး ပှၤလၢလံာ်စီဆှံပာ်ဖျါထီၣ်ဝဲတဖၣ်န့ၣ် မ့ၢ်ကစၢ်ယွၤကထံၣ်ပှၤလၢ ပအိၣ်ဒီးတၢ်လီၤတူာ်လီၤကာ်စ့ၢ်ကီးဧါ. တဲဖျါထီၣ်တက့ၢ်.
၁၃ ပမ့ၢ်ကွၢ်လိမၤဒိး ပှၤလၢလံာ်စီဆှံပာ်ဖျါထီၣ်ဝဲတဖၣ်န့ၣ် မ့ၢ်ကစၢ်ယွၤကထံၣ်ပှၤလၢ ပအိၣ်ဒီးတၢ်လီၤတူာ်လီၤကာ်စ့ၢ်ကီးဧါ. ကစၢ်ယွၤ တထံၣ်ဝဲဒ်န့ၣ်လ့ၤတက့ၤဘၣ်. သ့ၣ်နီၣ်ထီၣ်က့ၤလၢ ယဟိဝၤယွၤအကလုၢ်ကထါ ဟ့ၣ်သဆၣ်ထီၣ်ပှၤလၢ ပကကွၢ်လိမၤဒိး ပှၤတီပှၤလိၤလၢပျၢၤတဖၣ်အံၤလီၤ. (၁ ကရံၣ်. ၄:၁၆; ၁၁:၁; ၂ သ့း. ၃:၇, ၉) တကးဒံးဘၣ် ပှၤလၢပကမၤလိဘၣ်အဂ့ၢ်လၢ လံာ်တဘ့ၣ်အံၤအပူၤန့ၣ် အဝဲသ့ၣ်စ့ၢ်ကီး ကွၢ်လိမၤဒိးဝဲပှၤတီပှၤလိၤတဖၣ်လၢ အအိၣ်မူတ့ၢ်လၢအဝဲသ့ၣ်အမဲာ်ညါန့ၣ်လီၤ. အဒိ ပမ့ၢ်ကွၢ်လၢ တၢ်မၤလိ ၁၇ အပူၤန့ၣ် ပကထံၣ်ဘၣ်လၢ နီၢ်မၤရံသူဝဲနီၢ်ဃးနၤအတၢ်ကတိၤအဃိ ဖျါလၢအဝဲကွၢ်လိဝဲနီၢ်ဃးနၤန့ၣ်လီၤ. မ့မ့ၢ်ဒ်န့ၣ်န့ၣ် ပတဲလၢနီၢ်မၤရံအတၢ်နာ် လီၤတူာ်လီၤကာ်ဝဲကသ့စ့ၢ်ကီးဧါ. ပတဲဒ်န့ၣ် တသ့ဘၣ်. လၢတၢ်န့ၣ်အလီၢ် ဒ်သိးနီၢ်မၤရံအတၢ်နာ်ကဂၢၢ်ကျၢၤထီၣ် ဒီးကဒိးန့ၢ်ဘၣ်ဝဲမံၤဂ့ၤသၣ်ဂ့ၤလၢ ယဟိဝၤယွၤအမဲာ်ညါအဂီၢ် နီၢ်ဃးနၤအဒိအတဲာ်လၢအဂ့ၤအံၤ ကဲဘျုးလၢအတၢ်အိၣ်မူအပူၤလီၤ.
၁၄, ၁၅. လၢလံာ်တဘ့ၣ်အံၤအပူၤန့ၣ် ပၣ်ဃုာ်ဒီးတၢ်မနုၤလဲၣ် ဒီးလံာ်အံၤပသူအီၤသ့လၢ အဆၢကတီၢ်ဖဲလဲၣ်.
၁၄ လံာ်တဘ့ၣ်အံၤ ဘၣ်တၢ်ထုးထီၣ်အီၤ ဒ်သိးနတၢ်နာ်ကဂၢၢ်ကျၢၤထီၣ်ဝဲအဂီၢ်လီၤ. တၢးထီခိးတၢ် ၂၀၀၈ တုၤလၢ ၂၀၁၃ အပူၤန့ၣ် ပှၤကွဲးထၢနုာ်ဝဲတၢ်မၤလိတဖၣ်လၢ အခိၣ်တီမ့ၢ်ဝဲ “ကွၢ်လိမၤဒိးအဝဲသ့ၣ်အတၢ်နာ်တက့ၢ်.” ဝံၤဒီးပှၤပာ်ဖှိၣ်ထီၣ်က့ၤ တၢ်မၤလိတဖၣ်အံၤ ဒ်သိးကထုးထီၣ်ရၤလီၤဝဲလံာ်အံၤအဂီၢ်လီၤ. ဘၣ်ဆၣ် တၢ်ဂ့ၢ်တၢ်ကျိၤလၢအသီတနီၤန့ၣ် ဘၣ်တၢ်ထၢနုာ်အီၤလၢ လံာ်တဘ့ၣ်အံၤအပူၤစ့ၢ်ကီးလီၤ. ဒီးတၢ်မၤလိတခါစုာ်စုာ်န့ၣ် အိၣ်ဒီးတၢ်သံကွၢ်တဖၣ်လီၤ. တၢ်သံကွၢ်တဖၣ်အံၤ ကမၤစၢၤပှၤလၢ ပကတဲသကိးတၢ်ဂ့ၢ်တၢ်ကျိၤတဖၣ်အံၤဒီးပှၤဂၤအဂီၢ် ဒီးကဲထီၣ်စ့ၢ်ကီးတၢ်မၤစၢၤဒ်သိး ပသူတၢ်ဂ့ၢ်အံၤလၢ ပတၢ်အိၣ်မူအပူၤကသ့ဝဲအဂီၢ်လီၤ. လၢလံာ်တဘ့ၣ်အံၤအပူၤန့ၣ် ဘၣ်တၢ်ပၢနုာ်တၢ်ဂီၤအသီတဖၣ်လၢ အပှဲၤဝဲဒီးအလွဲၢ်လၢအဃံအလၤန့ၣ်လီၤ. မ့မ့ၢ် တၢ်ဂီၤလၢ အအိၣ်ပာ်စၢၤလၢ တၢ်မၤလိတဖၣ်အံၤအပူၤန့ၣ် ဘၣ်တၢ်မၤဒိၣ်ထီၣ်အီၤ ဒီးမၤဂ့ၤထီၣ်က့ၤအီၤလီၤ. တကးဒံးဘၣ် ပှၤပၢနုာ်ဃုာ်ဒီး တၢ်ပာ်ဖျါတၢ်ဆၢကတီၢ် ဒီးဟီၣ်ခိၣ်ဂီၤတဖၣ် ဒ်သိးပနၢ်ပၢၢ်လံာ်စီဆှံကညီထီၣ်အဂီၢ်လီၤ. လံာ်တဘ့ၣ်လၢအခိၣ်တီမ့ၢ်ဝဲ ကွၢ်လိမၤဒိးအဝဲသ့ၣ်အတၢ်နာ်တက့ၢ် န့ၣ်ဘၣ်တၢ်ထုးထီၣ်အီၤလၢ နကမၤနနီၢ်ကစၢ်တၢ်မၤလိလံာ်စီဆှံ, ဟံၣ်ဖိဃီဖိတၢ်မၤလိလံာ်စီဆှံ, ဒီးလၢတၢ်အိၣ်ဖှိၣ်တၢ်မၤလိလံာ်စီဆှံအဂီၢ်လီၤ. ပဖးလံာ်တဘ့ၣ်အံၤ ဒီးပဟံၣ်ဖိဃီဖိလၢ တၢ်သူၣ်ဖှံသးညီအပူၤသ့ဝဲလီၤ.
၁၅ မ်လံာ်တဘ့ၣ်အံၤ ကဲထီၣ်တၢ်မၤစၢၤဒ်သိးနကွၢ်လိမၤဒိး ယဟိဝၤယွၤအခ့အပှၤလၢညါတဖၣ် အတၢ်နာ်ကသ့အဂီၢ်တက့ၢ်. ဒီးမ်အကဲထီၣ်စ့ၢ်ကီးတၢ်မၤစၢၤလၢ နကဘူးထီၣ်ဒီး ပပၢ်ယဟိဝၤယွၤတက့ၢ်.
