တၢ်မၤလိ ၃
လံာ်စီဆှံန့ၣ် နနာ်န့ၢ်အီၤသ့ဧါ
လံာ်စီဆှံန့ၣ် အိၣ်ဒီးတၢ်အၢၣ်လီၤတဖၣ် ဒီးတၢ်ဟ့ၣ်ကူၣ်အါမး. တၢ်လၢလံာ်စီဆှံ သိၣ်လိဝဲတဖၣ်န့ၣ် ဘၣ်သ့ၣ်သ့ၣ် နကအဲၣ်ဒိးသ့ၣ်ညါ. ဘၣ်ဆၣ် နကနာ်အီၤအဂီၢ် ကကီတစဲး. တၢ်အၢၣ်လီၤတဖၣ် ဒီးတၢ်ဟ့ၣ်ကူၣ်လၢ အအိၣ်လၢ လံာ်လၢပျၢၤ ဒ်အံၤတဘ့ၣ်အပူၤန့ၣ် မ့ၢ်နကြၢးနာ်အီၤဧါ. တၢ်လၢ လံာ်စီဆှံတဲဝဲတဖၣ်န့ၣ် ကဲဘျုးလၢပဂီၢ်လၢ ဆၢကတီၢ်ခဲအံၤဧါ. တၢ်လၢ လံာ်စီဆှံတဲဝဲဘၣ်ဃးဒီး ခါဆူညါအဂ့ၢ်န့ၣ် ပနာ်အီၤသ့ဧါ. ပှၤလၢအကကွဲၢ်တဖၣ် နာ်ဝဲအဃိ ပဟ့ၣ်ဂံၢ်ဟ့ၣ်ဘါနၤလၢ နကဃုသ့ၣ်ညါအီၤလီၤ.
၁. တၢ်ဂ့ၢ်တဖၣ်လၢ အအိၣ်လၢ လံာ်စီဆှံပူၤန့ၣ် အကဲတၢ်တဲမုာ်နၢ်ဧါ မ့တမ့ၢ် အကဲတၢ်ဂ့ၢ်နီၢ်ကီၢ်ဧါ.
လၢလံာ်စီဆှံပူၤန့ၣ် အိၣ်ဒီး “တၢ်မ့ၢ်တၢ်တီ အတၢ်ကတိၤ” လီၤ. (စံၣ်တဲၤတဲလီၤတၢ် ၁၂:၁၀) လံာ်စီဆှံပာ်ဖျါထီၣ်ဝဲ တၢ်ကဲထီၣ်အသး အနီၢ်ကီၢ် ဒီးပှၤလၢ လံာ်စီဆှံပာ်ဖျါထီၣ်ဝဲ အဂ့ၢ်တဖၣ်န့ၣ် အဝဲသ့ၣ်အိၣ်မူ နီၢ်ကီၢ်လီၤ. (ဖး လူၤကၣ် ၁:၃; ၃:၁, ၂.) ပှၤလၢအဃုသ့ၣ်ညါ တၢ်စံၣ်စိၤတဲစိၤ ဒီးပှၤလၢအဃုသ့ၣ်ညါ တၢ်ဖိတၢ်လံၤလၢပျၢၤအါဂၤန့ၣ် အဝဲသ့ၣ် ပာ်ဂၢၢ်ပာ်ကျၢၤဝဲလၢ မုၢ်နံၤမုၢ်သီလၢအရ့ဒိၣ်, ပှၤကညီ, တၢ်လီၢ်တၢ်ကျဲတဖၣ် ဒီးတၢ်မၤအသးလၢ လံာ်စီဆှံအပူၤန့ၣ် မ့ၢ်ဝဲတၢ်နီၢ်ကီၢ်လီၤ.
၂. လံာ်စီဆှံန့ၣ် အကဲလံာ်လၢပျၢၤတဘ့ၣ် သနာ်က့ အကဲဘျုးလၢပစိၤဒံးဧါ.
အါဘျီန့ၣ် လံာ်စီဆှံ ပာ်ဖျါထီၣ်ဆိပာ်စၢၤဝဲ တၢ်ဂ့ၢ်လၢ ပှၤတသ့ၣ်ညါဒံးဘၣ် တဖၣ်လီၤ. အဒိ, လံာ်စီဆှံ ပာ်ဖျါထီၣ် တၢ်ဂ့ၢ်ဘၣ်ဃးဒီး စဲအ့ၣ်တကပၤ. တကးဒံးဘၣ် ဖဲပှၤကွဲးလီၤတၢ်ဂ့ၢ်တဖၣ်အံၤ လၢလံာ်စီဆှံပူၤအခါ ပှၤအါဂၤ တနာ်ဝဲလၢတၢ်ဂ့ၢ်အံၤ အမ့ၢ်အတီဘၣ်. ဘၣ်ဆၣ်လၢခံ ပှၤစဲအ့ၣ်ဖိလၢ စိၤခဲအံၤန့ၣ် ပာ်ဂၢၢ်ပာ်ကျၢၤဝဲလၢ တၢ်ဂ့ၢ်လၢ လံာ်စီဆှံ ပာ်ဖျါထီၣ်ဝဲန့ၣ် မ့ၢ်ဝဲတီဝဲလီၤ. လံာ်စီဆှံန့ၣ် “မ့ၢ်အမ့ၢ်အတီ . . . လီၤစိၤလီၤထီလီၤ.”—စံးထီၣ်ပတြၢၤ ၁၁၉:၁၆၀.
၃. တၢ်လၢလံာ်စီဆှံတဲဝဲ ဘၣ်ဃးဒီး ခါဆူညါအဂ့ၢ်န့ၣ် ဘၣ်မနုၤအဃိ ပနာ်အီၤသ့လဲၣ်.
လၢလံာ်စီဆှံအပူၤန့ၣ် အိၣ်ဒီး ဝံအတၢ်စံးပာ်တဖၣ် a လၢအတဲဆိပာ်စၢၤဝဲ “တၢ်လၢအတမၤဒံးဘၣ် အသးဘၣ်တဖၣ်.” (ယၡါယၤ ၄၆:၁၀) လံာ်စီဆှံ တဲဆိပာ်စၢၤဝဲ တၢ်ဂ့ၢ်အါမံၤလၢ တချုးလၢ အဟဲကဲထီၣ်အသးဒံးဘၣ်. ဒီးတၢ်လၢလံာ်စီဆှံ တဲဆိပာ်စၢၤဝဲတဖၣ်န့ၣ် ဘၣ်ဝဲလီၤ. လံာ်စီဆှံ တဲဖျါထီၣ်စ့ၢ်ကီးဝဲ တၢ်မၤအသးလၢ ဆၢကတီၢ်ခဲအံၤတဖၣ် လီၤတံၢ်လီၤဆဲးလီၤ. လၢတၢ်မၤလိအံၤအပူၤ ပကတဲသကိး ဝံအတၢ်စံးပာ်အဂ့ၢ်တနီၤ. နမ့ၢ်သ့ၣ်ညါဘၣ်လၢ ဝံအတၢ်စံးပာ်တဖၣ် အဘၣ်လီၤတံၢ်လီၤဆဲး ထဲလဲၣ်န့ၣ် နကကမၢကမၣ်.
ဃုသ့ၣ်ညါအါထီၣ်
ပကကွၢ်ဆိကမိၣ်သကိး ဘၣ်ဃး စဲအ့ၣ်လၢပစိၤခဲအံၤန့ၣ် အလီၤပလိာ်ဒီး လံာ်စီဆှံဒ်လဲၣ်. ဃုသ့ၣ်ညါသကိး ဝံအတၢ်စံးပာ်တဖၣ်လၢ အလီၤထုးန့ၢ်သူၣ်ထုးန့ၢ်သး တနီၤ လၢလံာ်စီဆှံအပူၤ.
၄. စဲအ့ၣ်န့ၣ် အလီၤပလိာ်ဒီး လံာ်စီဆှံ
လၢပျၢၤန့ၣ် ပှၤအါတက့ၢ်နာ်ဝဲလၢ ဟီၣ်ခိၣ်ဖျၢၣ်န့ၣ် အိၣ်လၢတၢ်တမံၤမံၤအလိၤ. ကွၢ်တၢ်ဂီၤမူ.
ပာ်သူၣ်ပာ်သး တၢ်လၢ အအိၣ်ကွဲးအသးလၢ လံာ်ယိၤဘးအပူၤ လၢအပူၤကွံာ်အနံၣ် ၃,၅၀၀ ဃၣ်ဃၣ်. ဖး ယိၤဘး ၂၆:၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
တၢ်ကတိၤလၢအမ့ၢ် ဟီၣ်ခိၣ်အံၤ တဘၣ်တၢ်စဲၤလီၤအီၤလၢ တၢ်အလိၤနီတမံၤဘၣ်န့ၣ် ဘၣ်မနုၤအဃိ အလီၤကမၢကမၣ်လဲၣ်.
လၢအပူၤကွံာ် အနံၣ် ၃,၅၀၀ ဃၣ်ဃၣ်န့ၣ် လံာ်စီဆှံ ပာ်ဖျါထီၣ်ဝဲဘၣ်ဃးဒီး ထံအတၢ်လဲၤတရံးအဂ့ၢ်. ဘၣ်ဆၣ် လၢခံအနံၣ် ၂၀၀၀ ဃၣ်ဃၣ်မး ပှၤနၢ်ပၢၢ်ထီၣ်က့ၤဝဲ ဘၣ်ဃးဒီး ထံအတၢ်လဲၤတရံးအဂ့ၢ်လီၤ. ဖး ယိၤဘး ၃၆:၂၇, ၂၈ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
လံာ်စီဆှံတဲဖျါထီၣ်ဝဲ ဘၣ်ဃးဒီး ထံအတၢ်လဲၤတရံးအဂ့ၢ်န့ၣ် နဆိကမိၣ်ဒ်လဲၣ်.
-
လံာ်စီဆှံအဆၢလၢ နဖးဖဲမၢကၢာ်န့ၣ် မၤအါထီၣ်နတၢ်နာ်လၢ လံာ်စီဆှံအဖီခိၣ်ဧါ.
၅. လံာ်စီဆှံတဲဆိပာ်စၢၤဝဲ တၢ်မၤအသးလၢ အရ့ဒိၣ်တဖၣ်
ဖး ယၡါယၤ ၄၄:၂၇–၄၅:၂ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
တချုးလၢ ဝ့ၢ်ဘၤဘူၤလိၣ် လီၤပှီၢ်ဒံးဘၣ် အနံၣ် ၂၀၀ န့ၣ် လံာ်စီဆှံ တဲဆိပာ်စၢၤဝဲ တၢ်ဂ့ၢ်တၢ်ကျိၤ လီၤတံၢ်လီၤဆဲး ဒ်လဲၣ်.
တၢ်စံၣ်စိၤတဲစိၤ ပာ်ဂၢၢ်ပာ်ကျၢၤဝဲလၢ ဖၢၡၢၣ်အစီၤပၤကိရ့ၣ် ဒီးအသုးမုၢ်သံၣ်ဘိတဖၣ် မၤနၢၤဝဲ ဝ့ၢ်ဘၤဘူၤလိၣ် ဖဲ ချ.ခ.န ၅၃၉ နံၣ်လီၤ. b ဒီးအဝဲသ့ၣ် မၤလီၤသံးကွံာ်ဝဲ ထံကျိလၢ အဒီသဒၢဝ့ၢ်ဘၤဘူၤလိၣ်. တကးဒံးဘၣ် ခီဖျိလၢ ဝ့ၢ်အတြဲၤတဖၣ် အိးထီၣ်ပာ်စၢၤအသးအဃိ အဝဲသ့ၣ် လဲၤနုၤလီၤဝဲလၢ ဝ့ၢ်ပူၤ ဒီးအဝဲသ့ၣ် မၤန့ၢ်ဝဲဝ့ၢ် ဘၣ်ဆၣ် တလိၣ်ဒုးတၢ်ဘၣ်. ခဲအံၤ ပူၤကွံာ်အနံၣ် ၂,၅၀၀ ဘျဲၣ်လံ သနာ်က့ ဝ့ၢ်ဘၤဘူၤလိၣ် အိၣ်လီၤပှီၢ်ဝဲ ဒ်န့ၣ်လီၤ. ဘၣ်ဃးဒီး ဝ့ၢ်ဘၤဘူၤလိၣ်န့ၣ် လံာ်စီဆှံ တဲဆိပာ်စၢၤဝဲဒ်လဲၣ်န့ၣ် ခဲအံၤ ပကကွၢ်သကိး.
ဖး ယၡါယၤ ၁၃:၁၉, ၂၀ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
ဝံအတၢ်စံးပာ်တခါအံၤ ဟဲလၢထီၣ်ပှဲၤထီၣ်ဒ်လဲၣ်.
ဝ့ၢ်ဘၤဘူၤလိၣ် အိၣ်လီၤပှီၢ်ဝဲ တုၤလၢခဲအံၤ
၆. လံာ်စီဆှံတဲဆိပာ်စၢၤဝဲ တၢ်လၢ ပထံၣ်ဘၣ်အီၤလၢ မုၢ်မဆါတနံၤအံၤ
လံာ်စီဆှံတဲဝဲလၢ ပအိၣ်မူဘၣ်လၢ “မုၢ်နံၤခံကတၢၢ်တဖၣ်.” (၂ တံၤမသ့း ၃:၁) လံာ်စီဆှံ တဲဆိပာ်စၢၤဝဲ ဘၣ်ဃးဒီး မုၢ်နံၤခံကတၢၢ်တဖၣ်အဂ့ၢ် ဒ်လဲၣ်န့ၣ် ခဲအံၤပကကွၢ်သကိး.
ဖး မးသဲ ၂၄:၆, ၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
လံာ်စီဆှံတဲဝဲလၢ ဖဲမုၢ်နံၤခံကတၢၢ် အဆၢကတီၢ်န့ၣ် တၢ်အိၣ်သး လီၤလီၤဆီဆီမနုၤတဖၣ် ကကဲထီၣ်အသးလဲၣ်.
ဖး ၂ တံၤမသ့း ၃:၁-၅ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
လံာ်စီဆှံ တဲဆိပာ်စၢၤဝဲလၢ ဖဲမုၢ်နံၤခံကတၢၢ် အဆၢကတီၢ်န့ၣ် ပှၤဟီၣ်ခိၣ်ဖိတဖၣ် အတၢ်ပာ်သူၣ်ပာ်သး ကအိၣ်ဒ်လဲၣ်.
-
လၢနခိၣ်နဃၢၤန့ၣ် နထံၣ်ဘၣ် တၢ်ပာ်သူၣ်ပာ်သးဒ်အံၤ တခါခါလံဧါ.
ပှၤတနီၤတဲဝဲလၢ– “လံာ်စီဆှံန့ၣ် အကဲဝဲ တၢ်တဲမုာ်နၢ် ဒီးပူကလီကလီလီၤ.”
-
တၢ်အုၣ်သးလၢ အမၤစၢၤနၤအဒိၣ်ကတၢၢ်လၢ ပနာ်န့ၢ် လံာ်စီဆှံသ့န့ၣ် မ့ၢ်ဖဲလဲၣ်တခါလဲၣ်.
တၢ်ဂ့ၢ်လၢအရ့ဒိၣ်
တၢ်စံၣ်စိၤတဲစိၤ, စဲအ့ၣ် ဒီးဝံအတၢ်စံးပာ်တဖၣ်န့ၣ် ပာ်ဖျါထီၣ်ဝဲလၢ လံာ်စီဆှံန့ၣ် ပနာ်န့ၢ်အီၤသ့.
တၢ်ကွၢ်ကဒါက့ၤ
-
တၢ်ဂ့ၢ်လၢအအိၣ်လၢ လံာ်စီဆှံပူၤတဖၣ်န့ၣ် အကဲတၢ်တဲမုာ်နၢ်ဧါ မ့တမ့ၢ် အကဲတၢ်ဂ့ၢ်နီၢ်ကီၢ်ဧါ.
-
တၢ်ဂ့ၢ်တနီၤလၢ စဲအ့ၣ် ဒီးလံာ်စီဆှံ လီၤပလိာ်လိာ်အသးန့ၣ် မ့ၢ်မနုၤလဲၣ်.
-
နနာ်လၢ လံာ်စီဆှံန့ၣ် တဲဆိပာ်စၢၤဝဲ တၢ်လၢကမၤအသးလၢ ခါဆူညါသ့ဧါ. ဘၣ်မနုၤအဃိ နနာ်ဒ်န့ၣ်လဲၣ်.
ဃုသ့ၣ်ညါ
လၢလံာ်စီဆှံအပူၤ တၢ်ဂ့ၢ်လၢ အတလီၤပလိာ်ဒီး စဲအ့ၣ်န့ၣ်အိၣ်ဧါ.
“လံာ်စီဆှံန့ၣ် အလီၤပလိာ်ဒီး စဲအ့ၣ်ဧါ.” (တၢ်မၤလိလၢ အအိၣ်လၢ online အဖီခိၣ်)
တၢ်အုၣ်သးလၢ အဘၣ်ဃးဒီး “မုၢ်နံၤခံကတၢၢ်တဖၣ်” န့ၣ်မ့ၢ်မနုၤလဲၣ်.
“ဝံအတၢ်စံးပာ် ၆ ခါလၢ နထံၣ်ဘၣ် အဟဲလၢထီၣ်ပှဲၤထီၣ်” (တၢးထီခိးတၢ်, လါမ့ၤ ၁, ၂၀၁၁)
ဃုသ့ၣ်ညါကွၢ် ဘၣ်ဃးဒီး ဝံအတၢ်စံးပာ်လၢ အဘၣ်ဃးဒီး ကြံးအဘီမုၢ် ဟဲလၢထီၣ်ပှဲၤထီၣ်ဒ်လဲၣ်အဂ့ၢ်.
ဝံအတၢ်စံးပာ်တဖၣ် ဆီတလဲဝဲ ပှၤတဂၤအတၢ်ထံၣ်လၢ လံာ်စီဆှံအဖီခိၣ်ဒ်လဲၣ်န့ၣ် ဃုသ့ၣ်ညါကွၢ်.
“လၢညါ ယတနာ်လၢ ကစၢ်ယွၤအိၣ်ဘၣ်” (တၢ်ဂ့ၢ်လၢအအိၣ်လၢ တၢးထီခိးတၢ် အပူၤ)
တၢ်ဂ့ၤအဂၤလၢ နကဘၣ်သး
တၢ်သံကွၢ်လၢ ညီနုၢ်ပှၤသံကွၢ်တဖၣ်
ယဟိဝၤပှၤအုၣ်အသးတဖၣ် မၤလိလံာ်စီဆှံဒီးပှၤဂၤန့ၣ် မ့ၢ်မနုၤလဲၣ်
ယဟိဝၤပှၤအုၣ်အသးတဖၣ် ကွဲးမုာ်ပှၤဂၤလၢ ကမၤလိလံာ်စီဆှံ အတၢ်ရဲၣ်တၢ်ကျဲၤလၢ တလိၣ်ဟ့ၣ်အပှ့ၤဘၣ်န့ၣ် နသူ လံာ်စီဆှံလၢ နဘၣ်သးအီၤ တဘ့ၣ်ဘ့ၣ်သ့လီၤ. နကွဲမုာ် နဟံၣ်ဖိဃီဖိ ဒီးနတံၤသကိးတဖၣ်သ့လီၤ.
