Na kilumbu ya 27 Mars 2022, mbangudulu ya Biblia—Evanjile ya Matayo bimisamaka na ndinga ya Konkani na masonukua ya Roman. Bantu kana 600 landaka programe yina ba anrejistreke na ntuala. Mukanda yango ya Matayo na ndinga ya Konkani bimisamaka mbala mosi na format yina bantu nionso lenda tanga na nzila ya apareyi. Kubimisama na yau ya papie kesalama na manima na mvula yayi.

Konkani kele mosi ya bandinga 23 ya nene yina mezabana na Inde. Yaketubamaka mingimingi na katikati ya buala ya Inde. Bambangi ya Yehova bandaka kusamuna na ndinga ya Konkani na 1957 ntangu bampasudi nzila ya nene kuizaka na kizunga yango. Kimvuka ya ntete ya ndinga ya Konkani salamaka na 1959.

Babiblia yina vuandaka na ndinga ya Konkani vuandaka kaka fioti tii na 1974. Na mvula yango, mbangudulu ya Masonukua ya Greki ya Buklisto na ndinga ya Konkani bandaka kusadulua na bantu mingi. Mbangudulu ya Masonukua ya Ebreo diaka bimaka na 2006. Kasi, bambangudulu yango vuandaka na bampova yina bantu mingi yina ketubaka Konkani zabaka ve.

Bansamuni yina vuandaka tuba ndinga ya Konkani bakaka mambote na kusadilaka bisadulu samu na kulonga yina bimisamaka na Bambangi ya Yehova na ndinga ya Konkani. Kasi bansamuni vuandaka ve na mbangudulu ya mbote ya Biblia yina balendaka tudila ntima. Na kifuani, nsamuni mosi tubaka: “Mbangudulu ya Biblia yina beto sadilaka na ntuala bangulaka Matayo 6:33 mutindu yayi: ‘Kutambula na kulandaka bansiku ya Kimfumu ya Nzambi mpe kusala mambu yina kesepedisa yandi fueti vuanda diambu ya ntete yina fueti tungisa beto.’ Kasi ntangu yayi, mbangudulu ya mukanda ya Matayo yayi mebima, kele na baverse ya puelele mpe yakele pete samu na kubakusa.”

Mbangudi yankaka tubaka: “Ata kana ntalu ya bansamuni yina ketubaka ndinga yango kele mpenza fioti na kutadila bandinga yankaka, kasi lokola beto mebaka mukanda yayi ya Biblia Mbangudulu ya Yinza ya Yimpa na ndinga na beto mosi, yakena kumonisa ti Yehova ketudilaka mosimosi kati na beto dikebi.”

Beto kena kutula ntima ti mbangudulu yayi ya yimpa kesadisa bampangi na beto yina ketubaka ndinga ya Konkani samu batatamana kupusana penepene na Yehova.—Yoane 6:44.