တၢ်မၤလိ ၁၇
“ကွၢ်ကွၢ်, ကစၢ်အကုၢ်ပိာ်မုၣ်လီၤ”
၁, ၂. (က) ပှၤတမှံၤတဂၤ ဟဲတဲဘၣ်နီၢ်မၤရံ ဒ်လဲၣ်. (ခ) နီၢ်မၤရံအတၢ်အိၣ်မူန့ၣ် ဆီတလဲအသးလၢ တၢ်ဂ့ၢ်မနုၤအဃိလဲၣ်.
ဖဲပှၤတမှံၤတဂၤ ဟဲလၢအဟံၣ်ခီၣ်ထံးအခါ နီၢ်မၤရံ အမဲာ်ချံကျိၣ်ထီၣ်ဒီး ကွၢ်အီၤလၢ တၢ်သးလီၤကတုၤအပူၤလီၤ. ပိာ်ခွါတဂၤအံၤ တဟဲဒ်သိးကထံၣ်လိာ်အသးဒီး နီၢ်မၤရံအမိၢ်အပၢ်အဂီၢ်ဘၣ်. ဟဲဝဲလၢ အကထံၣ်လိာ်အသးဒီးနီၢ်မၤရံလီၤ. ဒီးနီၢ်မၤရံ သ့ၣ်ညါဝဲလၢ ပိာ်ခွါတဂၤအံၤတမ့ၢ် ပှၤနစၤရ့းဖိဘၣ်. နစၤရ့း မ့ၢ်ဝ့ၢ်ဆံးဆံးဖိတဖျၢၣ်အဃိ ဖဲပှၤလၢတၢ်ချၢမ့ၢ်ဟဲနုာ်လီၤအခါ ပှၤသဝီဖိတဖၣ်သ့ၣ်ညါဝဲ တဘျီဃီလီၤ. ပှၤတမှံၤတဂၤအံၤ တဲဘၣ်နီၢ်မၤရံ တၢ်လီၤဆီတခါလီၤ. အဝဲစံးဝဲလၢ “ပှၤလၢအဘၣ်ဘျုးအါတဂၤဧၢ, ယွၤအိၣ်ဒီးနၤလီၤ.”—ဖး လူၤကၣ် ၁:၂၆-၂၈ တက့ၢ်.
၂ နီၢ်မၤရံ မ့ၢ်စီၤဟ့ၤလံ အဖိမုၣ်လၢအအိၣ်လၢ ဝ့ၢ်နစၤရ့း လၢကၤလံၤလါအပူၤန့ၣ်လီၤ. ဒီးလံာ်စီဆှံပာ်ဖျါထီၣ်န့ၢ်ပှၤလၢ တၢ်ဂ့ၢ်ဖးဒိၣ်တခါ ဟဲပၢၢ်ထီၣ်လၢ နီၢ်မၤရံအတၢ်အိၣ်မူအပူၤလီၤ. နီၢ်မၤရံ ဘၣ်တၢ်အဲၣ်တီပာ်န့ၢ်အီၤဒီး စီၤယိၤသး ဒ်သိးအဝဲသ့ၣ်ကဖျီအသးအဂီၢ်လီၤ. စီၤယိၤသးမ့ၢ်ပှၤစုသ့ဖိ ဒီးတမ့ၢ်ပှၤကဲဒိၣ်ကဲပှၢ်ဘၣ်. ဘၣ်ဆၣ် အဝဲအိၣ်ဒီးတၢ်နာ်ဂၢၢ်ဂၢၢ်ကျၢၤကျၢၤလၢ ကစၢ်ယွၤအဖီခိၣ်လီၤ. နီၢ်မၤရံ ပာ်လီၤအသးလၢ ကဆီဟံၣ်ဆီဃီဒီးစီၤယိၤသး, ကအိၣ်မူယိယိဖိ, ကလုၢ်ဒိၣ်ထီၣ်အဖိ ဒီးဒ်မါတဂၤအသိး ကမၤစၢၤအဝၤလၢ ဟံၣ်ဃီတၢ်ဖံးတၢ်မၤအပူၤလီၤ. ဘၣ်ဆၣ် လၢတၢ်တဆိကမိၣ်အပူၤန့ၣ် ပှၤတမှံၤတဂၤဟဲပၢၢ်ထီၣ်ဝဲ ဒီးတဲဘၣ်နီၢ်မၤရံလၢ ဘၣ်ဃးဒီးမူဒါလၢ ကစၢ်ယွၤကဟ့ၣ်လီၤအီၤန့ၣ်လီၤ. ဖဲန့ၣ်အဆၢကတီၢ် နီၢ်မၤရံသ့ၣ်ညါဝဲလၢ အတၢ်အိၣ်မူ တလဲၤအသးဒ် အဝဲမုၢ်လၢ်ပာ်စၢၤဝဲအသိးလၢၤဘၣ်.
၃, ၄. ဒ်သိးပသ့ၣ်ညါ နီၢ်မၤရံ အဂ့ၢ်ဂ့ၤဂ့ၤကသ့အဂီၢ် ပကဘၣ်မၤဒ်လဲၣ်.
၃ လံာ်စီဆှံတပာ်ဖျါထီၣ် နီၢ်မၤရံအဂ့ၢ်အါအါဘၣ်အဃိ ပှၤအါဂၤကမၢကမၣ်ဝဲလီၤ. လံာ်စီဆှံပာ်ဖျါန့ၢ်ပှၤ နီၢ်မၤရံ အတၢ်အိၣ်သးဒီးအဂ့ၢ်ထဲတစဲးဖိလီၤ. မ့မ့ၢ် ဘၣ်ဃးဒီး အက့ၢ်အဂီၤအိၣ်ဒ်လဲၣ်န့ၣ် လံာ်စီဆှံတပာ်ဖျါထီၣ်န့ၢ်ပှၤ နီတစဲးဘၣ်. ဘၣ်ဆၣ် ခဲအံၤန့ၣ် ပကသမံသမိးကွၢ် နီၢ်မၤရံအဂ့ၢ်လၢ လံာ်စီဆှံပာ်ဖျါထီၣ်ဝဲတဖၣ်န့ၣ်လီၤ.
၄ ဒ်သိးပကသ့ၣ်ညါ နီၢ်မၤရံအဂ့ၢ်ဂ့ၤဂ့ၤအဂီၢ် မ့ၢ်ပကဘၣ်ဃုသ့ၣ်ညါ တၢ်ဘူၣ်တၢ်ဘါခိၣ်နၢ်တဖၣ် အတၢ်သိၣ်လိတဖၣ်စ့ၢ်ကီးဧါ. တလိၣ်ဘၣ်. အဒိ အဝဲသ့ၣ်တ့ထီၣ်ဝဲ နီၢ်မၤရံအဂီၤဒ်လဲၣ်ဒ်လဲၣ်န့ၣ် ပတလိၣ်ပာ်သူၣ်ပာ်သးဘၣ်. ဒီးမ့မ့ၢ် အဝဲသ့ၣ်အတၢ်သိၣ်လိလၢ နီၢ်မၤရံမ့ၢ် “ကစၢ်ယွၤအမိၢ်” မ့တမ့ၢ် “မူခိၣ်အနီၢ်ပၤမုၣ်” န့ၣ်ပတလိၣ်တဲလၢၤဘၣ်. လၢတၢ်န့ၣ်အလီၢ် မ်ပကွၢ်တၢ်ကွဲးအသးလၢ လံာ်စီဆှံအပူၤလီၤတံၢ်လီၤဆဲးတက့ၢ်. မ့ၢ်လၢလံာ်စီဆှံ ပာ်ဖျါထီၣ်န့ၢ်ပှၤလၢ နီၢ်မၤရံအတၢ်နာ်အိၣ်ဒ်လဲၣ် ဒီးပကွၢ်လိမၤဒိးအီၤကသ့ဒ်လဲၣ်အဂ့ၢ်န့ၣ်လီၤ.
မူခိၣ်ကလူးတဂၤ ဟဲအိၣ်သကိးအီၤ
၅. (က) ဖဲမူခိၣ်ကလူး ကၤဘြံၤအ့လး ဆၢဂ့ၤဆၢဝါ နီၢ်မၤရံအခါ ပသ့ၣ်ညါအါထီၣ်ဘၣ် နီၢ်မၤရံအဂ့ၢ်ဒ်လဲၣ်. (ခ) ပဒိးန့ၢ်ဘၣ် တၢ်မၤလိအရ့ဒိၣ်လၢ နီၢ်မၤရံအအိၣ်ဒ်လဲၣ်.
၅ ပှၤတမှံၤလၢအဟဲဆူ နီၢ်မၤရံအအိၣ်န့ၣ် တမ့ၢ်ပှၤဟီၣ်ခိၣ်ဖိဘၣ်, မ့ၢ်မူခိၣ်ကလူး ကၤဘြံၤအ့လးန့ၣ်လီၤ. ဒီးဖဲအဝဲကိးဝဲ နီၢ်မၤရံလၢ “ပှၤလၢအဘၣ်ဘျုးအါတဂၤ” အခါ နီၢ်မၤရံ “အသူၣ်ကိၢ်အသးဂီၤ” ဝဲဒိၣ်မးလီၤ. နီၢ်မၤရံ ကဆိကမိၣ်လီၤအသးလၢ မ့ၢ်အဝဲအဲၣ်ဒိးတဲဝဲအခီပညီဒ်လဲၣ်, ဒီးယဘၣ်ဘျုးလၢမတၤတဂၤအအိၣ်လဲၣ်. (လူၤကၣ် ၁:၂၉) နီၢ်မၤရံ တမုၢ်လၢ်ဝဲလၢ အကဘၣ်ဘျုးလၢ ပှၤဟီၣ်ခိၣ်ဖိအအိၣ်ဘၣ်. ဘၣ်ဆၣ် မ့ၢ်လၢမူခိၣ်ကလူး အဲၣ်ဒိးစံးဝဲလၢ နီၢ်မၤရံ ဘၣ်ဘျုးဝဲလၢ ယဟိဝၤယွၤအအိၣ်အဃိ အဝဲသးခုဒိၣ်မးလီၤ. နီၢ်မၤရံအဲၣ်ဒိးဘၣ်ဘျုးလၢ ကစၢ်ယွၤအမဲာ်ညါ သနာ်က့ တအိၤဃံလီၤအသး လၢအဘၣ်ဘျုးလၢ ကစၢ်ယွၤအအိၣ်ဘၣ်. ပမ့ၢ်အဲၣ်ဒိးဘၣ်ဘျုးလၢ ကစၢ်ယွၤအမဲာ်ညါန့ၣ် ပဘၣ်အိၣ်ဒီးတၢ်ဆီၣ်လီၤသး ဒီးပတဘၣ်အိၤဃံလီၤပသးလၢ ပဒိးန့ၢ်ဘၣ်ကစၢ်ယွၤ အတၢ်ဘၣ်ဘျုးဘၣ်. ပကြၢးကွၢ်လိမၤဒိး နီၢ်မၤရံ အဒိအတဲာ်န့ၣ်လီၤ. ကစၢ်ယွၤ ထီဒါပှၤလၢအပာ်ထီၣ်ထီအသး ဘၣ်ဆၣ် အဝဲအဲၣ်ဒိးမၤစၢၤပှၤလၢ အအိၣ်ဒီးတၢ်ဆီၣ်လီၤသးန့ၣ်လီၤ.—ယၤ. ၄:၆.
နီၢ်မၤရံ တအိၤဃံလီၤအသး လၢအဘၣ်ဘျုးလၢ ကစၢ်ယွၤအအိၣ်ဘၣ်
၆. မူခိၣ်ကလူး ဟ့ၣ်လီၤနီၢ်မၤရံ မူဒါဒီးတၢ်ခွဲးတၢ်ယာ်လၢ အလီၤတိၢ်လီၤဆီမနုၤလဲၣ်.
၆ မူခိၣ်ကလူး ဟ့ၣ်လီၤနီၢ်မၤရံ မူဒါဒီးတၢ်ခွဲးတၢ်ယာ် လၢအလီၤတိၢ်လီၤဆီတခါလီၤ. ဒီးလၢမူဒါအံၤအဖီခိၣ်န့ၣ် နီၢ်မၤရံ ကဘၣ်အိၣ်ဒီးတၢ်ဆီၣ်လီၤသးလီၤ. မူခိၣ်ကလူး စံးဘၣ်အီၤလၢ အဝဲကအိၣ်ဖျဲၣ်ထီၣ် ဖိခွါတဂၤဒီးအဝဲကကဲထီၣ် ပှၤအရ့ဒိၣ်ကတၢၢ်တဂၤလၢ ဟီၣ်ခိၣ်ချၢန့ၣ်လီၤ. ဘၣ်ဃးဒီးဖိခွါတဂၤအံၤ မူခိၣ်ကလူး ကၤဘြံၤအ့လး စံးဝဲလၢ– “ဒီးကစၢ်ယွၤကဟ့ၣ်အီၤလၢ အပၢ်စီၤဒၤဝံးအလီၢ်ပစိာ်, ဒီးကပၢဘၣ်စီၤယၤကိာ်အဟံၣ် အစိၤစိၤအဃၣ်ဃၣ်လီၤ. ဒီးအဘီအမုၢ်န့ၣ် အကတၢၢ်တအိၣ်ဘၣ်လီၤ.” (လူၤကၣ် ၁:၃၂, ၃၃) နီၢ်မၤရံစ့ၢ်ကီးကသ့ၣ်ညါဝဲ လၢအပူၤကွံာ် အနံၣ်တကထိဃၣ်ဃၣ်န့ၣ် ကစၢ်ယွၤ မၤတၢ်အၢၣ်လီၤအီၤလီၤ ဒီးစီၤဒၤဝံး ဒ်သိးအစၢၤအသွဲၣ်တဂၤ ကပၢတၢ်လီၤထူလီၤယိာ်အဂီၢ်လီၤ. (၂ မူၤ. ၇:၁၂, ၁၃) လၢတၢ်န့ၣ်အဃိ နီၢ်မၤရံ အဖိခွါတဂၤအံၤကမ့ၢ်ဝဲ မ့းၡံအၤ လၢယွၤအခ့အပှၤတဖၣ် အိၣ်ခိးကွၢ်လၢ်ဝဲ ဖးယံာ်လံန့ၣ်လီၤ.
မူခိၣ်ကလူး ကၤဘြံၤအ့လး ဟ့ၣ်လီၤဝဲနီၢ်မၤရံ တၢ်ခွဲးတၢ်ယာ်လၢ အလီၤကမၢကမၣ်တခါ
၇. (က) ဖဲနီၢ်မၤရံ သံကွၢ်ကဒါက့ၤ မူခိၣ်ကလူးအခါ အဝဲပာ်ဖျါထီၣ်လၢ အပာ်လုၢ်ပာ်ပှ့ၤဝဲတၢ်မနုၤလဲၣ်. (ခ) မုၢ်မဆါတနံၤအံၤ ပှၤသးစၢ်တဖၣ်မၤလိန့ၢ် တၢ်မနုၤလၢနီၢ်မၤရံအအိၣ်သ့ဝဲလဲၣ်.
၇ တကးဒံးဘၣ် မူခိၣ်ကလူးစံးဘၣ် နီၢ်မၤရံလၢ အဖိခွါန့ၣ် “ကဘၣ်တၢ်ကိးအီၤလၢ တၢ်ထီကတၢၢ်အဖိခွါလီၤ.” နီၢ်မၤရံ မ့ၢ်ဝဲပှၤဟီၣ်ခိၣ်ဖိအဃိ အိၣ်ဖျဲၣ်ထီၣ်ဝဲ ယွၤအဖိခွါကသ့ဒ်လဲၣ်. အဂၤတမံၤန့ၣ် မ့ၢ်လၢနီၢ်မၤရံတဖျီဘၣ်အသး ဒီးစီၤယိၤသးဒံးဘၣ်အဃိ အဝဲအိၣ်ဖျဲၣ်ထီၣ်အဖိကသ့ဒ်လဲၣ်. နီၢ်မၤရံ သံကွၢ်မူခိၣ်ကလူးလၢ– “ယမ့ၢ်ဒၣ်မုၣ်ကနီၤတဂၤလီၤ. လၢတၢ်န့ၣ်အဃိ, တၢ်တမံၤအံၤ မၤအသးကသ့ဝဲလၢကျဲဒ်လဲၣ်.” (လူၤကၣ် ၁:၃၄, ခ့ခါစှီၤကျိာ်) ဖဲနီၢ်မၤရံ စံးဝဲလၢအမ့ၢ်ဒံး မုၣ်ကနီၤစီဆှံအခါန့ၣ် အဝဲတမဲာ်ဆှးဝဲဘၣ်. နီၢ်မၤရံ ပာ်လုၢ်ပာ်ပှ့ၤလီၤက့ၤအသး ဒီးပၢၤဃာ်ဝဲလုၢ်လၢ်သကဲာ်ပဝးလၢအဂ့ၤန့ၣ်လီၤ. မုၢ်မဆါတနံၤအံၤ ပှၤသးစၢ်အါဂၤ အဲၣ်ဒိးမၤကမၣ်မုၣ်ကမၣ်ခွါ တကးဒံးဘၣ် နံၤဘၣ်ဖၣ်လဲဝဲ ပှၤအဂၤတဖၣ်လၢ အပာ်လုၢ်ပာ်ပှ့ၤအလုၢ်လၢ်သကဲာ်ပဝးလၢအဂ့ၤန့ၣ်လီၤ. ဟီၣ်ခိၣ်အတၢ်အိၣ်သးတဖၣ် ဆီတလဲအသးဒိၣ်မးလီၤ. ဘၣ်ဆၣ် ယဟိဝၤယွၤန့ၣ် တဆီတလဲဝဲနီတဘျီဘၣ်. (မၤ. ၃:၆) ဒ်နီၢ်မၤရံအစိၤအသိး ကစၢ်ယွၤ ပာ်လုၢ်ပာ်ပှ့ၤဝဲ ပှၤလၢအမၤထွဲအတၢ်သိၣ်တၢ်သီလၢ ဘၣ်ဃးဒီး လုၢ်လၢ်သကဲာ်ပဝးတကပၤန့ၣ်လီၤ.—ဖး ဧ့ၤဘြံၤ ၁၃:၄ တက့ၢ်.
၈. နီၢ်မၤရံ မ့ၢ်ပှၤလၢအတလၢတပှဲၤအဃိ အိၣ်ဖျဲၣ်ထီၣ်ဝဲ ဖိလၢအလၢအပှဲၤကသ့ဒ်လဲၣ်.
၈ နီၢ်မၤရံ မ့ၢ်ကစၢ်ယွၤအခ့အပှၤ လၢအတီတဂၤဘၣ်ဆၣ် အဝဲမ့ၢ်စ့ၢ်ကီးပှၤဟီၣ်ခိၣ်ဖိလၢ အတလၢတပှဲၤဘၣ်တဂၤလီၤ. မ့မ့ၢ်ဒ်န့ၣ်န့ၣ် နီၢ်မၤရံကအိၣ်ဖျဲၣ်ထီၣ်ဝဲ အဖိလၢအလၢအပှဲၤတဂၤ လၢအမ့ၢ်ကစၢ်ယွၤအဖိခွါ ကသ့ဝဲလၢကျဲဒ်လဲၣ်. မူခိၣ်ကလူး ကၤဘြံၤအ့လး တဲဘၣ်အီၤလၢ– “သးစီဆှံကဟဲလီၤလၢနလိၤ, ဒီးတၢ်ထီကတၢၢ်အစိအကမီၤ ကကဒုဘၣ်နၤလီၤ. မၤသးဒ်န့ၣ်ဒီး တၢ်စီဆှံလၢအကအိၣ်ဖျဲၣ်ဝဲန့ၣ်, ကဘၣ်တၢ်ကိးအီၤလၢ ယွၤအဖိခွါစ့ၢ်ကီးလီၤ.” (လူၤကၣ် ၁:၃၅) ညီနုၢ်န့ၣ် ပှၤဟီၣ်ခိၣ်ဖိတဖၣ် ဟ့ၣ်လီၤဝဲအဖိအလံၤတဖၣ်လၢ တၢ်ဒဲးဘးဒီးတၢ်တလၢတပှဲၤန့ၣ်လီၤ. ဘၣ်ဆၣ် ယဟိဝၤယွၤ မၤတၢ်လီၤလးတခါ ဒီးဖၢနုာ်လီၤအဖိခွါအသးသမူလၢ နီၢ်မၤရံ အဒၢလီၢ်အပူၤန့ၣ်လီၤ. တကးဒံးဘၣ် ဒ်သိးအဖိခွါသုတဒိးန့ၢ်ဘၣ် တၢ်ဒဲးဘးဒီးတၢ်တလၢတပှဲၤတဂ့ၤအဂီၢ် ယဟိဝၤယွၤ သူဝဲအသးစီဆှံ မ့တမ့ၢ် အသဟီၣ်လၢ “ကကဒုဘၣ်” နီၢ်မၤရံဒီးဒီသဒၢဝဲဖိသၣ်န့ၣ်လီၤ. မ့ၢ်နီၢ်မၤရံ နာ်ဝဲဒ်မူခိၣ်ကလူး အၢၣ်လီၤတ့ၢ်အီၤအသိးစ့ၢ်ကီးဧါ. ဒီးနီၢ်မၤရံ တဲဆၢက့ၤအီၤဒ်လဲၣ်.
နီၢ်မၤရံ တဲဆၢက့ၤမူခိၣ်ကလူး ကၤဘြံၤအ့လး ဒ်လဲၣ်
၉. (က) ပှၤလၢအ တနာ်ဝဲလၢနီၢ်မၤရံ အိၣ်ဖျဲၣ်ထီၣ်အဖိခွါန့ၣ် ဘၣ်မနုၤအဃိ အဝဲသ့ၣ်အတၢ်ထံၣ်ကမၣ်ဝဲလဲၣ်. (ခ) မူခိၣ်ကလူး ကၤဘြံၤအ့လး ဒုးဆူၣ်ထီၣ်နီၢ်မၤရံ အတၢ်နာ်ဒ်လဲၣ်.
၉ လံာ်စီဆှံပာ်ဖျါထီၣ်ဝဲလၢ နီၢ်မၤရံလၢအမ့ၢ် မုၣ်ကနီၤစီဆှံတဂၤအံၤ အိၣ်ဖျဲၣ်ထီၣ်အဖိခွါ ဘၣ်ဆၣ်ပှၤအါဂၤဃုာ်ဒီး ပှၤခရံာ်ဖိတနီၤလၢ အထီၣ်ဘၣ်တၢ်ကူၣ်ဘၣ်ကူၣ်သ့ကၠိလၢ အပတီၢ်ထီန့ၣ် တနာ်ဝဲလီၤတံၢ်လီၤဆဲးဘၣ်. အဝဲသ့ၣ်ထီၣ်ဘၣ်ကၠိတဘျုးနံၣ်ညါ ဘၣ်ဆၣ် တၢ်မ့ၢ်တၢ်တီယိယိဖိအိၣ်ဝဲတခါ လၢအဝဲသ့ၣ်တနၢ်ပၢၢ်ဝဲဘၣ်. မူခိၣ်ကလူး ကၤဘြံၤအ့လး စံးဝဲလၢ “တၢ်လၢယွၤမၤတသ့ဘၣ်န့ၣ်, တအိၣ်ဘၣ်နီတမံၤဘၣ်.” (လူၤကၣ် ၁:၃၇) မ့ၢ်လၢနီၢ်မၤရံ အိၣ်ဒီးတၢ်နာ်လၢအဂၢၢ်ကျၢၤအဃိ နာ်ဝဲလၢမူခိၣ်ကလူး ကၤဘြံၤအ့လး အတၢ်ကတိၤန့ၣ် မ့ၢ်တၢ်လၢအမ့ၢ်အတီန့ၣ်လီၤ. ဘၣ်ဆၣ် နီၢ်မၤရံန့ၣ် တဟးနာ်ကြီကယဲၢ်တၢ်လၢပှၤတဲအီၤဘၣ်. နီၢ်မၤရံအတၢ်နာ် အိၣ်သူၣ်ထီၣ်အသးလၢ တၢ်အုၣ်အသးနီၢ်ကီၢ်အဖီခိၣ်လီၤ. ဒီးမူခိၣ်ကလူး ကၤဘြံၤအ့လး အဲၣ်ဒိးပာ်ဖျါထီၣ်န့ၢ်အီၤ တၢ်အုၣ်အသးအဂၤတဖၣ် လၢကဒုးဆူၣ်ထီၣ် နီၢ်မၤရံ အတၢ်နာ်အါန့ၢ်အလီၢ်န့ၣ်လီၤ. လၢတၢ်န့ၣ်အဃိ ကၤဘြံၤအ့လး စံးဘၣ်အီၤလၢ ခီဖျိလၢ ကစၢ်ယွၤမၤတၢ်လီၤလးအဃိ နဘူးနတံၢ်နီၢ်အ့းလံၤစါဘ့း လၢအသးပှၢ် ဒီးမ့ၢ်တ့ၢ်ပှၤတူာ်ဖိန့ၣ် ဒၢထီၣ်ဝဲလံ.
၁၀. နီၢ်မၤရံ အိၣ်ဒီးတၢ်ခွဲးတၢ်ယာ်လီၤဆီလၢ ကအိၣ်ဖျဲၣ်ထီၣ်ဝဲ ကစၢ်ယွၤအဖိခွါ ဘၣ်ဆၣ် ဘၣ်မနုၤအဃိ မူဒါလၢအဒိးန့ၢ်ဘၣ်ဝဲအံၤ တမ့ၢ်တၢ်ညီလၢအဂီၢ်လဲၣ်.
၁၀ မ့ၢ်နီၢ်မၤရံ ကမၤဝဲဒ်လဲၣ်. အဝဲဒိးန့ၢ်ဘၣ်မူဒါလၢ ကစၢ်ယွၤအအိၣ်ဒီး တၢ်အုၣ်အသးအိၣ်ဝဲ လီၤတံၢ်လီၤဆဲးလၢ မူခိၣ်ကလူး ကၤဘြံၤအ့လးအတၢ်ကတိၤ ကဟဲလၢထီၣ်ပှဲၤထီၣ်ဝဲလီၤ. နီၢ်မၤရံ အိၣ်ဒီးတၢ်ခွဲးတၢ်ယာ်လီၤဆီလၢ ကအိၣ်ဖျဲၣ်ထီၣ်ဝဲ ကစၢ်ယွၤအဖိခွါ ဘၣ်ဆၣ် အမူဒါအံၤတမ့ၢ်တၢ်ညီလၢအဂီၢ်ဘၣ်. အဒိ နီၢ်မၤရံ အဲၣ်တီဃာ်ဒီးစီၤယိၤသးဝံၤဝဲလံ. စီၤယိၤသး မ့ၢ်သ့ၣ်ညါလၢ အဝဲဒၢထီၣ်န့ၣ် မ့ၢ်အကအဲၣ်ဒိးဖျီအသးဒီးအီၤဒံးဧါ. အဂၤတမံၤန့ၣ် မူဒါတခါအံၤ မ့ၢ်မူဒါလၢအရ့ဒိၣ်ဝဲဒိၣ်မးလီၤ. နီၢ်မၤရံကဘၣ်ဒၢထီၣ်ဝဲ ကစၢ်ယွၤအဖိခွါလၢအမ့ၢ် သးသမူလၢအလုၢ်ဒိၣ်ပှ့ၤဒိၣ်ကတၢၢ်လၢ တၢ်ဘၣ်တ့ခဲလၢာ်အကျါန့ၣ်လီၤ. ဒီးဖဲဖိသၣ်အံၤ မၤစၢၤလီၤအသး တသ့ဒံးဘၣ်အခါ အဝဲကဘၣ်ကွၢ်ထွဲအီၤ ဒီးဒီသဒၢအီၤလၢ ပှၤအၢပှၤသီတဖၣ်အကျါန့ၣ်လီၤ. မူဒါအဝဲအံၤ ဃၢဒိၣ်မးလၢ နီၢ်မၤရံအဂီၢ်လီၤ.
၁၁, ၁၂. (က) ပိာ်ခွါတနီၤလၢအတၢ်နာ်ဂၢၢ်ကျၢၤဒၣ်လဲာ် ဖဲကစၢ်ယွၤဟ့ၣ်လီၤအီၤ မူဒါအခါ အဝဲသ့ၣ်မၤဝဲဒ်လဲၣ်. (ခ) ဖဲနီၢ်မၤရံ တဲဆၢက့ၤမူခိၣ်ကလူး ကၤဘြံၤအ့လးအခါ အဝဲပာ်ဖျါထီၣ်လၢ အဝဲမ့ၢ်ပှၤဒ်လဲၣ်တဂၤလဲၣ်.
၁၁ လံာ်စီဆှံ ပာ်ဖျါထီၣ်န့ၢ်ပှၤလၢ တဘျီတခီၣ်န့ၣ် ပိာ်ခွါလၢအအိၣ်ဒီးတၢ်နာ် လၢအဂၢၢ်အကျၢၤဒၣ်လဲာ် ဟံးထီၣ်ဖီၣ်ထီၣ်မူဒါလၢ ကစၢ်ယွၤဟ့ၣ်လီၤအဝဲသ့ၣ် တဘူၣ်ဝဲဘၣ်. ဖဲကစၢ်ယွၤဟ့ၣ်လီၤစီၤမိၤၡ့ မူဒါလၢ အကကတိၤခၢၣ်စးတၢ်လၢ ယွၤအဂီၢ်န့ၣ် အဝဲတဲပူၤဖျဲးအသးလၢ ယတဲတၢ်တသ့ဘၣ်. (၂ မိၤ. ၄:၁၀) ဝံယံးရမံယၤစ့ၢ်ကီး ဖဲကစၢ်ယွၤဟ့ၣ်လီၤအီၤမူဒါအဆၢကတီၢ် အဝဲတဲပူၤဖျဲးအသးလၢ “ယမ့ၢ်ဖိသၣ်” လီၤ. (ယံး. ၁:၆) ဒီးဖဲကစၢ်ယွၤဟ့ၣ်လီၤ ဝံယိၤနါမူဒါအဆၢကတီၢ် အဝဲဃ့ၢ်ကွံာ်လၢအယံၤန့ၣ်လီၤ. (ယိၤနါ ၁:၃) မ့မ့ၢ် နီၢ်မၤရံန့ၣ် အဝဲကမၤဝဲဒ်လဲၣ်.
၁၂ အဝဲစံးဘၣ် မူခိၣ်ကလူး ကၤဘြံၤအ့လးလၢ– “ကွၢ်ကွၢ်, ကစၢ်အကုၢ်ပိာ်မုၣ်လီၤ. မ်တၢ်ကမၤအသးဒီးယၤ ဒ်နကလုၢ်အသိးန့ၣ်တက့ၢ်.” နီၢ်မၤရံ အိၣ်ဒီးတၢ်ဆီၣ်လီၤသး ဒီးတၢ်ဒိကနၣ်အဃိ ကဲထီၣ်တၢ်ဒိဂ့ၤတဲာ်ဘၣ် လၢပဂီၢ်လီၤ. (လူၤကၣ် ၁:၃၈) ကုၢ်လၢအမ့ၢ်ပိာ်မုၣ်န့ၣ် မ့ၢ်ဝဲကုၢ်လၢအပတီၢ်ဖုၣ်ကတၢၢ် ဒီးအတၢ်အိၣ်မူအိၣ်လၢ အကစၢ်အစုပူၤလီၤ. နီၢ်မၤရံစ့ၢ်ကီး တူၢ်ဘၣ်ဝဲလၢအတၢ်အိၣ်မူန့ၣ် အိၣ်လၢအကစၢ် ယဟိဝၤယွၤအစုပူၤလီၤ. အဝဲနာ်ဝဲလၢ ကစၢ်ယွၤ ကဒီသဒၢအီၤဒီးကမၤစၢၤအီၤလီၤ. ဒီးနီၢ်မၤရံသ့ၣ်ညါဝဲလၢ ကစၢ်ယွၤကတီဒီးပှၤလၢအတီဒီးအီၤတဖၣ် တကးဒံးဘၣ် သ့ၣ်ညါစ့ၢ်ကီးဝဲလၢ အဝဲမ့ၢ်ဂုာ်ကျဲးစၢးလၢအဂ့ၤကတၢၢ် ဒ်သိးကမၤလၢပှဲၤဝဲ မူဒါအံၤအဂီၢ်န့ၣ် ကစၢ်ယွၤ ကဆိၣ်ဂ့ၤအီၤန့ၣ်လီၤ.—စံး. ၁၈:၂၅.
နီၢ်မၤရံ သ့ၣ်ညါဝဲလၢ အတၢ်အိၣ်မူန့ၣ် အိၣ်လၢ ယဟိဝၤယွၤအစုပူၤ
၁၃. မူဒါလၢ ကစၢ်ယွၤဟ့ၣ်လီၤပှၤန့ၣ် ပမ့ၢ်တူၢ်ဘၣ်လၢ ပမၤအီၤတန့ၢ်ဘၣ်ဒီးကီခဲဝဲလၢပဂီၢ်န့ၣ် နီၢ်မၤရံ အဒိအတဲာ်ကဲထီၣ်တၢ်မၤစၢၤ လၢပဂီၢ်ဒ်လဲၣ်.
၁၃ မူဒါလၢကစၢ်ယွၤ ဟ့ၣ်လီၤပှၤန့ၣ် တဘျီတခီၣ် ပတူၢ်ဘၣ်လၢ ပမၤအီၤတန့ၢ်ဘၣ် ဒီးကီခဲဝဲလၢပဂီၢ်လီၤ. ဘၣ်ဆၣ် လံာ်စီဆှံ ပာ်ဖျါထီၣ်န့ၢ်ပှၤလၢ ပနာ်န့ၢ်ယဟိဝၤယွၤ ဒ်နီၢ်မၤရံအသိးသ့ဝဲလီၤ. (ကတိၤ. ၃:၅, ၆) ပမ့ၢ်မၤဒ်န့ၣ်န့ၣ် ယဟိဝၤယွၤကမၤစၢၤပှၤဒ်သိး ပတၢ်နာ်အီၤကဒံးယံာ်ဒံးဆူၣ်ထီၣ်ဝဲလီၤ.
နီၢ်မၤရံလဲၤအိၣ်သကိး နီၢ်အ့းလံၤစါဘ့း
၁၄, ၁၅. (က) ဖဲနီၢ်မၤရံ လဲၤဟးအိၣ်သကိး နီၢ်အ့းလံၤစါဘ့းဒီးစီၤစဃၤရံအခါ ယဟိဝၤယွၤ ဆိၣ်ဂ့ၤအီၤဒ်လဲၣ်. (ခ) လူၤကၣ် ၁:၄၆-၅၅ န့ၣ် ပာ်ဖျါထီၣ်န့ၢ်ပှၤ နီၢ်မၤရံအဂ့ၢ်ဒ်လဲၣ်.
၁၄ ဖဲနီၢ်မၤရံနၢ်ဟူဘၣ်ဝဲ နီၢ်အ့းလံၤစါဘ့းအကစီၣ်လၢ မူခိၣ်ကလူး ကၤဘြံၤအ့လးအိၣ်အခါ အဝဲန့ၢ်ဂံၢ်န့ၢ်ဘါအါမးလီၤ. လၢဟီၣ်ခိၣ်ချၢအံၤ ပှၤပိာ်မုၣ်အဂၤလၢ ကနၢ်ပၢၢ်စၢၤဝဲနီၢ်မၤရံ ထဲသိးဒီးနီၢ်အ့းလံၤစါဘ့းန့ၣ်တအိၣ်နီတဂၤဘၣ်. တဘျီဃီန့ၣ် နီၢ်မၤရံလဲၤဝဲဆူ နီၢ်အ့းလံၤစါဘ့းအအိၣ်လီၤ. နီၢ်အ့းလံၤစါဘ့းန့ၣ်အိၣ်ဝဲလၢ ယူဒၤအထံကီၢ် လၢကစၢၢ်ကလိအကျါန့ၣ်လီၤ. ဘၣ်သ့ၣ်သ့ၣ် ဒ်သိးနီၢ်မၤရံ လဲၤကတုၤဝဲအဂီၢ်န့ၣ် ကဘၣ်လဲၤဝဲသၢသီလွံၢ်သီကျဲလီၤ. ဖဲနီၢ်မၤရံလဲၤနုာ်လီၤလၢ နီၢ်အ့းလံၤစါဘ့း ဒီးပှၤလုၢ်တၢ်အဒိၣ် စီၤစဃၤရံအဟံၣ်အခါ, ယဟိဝၤယွၤ ဆိၣ်ဂ့ၤအီၤခီဖျိလၢ အဝဲဟ့ၣ်အါထီၣ်အီၤတၢ်အုၣ်အသး ဒ်သိးကမၤဆူၣ်ထီၣ်အတၢ်နာ်န့ၣ်လီၤ. နီၢ်အ့းလံၤစါဘ့း နၢ်ဟူဘၣ်ဝဲ နီၢ်မၤရံ အတၢ်ဆၢဂ့ၤဆၢဝါဒီး တဘျီဃီန့ၣ် အဖိလၢအဟၢဖၢပူၤ ဟူးဂဲၤဝဲလၢ တၢ်သူၣ်ဖှံသးညီန့ၣ်လီၤ. နီၢ်အ့းလံၤစါဘ့း လၢထီၣ်ပှဲၤထီၣ်ဒီးသးစီဆှံဒီးကိးဝဲနီၢ်မၤရံလၢ “ယကစၢ်အမိၢ်” လီၤ. ကစၢ်ယွၤဒုးသ့ၣ်ညါ နီၢ်အ့းလံၤစါဘ့း လၢနီၢ်မၤရံအဖိခွါန့ၣ် ကကဲထီၣ်ဝဲအကစၢ်, မ့းၡံအၤန့ၣ်လီၤ. တကးဒံးဘၣ် သးစီဆှံထိးဘၣ် နီၢ်အ့းလံၤစါဘ့းအသးလၢကစံးပတြၢၤဝဲ နီၢ်မၤရံ မ့ၢ်လၢအအိၣ်ဒီး တၢ်ဒိကနၣ်အဃိလီၤ. အဝဲစံးဝဲ– “ပိာ်မုၣ်လၢအစူၢ်က့ၤနာ်က့ၤလၢ တၢ်လၢယွၤစံးဘၣ်အီၤကလၢထီၣ်ပှဲၤထီၣ်ဝဲန့ၣ်, ဘၣ်တၢ်ဆိၣ်ဂ့ၤဝဲလီၤ.” (လူၤကၣ် ၁:၃၉-၄၅) မ့ၢ်လံ, တၢ်လၢယဟိဝၤယွၤ အၢၣ်လီၤဝဲဒီးနီၢ်မၤရံန့ၣ် ကဟဲလၢထီၣ်ပှဲၤထီၣ်ဝဲသပှၢ်ကတၢၢ်လီၤ.
နီၢ်မၤရံဒီးနီၢ်အ့းလံၤစါဘ့း အတၢ်ရ့လိာ်သးန့ၣ် ကဲထီၣ်တၢ်ဂံၢ်တၢ်ဘါလၢ အဝဲသ့ၣ်အဂီၢ်
၁၅ ဖဲတၢ်မၤအသးဒ်န့ၣ် ဝံၤအလီၢ်ခံ နီၢ်မၤရံ စံးထီၣ်ပတြၢၤဝဲ ယဟိဝၤယွၤလီၤ. ဒီးအတၢ်ကတိၤတဖၣ်န့ၣ် ဘၣ်တၢ်ကွဲးနီၣ်ဃာ်အီၤလၢ လံာ်စီဆှံအပူၤလီၤတံၢ်လီၤဆဲးလီၤ. (ဖး လူၤကၣ် ၁:၄၆-၅၅ တက့ၢ်.) လၢလံာ်စီဆှံ အတၢ်ကွဲးနီၣ်အကျါန့ၣ် နီၢ်မၤရံကတိၤတၢ်တဘျီအံၤမ့ၢ်တၢ်လၢအ ယံာ်ကတၢၢ်အဃိ ပာ်ဖျါထီၣ်န့ၢ်ပှၤလၢ အတၢ်ပာ်သူၣ်ပာ်သးအိၣ်ဒ်လဲၣ်အဂ့ၢ်န့ၣ်လီၤ. နီၢ်မၤရံ ဒိးန့ၢ်ဘၣ်တၢ်ခွဲးတၢ်ယာ်လီၤဆီလၢ ကကဲထီၣ်ဘၣ် မ့းၡံအၤအမိၢ်အဃိ အဝဲစံးထီၣ်ပတြၢၤဝဲ ယဟိဝၤယွၤလီၤ. ဒီးအတၢ်စံးထီၣ်ပတြၢၤန့ၣ် ပာ်ဖျါထီၣ်လၢ အဝဲမ့ၢ်ပှၤလၢ အသ့ၣ်ညါဆၢက့ၤတၢ်အဘျုးန့ၣ်လီၤ. နီၢ်မၤရံပာ်ဖျါထီၣ်စ့ၢ်ကီးအတၢ်နာ် ခီဖျိလၢအဝဲစံးဝဲလၢ ယဟိဝၤယွၤကဆီၣ်လီၤ ပှၤလၢအပာ်ထီၣ်ထီအသးဒီး ကမၤစၢၤပှၤလၢအဆီၣ်လီၤသး ဃုာ်ဒီးပှၤဖှီၣ်ဖိယာ်ဖိတဖၣ်လၢ အဂုာ်ကျဲးစၢးမၤတၢ်ဘၣ်အသးန့ၣ်လီၤ. တကးဒံးဘၣ် ပထံၣ်ဘၣ်လၢ နီၢ်မၤရံအတၢ်သ့ၣ်ညါနၢ်ပၢၢ် လံာ်စီဆှံအိၣ်ဝဲထဲလဲၣ်န့ၣ်လီၤ. ဘၣ်သ့ၣ်သ့ၣ် ဖဲလံာ်စီဆှံတတီၤအံၤအပူၤ နီၢ်မၤရံယၢၤထီၣ်ဝဲ လံာ်စီဆှံအဆၢလၢအဂၤတဖၣ်အဂ့ၢ် အိၣ်ဝဲအါန့ၢ်ဒံး အဘျီ ၂၀ န့ၣ်လီၤ. *
၁၆, ၁၇. (က) ပကြၢးကွၢ်လိ နီၢ်မၤရံဒီးအဖိခွါ အတၢ်ပာ်သူၣ်ပာ်သးလၢကျဲဒ်လဲၣ်. (ခ) နီၢ်မၤရံ လဲၤအိၣ်သကိး နီၢ်အ့းလံၤစါဘ့းအဃိ ဒုးသ့ၣ်နီၣ်ထီၣ်က့ၤပှၤလၢ တၢ်ဂ့ၢ်မနုၤလဲၣ်.
၁၆ နီၢ်မၤရံ မ့ၢ်ပှၤလၢအဆိကမိၣ်ထံဝဲကစၢ်ယွၤ အကလုၢ်ကထါလီၤတံၢ်လီၤဆဲးလီၤ. ဒီးအဝဲတကတိၤတၢ်လၢ အနီၢ်ကစၢ်အတၢ်ကတိၤဘၣ်, အဝဲသူဝဲကစၢ်ယွၤအကလုၢ်ကထါ လၢတၢ်ဆီၣ်လီၤသးအပူၤလီၤ. ဖိသၣ်လၢအိၣ်လၢအဟၢဖၢပူၤစ့ၢ်ကီး ဖဲအနီၢ်ဒိၣ်ထီၣ်ဝဲအခါ အိၣ်ဒီးတၢ်ဆီၣ်လီၤသး ဒ်သိးဒီးအီၤလီၤ. ဘၣ်တဘျီအဝဲစံးဝဲလၢ– “ယတၢ်သိၣ်တၢ်သီအံၤ, တမ့ၢ်ဘၣ်ယတၢ်ဒၣ်ယဲဘၣ်. မ့ၢ်ပှၤလၢအမၢလီၤယၤတဂၤ အတၢ်လီၤ.” (ယိၤဟၣ် ၇:၁၆) ပဝဲစ့ၢ်ကီး ပကြၢးသံကွၢ်လီၤက့ၤပသးလၢ– ‘မ့ၢ်ယပာ်လုၢ်ပာ်ပှ့ၤ ဒီးပာ်ကဲယွၤအကလုၢ်ကထါ ဒ်နီၢ်မၤရံအသိးစ့ၢ်ကီးဧါ. မ့တမ့ၢ်ဘၣ်န့ၣ် မ့ၢ်ယသိၣ်လိပှၤဂၤ ဒ်ယနီၢ်ကစၢ်အတၢ်ဆိကမိၣ်အိၣ်ဝဲအသိးဧါ.’ နီၢ်မၤရံ အတၢ်ပာ်သူၣ်ပာ်သးန့ၣ် မ့ၢ်တၢ်လၢအလီၤကွၢ်လိဝဲသပှၢ်ကတၢၢ်လီၤ.
၁၇ နီၢ်မၤရံ အိၣ်ဒီးနီၢ်အ့းလံၤစါဘ့း သၢလါဃၣ်ဃၣ် ဒီးအဝဲသ့ၣ်ကဟ့ၣ်ဂံၢ်ဟ့ၣ်ဘါ လိာ်အသးတဂၤဒီးတဂၤလီၤ. (လူၤကၣ် ၁:၅၆) လံာ်စီဆှံတဆၢအံၤ ဒုးသ့ၣ်နီၣ်ထီၣ်က့ၤပှၤလၢ တၢ်ရ့တံၤရ့သကိးန့ၣ် ကဲထီၣ်တၢ်ဂံၢ်တၢ်ဘါလၢပဂီၢ်န့ၣ်လီၤ. ပမ့ၢ်ဃုထၢတံၤသကိးလၢ အအဲၣ်ယဟိဝၤယွၤနီၢ်နီၢ်န့ၣ် ပတၢ်ရ့လိာ်သးဒီး ယဟိဝၤယွၤကဘူးထီၣ်ဝဲလီၤ. (ကတိၤ. ၁၃:၂၀) လၢခံန့ၣ် နီၢ်မၤရံ က့ၤကဒါက့ၤဆူအဟံၣ်လီၤ. ဖဲစီၤယိၤသး သ့ၣ်ညါဝဲလၢ နီၢ်မၤရံဒၢထီၣ်ဝဲအခါ အဝဲကတဲဝဲဒ်လဲၣ်.
နီၢ်မၤရံ ဒီးစီၤယိၤသး
၁၈. နီၢ်မၤရံ တဲဘၣ်စီၤယိၤသးဒ်လဲၣ်, ဒီးစီၤယိၤသး မၤဝဲဒ်လဲၣ်.
၁၈ ဖျါလၢနီၢ်မၤရံ တထုးတၢ်ဆၢကတီၢ်ဒ်သိး ကတဲဘၣ်စီၤယိၤသးလၢ အဝဲအိၣ်ထီၣ်ဒီးအဟုးအသးန့ၣ်ဘၣ်. တချုးဖဲနီၢ်မၤရံတဲဘၣ်ဝဲ စီၤယိၤသးအခါ အဝဲကဆိကမိၣ်ဝဲလၢ စီၤယိၤသးမ့ၢ်နၢ်ဟူဘၣ်ဝဲတၢ်ကစီၣ်အံၤန့ၣ် အသးကမၤအသးဒ်လဲၣ်. ဘၣ်ဆၣ်သနာ်က့ နီၢ်မၤရံ လဲၤဆူစီၤယိၤသးအဟံၣ် ဒီးတဲဖျါထီၣ်ဝဲ တၢ်ဂ့ၢ်တၢ်ကျိၤလၢ အဟဲကဲထီၣ်အသးဒီးအီၤခဲလၢာ်န့ၣ်လီၤ. ဆိကမိၣ်ကွၢ်, ဖဲစီၤယိၤသး နၢ်ဟူဘၣ်ဝဲတၢ်ကစီၣ်အံၤအခါ ကကဲထီၣ်တၢ်သးတံာ်တာ် လၢအဂီၢ်ထဲလဲၣ်န့ၣ်တက့ၢ်. စီၤယိၤသး ကဘၣ်နာ်ဝဲနီၢ်မၤရံ အတၢ်ကတိၤဧီၤကီကီ တနာ်ဧီၤကီကီအဃိ အဝဲကမၤဝဲဒ်လဲၣ်. စီၤယိၤသးအတၢ်ဆိကမိၣ် ကဟဲထီၣ်ဝဲဒီဒူၣ်ဒီထၢန့ၣ်လီၤ. ဘၣ်ဆၣ် အတၢ်ဆိကမိၣ် ကဟဲထီၣ်ဝဲဒ်လဲၣ်န့ၣ် လံာ်စီဆှံတပာ်ဖျါထီၣ်ဝဲဘၣ်. ဖဲန့ၣ်အဆၢကတီၢ် ပှၤလၢအဘၣ်တၢ်အဲၣ်တီဃာ်အီၤန့ၣ် ပှၤပာ်ပနီၣ်အီၤဒ် နီၢ်ဒီမါဝၤအသိးန့ၣ်လီၤ. ဒီးလံာ်စီဆှံပာ်ဖျါထီၣ်ဝဲလၢ အဝဲဆၢတဲာ်လီၤအသးလၢ ကမၤလီၤဖးအသးဒီးနီၢ်မၤရံလီၤ. ဒ်လဲၣ်ဂ့ၤဒ်လဲၣ်ဂ့ၤ အဝဲတအဲၣ်ဒိးမၤမဲာ်ဆှး နီၢ်မၤရံ လၢပှၤအါဂၤအမဲာ်ညါအဃိ အဝဲမၤလီၤဖးအသးဒီးအီၤ ကစုဒုလီၤ. (မး. ၁:၁၈, ၁၉) နီၢ်မၤရံ ထံၣ်ဘၣ်ဝဲလၢ စီၤယိၤသး လၢအမ့ၢ်ပှၤလၢအသးဂ့ၤတဂၤအံၤ ပှဲၤဝဲဒီးတၢ်သူၣ်ကိၢ်သးဂီၤအဃိ နီၢ်မၤရံအသးဘၣ်ဒိဝဲဒိၣ်မးလီၤ. စီၤယိၤသး တနာ်အီၤသနာ်က့ အဝဲတပာ်ဒ့ၣ်ပာ်ကမၣ် စီၤယိၤသးဘၣ်.
၁၉. ဒ်သိးစီၤယိၤသး ကဆၢတဲာ်တၢ်လၢအဘၣ်အဂီၢ် ယဟိဝၤယွၤ မၤစၢၤအီၤဒ်လဲၣ်.
၁၉ ယဟိဝၤယွၤ မၤစၢၤစီၤယိၤသး ဒ်သိးကဆၢတဲာ်တၢ်လၢအဘၣ်လီၤ. လၢစီၤယိၤသး အတၢ်မံမီၢ်အပူၤန့ၣ် မူခိၣ်ကလူးတဂၤတဲဘၣ်အီၤလၢ နီၢ်မၤရံဒၢထီၣ်လၢတၢ်လီၤလးအပူၤလီၤ. ဖဲန့ၣ်အခါ စီၤယိၤသး အတၢ်သူၣ်ကိၢ်သးဂီၤခုၣ်လီၤက့ၤဝဲ သပှၢ်ကတၢၢ်လီၤ. ဒ်နီၢ်မၤရံအသိး စီၤယိၤသးစ့ၢ်ကီးမၤဝဲ ဒ်ကစၢ်ယွၤတဲအီၤအသိးန့ၣ်လီၤ. လၢတၢ်န့ၣ်အဃိ စီၤယိၤသး ဖျီအသးဒီးနီၢ်မၤရံ ဒီးအိၣ်ကတဲာ်ကတီၤအသးလၢ ကဟံးထီၣ်ဖီၣ်ထီၣ်မူဒါလၢ ကကွၢ်ဒိၣ်ထီၣ်ဝဲ ယဟိဝၤယွၤအဖိခွါန့ၣ်လီၤ.—မး. ၁:၂၀-၂၄.
၂၀, ၂၁. ပှၤလၢအအိၣ်ဒီးအသးသမူတံၤသကိး ဒီးပှၤလၢအအဲၣ်ဒိး ဆီဟံၣ်ဆီဃီတဖၣ်န့ၣ် ဟံးန့ၢ်တၢ်မၤလိလၢ နီၢ်မၤရံဒီးစီၤယိၤသး အအိၣ်သ့ဒ်လဲၣ်.
၂၀ ပှၤလၢအအိၣ်ဒီးအသးသမူတံၤသကိး ဒီးပှၤလၢအအဲၣ်ဒိး ဆီဟံၣ်ဆီဃီတဖၣ်စ့ၢ်ကီး ကြၢးကွၢ်လိဝဲ ပှၤနီၢ်ဒီမါဝၤလၢအအိၣ်မူတ့ၢ် လၢအပူၤကွံာ်အနံၣ် ၂,၀၀၀ အံၤန့ၣ်လီၤ. ဖဲစီၤယိၤသး ထံၣ်ဘၣ်ဝဲအမါလၢ အသးစၢ်ဒံးတဂၤအံၤ မၤလၢပှဲၤဝဲမိၢ်အမူဒါအခါ အဝဲကသးခုလၢ ယဟိဝၤယွၤ အမူခိၣ်ကလူး ဟဲဟ့ၣ်သဆၣ်ထီၣ်အီၤလၢ ကဖျီအသးဒီးနီၢ်မၤရံအဃိလီၤ. တဘျီအံၤဒု စီၤယိၤသးနၢ်ပၢၢ်ဝဲလၢ ဖဲအဝဲကဘၣ်ဆၢတဲာ်တၢ်အခါ အရ့ဒိၣ်ဝဲလၢ အကဘၣ်သန့ၤအသးလၢ ကစၢ်ယွၤအအိၣ်န့ၣ်လီၤ. (စံး. ၃၇:၅; ကတိၤ. ၁၈:၁၃) လၢခံန့ၣ် ဟံၣ်ခိၣ်စီၤယိၤသးအံၤ တချုးဖဲအဆၢတဲာ်တၢ်အခါ အဝဲဆိကမိၣ်တၢ်လီၤတံၢ်လီၤဆဲး ဒီးအိၣ်ဒီးတၢ်ဒိသူၣ်ဒိသးလီၤ.
၂၁ တကးဒံးဘၣ် မ့ၢ်လၢနီၢ်မၤရံ သးအိၣ်ဖျီအသးဒီး စီၤယိၤသးအဃိ ပဟံးန့ၢ်တၢ်မၤလိလၢ အအိၣ်သ့ဒ်လဲၣ်. အဆိကတၢၢ်န့ၣ် စီၤယိၤသး ကတူၢ်လိာ်ဝဲတၢ်လၢ နီၢ်မၤရံတဲဘၣ်အီၤတဖၣ်န့ၣ် တညီဝဲလၢအဂီၢ်ဘၣ်. ဘၣ်ဆၣ်သနာ်က့ နီၢ်မၤရံအိၣ်ခိးဝဲလၢ တၢ်သူၣ်စူၤသးစူၤအပူၤ ဒ်သိးကခိးကွၢ်ဝဲ ပှၤလၢအကကဲထီၣ်အဟံၣ်ခိၣ်တဂၤအံၤ ကဆၢတဲာ်တၢ်ဒ်လဲၣ်ဒ်လဲၣ်န့ၣ်လီၤ. နီၢ်မၤရံ အတၢ်ဆီၣ်လီၤသးအံၤ ကဲထီၣ်တၢ်ဒိတၢ်တဲာ်လၢ ခရံာ်ဖိပိာ်မုၣ်လၢ မုၢ်မဆါတနံၤအံၤအဂီၢ်လီၤ. လၢခံကတၢၢ် နီၢ်မၤရံဒီးစီၤယိၤသး ဒိးန့ၢ်ဘၣ်တၢ်မၤလိလၢ တၢ်ကတိၤသကိးတၢ်ၡဲၡဲပျီပျီန့ၣ် မ့ၢ်တၢ်လၢ အရ့ဒိၣ်ဝဲလီၤ.—ဖး ကတိၤဒိ ၁၅:၂၂ တက့ၢ်.
၂၂. ဘၣ်မနုၤအဃိ ပတဲသ့လၢ နီၢ်မၤရံဒီးစီၤယိၤသး ဂုာ်ကျဲးစၢးသူၣ်ထီၣ်ဝဲ အတၢ်ဆီဟံၣ်ဆီဃီလၢ အဂ့ၤကတၢၢ်လဲၣ်, ဒီးတၢ်မနုၤအိၣ်ခိးလီၤပာ်စၢၤ အဝဲသ့ၣ်လဲၣ်.
၂၂ ပှၤနီၢ်ဒီမါဝၤလၢ အသးစၢ်ခံဂၤအံၤ ဂုာ်ကျဲးစၢးသူၣ်ထီၣ်ဝဲ အတၢ်ဆီဟံၣ်ဆီဃီလၢ အဂ့ၤကတၢၢ်လီၤ. အဝဲသ့ၣ်အဲၣ်ဝဲယဟိဝၤယွၤ ဒိၣ်န့ၢ်တၢ်အဂၤခဲလၢာ်, အိၣ်မူဝဲဒ်ကစၢ်ယွၤ အတၢ်ဘၣ်သးဒီး မၤလၢပှဲၤဝဲမိၢ်ပၢ်အမူဒါလၢ ကစၢ်ယွၤဟ့ၣ်လီၤအဝဲသ့ၣ်န့ၣ်လီၤ. ဘၣ်ဆၣ် တၢ်ဆိၣ်ဂ့ၤဒီးတၢ်ကီတၢ်ခဲတဖၣ် အိၣ်ခိးလီၤပာ်စၢၤ အဝဲသ့ၣ်စ့ၢ်ကီးလီၤ. မ့ၢ်လၢအဝဲသ့ၣ် ကဘၣ်ကွၢ်ဒိၣ်ထီၣ်ဝဲ ပှၤဟီၣ်ခိၣ်ဖိလၢ အဂ့ၤကတၢၢ်တဂၤအဃိလီၤ.
^ လံာ်အဆၢ. 15 ဖျါလၢနီၢ်မၤရံ ယၢၤထီၣ်ဝဲပိာ်မုၣ်လၢအတီအလိၤ နီၢ်ဃးနၤအတၢ်ကတိၤလီၤ. လၢကစၢ်ယွၤ အဘျုးအဖှိၣ်အဃိ နီၢ်ဃးနၤစ့ၢ်ကီးအိၣ်ဖျဲၣ်ထီၣ်ဝဲဖိခွါန့ၣ်လီၤ.—ကွၢ်စ့ၢ်ကီးတၢ်လွံၢ်နၢၣ် လၢအမ့ၢ် “တၢ်ထုကဖၣ်လၢအလီၤဆီခံခါ” လၢအအိၣ်လၢ တၢ်မၤလိ ၆ အပူၤတက့ၢ်.
တၢ်ဂ့ၤအဂၤလၢ နကဘၣ်သး
ကွၢ်လိမၤဒိးအဝဲသ့ၣ်အတၢ်နာ်
နီၢ်မၤရံ—အဝဲ “ဆိကမိၣ်ဝဲလၢအသး”
နီၢ်မၤရံအတၢ်လဲၤခီဖျိလၢ ဝ့ၢ်ဘ့ၤသလ့ဃ့ၣ်အပူၤန့ၣ် မၤဂၢၢ်ထီၣ်ကျၢၤထီၣ်အတၢ်နာ်လၢ ကစၢ်ယွၤအတၢ်အၢၣ်လီၤအဖီခိၣ်လီၤ.
လံာ်စီဆှံ အတၢ်သိၣ်လိတဖၣ်
တၢ်ပီးတၢ်လီတဖၣ်လၢ တၢ်မၤလိလံာ်စီဆှံအဂီၢ်
ဒ်သိး နမၤလိလံာ်စီဆှံကမုာ် ဒီးကထုးန့ၢ်နသးအဂီၢ် ဃုထၢ တၢ်ပီးတၢ်လီလၢ တၢ်မၤလိလံာ်စီဆှံအဂီၢ် တဖၣ်အံၤတက့ၢ်.
လံာ်စီဆှံ အတၢ်သိၣ်လိတဖၣ်
မၤလိကွၢ် လံာ်စီဆှံဒီးပှၤ
မၤလိသကိး တၢ်မၤလိလံာ်စီဆှံ လၢတလိၣ်ဟ့ၣ်စ့ဘၣ်ဒီး ပှၤလၢအကမၤလိနၤ လံာ်စီဆှံတဂၤ.
