NA NSIKU, bipopo mpe bapijon vuandaka ndimama samu na kupesa yau lokola nkayilu na Yehova. Bavuandaka tanga ntangu nionso bandeke yango nionso zole na bansiku yina metadila bankayilu mpe bavuandaka sadila mosi na kisika yankaka. (Lev. 1:14; 12:8; 14:30) Samu na yinki yavuandaka mbote? Mosi ya bamfunu kele samu bipopo vuandaka monana ve ntangu nionso. Samu na yinki?

Bipopo kele bandeke yina kesalaka bavuayaje, yakevuandaka na Yisaele ya mvimba na bangonda ya tiya ya ngolo. Na ngonda ya Octobre, bakepumbuaka samu na kukuenda na Sud na babuala ya tiya, samu na kuvutuka kaka na Yisaele na nsungi ya printemps. (Sal 2:11, 12; Yer. 8:7) Na Yisaele ya ntama, yavuandaka mpasi samu na Bayisaele na kupesa bipopo lokola nkayilu na ntangu ya nsungi ya madidi (Hiver).

Na ndambu yankaka, bapijon vuandaka sala ve bavuayaje mingi, na yau yavuandaka monana na Yisaele mvula ya mvimba. Katula yau, bavuandaka yundula bapijon na bayinzo. (Tala Yoane 2:14, 16.) Mukanda (Bible Plants and Animals) metuba: “Babuala mpe bambanza nionso ya Palestine vuandaka yundula bapijon. Konso mfumu ya yinzo vuandaka na yinzo na yandi ya bapijon, to mua didusu na kibaka, kisika bandeke lendaka zinga.”—Tala Yezaya 60:8.

Na yau Yehova monisaka ti yandi kele na nzola mpe na bukatikati mutindu yandi ndimaka ti Bayisaele pesa bandeke yina vuandaka monana na pete na mvula lokola nkayilu.